Kyananaka 16

Pɔlɔ ʉchɨka Timɔtɛɔ ɓɔ ɓʉkɨndaka ɨzɔ nayɔ

1Kija Pɔlɔ a꞉ɓʉya anʉ Dɛlɛbɛ, ambʉʉngwa nanɨ kʉsa anʉ Lisitula. 'Ʉkpataka mungono wi꞉nye nanɨ ino ɓɔ Timɔtɛɔ. Inye i꞉nye 'ʉtʉ ʉ Ɓayuda ngia i꞉nye ʉbayeni Yeso, ɨkyɛmɨngana ɨsɛ i꞉nye 'Ugiliki. 2Ɓaklisito ngiɓa ɓi꞉nye ɨkʉmbʉ anʉ Lisitula nʉ Ikonio ɓi꞉nye chwa Timɔtɛɔ uduɓa uɗo. 3Pɔlɔ i꞉nye kʉkʉnda nayɔ kʉchɨka aka ekoo ngia ɓɔ ɓʉsa ɨzɔ nayɔ. Kija a꞉mʉchɨka, ambʉmʉtɨna ganza jʉ Ɓayuda ngiɓa ɓʉ ɨkʉmbʉ ngiinanɨ kʉ iɓomu ɓi꞉nye kʉmbɨa iɗo ɓɔ ɨsɛ ʉ Timɔtɛɔ a 'Ugiliki. 4Amati ʉ ɓagʉlʉ kʉ ɓuɓomu ngiɓa ɓa꞉ɓaa‑ɔɔ, ɓi꞉nye kunzo masaʉ kʉ moni ngika ɓatitima nʉ ɓʉkʉʉ ɓa꞉maiso anʉ Yelusalɛma, nʉ kʉta ɓombi ɓʉ baya ɓɔ ɓʉkyananakɨa moni ngikʉnanɨ. 5Ɓakanisa ɓambʉ'ʉtandaka amati ʉ baya, nʉ mboi yɨ ɓombi ɓʉ baya yi꞉nye kʉsɨnganaka tʉkʉ nʉpɛɛ makwaa kʉ muɓomu.

Pɔlɔ ʉna ɨkyɛmɛ ndʉ ʉtakanaka

6Ɓambʉɓaa gɨpa ʉ Fuligia nʉ Galatia tʉkʉ ɓaa, jʉ 'Ʉtʉma wɔɔ Tu wa꞉ɓʉgbʉma ɓɔ ɓɔɔɓɨakɨakɔmʉ ʉpanʉ wʉ Asʉɓɨɨ akʉ gɨpa ʉ Azia. 7Ati ngia ɓa꞉ɓʉya‑ɔɔ tinene nʉ gɨpa ʉ Misia, ɓambukanyo ɓɔ ɓʉsa akʉ gɨpa ʉ Bitinia, ɨkyɛmɨngana 'Ʉtʉma wʉ Yeso wambʉɓʉgbʉma ɓata kʉ gbʉmaa. 8Iya ɓa꞉ɓaa anʉ Misia ɓambʉsa tiga anʉ Tɔlɔa. 9Tiga nuɓutu Pɔlɔ ambʉna ɨkyɛmɛ mɨngana ndʉ ʉtakanaka, mombi mʉngana ʉ Makedonia ʉ꞉maeni apɛɛ angɔ. Mombi ngiinanɨ ambʉmʉndɨanɨa kusigo ɓɔ: « Ambʉ wʉka ɓaka‑zʉ nisu kʉsalɨa ya anʉ Makedonia. » 10Mbise ngia Pɔlɔ a꞉na‑ɔɔ ɨkyɛmɛ ngiinanɨ ndʉ ʉtakanaka, kambufaniso tambanakɨa kɨnda yɛɛ sɛ akʉ gɨpa ʉ Makedonia, jʉ ka꞉mbɨa kingono ɓɔ Asʉɓɨɨ a꞉tisoko aka ekoo ngia ɓɔ kʉsa kʉɓɨakɨa Ɨsaʉ yɛɛ Iɗo nani.

Ludia ʉbaya Makʉʉɓɨɨ

11Kija ka꞉ɗito masʉa wʉ mepo kʉʉngwa anʉ Tɔlɔa kambuyumo tʉkʉ ɓʉ gɔ kʉsa akʉ oji wʉ Samɔtɨlakɛ. Kʉɓa ɔngɔ kambʉɓʉya anʉ Nɨapolɨ. 12Tiga nanɨ kambʉɗʉana anʉ Filipi iya i꞉nye gʉlʉ ɔɔ ʉja ngia wʉ gɨpa ʉ Makedonia, iya i꞉nye ɛsɨ ʉ ɓʉngama ɓʉ Ɓalɔma. Ka꞉kwaa na akʉ gʉlʉ ngiinanɨ makwaa maja. 13Akʉ ɓisi ɓʉ humuo ngiɓa ɓʉ Ɓayuda ka꞉ɓʉa aɓei ʉ gʉlʉ anʉ ɨtɛtɛtɛ yɨ ɗei. Jʉ ki꞉nye kuyo ɓɔ izi yɛɛ tɛ Asʉɓɨɨ ya nanɨ. Iya ka꞉wulo, kambufaniso ngakɨa ɓoi ngiɓa ɓi꞉nye ɓʉmʉmanɨɛ nanɨ moni. 14Ati ʉndaɓʉ, moi mʉngana i꞉nye ino ɓʉ Ludia iya a꞉ʉngwa akʉ gʉlʉ ʉ Tʉatɛla. Moi ngiinanɨ i꞉nye gabiso lɨpʉkʉ lɔɔ ngbo ngbo ngbo, nʉ manzanza nʉ i꞉nye bibiso Asʉɓɨɨ. I꞉nye nisu kʉkɔ nʉ taa yengo, kija Makʉʉɓɨɨ a꞉mʉgana 'ʉtʉma kʉbaya moni ngika Pɔlɔ i꞉nye kʉyaka engo. 15Kija ɓa꞉muɓatiso nʉ 'ufini nguangɔ kʉ uɓomu. Mbise ngiinanɨ ambutisoko ambusigo ɓɔ: « Nʉneni ɓɔ mʉbaya Makʉʉɓɨɨ tʉkʉ nʉ ingono, ikeni‑zʉ kʉ kuwulo ya andɛmɛ. » Kija a꞉tɨkpakpa ɓʉ ndi ɓɔ kʉsa tʉkʉ saa.

Ɓʉfa ɔɔ Pɔlɔ nʉ Sila akʉ boloko anʉ Filipi

16Ɓisi mʉngana isu tiga kʉsa akʉ izi yɨ nɨta, kija ka꞉junikio nʉ‑ɔɔ moi mʉngana mombi ʉ kuu ɔngɔ iya i꞉nye nʉ 'ʉtʉma wʉ abɨa wʉ ɨkazɨɨ amati angɔ. Moi ngiinanɨ i꞉nye isio ɓakʉɓangɔ falanga 'ʉja. Jʉ 'ʉtʉma wʉ abɨa nguʉnanɨ wi꞉nye mukwiso ɨgbɛ nʉ ngaka moni ngika ka꞊kyɨanɨa. 17Ambufaniso nisu kʉkpata isu nʉ‑ɔɔ Pɔlɔ nʉ nachokoo kusigo ɓɔ: « Ɓombi ngiɓa ɓa ɓabayo ɓʉ Asʉɓɨɨ ngia a ekoo ɓisi nadɨndɨ, iɓa ɓaninu kʉɓɨakɨa ɨngbaa yɨ ɓʉhɨa. » 18A꞉kyɨa moni ngikʉnanɨ amati ʉ makwaa maja. Iya moni ngikʉnanɨ ka꞉ndukuniso nayɔ Pɔlɔ, ambʉnɨtana mesu ambise, ambusigio 'ʉtʉma wʉ abɨa nguʉnanɨ ɓɔ: « Akʉ ino yɨ Yeso Klisito, munanzo ʉpanʉ ɓɔ ɓʉa amati ʉ moi ngia! » Tʉkʉ nɨma ngiinanɨ 'ʉtʉma wʉ abɨa wambʉmʉɓʉa. 19Ati ngia ɓakʉɓangɔ ɓa꞉na‑ɔɔ ɓɔ yambʉkɔmʉ tii ɓata ikanzi ngia moi ngiinanɨ a꞊ɓisio‑ɔɔ falanga, ɓambʉfa ɔɔ Pɔlɔ nʉ Sila, ɓambʉsa naɓɔ akʉ ɨmbaa apɛɛ ʉ ɓangama ɓʉ ɨkʉmbʉ. 20Kija ɓa꞉ka tiga naɓɔ apɛɛ ʉ ɓajuji ɓʉ Ɓalɔma, ɓambusigo ɓɔ: « Ɓombi ngiɓa ɓa Ɓayuda nʉ ɛɓɔ iɓa ɓakutambiso gʉlʉ ngiʉndɛsʉ. 21Ɓakʉpanɨa ɨkɔɔ ngia isu Ɓalɔma kʉkwananakɔmʉ kʉbaya, gʉ ɓɔ kʉkpata engo. »

22Kija ungbutu wʉ ɓombi wa꞉nɨtanɨa ɔɔ Pɔlɔ. Ɓajuji ɓambutitio ɓɔ ɓuɗuo ɔɔ Pɔlɔ nʉ Sila lɨpʉkʉ akʉ angu, ɓambʉɓʉɓɛnda fimbo. 23Mbise ʉ naɓɔ kʉɓɛnda nadɨndɨ, ɓambumugiso akʉ ɨkáa yɨ boloko, ɓambunzo sʉda ngia i꞉nye pɨmakɨa ɨkáa yɨ boloko ʉpanʉ ɓɔ ʉɓʉkanga iɗo. 24Aka ekoo ʉ ʉpanʉ nguʉnanɨ, sʉda ngiinanɨ ambusingo ɔɔ Pɔlɔ nʉ Sila tii tʉkʉ ambɛnɨ ʉ pɛɛ ngia wʉ ɨkáa yɨ boloko, ambuɓusingo mɨtɨndɨ amati ʉ kpokpo. 25Nuɓutu, tinene nʉgʉndʉ, ɔɔ Pɔlɔ nʉ Sila ɓi꞉nye kʉta nʉ sʉa mʉmbɔ kɔɔ mubibise Asʉɓɨɨ, ɓombi ɓʉ boloko nga ɓɔmɔ ɓi꞉nye naɓɔ kʉkɔ. 26Kʉ nɨma ngiinanɨ, ajigijo ɔɔ ɓʉmʉ nadɨndɨ ambujigijo 'ʉkʉpa wʉ mukopi wʉ ɨkáa yɨ boloko, mimongu kʉ iɓomu yambʉgananakɨa. Kija ɓaselegeni ngiɓa ɓa꞉nga naɓɔ ɓombi ɓʉ boloko, ɓambuɓununikio.

27Iya sʉda wʉ ɨkáa yɨ boloko a꞉jʉkana nayɔ, ambʉna mimongu kʉ iɓomu kʉ unonono, i꞉nye kuyo ɓɔ ɓombi ɓʉ boloko ɓʉ꞉gʉa ɓangʉ. Kija a꞉iso bakanza ngiangɔ ɓɔ awuno tʉkʉ wunoo. 28Ɨkyɛmɨngana, Pɔlɔ ambʉnatɨa nʉ iyo yɛɛ ɓʉmʉ kusigo ɓɔ: « Wɔɔwunonokɔmʉ! Jʉ isu kʉ ɓuɓomu ka tʉkʉ aka! » 29Iya a꞉soko mombi ɓɔ ʉmɨkyɨa nʉ manga, sʉda ngiinanɨ ambukumunio gagaa ambɛnɨ ʉ pɛɛ ʉ ɨkáa yɨ boloko, ambʉka kʉgbʉkʉmɨa akʉ mɨtɨndɨ yɨ ɔɔ Pɔlɔ nʉ Sila ndʉtʉ nayɔ kʉnda ɓʉ kya kya kya. 30Kija a꞉ɓiso aɓei, ambuɓukuo ɓɔ: « Inu ɓangama ɓʉsɛmɛ, yɨkwanana mʉkyɨa tanɨ kʉnyɨa nʉ ɓʉhɨa? »

31Ɛɓɔ ɓambumutisio ɓɔ: « Baya Makʉʉɓɨɨ Yeso, kija wa꞊nyɨa nʉ ɓʉhɨa ɨzɔ nʉ ɨkáa ngiisɔɔ kʉ iɓomu. » 32Kija ɓa꞉mʉngakɨa ʉpanʉ wʉ Makʉʉɓɨɨ, ɛyɔ ɨzɔ nʉ ɨkáa ngiangɔ kʉ iɓomu. 33Sʉda ngiinanɨ ambʉsa naɓɔ kʉjaɓa lɨpɨ tʉkʉ nʉgʉndʉ ngiinanɨ. Kija ɓa꞉muɓatiso ɛyɔ nʉ ɨkáa ngiangɔ tʉkʉ akʉ wati nguʉnanɨ. 34Kija a꞉sa nʉ ɔɔ Pɔlɔ nʉ Sila andɔngɔ andei, ambuɓunzo idyo. Ɛyɔ ɨzɔ nʉ ɨkáa ngiangɔ kʉ iɓomu ɓambʉkwa ɨgyagya jʉ ɓi꞉nye tiga ɓʉbayeni Asʉɓɨɨ ɓayaa.

35Tiga kʉɓa ɔngɔ, ɓajuji ɓambʉtʉma ɓombi ngiɓʉndaɓʉ ɔɔ sʉda ngia wʉ ɨkáa yɨ boloko nayɔ kusigio ɓɔ: « Ɓono ɓombi ngiɓʉnanɨ ɓonoo. » 36Ɛyɔ sʉda ngiinanɨ ambʉngakɨa Pɔlɔ ɨsaʉ ɓɔ: « Ɓajuji ɓʉtʉma iyo ɓɔ ɓuniɓono. Ɨtakɨ‑takɨ ngiakɛ ɓuniɓono tiga ɓonoo, seni kʉ nʉ majɨɔ. » 37Ɨkyɛmɨngana, Pɔlɔ ambutisio ɓombi ngiɓʉnanɨ ɓa꞉ɓʉtʉma ɓɔ: « Ɨma! Ɛɓɔ ngiɓa ɓa꞉tiɓindiso bɛ apɛɛ ʉ ɓombi kʉ ɓuɓomu, chʉkɔmʉ ɓambutisambiso kʉ ɓwanɨ, isu ngiɓa ka Ɓalɔma! Nʉ ɓata ɓambutigiso kʉ akʉ ɨkáa yɨ boloko, nʉ ɨtakɨ‑takɨ ngiakɛ ɓakʉhata nisu kuɓono tiga akʉ ɓaɗi! Yambʉkʉkwananaka gʉkʉ ɗɛkɛkɛ! Yɨkwananaka ɓɔ ɛɓɔ ɓakʉɓɔngɔ ɓʉka nisu kuɓono aka. » 38Kija ɓombi ngiɓʉnanɨ ɓi꞉nye ɓʉɓʉtʉmeni ɓa꞉tʉa kʉngakɨa ɓajuji moni ngikʉnanɨ. Iya ɓa꞉kɔ ɓɔ ɔɔ Pɔlɔ nʉ Sila ɓa Ɓalɔma, ɓambʉkwa ʉɓa. 39Kija ɓa꞉ka naɓɔ kʉta ɓɔ ɓʉɓʉpɨa pɨaa, nʉ ɓuɓiso akʉ ɨkáa yɨ boloko, ɓambuɓusigio ɓɔ ɓʉɓʉa akʉ gʉlʉ ngiinanɨ ɓʉaa. 40Tiga ndʉ ɔɔ Pɔlɔ nʉ Sila ɓa꞉ɓʉa akʉ ɨkáa yɨ boloko, ɓambʉsa ɔɔ Ludia andei. Nani ɓambʉna ɓombi ɓʉ baya, ɓambuɓunzo igue‑igue akʉ 'ʉtʉma, ɓambʉsa.

Currently Selected:

Kyananaka 16: BudKoya

Highlight

Copy