2 RAJA-RAJA 6
6
Kapak si ndabuh ku lau
1I bas sada wari nina terpuk nabi-nabi e man Elisa, “Idahndu maka rumah ingan kami tading enda kitiksa man kami kerina ajar-ajarndu. 2E maka berelah kami lawes ku Lau Jordan nabah kayu, gelah banci ipajekken kami rumah man ingan kami tading.”
“Banci,” nina Elisa ngaloi.
3Sekalak i bas ia nari mindo gelah ikut min Elisa; nggit Elisa, 4e maka ras ia berkat kerina. Kenca seh i Lau Jordan mulai me ia erdahin. 5Sanga nabahi kayu e, sekalak i bas ia nari rempet ndabuh kapakna ku bas lau. “Uga nari kuban e Tuan?” nina man Elisa. “Kupinjam kal ndai kapak e!”
6“I ja ndai ndabuhna?” nina Elisa nungkun.
Ituduhkenna man Elisa ingan kapak e ndabuh. Kenca bage ikeret Elisa sada ciken, ibenterkenna ku bas lau e, e maka minter bombang ibahanna kapak ndai. 7“Angkat ndarat,” nina Elisa. Tungkuk kalak ndai, ibuatna kapak e.
Tentera Siria italuken
8Raja Siria erperang ras Israel. Arih-arih raja e ras kepala-kepala tenterana, janah itentukenna me sada ingan man inganna erkemah. 9Tapi itenahken Elisa berita man raja Israel persingetisa gelah ola ideherina ingan e, erkiteken kalak Siria enggo nggempangi i je. 10E maka ipersingeti raja Israel kalak si ringan i bas ingan e, e maka erjaga-jaga ia kerina. Bagenda me jadi piga-piga kali.
11Erkiteken si e merawa kal ate raja Siria; idilona kepala tenterana e ngadap man bana, jenari isungkunina, “Siapai i bas kam si mihak raja Israel?”
12Sekalak i bas ia nari ngaloi, “Labo lit o, Tuanku raja. Tapi Nabi Elisa nge si nurikenca man raja Israel kai si ikatakenndu alu erbuni-buni gia i bas kamarndu.”
13“Darami i ja ia,” nina raja Siria mereken perentah, “gelah kutangkap ia.”
Kenca ikataken man bana maka Elisa sangana i Dotan, 14minter isuruhna ku je nterem tentera rikut ras melala kuda ras gereta perang. Enggo berngi kalak enda ndai seh i bas kuta e, e maka minter ikepungna. 15Pepagina lampas, keke suruh-suruhen Elisa. Ndarat ia i rumah nari, idahna tentera Siria e ras kudana bage pe gereta perangna ngepung kuta e. Mulih ia ndahi Elisa janah nina, “Enggo kita bene, Tuan! Kai nari banci siban?”
16“Ola kam mbiar,” nina Elisa ngaloi. “Sabap teremen si ras kita asa si ras kalak ah.” 17Kenca bage ertoto Elisa nina, “O TUHAN, bukalah matana gelah idahna!” Ibegiken TUHAN pertotonna e, janah asum itare suruh-suruhen Elisa ku das, idahna reben uruk-uruk e dem alu kuda ras gereta perang si ernala bagi api ngkeleweti Elisa.
18Asum kalak Siria e reh nerangsa ertoto Elisa, “O TUHAN, pepentanglah kalak ah!” Ibegiken TUHAN pertoton Elisa e maka ipepentangNa kalak ndai kerina. 19Kenca bage idahi Elisa ia kerina janah nina, “Papak kap kam e; labo enda kuta si idaramindu. Mari ikutken aku gelah kubabai kam ku kalak si man daramenndu.” Jenari ibabai Elisa kalak ndai ku Samaria.
20Kenca kalak enda bengket ku bas kuta Samaria, minter Elisa ertoto. Nina, “Bukalah matana kerina, TUHAN, gelah erpengidah ka ia.” Ibegiken TUHAN pertoton Elisa e maka mamang kal atena, sabap idahna ia i bas kuta Samaria.
21Kenca iidah raja Israel kalak Siria e, isungkunna Elisa nina, “Uga, kubunuh ia kerina, bapa? Kubunuh ia kerina?”
22“Ola,” nina Elisa ngaloi. “Kalak si itabanndu i bas peperangen gia ma labo ibunuhndu? Bere man ras bere minemlah ia, jenari pelepas ia mulih ku rajana.” 23E maka ibahan raja Israel man-man si mbelin man kalak Siria e kerina; janah kenca ia man ras minem kerina, isuruh raja Israel ia mulih ku raja Siria. Mulai i bas paksa e nari ingadiken kalak Siria merangi negeri Israel.
Kuta Samaria ikepung
24Piga-piga paksa kenca si e ipepulung Benhadat, raja Siria, kerina tenterana guna ngelawan Israel, e maka ikepungna kuta Samaria. 25Erkiteken kuta e enggo ikepung, seh kal serana muat pangan i je, e maka erga sada takal kelede pe enggo seh waluh puluh duit pirak. Janah dua ons kotoren nderpati ergana lima duit pirak.
26Sekali jadi erdalan-dalan me raja Israel arah datas tembok kuta. Tupung si e lit sekalak diberu nderkuh nina, “Sampatilah aku, o raja!”
27Ngaloi raja, “Adi la kam isampati TUHAN, aku pe labo tersampati aku kam. Lit kin akapndu gandumku ntah lau anggurku? 28Kai kin persoalenndu e?”
Ngaloi diberu e, “Dua mberngi diberu si enda ngataken maka ipan kami anakku, janah kenca bage anakna ka ipan kami pepagina. 29E maka itanggerken kami anakku si dilaki, jenari ipan kami. Pepagina kukataken man bana maka anakna ka ipan kami. Tapi enggo ibunikenna anakna e!” #Ul 28:57; Perng 4:10
30Megi si enda, icaingken raja pakenna perban megogo atena. Janah kalak si ndeher ku tembok e ngidah maka raja make uis guni arah bas jubahna tanda erceda ate. 31Nina raja ersumpah, “Dibatalah si munuh aku adi la kin retap sendah takal Elisa!” 32Kenca e isuruhna sekalak suruh-suruhen ngelegi Elisa.
Tupung si e Elisa sangana i rumah ras piga-piga kalak pertua si ndahi ia. Ope denga seh suruh-suruhen raja ndai nina Elisa man pertua-pertua e, “Pemunuh e sangana nuruh sekalak jelma nampul takalku! Adi enggo kari ia seh, tutup pintu janah ola bere ia bengket; raja la ndauh arah pudina.” 33Dung kenca kal ibelaskenna kata enda reh me raja, janah nina, “TUHAN jine kap si erbahan kesusahen enda. Kai denga gunana kutimai penampatNa?”
Currently Selected:
2 RAJA-RAJA 6: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
