2 RAJA-RAJA 2
2
Elia iangkat ku Surga
1Seh paksana Elia iangkat TUHAN ku Surga i bas angin kaba-kaba si megegeh. Sanga si e Elia ras Elisa i perdalanen i Gilgal nari. 2I tengah dalan nina Elia man Elisa, “I jenda kam lebe sabap aku isuruh TUHAN ku Betel.”
Tapi ngaloi Elisa, “Ersumpah aku erkiteken kepatuhenku man TUHAN si nggeluh ras man bandu, la ateku nadingken kam.” Erkiteken si e ras ia terus ku Betel.
3Sada terpuk nabi-nabi i Betel reh njumpai Elisa, jenari isungkuni nabi-nabi e ia nina, “Itehndu kang maka ibuat TUHAN ateNa tuandu sendah i bas kam nari?”
“Kueteh,” nina Elisa njabapsa. “Tapi la padah sicakapken kerna si e.”
4Jenari nina Elia man Elisa, “I jenda kam lebe, sabap isuruh TUHAN aku lawes ku Jeriho.”
Tapi ngaloi Elisa nina, “Ersumpah aku erkiteken kepatuhenku man TUHAN si nggeluh ras man bandu maka ndigan pe la aku nggit nadingken kam.” Erkiteken si e iteruskenna duana perdalanenna ku Jeriho.
5Sada terpuk nabi-nabi i Jeriho reh njumpai Elisa jenari isungkunna ia nina, “Itehndu kang maka ibuat TUHAN ateNa tuanndu sendah i bas kam nari?”
“Kueteh,” nina Elisa njabapsa. “Tapi la pedah sicakapken kerna si e.”
6Kenca bage nina Elia man Elisa, “I jenda kam lebe, sabap isuruh TUHAN aku lawes ku Lau Jordan.”
Tapi erjabap Elisa nina, “Ersumpah aku erkiteken kepatuhenku man TUHAN si nggeluh ras man bandu, la ateku nadingken kam.” Erkiteken si e ras ia lawes, 7janah lima puluh kalak nabi ngikutken ia ku Lau Jordan. Ngadi Elia ras Elisa i tepi lau e, janah nabi si lima puluh kalak e tedis la ndauhsa i jenari. 8Kenca bage itangtangi Elia jubahna, igulungna, ipekpekna lau e alu jubahna e minter erbelah. E maka ngepar ia ras Elisa i babo taneh kerah. 9Kenca seh i lepar nina Elia man Elisa, “Turiken man bangku kai atendu kubahan man bandu ope aku iangkat i bas kam nari.”
“Bereken bangku sada bagin kuasandu gelah banci aku nggantiken kam,” nina Elisa njabapsa. #Ul 21:17
10“Mesera kal nehkenca pemindonndu e,” nina Elia ngaloi. “Tapi banci ialokenndu e, adi idahndu kari aku sanga aku ibuat i bas kam nari. Adi la idahndu aku, la banci ialokenndu.”
11Ercakap-cakap ia duana janahna erdalan. Rempet reh sada gereta perang ernala bagi api irintak kuda si ernala-nala bagi api, mentas arah kelang-kelang Elia ras Elisa. I je me Elia iangkat ku Surga alu angin kaba-kaba si megegeh. 12Asum Elisa ngidahsa nderkuh ia ngelebuh Elia nina, “O bapangku, bapangku! Pengawal Israel si mbisa!” Jenari lanai enggo idahna Elia.
Erkiteken ceda atena icaingken Elisa bajuna. #2Raj 13:14 13Kenca bage ibuatna jubah Elia, si naktak ndai i bas ia nari mulih ia, jenari tedis ia i tepi Lau Jordan. 14Ipekpek Elisa lau e alu jubah Elia ndai janah nina, “I ja kin TUHAN, Dibata Elia?” Kenca bage ipekpekna ka, e maka erbelah lau e, jenari erdalan ia ngepar. 15Nabi-nabi si lima puluh kalak si reh i Jeriho nari ngidah ia, e maka nina, “Kuasa Elia genduari lit i bas Elisa!” E maka ijumpai nabi-nabi e ia, erjimpuh ia kerina i lebe-lebe Elisa, 16nina, “Lit kami lima puluh kalak i jenda, kerina kalak si megegeh. Berelah kami lawes ndarami tuanndu. Banci jadi enggo ibabaken kesah TUHAN, jenari itadingkenna i babo deleng-deleng tah pe berneh.”
“Labo padah,” nina Elisa njabapsa.
17Tapi erkiteken lalap iseksekina, dungna iberena kalak ndai lawes. Lawes me si lima puluh kalak e. Telu wari dekahna serser idaramina Elia i japa pe, tapi la ia jumpa. 18Kenca bage mulihken ia ndahi Elisa, si sangana tima-tima i Jeriho, e maka nina man kalak e, “Ma enggo kukataken man bandu la padah lawes?”
Tanda kuasa si mbelin ibahan Elisa
19Piga-piga kalak dilaki i Jeriho nari lawes njumpai Elisa, nina, “Bagi itehndu Tuan, kuta enda tuhu-tuhu mejile, tapi launa la mehuli, erbahanca nterem diberu-diberu keguguren.”
20E maka isuruh Elisa nina, “Buat bangku sada mangkuk si mbaru denga, tamaken sira ku bas.” Ibaba kalak ndai mangkuk e man Elisa, 21jenari lawes Elisa ku ulu lau e, iamburkenna sira e ku lau, janah nina, “Enda me si ikataken TUHAN, ‘Enggo bersih Kubahan lau enda, e maka lanai lit ibahanna kematen ntah pe keguguren.’ ” 22Erkiteken si e lau ndai enggo bersih mulai i bas paksa e nari, payo bagi si ikataken Elisa.
23Kenca bage lawes Elisa i Jeriho nari ku Betel. Sanga i tengah dalan ndarat me piga-piga kalak anak dilaki i bas sada kuta nari ngoto-ngotoi Elisa. “To lawesken, sulah!” nina man Elisa alu sora si megang.
24Itulihken Elisa, ijerlengna danak-danak ndai, jenari isumpahina alu gelar TUHAN. Kenca bage ndarat me dua beruang beru-beru i bas kerangen nari, e maka icaing-caingna danak-danak ndai empat puluh dua kalak.
25Jenari iterusken Elisa ka perdalanenna ku Deleng Karmel; kedungenna mulih ka ia ku Samaria.
Currently Selected:
2 RAJA-RAJA 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
