1 RAJA-RAJA 20
20
Perang ras Siria
1I bas sada wari Benhadat, raja Siria, pepulung kerina tenterana. Radu ras telu puluh dua raja-raja si deban, alu maba kuda ras gereta perangna, berkat ia ku Samaria. Ikepungna kuta e, iserangna. 2Isuruhna piga-piga kalak persuruhen ku kuta e njumpai Ahap, raja Israel guna ngataken, “Iperentahken Raja Benhadat man bandu maka 3iendeskenndu man bana pirakndu ras emasndu, ndeharandu ras kerina anak-anakndu si mejilena.”
4Erjabap Ahap, “Kataken man tuanku Raja Benhadat maka aku ras kerina sikerajangenku banci bana.”
5La ndekahsa kenca si e reh ka sekali nari persuruhen ndai ndahi Ahap alu pemindon si deban i bas Benhadat nari. Nina Benhadat arah persuruhen e, “Enggo kupeseh man bandu katangku maka arus iendeskenndu man bangku pirakndu ras emasndu, ndeharandu ras anak-anakndu. 6Tapi genduari, ateku nuruh kepala-kepala tenterangku nggargari istanandu ras rumah pegawai-pegawaindu, lako muat barang-barang si meherga. Bagi paksa genduari ka pagi enggo ia seh i jena.”
7Erkiteken si e ipepulung Raja Ahap kerina peminpin-peminpin Israel nina, “Nehenlah, tentu tangkas man bandu kerina maka ate kalak ah meneken kita kerina. Itenahkenna man bangku katana lako merentahken aku mereken ndeharangku kerina ras anak-anakku, pirak ku ras emasku, janah la aku ertahan.”
8Ngaloi peminpin-peminpin e kerina ras jelma si nterem, “Ola begiken ia, ola kam nggit talu.”
9Erkiteken si e ikataken Ahap man persuruhen Benhadat ndai. “Kataken man tuanku raja, maka pemindonna si pemena nggit aku merekenca, tapi si peduaken lang.”
E maka lawes persuruhen-persuruhen ndai. Kenca bage mulihken ka ia maba tenah si deban i bas Benhadat nari. 10Nina Benhadat arah persuruhen e, “Kubaba nterem tenterangku lako ngeradasken kutandu enda, jenari ibabana abu kuta e tare tanna. Dibata si munuh aku adi la kulakoken e.”
11Ngaloi Raja Ahap, “Kataken saja man Raja Benhadat: Sekalak puanglima ola mujiken bana ope denga perang, tapi kenca ngadi peranglah.”
12Berita enda ialoken Benhadat tupung ia ras raja-raja si deban sangana minem-minem i bas kemahna sekalak-sekalak. Megi kata e minter iperentahkenna man anak buahna guna merang kuta Samaria, e maka minter ia berkat kerina.
13Sanga bage, lit sekalak nabi njumpai Raja Ahap nina, “Bagenda nina TUHAN: ‘Ola kam mbiar man tentera musuh si melala la teralang e! Sendah Kubereken kemenangen man bandu, gelah ietehndu maka Aku nge TUHAN.’ ”
14“Ise kari arah lebe i bas peperangen e!” nina Ahap nungkun. Erjabap nabi e, “Kerina tentera si anak perana denga si ipinpin kepala-kepala daerah e. Bage nina TUHAN.”
“Ise kari lebe menai serangen e?” nina raja nungkun.
“Kam,” nina nabi njabapsa.
15E maka ipepulung Raja Ahap kerina tentera si anak perana denga si ipinpin kepala-kepala daerah e; teremna lit 232 kalak. Kenca bage ipepulungna ka tentera kalak Israel, lit 7.000 kalak teremna.
16Perang e mulai ciger. Tupung e Benhadat ras teman-temanna raja-raja si telu puluh dua kalak sangana mabuk-mabuk i bas kemahna. 17Si pemena maju e me tentera si anak perana denga. Mata-mata si itugasken Benhadat ngelaporken man bana maka lit sada terpuk tentera reh i Samaria nari. 18E maka iperentahken Benhadat nina, “Tangkap ia geluh-geluhen, subuk si reh erperang ntah pe mindo perdamen.”
19Jenari mulai me tentera anak perana ndai ndarat erperang, iikuti tentera Israel. 20Sekalak-sekalak ia munuh kalak si ngelawan ia, e maka lompaten kalak Siria e iayak-ayak kalak Israel. Tapi Benhadat sempat pulah ngersak kuda, itemani piga-piga kalak tenterana si erkuda.
21Raja Ahap pe maju ku peperangen e. Itabanna kuda ras gereta perang kalak e, janah mesangat kal talu ibahanna bangsa Siria.
22Kenca bage ijumpai nabi ndai Raja Ahap nina, “Mulihkenlah kam. Tambahilah tole gegehndu, janah bahanlah rencana si mehuli, sabap i bas pengkeri-kerin tahun enda, ugapa pe iperang raja Siria ka kam.”
Perang si peduaken i bas bangsa Siria nari
23Nina pegawai Benhadat man bana, “Dibata Israel, e me dibata deleng-deleng. Em sabapna maka italuken bangsa Israel kita. Tapi adi si perang ia i berneh si kendit, tentu talu ia sibahan. 24E maka genduari, gantikenlah raja-raja si telu puluh dua kalak e alu kepala-kepala pasuken jadi peminpin. 25Kenca bage pepulunglah tentera seri teremna ras si enggo nadingken kam mbarenda, rikut ras kuda ras gereta perang si bali buena. Jenari siperang kalak Israel e i berneh si kendit, janah sekali enda ugapa pe talu ia.”
Payo iakap Raja Benhadat, ikutkenna kata kalak ndai. 26Kenca enggo seh i bas ujung tahun e, ipepulungna anak buahna, jenari berkat ku Kuta Apek merang kalak Israel. 27Kalak Israel pe pulung dingen iperlengkapi; luar ia guna erperang, jenari ibahanna pertahanenna i bas dua inganen petala-tala ras kalak Siria e. Kalak Israel e teridah desken dua rarasen kambing si kitik ngenca adi ibandingken ras kalak si merap i belang-belang mbalmbal e.
28Sekalak nabi lawes ngadap Raja Ahap nina, “Bagenda nina TUHAN, ‘Erkiteken kalak Siria e ngataken maka Aku dibata deleng-deleng, janah labo dibata berneh-berneh si kendit, Kubereken me man bandu kemenangen ngelawan tenterana si nterem e, gelah kam ras rayatndu meteh maka Aku kap TUHAN.’ ”
29Pitu wari dekahna kalak Siria ras kalak Israel e ringan i bas ingan pertahanenna siala-alan. I bas wari pepituken mulai me erperang; 100.000 kalak teremna kalak Siria ibunuhi kalak Israel. 30Si la terbunuh, lompat ku kuta Apek, tapi i je 27.000 ribu kalak teremna ibulaki tembok kuta e.
Benhadat pe kiam ku bas kuta e, cebuni ia i bas kamar belakang sada rumah. 31Pegawai-pegawaina reh ndahi ia nina, “Enggo ibegi kami maka raja-raja Israel perkuah. Dage berelah kami lawes ngadap raja Israel make uis guni dingen takal kami irakuti alu tinali, tanda mindo ampun. Alu bage mbera-mbera ipelepasna kam nggeluh.” 32E maka ipake kalak ndai uis guni dingen irakutina takalna alu tinali, jenari lawes ia ngadap Ahap nina, “Suruh-suruhenndu si Benhadat mindo man bandu gelah ipelepasndu ia nggeluh.”
Ngaloi Ahap, “Nggeluh denga kin ia? Mehuli! Ia deksen seninangku kap!”
33Pegawai-pegawai Benhadat sanga nimai tanda si mehuli, janah tupung ibelasken Ahap “seninangku”, minter itangkap kalak ndai kata e, janah nina, “Bagi si ikatakenndu payo maka Benhadat seninandu kap!”
“Baba ia ku jenda,” nina Ahap. Kenca Benhadat enggo seh, idilo Ahap ia nangkih ku geretana. 34Nina Benhadat man bana, “Kuulihken kerina kuta-kuta si enggo ibuat bapangku i bas bapandu nari, janah banci ipantekindu pusat perbinaganndu i Damaskus, bali ras si ibahan bapangku i Samaria.”
Ngaloi Ahap, “Adi bage, erpalasken perpadanenndu e kubebasken kam.” E maka ibahan Benhadat perpadanen ras Ahap, jenari ipelepasna ia lawes.
Sekalak nabi nalahken Ahap
35Alu perentah TUHAN, sekalak i bas terpuk nabi-nabi ngataken man temanna, “Pekpek aku!” Tapi la ia nggit mekpeksa. 36E maka nina nabi e man temanna, “Erkiteken la kam patuh man perentah TUHAN, minter kam kari ijerngem singa kenca kita sirang.” Kenca ia lawes, minter reh sada singa, ijerngemna ia seh mate. #1Raj 13:24
37Kenca bage lawes ka nabi si ndai ndahi kalak si deban nina, “Pekpek aku!” Minter ipekpekna nabi e seh luka. 38E maka ibaluti nabi ndai ayona alu uis, gelah ola ia itandai kalak, jenari lawes ia tedis i duru dalan nimai raja Israel mentas. 39Asum mentas raja e, ilebuh nabi e ia nina, “O Raja, asum aku erperang, reh sekalak tentera maba sekalak musuh si tertaban man bangku, janah nina, ‘Jagai ia! Adi pulah ia, arus igalarindu alu kesahndu, ntah pe igalarindu denda 3.000 duit pirak.’ 40Tarun aku kuskas kerna si debanna, pulah tabanen ndai.”
Erjabap raja, “Enggo ibelaskenndu ukumen man dirindu, e maka arus itanggungndu.”
41Itangtangi nabi e uis si mbaluti ayona, e maka minter ia itandai raja. Kepeken ia sekalak i bas nabi-nabi e nari. 42Jenari nina nabi e man raja, “Enda me kata TUHAN, ‘Erkiteken iberendu pulah kalak si enggo Kuperentahken ibunuh, arus igalarindu e alu kesahndu, janah tenterandu ikernepken erkiteken ipelepasndu tentera kalak pulah.’ ”
43Mulihken raja Israel ku Samaria ndele, dingen merawa atena.
Currently Selected:
1 RAJA-RAJA 20: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
