1 RAJA-RAJA 19

Elia nangkih ku Deleng Sinai

1Ituriken Raja Ahap man ndeharana Isebel kerina si enggo ilakoken Elia, ras kuga ia enggo munuh kerina nabi-nabi Baal. 2Itenahken Isebel berita man Elia nina, “I bas paksa si genduari e ka pagi, adi la kam mate kubunuh bagi pemunuhndu nabi-nabi e, ibunuh dibata gia aku.” 3Mbiar Elia, e maka lompat ia ras suruh-suruhenna lako ngkelini kesahna. Kenca seh i Berseba i daerah Juda, itadingkenna suruh-suruhenna i je, 4janah Elia lawes sisada ku taneh si melenget sada wari perdalanen dauhna. Dungna seh ia ku sada batang kayu, e maka kundul ia cicio i je. Madin iakapna ia mate i je e maka ertoto ia, “Enggo me TUHAN, buatlah kesahku; madin me aku mate!” #Jun 4:3

5Medem ia i teruh batang kayu e, dungna tertunduh. Rempet lit sekalak malekat ngkuit Elia nina, “Kekeken Elia, manken!” 6Ipernehenna ku sekelewetna, idahna sengkibul roti ras sada guci lau deherken takalna. Man ras minem ia, jenari ipedemkenna ka mulihken. 7Reh ka mulihken malekat TUHAN ndai, iingetina Elia pedua kaliken nina, “Kekeken Elia, manken! Adi lang, la kari kam ngasup erdalan ndauh.” 8Keke Elia, e maka man ras minem ia. Pangan e mereken gegeh cukup man bana lako erdalan empat puluh wari empat puluh berngi ku Deleng Sinai, deleng si badia e. 9I das deleng e ibengketina sada gua, janah i je me ia erberngi.

Rempet reh kata TUHAN man bana nina, “Erkai kam i jenda, Elia?”

10Ngaloi Elia, “TUHAN Dibata si Mada Kuasa, man baNdu, man baNdu saja ngenca aku tetap ersembah. Tapi bangsa Israel enggo ngelanggar perpadanenna ras Kam; iruntuhkenna batar-batarNdu. Aku nari ngenca tading, janah aku pe ibunuhna atena.” #Rom 11:3

11“Ndaratken, tedislah kam i lebe-lebengKu i das tampuk deleng enda,” nina TUHAN man bana. Kenca bage mentas TUHAN, ibahanNa rembus angin kaba-kaba seh maka erbelah ibahanna uruk-uruk, janah batu iripukkenna. Tapi TUHAN la lit i bas angin e. Ngadi angin ndai rembus, jenari jadi me linur. 12Kenca ngadi linur ndai gurlah api, tapi TUHAN la lit i bas api e. Kenca nimpet api lit sora medate bagi sora erkusik.

13Kenca ibegi Elia sora e, itutupina ayona alu jubahna jenari ndarat ia, janah tedis i bas babah gua e. I je terbegi sora ngerana man bana nina, “Erkai kam i jenda, Elia?”

14Ngaloi Elia, “TUHAN Dibata si Mada Kuasa, man baNdu, man baNdu saja ngenca aku ersembah. Tapi bangsa Israel enggo ngelanggar perpadanenna ras Kam; iruntuhkenna batar-batarNdu, janah ibunuhna kerina nabi-nabiNdu. Aku nari ngenca tading, janah aku pe ibunuhna atena.”

15Nina TUHAN, “Mulihkenlah kam ku taneh si mesawang deherken Damaskus. Kenca kam seh i jah minaki Hasael jadi raja Siria, #2Raj 8:7-13 16Jehu anak Nimsi jadi raja Israel, janah Elisa anak Sapat – anak kuta Abil Mehola nggantiken kam jadi nabi. #2Raj 9:1-6 17Ise si pulah i bas pedang Hasael nari, Jehu pagi munuhsa, janah ise si pulah i bas pedang Jehu nari Elisa pagi munuhsa. 18Tapi Kuserapken pagi pitu ribu kalak Israel si la ibunuh, e me kerina kalak si langa nembah erjimpuh man Baal ntah pe man gana-ganana.” #Rom 11:4

Elisa ipilih TUHAN

19E maka berkat me Elia, idapetina Elisa sangana nenggala. Lit sepuluh dua pasang lembu sangana nenggala i je, janah Elisa i bas pasangen si arah pudina. Asum Elia mentasi Elisa, icabinken Elia jubahna man Elisa. 20E maka itadingken Elisa lembuna, kiam ia ngayaki Elia nina, “Mulih aku lebe ngataken mejuah-juah man bapangku ras nandengku, jenari banci kuikutken kam.”

Ngaloi Elia, “To mulihken! Kuambati kin kam?”

21Mulihken Elisa, ibuatna lembu penenggalana ndai duana, igelehna. Alu make tenggalana e jadi rantingna, itanggerkenna daging lembu e, jenari iberekenna ipan kalak ndai kerina. Kenca bage berkat ia ngikutken Elia jadi suruh-suruhenna.

Currently Selected:

1 RAJA-RAJA 19: BTX

Highlight

Copy