Luqaas Mishiraachcha 3
3
Xammaqaanchi Yohaannis Waa'i Sagara Kurukkisa
(Mat 3:1-12; Mar 1:1-8; Yoh 1:19-28)
1Xibaaroos Qeesaar adil ihukkaanniinsi tommoo onti hiinchoo ihaakkoohaannonne Pheenxeenaawekkichchi Philaaxoos Yihuxxi uulla gassam hee'ukko. Odim Heeroodis#3:1 Mat 2:13 yoo lob Heeroodisina ku Heeroodis beeto. Galii'l uulla gassam hee'ukko. Ee'isam Heeroodis abbaayyi Filiphphoos Iixuriyaasaa Xiraakondoosaa yakkam uulla gassam hee'ukko. Lisaanoosim Abiliina yakkam uulla gassam hee'ukko. 2Odim Haanna'aa Qayyaafii hundiinsi lob qeessuwwi hee'llo'o#3:2 Ee ammane Haanna'a lomma'nnaa hee'u bikkina hundiinsi lob qeessichchi hee'ukkok Qayyaafatte.. Ee doollenne udma'anne yoo Yohaannisina Zakkaaryaas beetina Waa'i sagar waarukko. 3Ee bikkina Yohaannis «Waa'i ki'nnuwwika baaxiilo haafihona baaxiilo biira yitakka'a xammaqammehe» yaa alallaatukkuuyyi Yoordaanoos daajji kululleetanne yoo uulli hundam marukko. 4#Isa 40:3-5 Oohim hiraagaanchi Issaayyaas Kitaabanne
«Udma'anne ‹Moollannina googo gudissehe.
Googguwwam shiraashillehe.
5Cebbi beyyi hundim gudona.
Lob duunii hoffi duunii hundim shiraashiramona.
Boqqu googim xabbeen ihona.
Gargante'aam googim lii'llaalli ihona.
6Maara edde'u hundim Waa'ika gatishsha moo'ookko›
yaa laaroo manchi sagara» yamamaa kitaabamukkane.
7 #
Mat 12:34; 23:33 Yohaannisim xammaqameena waaru minaadabina «Ki'nnuwwi hamashshi ooso, waaroo Waa'i quunqiinsi gibbakkamisina ki'nnuwwina ayyi kurukko? 8#Yoh 8:33 Kabadem ‹Neese Abrihaam ooso› yimma uttakka'a baaxiilo biira yitakko'isa moo'isoo danaam baxo baxxehe. Mashka'oomim Waa'i Abrihaamina ooso ka kiniinsi ki'iseena xanoo'isa an ki'nnuwwina kuroommo. 9#Mat 7:19 Oono'o! Meesaan haqqi lugumonne gudaakko. Kabadem danaam misha mishoobee'i haqqi hundim muramaa giiranne edamookko» yukko.
10Minaadabim «Eehaare maha issino?» yita'a Yohaannisa xa'mmito'o. 11Yohaannisim dabaraa «Lam eddechchi yookkok matooma bee'aannina uwwona. Hurbaat yookkokim ee'isam issona» yukko. 12#Luq 7:29 Qaraxaanim xammaqanteena waatta'a Yohaannisina «Losisaancho, maha issino?» yita'a xa'mmito'o. 13Yohaannisim dabaraa «Ki'nnuwwim ijaajantakko'aanniinsi lonsitakka'a aa'llakkotte» yukko. 14Gaadaanim ixxi beyyo waatta'a «Neesdu maha issino?» yita'a xa'mmito'o. Ixxim dabaraa «Ki'nnuwwi baxxakka'a siiddakkam diinat ihookko. Ayyem malaayyinne te'im qophphanonne kasasimminne boggakkotte» yukko.
15Manni hundim Kiristoos waaroo'isa egettam hee'llo'i bikkina «Kuk Gatisaanchi Kiristoosatda'e?» yita'a ixxuwwi wodanonne Yohaannis bikkina sawwito'o. 16Yohaannisim dabaraa «An ki'nnuwwa wo'inne xammaqoommo. Ihukkaarem an ixxeka caamma'i fatira tireena laboombee'ek iinniinsi lophphoo malaayyaam waaroolla. Ixxi Keesammi Ayyaaninnee giirinnee ki'nnuwwa xammaqookko. 17Hurbaata muccusseena axuruunsoo maanshim ixxi angannette. Muccussaa lasagem arasooma sechchonne aagisookko. Ihukkaarem bura'ooma xoo'oobee'i giiranne shokkiisookko» yukko.
18Yohaannisim dutisinne sogukkuuyyi minaadabina mishiraachchi sagara kurukko. 19#Mat 14:3-4; Mar 6:17-18 Galii'l uulla gassam hee'u Heeroodisam Filiphphoos are Heeroodiyaada gassu bikkinaa mulli dut jor baxom baxu bikkinaa acceeqasukko. Filiphphoos Heeroodisina abbaayyi hee'ukko. 20Ee bikkina Heeroodis Yohaannisam karaxxi minenne kassiisimminne eraa baxu jollennem edaa jora baxukko.
Yohaannis Yesuusa Xammaqukkisa
(Mat 3:13-17; Mar 1:9-11)
21Manni hundim xammaqamaa lasage Yesuusim xammaqamukko. Xammaqamaa ki'aa Waa'a uunxukkuuyyi hee'onam iiman fooqukko. 22#Qoc 22:2; Maz 2:7; Isa 42:1; Mat 3:17; Mar 1:11; Luq 9:35 Keesammi Ayyaanim handarekkichchi kobi'llanne ihaa ixxonne dillukko. Iimaniinsim «An iittoommi i beet eesem liiransitoottok atette» yoo sagar waarukko.
Yesuus Kiristoos Qaranchi Lugu'm Bikkina
(Mat 1:1-17)
23Yesuus losisimma asheeru ammane qaramukkaanniinsi sad hiincho ihaa hee'ukko. Manni Yesuusa Yooseef beeto labisam hee'ukko.
Yooseef Eeli'i beeto;
24Eeli'i Maati'i beeto;
Maati'i Leewi'i beeto;
Leewi'i Milke'i beeto;
Milke'i Yoona'i beeto;
Yoona'i Yooseef beeto.
25Yooseef Mataatiy beeto;
Mataatiy Amoox beeto;
Amoox Naahoom beeto;
Naahoom Eesiliim beeto;
Eesiliim Naage'i beeto.
26Naage'i Maa'at beeto;
Maa'at Mataatiy beeto;
Mataatiy Semeey beeto;
Semeey Yooseef beeto;
Yooseef Yooda'i beeto.
27Yooda'i Yoonaan beeto;
Yoonaan Erees beeto;
Erees Zarubaabeel beeto;
Zarubaabeel Saalaatiyaal beeto;
Saalaatiyaal Neer beeto.
28Neer Milki'i beeto;
Milki'i Hade'i beeto;
Hade'i Qoossam beeto;
Qoossam Elmoodaam beeto;
Elmoodaam Eer beeto.
29Eer Yoose'i beeto;
Yoose'i Eli'eezar beeto;
Eli'eezar Yooraam beeto;
Yooraam Maaxaat beeto;
Maaxaat Leewi'i beeto.
30Leewi'i Simi'oon beeto;
Simi'oon Yihud beeto;
Yihud Yooseef beeto;
Yooseef Yoonaan beeto;
Yoonaan Eeliyaaqeem beeto.
31Eeliyaaqeem Meeliy beeto;
Meeliy Maynaan beeto;
Maynaan Maaxaat beeto;
Maaxaat Naataan beeto;
Naataan Daawiit beeto.
32Daawiit Issayyi beeto;
Issayyi Iyyoobeed beeto;
Iyyoobeed Boo'eez beeto;
Boo'eez Saalimoon beeto;
Saalimoon Na'aasoon beeto.
33Na'aasoon Aminaadaab beeto;
Aminaadaab Raam beeto;
Raam Aariin beeto;
Aariin Heexroon beeto;
Heexroon Faarees beeto;
Faarees Yihud beeto;
Yihud Yaaqoob beeto.
34Yaaqoob Yisaaq beeto;
Yisaaq Abrihaam beeto;
Abrihaam Taara'i beeto;
Taara'i Naakoor beeto;
Naakoor Saruug beeto.
35Saruug Ra'u beeto;
Ra'u Feleg beeto;
Feleg Eebeer beeto;
Eebeer Sheela'i beeto.
36Sheela'i Qaayinaam beeto;
Qaayinaam Arfaakisaad beeto;
Arfaakisaad Seem beeto;
Seem Nohe'i beeto;
Nohe'i Laameek beeto.
37Laameek Maatusaal beeto;
Maatusaal Heenook beeto;
Heenook Yaareed beeto;
Yaareed Malaali'eel beeto;
Malaali'eel Qaayinaan beeto.
38Qaayinaan Heenoos beeto;
Heenoos Seet beeto;
Seet Addaam beeto;
Addaam Waa'i beeto.
Currently Selected:
Luqaas Mishiraachcha 3: KeesKita
Highlight
Share
Copy
Want to have your highlights saved across all your devices? Sign up or sign in
