Luqaas Mishiraachcha 22

Yesuusanne Manni Ki'ukkisa

(Mat 26:1-5; Mar 14:1-2; Yoh 11:45-53)

1 # Doy 12:1 Shaashshiqqi Uguda yakkam Qorosho'i Uguxxi balli hincaa hee'ukko. 2Qeessa awwonsaanii Seera losisaanii Yesuusa shiteena manna baddito'i bikkina hinkid issita'a shitamda'e e'lloo googo hassam hee'llo'o.

Yihud Yesuusa Higisaa Uwweena Iittamukkisa

(Mat 26:14-16; Mar 14:10-11)

3Ee lasage tommiinsii lam losaaniinsii mat hee'u Asqorotokkichchi Yihudanne Sheexaanchi aagukko. 4Ixxim qeessa awwonsaaninnee Keesammi Mine egettam keeninnee Yesuusa ixxuwwina hinkid issaa uwwooda'e a'llamukko. 5Ixxuwwim liiranta'a diinate uwwiteena iittanto'o. 6Yihudim ee woshshanne iittamaa manni bee'i beyyonne higisaa uwweena makki ammane hasam hee'ukko.

Yesuus Shaashshiqqi Uguxxi Maadda Losaaninnem Itukkisa

(Mat 26:17-30; Mar 14:12-26; Yoh 13:21-30)

7Shaashshiqqi Ugudina geex ambula durakkam Qorosho'i Uguxxi balli afukko. 8Ee bikkina Yesuusim Pheexiroosaa Yohaannisaa «Mattakka'a uguxxi hurbaata intona gudissehe» yaa asse'ukko. 9Ixxuwwim ixxena dabatta'a «Uguxxi hurbaata hannonne gudinso?» yita'a xa'mmito'o.

10Yesuusim ixxuwwina dabaraa «Oono'o! Mattakka'a beero'o aaggakkam ammane wo'i harachcho iyyaakkoo mat manchinne edantakkamo. Oo manchi aagoo mine awwontakka'a aaggehe. 11Ee mi'n annichchinam ‹Losisaanchi «I losaaninne maqirem uguxxi hurbaata itoommi koyyi min hannonnette?» yoolla› yi'llehe. 12Oo mi'n annichchim hundem luwwim gudaakkoo haraar mine fooqanne moo'isookko; eekke'enne gudissehe» yukko. 13Ixxuwwim Yesuus kurukkisam luwwi hundim ihaa siiddo'o; Shaashshiqqi Uguxxi maaddi hurbaatam ee beyyonne gudisso'o.

14Hurbaata itakkam amman afukkaare Yesuus ixxi asse'amaaninne maqirem hurbaata iteena afuurukko. 15Yesuusim ixxuwwina «An hawwonne aageena illageen ki'nnuwwinne maqire ka uguxxi hurbaata iteena lobakata mixam hee'ummo. 16An ki'nnuwwina kuroommo; ka uguxxi hurbaaxxek tirat Waa'i adillanonne caakkaa la'ameebe'e ka lasage uguxxi hurbaata hore'em itoommoyyo» yukko.

17Ee lasage Yesuus humbullonne yoo woyi'n diqaasa ki'isaa amadaa Waa'a galaxxukko. Ixxim «Hii'nnehe; kaka ki'nnuwwi baxxammehe. 18An ki'nnuwwina kuroommo; kabadiinsi ki'isaa Waa'i adillan waareebe'e woyi'n mishiinsi ciinsamu diqaasa agoommoyyo» yukko.

19Odim qorosho'om ki'isaa amadaa Waa'a galaxxukko. Ee qorosho'om iiqaa ixxi losaanina «Kuk ki'nnuwwina uwwamu i maara; ki'nnuwwi kaka eese tiirimmina issehe» yaa uwwukko. 20#Erm 31:31 Ee'isam hii'm hurbaata itta'a lasage humbullonne yoo woyi'n diqaasam ki'isaa amadaa «Kuk ki'nnuwwi bikkina dunamoo i xiiginne wo'mmoo haareechchi hidiro.

21 # Maz 41:9 «Oono'o! Eese higisaa uwwoo manchi ka maaddanne iinninne maqirem itoolla. 22Manchi Beeta'i yamamukkisam lehookko; ihukkaarem ixxo higisaa uwwoohaannina aayye!» yukko. 23Ee bikkina ixxuwwina'i ixxuwwim «Ni woriinsi kaka issookkok ayyette?» yita'a xa'mmaqancha asheetto'o.

Hundiinsi Lophphookkok Ayyette?

24 # Mat 18:1; Mar 9:34; Luq 9:46 Losaanim issena'i issem «Niinniinsi lophphookkok ayyette?» yita'a fitanto'o. 25#Mat 20:25-27; Mar 10:42-44 Yesuusim ixxuwwina «Mulli minaadaphphi adilluwwi minaadabanne moollannooma moo'ixxitamo. Ee minaadaphphi gassaanim minaadabina eroomma issitam keeno yamantamo. 26#Mat 23:11; Mar 9:35 Ihukkaarem ki'nnuwwi ee'isa ikkakkotte. Ki'nnuwwi lambe'iinsi loban ihookkok hoffan ihona. Moollanni ihookkokim awwaadaanchi ihona. 27#Yoh 13:12 Afuuraa itoohaanniinsii uullaa itisoohaanniinsii hinki lobane? Lophphookkok afuuraa itoohaneyyonnihe? Ee'isam an ki'nnuwwi lambe'enne awwaadaanchisa.

28«Eesenne afu hawwonne hundannem ki'nnuwwi iinninne maqirem qoxxitakka'a uullitakko'ookko. 29Iyyanni iina gassimmi malaayye uwwukkisam anim ki'nnuwwina gassimmi malaayye uwwoommo. 30#Mat 19:28 Ki'nnuwwim i adillanonne maaddiinsi ittakkamoo aggakkamoo. Odim adilla'n barcumanne afuuttakka'a tommonnee lamem Isra'ee'l sullonnee oogattakkamo» yukko.

Pheexiroos Ixxo Lagoo'isa Yesuus Kurukkisa

(Mat 26:31-35; Mar 14:27-31; Yoh 13:36-38)

31Moollannim «Simi'oona, Simi'oona! Oono'o! Sheexaanchi ki'nnuwwa arasisa ufeeseena xa'mmaakko. 32Ihukkaarem at ki amma'nnatiinsi ubboobee'isa an ki bikkina Waa'a uunxaammo. At saxxitaa daba'llitti ammane kiyyabbaayyuwwa qoxxise» yukko. 33Pheexiroosim Yesuusina «Moollanna! An kiinninne maqire karameenaa leheenaa gudaammo» yukko. 34Yesuusim ixxena «Pheexiroosa, an kiina kuroommo; at ‹Ixxo la'oommoyyo› yitaa eese sas kore laggeebe'e ka hiimo antabaa'i muunooyyo» yukko.

35 # Mat 10:9 Ee lasage Yesuus ixxi losaanina «An ki'nnuwwa gonoona, canaa caamma'aa amaddakkoo'nnim asse'ummi ammane ki'nnuwwina mah hanqatukko?» yaa xa'mmukko. Ixxuwwim «Mahim hanqatukkoyyo» yita'a dabatto'o.

36Yesuusim ixxuwwina dabaraa «Ihukkaarem kaba gonoon yookkok gonoonam amaxxona. Can yookkokim cana amaxxona. Bisa'i bee'ekim eddechcha biteesaa mat bisa'a bita'llona. 37#Isa 53:12 An ki'nnuwwina kuroommo; ‹Boqqi keeninne xigamukko› yamamaa kitaabamu woshshi eesenne wo'mmimmi hasisookko. Mashka'oomim i bikkina kitaabamu woshshi hundim wo'mmoo'isinatte» yukko. 38Ixxuwwim «Moollanna! Moo'e; kuno'o, lam bisa'i keyye yookko» yito'o. Yesuusim ixxuwwina dabaraa «Ihookko» yukko.

Wee'l duunanne Yesuus Firaa Waa'a Uunxukkisa

(Mat 26:36-46; Mar 14:32-42)

39Yesuusim beero'iinsi firaa eraare losukkisam Wee'l duuna firukko. Ixxi losaanim ixxo awwonta'a matto'o. 40Wee'l duuna afaa ixxi losaanina «Keennaanchonne aaggakkambee'isa Waa'a uunxehe» yukko.

41Ixxim ixxuwwiinsi kina huushakka'a afisakkamqax beyyo qee'llaa maraa guruphphaa 42«Iyyanna! Ki doo'l ihulas ka hawwi humbullo at iinniinsi higise. Ihukkaarem i doo'llisa ihoo'n ki doo'llisa ihona» yaa Waa'a uunxukko. 43Ee ammanem Waa'i asse'amaanchi iimaniinsi waaraa ixxo qoxxisukkuuyyi ixxena moo'amukko. 44Ixxim u'nnanne hee'u bikkina qoxxaa Waa'a uunxukko. Ixxeensi firoo biincim xiiqqisa uullanne daadam hee'ukko#22:43-44 Ku beyyi mat mat keesammi kitaabbuwwanne kitaabamukkoyyo.. 45Waa'a uunxatiinsi ki'aa losaa'n beyyo maru ammanenne losaan kichchechchiinsi ki'ukkok diriitta'a hee'llo'o. 46Ixxim dabaraa «Mahina diriittakkamuulla? Keenanchanne aaggakkambee'isa baqitakka'a Waa'a uunxehe» yukko.

Yesuus Higamaa Uwwamukkisaa Amadamukkisaa

(Mat 26:47-56; Mar 14:43-50; Yoh 18:3-11)

47Yesuus woconam ixxi losaa'nnek tommiinsii lamiinsii mat hee'u Yihud awwonsaakkoo dut manni waarukko. Ixxim Yesuusa suunqeena hincukko. 48Ihukkaarem Yesuus ixxena «Yihuda, Manchi Beeto suunqimminne higissaa uwwitoohonnihe?» yukko.

49Woshshika duuha'a ixxi losaan moo'llo'i ammanenne «Moollanna! Ka manna bisa'inne aphphinsonnihe?» yito'o. 50Ixxuwwiinsim mat manchi hundiinsi lob qeessichchina awwaadaanchika makki kolli macce aphphisaa murukko.

51Ihukkaarem Yesuus «Od la'mmeka eddoobee'isa»#22:51 «Od la'mmeka eddobee'isa» yoo sagar mat mat tiraxxi kitaabbuwwanne «Kaka fayyiiseembe'e egellehe» te'im «Kaba fayyiisonnihe?» yamamaa kitaabamaakko. yaa ee awwaadaanchika macce amadaa fayyiisukko. 52Ee lasage ixxo amaddeena waatto'i qeessa awwonsaano, Keesammi Mine egettam keeno, ijaajaanoo lommannaa «Fanga amadakkamisa eese amaddakkeena bisa'aa mugaa amaddakka'a waattakko'onnihe? 53#Luq 19:47; 21:37 An ballina ballina Keesammi Minenne ki'nnuwwinne hee'ummuuyyi amaddakko'oyyo. Ihukkaarem ku amman ki'nnuwwanee tuunsi gassaanchanee» yukko.

Pheexiroos Yesuusa Lagukkisa

(Mat 26:57-58,69-75; Mar 14:53-54,66-72; Yoh 18:12-18,25-27)

54Ee lasage oo manni Yesuusa amadda'a hundiinsi lob qeessichchi mine massito'o. Pheexiroosim qee'llonne ihaa awwonam hee'ukko. 55Ixxuwwim qash woro'l lambe'enne giira giitta'a iibbixxiteena wixxita'a afuutto'aare Pheexiroosim ixxuwwinnem afuurukko. 56Ee lasage ixxim gii'l caakkanne afuuraakkoohaannonne mat awwaadaancho ixxo qoossita'a moo'lla'a «Ku manchim ixxenne maqire hee'ukko» yito'o.

57Pheexiroosim «Meentichche, an ixxo la'oommoyyo» yaa lagukko. 58Odim hofqax ammaniinsi lasonne mat manchi «At ixxuwwiinsi mato» yukko. Ihukkaarem Pheexiroos «Mancho, aneyyo» yaa dabarukko. 59Mat sa'aata ihooqax ammaniinsi lasage mulli manchim «Hanqinam ku manchi Galiiliinsette ihu bikkina ixxenne maqire yoohane» yaa qoxxisaa wocukko.

60Ihukkaarem Pheexiroos «Mancho, at yitoottoka an la'oommoyyo» yukko. Ee ammanchom Pheexiroos woconam antabaa'i muunukko. 61Moollanni Yesuusim Pheexiroosa daba'llaa moo'ukko. Pheexiroosim «Kaballi hiimo antabaa'i muuneebe'e sas kore eese laggootto» yaa Moollanni kuru woshsha tiirukko. 62Ee lasage ixxim ee beyyiinsi firaa shikkaa wi'llukko.

Yesuusa Ganto'isaa Ixxonnem Naacco'isaa

63Ee ammane Yesuusa amadda'a hee'llo'i manni ganimmaa ixxonne naacimmaa asheetto'o. 64Odim ixxeka ille katta'a aphphissu'uuyyi «Keese aphphisukkok ayyetda'e huno'o, la'e?» yita'a xa'mmitam hee'llo'o. 65Lobakat mulli game'llaxxi sagalluwwam woccam hee'llo'o.

Daannuwwi Illagenne Yesuusa Hincaa'akko'isa

(Mat 26:59-66; Mar 14:55-64; Yoh 18:19-24)

66Uulli soodaa lasage minaadaphphi lommanni, qeessa awwonsaanii Seera losisaanii mat ikka'a Yesuusa ixxuwwi dummichchi beyyo massita'a 67«At Kiristoosatte ikkaattoolas niina kure» yita'a xa'mmito'o. Ihukkaarem ixxi ixxuwwina dabaraa «Ki'nnuwwina kurummaarem eese amma'nnitakkamoyyo. 68An ki'nnuwwa xa'mmumta'nnim dabattakkamoyyo. 69Ihukkaarem kabadiinsi ki'isaa Manchi Beet hundam xanoo Waa'i makkanne afuurookko» yukko. 70Ixxuwwi hundim dabatta'a «Eehaare at Waa'i Beetonnihe?» yito'o. Ixxim ixxuwwina dabaraa «Eeyya, ki'nnuwwi yitakko'isame» yukko. 71Ixxuwwim «Neese ni gagima'i ixxi suumiinsi macceensummo; kanniinsi lophphoo naqaash niina mahina hasisookko?» yito'o.

Currently Selected:

Luqaas Mishiraachcha 22: KeesKita

Highlight

Copy