Yohaannis Mishiraachcha 17

Waa'a Yesuus Uunxukkisa

1Yesuus ee woshsha wocaa ki'aa iimane moo'ukkuuyyi «Iyyanna! Kaba amman afaakko. Ki Beet keese lonsoo'isina atim ki Beeto lonse. 2Mashka'oomim at ixxena uwwitti keenina hundinam heer heerina hee'oo heechcha uwwoo'isina manni hundannem at ixxena malaayye uwwitaatto. 3Oo heer heerina hee'oo heechchim at xale'i hanqo'i Waa'i ikkittisa la'immaa at asse'llitti Yesuus Kiristoosa la'imma. 4An baxoommisina at uwwitti baxo baxaa guullaa keese ka uullanne lonsaammo. 5Iyyanna! Uulli qooccamoo'n illageen kiinninne maqire iina hee'u lombinne kaba eese ki beyyonne lonse.

6«At ka uulliinsi fissitaa iina uwwitti mannina ki summa la'isaammo. Ixxuwwi ki keen hee'llo'o. At ixxuwwa iina uwwitto. Ixxuwwim ki sagara egetto'o. 7At iina uwwitti luwwi hundim kiinniinsette ihukkisa kaba ixxuwwi laqqo'ookko. 8At iina uwwitti sagara anim ixxuwwina uwwummaare aa'lla'a an ki beyyiinsi waarummisa hanqinam laqqo'ookko. At eese asse'llittisam amma'nnito'ookko. 9An ixxuwwi bikkina keese uunxoommuulla. An keese uunxoommuullak ixxuwwi kiihan ikko'i bikkina at iina uwwitti keeninatte bagaan mulli manni bikkina keese uunxoommoyyo. 10I keen hundim kiihane; ki keenim iihane. Anim ixxuwwanne lomba siixxaammo. 11Kaba an ki beyyo waaroommuulla. Ka lasage ixxuwwi ka uullanne hee'llamo bagaan an ka uullanne hee'oommoyyo. Keesantaattoo Iyyanna! Anii atii mat inkummisam ixxuwwim mat ikkamisina at iina uwwitti keeno ki summinne egere. 12#Maz 41:9; Yoh 13:18 An ixxuwwinne maqire hee'ummuuyyi at iina uwwitti ki summinne ixxuwwa egeraammo#17:12 «At iina uwwitti ki summinne egeraammo» yookkoka mat mat kitaabbuwwi «At iina uwwitti keeno ki summinne egeraammo» yookko. . Keesammi Kitaabanne kitaabamukkok wo'mmoo'isina bichchi beetiinsi bagaan ixxuwwiinsi matim bi'ukkoyyo. 13Ihukkaarem kaba an ki beyyo waaroommuulla. I liiranchi ixxuwwanne wo'mmoo'isina an ka uullanne hee'ummuuyyi ka woshsha wocaammo. 14An ixxuwwina ki sagara uwwaammo. An ka uullan ihumbee'isam ixxuwwim ka uullan ikkobee'i bikkina ka uulli manni ixxuwwa sabukko. 15An keese uunxoommok ixxuwwa joriinsi#17:15 Ka beyyonne «Joriinsi» yookkok Sheexaanchinatte. egettonatte bagaan ka uulliinsi fissitoo'isinayyo. 16An ka uullan ihumbee'isam ixxuwwim ka uulli keenoyyo. 17Hanqinam ixxuwwa ki gagina annanni isse. Ki sagarim hanqa. 18At eese ka uulla asse'llittisam anim ixxuwwa ka uulla asse'aammo. 19Ixxuwwim hanqina ixxuwwi gaga annanni issita'a kiina hincaa'llamisina an i gaga kiina annanni issaa hincaa'aammo.

20-21An keese uunxoommok xale'i ka keeninatte ihoo'n ku keen kuttam woshsha macceessa'a eesenne amma'nnitam keen hundim mat ikkamisinatte. Iyyanna! At eese asse'llittisa manni amma'nnoo'isina at iinninne mat ikkittisa anim kiinninne mat ihummisa ixxuwwim niinninne mat ikkamisina an keese uunxoommuulla. 22Atii anii mat inkummisa ixxuwwim mat ikkamisina at iina uwwitti lomba anim ixxuwwina uwwaammo. 23Oo uunxoommokim at eese asse'llittisaa eese iittittisam ixxuwwam iittittisaa ka uulli manni la'oo'isina ixxuwwi guullita'a mat ikkamisina an ixxuwwinne ixxuwwim iinninne mat inkoommisinatte. 24Iyyanna! Oo at iina uwwitti keen uulli qooccamoo'n illageenim at eese iittitaa iina uwwitti lomba moo'lleena an yoommi beyyonne ixxuwwim ikkamisina hasoommo. 25Hanqo'i muccur Iyyanna! Ka uulli manni keese la'ukkoyyo. Ihukkaarem an keese la'ummo. Ku keenim at eese asse'llittisa laqqo'ookko. 26Anim ixxuwwina ki summa la'isaammo. At eese iittitti iitti ixxuwwi woronne ihoo'isinaa anim ixxuwwinne mat ihoommisinaa ki summa odim la'isoommo» yukko.

Currently Selected:

Yohaannis Mishiraachcha 17: KeesKita

Highlight

Copy