Inbaaqoom Kitaaba 2
2
1I egechchi beyyonne ihaa uulloommo; girbi ooxxi hananne firaa egeroommo; ee beyyonne ihaa Waa'i iina yookkokaa i fitina uwwoo dabachchaa egeroommo.
Waa'i Inbaaqoomina Uwwu Dabachcha
2Waa'im iina «Kiina caakkisoommi kaalta kitaabe; qananaa'ookkok qaqqisaa qananaa'ona moo'amoo beyyonne kirbaasanne kitaabe. 3#Ibr 10:37Kaaltoom qoodamu amman afeebe'e egerookko; lasaanchi doolli bikkina kurookko; ixxim qophphanooyyo. Dasoo labuta'nnim egere; hanqo'isam waarookko; hore'em dasooyyo. 4#Oro 1:17; Gal 3:11; Ibr 10:38Amaadaano moo'e; eroomma sawwitamoyyo; ihukkaarem mucculluwwi amma'nnatinne hee'llamo» yaa dabarukko.
Baaxiilaan Uboo'isa
5Amaxxi huushisoohane; amaadaanchim iyyaqqooyyo. Si'ooli'nnoo'i gollaancho; Lehi'nnoo'i mogaalla. Mulli minaadaba ixxi gagina wixxaa'ookko; manna hundam qeefadookko. 6Manni hundim eehido'i mannanne naacimminne «Kiihan ihubee'i amaxxa wixxaa'lloohaanno aayye! Badano miqimma hoogu kee'n amaxxa wixxaa'llittuuyyi goddaanchi ikkoottok hinki balli afeebe'ette?» yookko.
7Badanaammuwwi issitakko'i keen ki'nnuwwanne dangonne ki'llamoyyonnihe? Ki'lladu ki'nnuwwa batbataa'llammoyyonnihe? Ki'nnuwwim ixxuwwi anganne qeefadantakkamo. 8Ki'nnuwwi lobakat minaadaphpheka amaxxa boggakka'a hee'llakko'o; ihukkaarem foorinne gatto'i keen korina ki'nnuwwa boggamo. Mashka'oomim ki'nnuwwi lobakat minaadaphpheka xiiga duntakko'ookko. Uullanne yoo beero'uwwanne hundannem hee'llam minaadabanne barche'e baxxakko'ookko.
9Hanqi bee'i googinne wixxaa'llakko'i amaxxinne mine baxxakko'i keeninaa jor luwwi afoobee'isa mine duunanne baxxakko'i keeninaa aayye! 10Lobakat minaadaba hantaarinne shitakka'a ki'nnuwwi abaroosina sholle'nna eebbakko'ookko; ki'nnuwwi gaginam bichcha eebaqqitakko'ookko. 11Gimbi kinneewwim gorte'i worinne laarookko; gorte'i haqqim eehannina wororinne dabachcha uwwookko.
12Beero'o baaxiilinne shooto'llam keeninaa manni xiiginne baxxam keeninaa ayye! 13Gogoxxi Moollanni Waa'i minaadab baxxamok hundim giirinne bi'oo'isina, adilluwwi yakitim kora'am gatoo'isina qoodaakko. 14#Isa 11:9Dambalaq wo'inne wo'mmaakkoohan ihukkisam uullim Waa'ika lomba la'imminne wo'mmaakkoohane ihookko.
15Tuulli orachcho moo'eena ixxi beshichchina dimbeebe'e inkiirukkuuyyi dimbisoo agga agisoohaannina aayye! 16Atim korina lombi bikkenne sholle'llootto; aggaa dimbitaahim tartaritootto; Waa'i qoxxaalli guzumo'i humbullo agisookko. Ki lombam sholle'nnanne dabarookko. 17Liibaanoosika digibbuwwa muttittisa atim murantootto; moochcha guullitaa hee'llitto; ixxuwwim keese u'nnissamo; oo hundim keesenne afookkok lobakat minaadaphpheka xiiga dunti bikkinattee uulluwwaa beero'uwwaa bi'issitti bikkinatte.
18Qophpha'n waa'uwwik awwaad marcho? Ixxi manni anginne shobamaa baxamaakkoohane; qophphaniinsi bagaan ixxeensi ma'llichchim siidamooyyo; eehannah ixxo shobaa baxu manchi maham woceena xanoobee'aannonne amma'nnim maha awwaadookko? 19Haqqiinsi cabbaramaa baxamu luwwina «Baqihe», kiniinsi shobamaa baxamu luwwinam «Ki'e» yitoo kiina ayye! Ayla'ukko oo qophpha'n waa'i mat maaxaqqi luchcho kiina caakkiseena xanoohonnihe? Qophpha'n waa'i worqinnee birinnee goolabamaa baxamaakkohane; ihukkaarem foor bee'ane.
20Waa'i keesamaakkoo minennette; ee bikkina uullanne yoo minaadab hundim sa'ihona.
Currently Selected:
Inbaaqoom Kitaaba 2: KeesKita
Highlight
Share
Copy
Want to have your highlights saved across all your devices? Sign up or sign in
