Qooccanchi Kitaaba 28

1Yisaaqim Yaaqooba weeshisaa maasse'aa lasage «At Kana'aa'n uulli landa eebbitte. 2Ki'llaa Masphexoome'enne hee'oo kiyyummi anni Baatu'eel mi'n beyyo mare; ee beyyiinsi ki eeshimmi Laaba'i landika mato eebe. 3Hundam xanoo Waa'i keese maasse'ona; odim mishaam issonaa fikkaannisonaa. Keese dut minaadabina anni issona. 4#Qoc 17:4-8Waa'i Abrihaama maasse'ukkisam keesee ki shumo'oo maasse'ona; ka at koyyinanonne hee'llitti uulla Waa'i Abrihaamina uwwukkoka at lagaallo'isa issona» yaa ijaajukko.

5Ee'isa yaa Yisaaq Yaaqooba asse'ukko; ixxim Yaaqoobinaa Eesa'anaa ama Irbiqana abbaayyi ihu Sooriy uulli manchi Baatu'eel beet Laaba'a hee'oo beyyo lam daajji lambe'e marukko.

Eesa'a Mulli Meento Eebukkisa

6Eesa'a Yisaaq Yaaqooba maasse'ukkisa, Masphexoome'iinsi meento eebeena marona asse'ukkisaa odim «Kana'aa'n landiinsi meento eebbitte» yaa ijaajukkisaa macceesukko. 7Odim Yaaqoobim ixxi anninaa amanaa ijaajamaa Masphexoome'e marukkisa Eesa'a macceesukko. 8Kana'aa'n meenti ixxi anni Yisaaqina liiransubee'isa Eesa'a la'ukko. 9Ee bikkina Abrihaam beet hee'u Isma'eel beyyo maraa ixxi landichchotte hee'llo'i Maahileeta illageen hee'u meentinne maqirem aretti ikkona eebukko. Isem Nabaayoot aayyatte hee'llo'o.

Yaaqoob Beeteelanne Haqaawwe'ukkisa

10Yaaqoobim Beersaabe'e uraa Kaaraana marukko. 11Ixxim marukkuuyyi mat beyyo afu ammanenne eelliinchi aagaa hiimukko. Ee bikkina ee hiimo ee beyyonne gareena kina bakke'aa iinise'ukko. 12#Yoh 1:51Ixxim haqaawwonne uullanne kaaxxaa lud iimane afaakkoo masalaala moo'ukko; ixxonnem Waa'i asse'amaan iimii aadii daba'llantam hee'llo'o. 13#Qoc 13:14,15Ixxim Waa'i ixxi bakkonne uullukkisa moo'ukko; Moollannim ixxena «Kiyyanni Abrihaaminaa Yisaaqinaa Waa'i anette; ka at iinse'llitti uulla kiinaa ki shumo'inaa an uwwoommo. 14#Qoc 12:3; 22:18Odim ki shumo'o uulli shashsha'llisa fikkaannisoommo; atim eelliinchi aagoo kollonnee firoo kollonnee woroo'n qarannee hanaa'n qarannee afeebe'e binnitaa haraattoottoo kiinninnee ki shumo'innee uulli minaadaba hundam maasse'oommo. 15Kiinninne maqire ihoommo; odim at mattoo beyyi hundannem keese egeroommo; ka uullam keese dabaraa woroommo; an kiina kurummoka hundam isseembe'e keese uroommoyyo» yukko.

16Ee lasage Yaaqoob diriiriinsi baqaa «Hanqinam Waa'i ka beyyonnette; ixxi ka beyyonnetti ihukkisa an la'ummoyyi hee'ukko» yukko. 17Ixxim lobakata baddaa hee'u bikkina «Ku beyyi hinkaa'nna baddisoolla; ku beyyi Keesammi Mine bagaan mullaneyyo; kuk iima'n gooc fooqaakkoo beyyo» yukko.

18Yaaqoob soodaraarom ki'aa bakke'aa hee'u kina ki'isaa utuphphisa uullisukko; ixxi ludonnem wee'l zayta dunukko. 19Ixxim ee beyyi summa «Beeteela» yaa weeshukko. Illageen ee beyyi summi «Looza» yakkaman hee'ukko. 20Yaaqoobim Waa'ina «Waa'i iinninne maqir ihulas, ka an maroommi googonne egerulas, itoommi hurbaataa ede'oommi eddechchaa uwwulasii 21iyyanni minem xumminne daba'llumlasii Moollanni iina Waa'i ihookko. 22Odim ku utuphphisa uullisummi kin Waa'i min ihookko; at iina uwwitti luwwi hundiinsim tommiinsi mato kiina uwwoommo» yaa hide'ukko.

Currently Selected:

Qooccanchi Kitaaba 28: KeesKita

Highlight

Copy