Dooyyi Kitaaba 23

Hanqo'i Oogaxxi Bikkina

1 # Doy 20:16; Qes 19:11,12; Se'l 5:20 «Qophpha'n woshsha taakkiissitte; baaxiilaanchi mancho qophphano naqqassaa muccur issiissitte. 2Jora baxxeena te'im oogato boqqisseena lobakat manni mateeyyoominne ki'llam ammane at ixxuwwinne maqire manni hanqa bi'issitte. 3#Qes 19:15Buxichchi oogatina hincoo ammane ixxi buxooma moo'llaa golo'llitte.

4 # Se'l 22:1-4 «Ki masokkichchik mirgo'i te'im hallichchi bi'u beyyonne siidditlas ixxena massitaa uwwe. 5Keese saboo manchik hallichchi iyyi kee'mmaa ubu beyyonne siidditlas ubu beyyiinsi ki'ona hara'mme bagaan uttaa higgitte.

6 # Qes 19:15; Se'l 16:19 «Buxichchi fitamoo ammane ixxi buxooma moo'llaa oogato boqqissitte. 7Ayyi manchom qophphaninne kasassitte; muccur mancho shititte; mashka'oomim an baaxiilaanchi mancho muccur issoombee'ane. 8Manni hanqo'an ihu luwwa moo'oobee'isa ille ifiisoo bikkinaa muccur mannikam oogato'o bi'isoo bikkinaa maqanxa aa'llitte.

9 # Doy 22:21; Qes 19:33,34; Se'l 24:17,18; 27:19 «Waaraano barche'e issitakkotte; mashka'oomim ki'nnuwwi Gibxanne waaraan ikkakka'a hee'llakko'i bikkina waaraa'nnek heechchi hinkido'anda'e ki'nnuwwim laqqakkamo.

Lama'l Ballaa Lama'l Hiinchoo

10 # Qes 25:1-7 «Loh hiincho ki uulla abuullitaa atoota wixxaa'e. 11Ihukkaarem lama'l hiinchonne uulli usheexxona. Ki minaadaphphi lambe'enne yoo buxim hurbaata wixxaa'aqqona; ki uullanne gobbe'i ihaa mutu luwwiinsi maham wixxaa'llitte. Buxiinsi gatukkokam bii'l moochchi itona. Woyi'n kaashshi beyyii wee'l kaashshi beyyim ee'isam usheexxona.

12 # Doy 20:9-11; 31:15; 34:21; 35:2; Qes 23:3; Se'l 5:13,14 «Saantanne loh balla kiikka bax hundam baxe. Ihukkaarem lama'l ballanne mah baxom baxxitte. Ki mirgo'i, ki hallichchi, ki awwaadaanii ki minenne hee'oo waaraanii hundim usheexxona.

13«An Waa'i ki'nnuwwina kurummi luwwi hundam qoossitakka'a macceessehe. Mulli waa'uwwa uunxitakkotte; ki'nnuwwi suuminne weeshshakku'uuyyim macceesamoone.

La'amaakkoo Sasem Ugudduwwim

(Doy 34:18-26; Se'l 16:1-17)

14«Hiinchonne sas kore eese lonsitakkam ugudduwwi hee'ona. 15#Doy 12:14-20; Qes 23:6-8; Xiq 28:17-25Gibxi uulliinsi fittakko'i Abiiphphi agananne an ki'nnuwwa ijaajummisinnem Qorosho'i uguda lonsehe. Ee uguda lonsakkam lamarem ballannem irsho'i nakkubee'i qorosho'o ittehe; i illagennem kora'i angam hincitakkotte.

16 # Qes 23:15-21; Xiq 28:26-31; Qes 23:39-43 «Ki'nnuwwi uulliinsi hurbaata wixxa'llakkam ammane Hurbaaxxi uguda lonsehe.

«Woyi'n kaashshiinsii mulli kaashshuwwiinsii misha wixxaa'llakkam hiinchi lasaanchonnem Daas uguda lonsehe. 17Hiinchonne sas kore ka ugudduwwa lonsitakkam ammane goon hundim Moollanni Waa'i kollonne hincihona.

18«Kiti'm xiiga hincaa'llakkam ammane irsho'i yoo hurbaatinne hincaa'llakkotte. Ee ugudduwwanne iina hincoo kiti'mmek di'ir uulli soodeebe'e garoone.

19 # Se'l 26:2; Doy 34:26; Se'l 14:21 «Ki uulli mishika ludo ki'nnuwwina Moollanni ihummi Keesammi Mine eebbehe.

«Gereechchika te'im fellakkichchi wota'lleka maara ixxi am adinne sattitte.

Neeyyaxxi Sagalluwwaa Awwonsattuwwaa

20«Mattoo googonne keese egeronaa an kiina gudisummi uullam keese xumminne aagisonaa ki illaginne maroo asse'amaancho an asse'oommo. 21Ixxi kiina yookkoka qoossitaa macceese. Ixxena ijaajancha sabbaa ixxo qaraassititte. I summi ixxonnetti ihu bikkina boqqooma moo'aa haafooyyo. 22Ixxi kiina yookkokaa an ijaajummi ijaajoo qoxxitaa macceessilas an ki diina'a hundam saboommo; keese u'nnissam keenom u'nnisoommo. 23I asse'amaanchim ki'nnuwwi illaginne marookko. Ixxim ki'nnuwwa Amoore'ika, Hiite'ika, Faarze'ika Kana'aa'nneka, Hiiwe'ikaa Iyyaabuus uullaa awwonsaa massookko. Anim ixxuwwa guullaa bi'isoommo. 24Ee kee'n waa'uwwina otossititte; ixxuwwi losanom awwontitte. Ixxuwwika waa'uwwa guullitaa bi'ise; keesammi ki'n utubbuwwam iiqanse. 25Iina ki Moollanni Waa'ina otossitlas ittoo hurbaataa aggoo wo'oo uwwaa keese maasse'oommo; jabbi hundam kiinniinsi qeessommo. 26Ki uullanne karii alceenni meentii hee'ooyyo; ki umuram qeeraa'llisoommo.

27«Kiinninne uullixxantam keen hundim eese badditamisa issoommo; keesenne ora ki'issam minaadab hundannem hambalaachcha eeboommo. Ki diina'i laso daba'llita'a gibbamisa issoommo. 28Ki diina'a dambaqisoommo.#23:28 «Dambaqisoommo» yookkoka mat mat tirattuwwi «Haldiishsha asse'oommo» yookko. Hiiwe'ika, Kana'aa'nnekaa Hiite'i minaadabaa ki illagiinsi fiikkisoommo. 29Ihukkaarem an ixxuwwa mexxo'i hiinchonne fissaa holloommoyyo; eehid issumlas uulli udma'i ihaa bii'l moochchi keese hawwisookko. 30At fikkaannitaa uulla wo'mmiteebe'e an ixxuwwa hoffi hoffan issummuuyyi fissoommo. 31Ki uulli gabalam Ertiira'i dambalaqiinsi ki'isaa Filisxee'm dambalaq afeebe'e udma'i uulliinsim ki'isaa Efiraaxiis daajji afeebe'e haraassoommo. Ee uullanne hee'oo manna kaa'lloo'isa issoommi bikkina at ixxuwwa ki illagiinsi hollitootto. 32Ixxuwwinnee ixxuwwi waa'uwwinnee hore'em hide'antitte. 33Ixxuwwi waa'uwwina otossitlas kiina qaash ihookko. Oo minaadab ki uullanne hee'llona uwwititte; ki uullanne hee'llolas baaxiilo baxxaa eese hawwoddoo'isa issitamo» yaa ijaajukko.

Currently Selected:

Dooyyi Kitaaba 23: KeesKita

Highlight

Copy