Dooyyi Kitaaba 20

Tommem Ijaajjuwwim

(Se'l 5:1-21)

1Waa'i ka ijaajjuwwa hundam ixxi minaadabina 2«Isra'ee'l minaadaba, Gibxiinsi agidda'n uulliinsi keese fissummi ki Moollanni Waa'i anette.

3«Iinniinsi bagaan kiina mulli waa'i hee'oone.

4 # Doy 34:17; Qes 19:4; 26:1; Se'l 4:15-18; 27:15 «Iimanenne te'im uullanne te'im uulliinsi woroon wo'onne hee'oo ayyi luwwiinsim misila ki gagina waa'i issitaa baxxitte. 5#Doy 34:6,7; Xiq 14:18; Se'l 7:9,10An ki Moollanni Waa'i to'achchoommanee eese sabbam kee'n shumo'om ixxuwwi anno'i baaxii'l bikkina saxxi qaranchiinsi soo'l qaranchi afeebe'e guzumo'oommanee ihu bikkina eehido'i waa'uwwina otossititte te'im awwaadditte. 6Ihukkaarem eese iittitam keeninaa i ijaajom egettam keeninaa hundinam kum qaranchi afeebe'e heer heerina hee'oo iitto moo'isoommo.

7 # Qes 19:12 «Ki Moollanni Waa'ika summa awwaad bee'i luwwina weeshshitte; mashka'oomim Waa'i ixxi summa awwaad bee'i luwwina weeshoo keeno guzumo'oo'n urooyyo.

8 # Doy 16:23-30; 31:12-14 «Usheexxaxxi balla keessoo'isina sawwihe. 9#Doy 23:12; 31:15; 34:21; 35:2; Qes 23:3Loh balla baxe; issitoo luwwi hundam isse. 10Ihukkaarem lama'l balli ki Moollanni Waa'ina keesamaakkoo usheexxaxxi balla; ee ballanne ayyi manchim baxo baxoone; at, ki oos, ki awwaadaan, ki diinatii ki uullanne hee'llam waaraanii matem baxom baxxakkotte. 11#Qoc 2:1-3; Doy 31:17An Waa'i iimane, uulla, dambalaqaa eekee'n woronne yoo luwwaa hundam loh ballanne qooccaa lama'l ballanne usheexxaammo; ee bikkina an usheexxaxxi balla maasse'aammo; keesaammome.

12 # Se'l 27:16; Mat 15:4; 19:19; Mar 7:10; 10:19; Luq 18:20; Efe 6:2-3 «Ki Moollanni Waa'i kiina uwwoo uullanne ki umur qeeraa'lloo'isina kiyyannaa kiyyummaa lonse.

13 # Qoc 9:6; Qes 24:17; Mat 5:21; 19:18; Mar 10:19; Luq 18:20; Oro 13:9; Yaq 2:11 «Shititte.

14 # Qes 20:10; Mat 5:27; 19:18; Mar 10:19; Luq 18:20; Oro 13:9; Yaq 2:11 «Saa'llitte.

15 # Qes 19:11; Mat 19:18; Mar 10:19; Luq 18:20; Oro 13:9 «Game'llitte.

16 # Doy 23:1; Mat 19:18; Mar 10:19; Luq 18:20 «Ki beshichchonne qophphano naqqassitte.

17 # Oro 7:7; 13:9 «Ki beshichchika mine mixxitte; ixxeka are, agido, mirgo'oo hallaa ixxeka ayyi amaxxam mixxitte» yukko.

Minaadab Baddukkisa

(Se'l 5:22-33)

18 # Ibr 12:18,19 Minaadabim banqa, gugaa xurumbi sagaraa macceesaahii duun wiriiroo'isa moo'aahii baa'aa huxe'ukko; qee'llaahim uullukko. 19Ixxuwwim Muse'ena «At niina woce; neesem macceensoommo; Waa'i niina wocoo'isa issititte; oobeelas neese leneenatte» yito'o.

20Muse'em minaadabina «Badditakkotte; baaxiilo baxxakkambee'isa Waa'a baddimmi ki'nnuwwinne maqir ihoo'isina Waa'i ki'nnuwwa keeneena waaraakko» yukko. 21Waa'i yoo gambabbi tuunsonne Muse'e hincaakkoohaannonne minaadab qee'llonne uullaa hee'ukko.

Kiti'm Beyyuwwi Bikkina Seer Uwwamukkisa

22Ee lasage Waa'i Muse'ena «Isra'ee'l minaadabina ‹Iimanenne ihaa wocummisa ki'nnuwwi gagoomim moo'llakko'ookko. 23Iinniinsi bagaan ki'nnuwwina mulli waa'uwwi hee'oone; biriinsi te'im worqiinsi mulli waa'uwwa baxxakkotte.

24«Iina buchchinne kiti'm beyyo baxxehe; ixxonnem ki'nnuwwi gereebbiinsi, fella'iinsii lariinsii doo'llitakka'a shokkiisakka'a hincaa'akkamokaa mateeyyoo'm kitimaa kitimmehe; i summi lophphoo'isina qoodummi beyyi hundam waaraa ki'nnuwwa maasse'oommo. 25#Se'l 27:5-7; Iya 8:31Kiti'm beyyo kininne baxxakkolas xaar nakku kininne baxxakkotte; xaarimdu nakkulas haashaaramookko. 26Ki'nnuwwik tuulli orachchi la'amoobee'isa kiti'm beyyo gardabbinne fittakkotte.

Currently Selected:

Dooyyi Kitaaba 20: KeesKita

Highlight

Copy