Dooyyi Kitaaba 1
1
Gibxi Isra'eela Barche'e Issukkisa
1 #
Qoc 46:8-27
Mi'n abaroosa amadda'a Yaaqoobinne maqirem Gibxa matto'i Isra'ee'l oosik summi 2«Roobeelatte, Simi'oonatte, Leewe'ette, Yihudatte, 3Yisaakooratte, Zaabiloonatte, Biiniyaamatte, 4Daanatte, Niftaaleematte, Gaadattee Aseerattee. 5Yaaqoob shumo'i hundim lamarayyi hee'llo'o. Ihukkaarem Yooseef illagem Gibxanne hee'ukko. 6Doolluwwiinsi lasonne Yooseef, ixxi abbaayyuwwii ee qaranchina anno'ii hundim leto'o. 7#Ass 7:17Ihukkaarem Isra'ee'l oos fikkaannitu'uuyyi matto'o; ixxuwwikim xig lophphukkuuyyi maru bikkina Gibxi uullanne wo'mmito'o.
8 #
Ass 7:18
Ee lasage Yooseef bikkina la'oobee'i haareechchi adil Gibxi uullanne ki'ukko. 9Ixxim minaadabina «Oono'o Isra'ee'l minaadaphphek xig dutaakko; ixxuwwi niinniinsi malaayyitu'uuyyi matteenatte. 10#Ass 7:19Ee bikkina ixxuwwik xig exxoobee'isa, or ki'uta'nnim ni diina'inne hara'mmanta'a neese qassambee'isaa uulliinsim gibba'a mattambee'isaa mat luwwa qooccinona» yukko.
11Ee bikkina u'nnissu'uuyyi kee'mmaalli baxo baxissam keeno doo'llito'o; Faari'ooninam Fiitoomaa Raamsee yakkam qoxxaalli beero'uwwa baxxo'o. 12Isra'ee'l oos wor amadanto'aarem ixxuwwik xig dutukkuuyyii uullannem wo'mmukkuuyyii marukko. Ee bikkina Gibxi uulli manni Isra'ee'l ooso baddito'o. 13Qishixxatbee'i monginnem baxisimma asheetto'o. Hara kade'isimminne, xuuba baxisimminnee uulla abuullisimminnee u'nnissu'uuyyi kee'mmaalli baxo baxissu'uuyyi ixxuwwika heechcha qaraassito'o. 14Gibxi minaadab ixxuwwa baxissam hee'llo'i baxonne hundannem ixxuwwina hore'em qishixxitam hee'llo'oyyo.
15Ee lasage Gibxi uulli adil Ibro'i meenti qaroo ammane qassiissam lam meento Siiphaaraa Fuhaa weeshaa 16«Ibro'i meenti qaroo ammane goonchi qaramulas ee ammanem shi'llehe. Ihukkaarem landi ihulas shitakkotte» yukko. 17Ihukkaarem oo meenti Waa'a baddito'i bikkina Gibxi uulli adil ijaajukkisa issito'oyyo; goon oosom shito'oyyo. 18Ee lasage Gibxi uulli adil ee meento weeshisaa «Goon ooso shitakkobee'i mashka'i maha?» yaa xa'mmukko.
19Ixxuwwim «Ibro'i meenti Gibxi meentisayyo; ixxuwwi qoxar meenti ikko'i bikkina neese amfoo'nnim gaassita'a qattamo» yita'a dabatto'o. 20-21Oo meenti xuu'oo ammane qassiissam hee'llo'i keen Waa'a baddito'i bikkina Waa'im ixxuwwina er luwwa issukko; annannichchinam abaroosa uwwukko; Isra'ee'l minaadabim fikkaannukkuuyyii wodukkuuyyii marukko. 22#Ass 7:19Ee lasage adil «Ibro'ika haareechcho qaramoo goo'n ooso hundam massitakka'a Abbaayyi daajjenne uunjehe; ihukkaarem landa nakkitakkotte» yaa minaadaba ijaajukko.
Currently Selected:
Dooyyi Kitaaba 1: KeesKita
Highlight
Share
Copy
Want to have your highlights saved across all your devices? Sign up or sign in
