Asse'amaa'n Baxo 3

Shiihaakkoo Manchi Fayye'ukkisa

1Mat balla Pheexiroosii Yohaannisii honsi sa'aatanne Waa'a uunxakkam ammanenne Keesammi Mine mattam hee'llo'o. 2Ee beyyonnem Danaam Gooca yakkam gooc hee'ukko. Qaramukkaanniinsi ki'isaa shiihaakkoo mat mancho Keesammi Mine aagoo manniinsi tasbo'o uunxaqqoo'isina ballina ballina iyyakka'a eebakka'a eekke'e dissakkam hee'akko'o. 3Oo manchim Pheexiroosii Yohaannisii Keesammi Mine aaggeena waattu'uuyyi moo'aa tasbo'o uwwitamisina uunxukko. 4Pheexiroosim Yohaannisinne maqirem ixxo xuxxaa moo'aa «Neese moo'e!» yukkaare 5oo shiihu manchim «Ihu luwwa uwwitamo» yaa ixxuwwa xuxxaa moo'ukko. 6Ihukkaarem Pheexiroos «Iina worqii birii bee'e. Iina yoo luwwa kiina uwwoommo. Naazireexxi Yesuus Kiristoos summinne ki'llaa taakke'e» yaa 7makki anga amadaa ki'isukkaare ee ammanchom ee manchik lokkii mogole'ii qoxxukko. 8Ixxim shoottaa uullaa taakke'ukkuuyyi, xophxophukkuuyyii Waa'a galaxxukkuuyyii ixxuwwinne maqirem Keesammi Mine aagukko. 9Manni hundim oo shiihaa hee'am hee'u manchi taakke'ukkuuyyii Waa'a galaxxukkuuyyii 10moo'lla'a tasbo'o uunxaqqeena Waa'i mi'nnaannonne Danaam Gooca yakkam beyyonne afuuraa hee'u manchi ihukkisa laqqa'a ee ixxonne ihu woshshanne lobakata maalalto'o.

Keesammi Minenne Pheexiroos Wocu Woshsha

11Oo fayye'u manchi Pheexiroosiinsii Yohaannisiinsii «Annanni ihoommoyyo» yaa hee'ukkuuyyim manni hundim mat ihaa maalalukkuuyyi Daba'llamakkam Salamoon Gooca yakkam beyyo ixxuwwi beyyo geerukko. 12Pheexiroos eekka moo'u ammanenne minaadabina «Isra'ee'l minaadaba, kannonne mahina maalaltakkamuulla? Ni malaayyinne ka mancho taakkiinsummaannisa te'im Waa'i illagenne er manni inkummi bikkina ka mancho taakke'oo'isa issinummaannisa mahina neese moo'llakkamuulla? 13#Doy 3:14 Waa'ina awwaadaanchi Yesuusa Philaaxoosina ki'nnuwwi higissakka'a uwwitakko'aare Philaaxoos fatakeena ihu ammanenne ixxi illagennem laggakko'oka Abrihaamina, Yisaaqina, Yaaqoobinaa niyyanno'inaa Waa'i lonsukko. 14#Mat 27:15 Ihukkaarem ki'nnuwwi Waa'ina annanni ihaakkoo muccura laggakka'a manna shu mancho fatakoo'isina Philaaxoosa xa'mmitakko'o. 15Heechcha uwwookkoka shitakko'aare Waa'i ixxo lehiinsi ki'isukkisina neese naqaashshuwwa. 16Ka shiihu mancho ki'nnuwwi moo'llakkamokaa laqqakkamokaa Yesuusanne amma'nnimmi qoxxisaakko. Ka mancho ki'nnuwwi hundi illagennem tollaa'aa fayyiisukkok Yesuusanne amma'nnimma» yukko.

17Odim Pheexiroos «Kabadem iyyabbaayyuwwa, ki'nnuwwim ki'nnuwwi gassaa'nnisam Yesuusanne issitakko'i luwwa lachchoonginne issitakko'isa an la'oommo. 18Ihukkaarem Waa'i hiraagaan hundinnem ihaa ixxi doo'llu Yesuus hawwimmi hasisoo'isa gaassaatim kuru woshsha wonshaakko. 19Ee bikkina ki'nnuwwika baaxiilo Waa'i haafoo'isina baaxiilo biiraa yitakka'a daba'llehe. Baaxiiliinsi daba'llitakkolas Waa'i ki'nnuwwa guullaa maasse'oo balli waarookko. 20Ki'nnuwwina Yesuus Kiristoosam asse'ookko. 21Waa'i hiraaggona annanni issu kee'n kollinne ihaa gaassaatim wocukkisam hundem luchchom haareechchi isseebe'i afeebe'e iimanenne Yesuus afuurimmi hasisookko. 22#Se'l 18:15 Muse'em ‹Moollanni Waa'i ki'nnuwwi abbaayyuwwi lambe'iinsi hiraagaancho eese ki'isukkisam #3:22 «Eese ki'isukkisam» yoo sagar «Iinni'nnoo'oka» yimmam iheena xanookko. ki'nnuwwina ki'isookko. Ixxi wocoo luwwi hundam macceessehe. 23#Se'l 18:19 Oo hiraagaanchi wocoo woshsha macceesoobee'ek ayyim minaadaphphi lambe'iinsi bi'ona› yukko. 24Odim Saamu'eelii Saamu'eeliinsi lasage ki'llo'i keenii hiraagaan hundim ka doolli bikkina wocco'ookko. 25#Qoc 22:18 Ki'nnuwwi hundim Waa'i Abrihaamina ‹Ki shumo'iinsi qaramoohaanninne uullanne yoo minaadab hundam maasse'oommo› yaa ki'nnuwwi anno'inne aagu hidi'l oosoo hiraagaa'n oosoo. 26Waa'i ki'nnuwwi hundam mulli keeniinsi gaassaa boqqoomiinsi dabaraa maasse'eena doo'llamaakkoo ixxi Awwaadaancho#3:26Ku Awwaadaancho yamamu sagar Giriikisinne Beeto te'im Awwaadaancho yamamookko. ki'isaa ki'nnuwwi beyyo asse'aakko» yukko.

Currently Selected:

Asse'amaa'n Baxo 3: KeesKita

Highlight

Copy