ดอ โฆว 8

ลอง เฌาพรา วี โหลห ดูอี

1วาย อัน ตี แฮะ ฮอต โนะ อู มาย็อห ดี พัน ฆึร ซีแง, เฌาพรา วี โหลห ดา อาโนว ตึอน. อัน วี โหลห บอ เฆ ดูอี บอ เฆ โดว ซัดดาวา เฆ อี กอย รึม โดบ อัน แคง รึร ซังโพว. เฌาพรา มืร แตห อึณ มึห คูน ตัห บูด แดง กาดาย แตห อึม วี แกร ดี โยม โลง. 2ปัน ตี อึม อี โตห นา ครึม วี ฮีด. บอ มาโลห แคง เบลณ วี กาบีด. ฆลาย บอ วี ฮัห. 3อึณ บอ ปึอน อู มาย็อห ดี พัน ฆึร ซีแง, อึม อี กอย แดง กาดาย วี แกร ดี โยม. 4บอ โนะ บู มาเฆียน ฆึร ดี บู ซีแง, รึร ซังโพว ตาง ตึอน วี แกร ดี โลง, กอย แดง นอน. นอน ตี จืร นอน อาราราด. 5อึม ยี แกร ดี โยม โลง กอ ฌัม ฆึร มาเฆียน. ดอ ฌัม ซีแง เหลห มาเฆียน ฆึร, อึณ แฮะ ปึอน ยึร กาแดะ นอน.

6บอ วี โนะ ปอ พวน ฆึร ซีแง, ดา อาโนว ตึอน วึห มาโลห แปะ แฮะ โบง อัน แคง รึร ซังโพว ตาง ตึอน. 7อัน มืร ดึห มากาอัะ อู โดว, เบลห นา เรต, แตห อัน บึณ. มากาอัะ ยี บึณ วีว, บึณ เวณ, กอ ฌัม อาคราว ฮีด อึม. 8แฮะ ฮอต ปัน ตี อาโนว วี เบลห ฮาว มาโบลย อู โดว, แตห อัน นับ โยว อึม แดง กาดาย แฮะ ฮีด. 9มาโบลย ตี ยี ตู ยึร โดง ดี ปึอน จูห. แฮะ ฮอต อัน บอ วี ตัห. อึม หณัม ฮีด แดง กาดาย. อาโนว ยี โซ็ง แด อัน, เหมต มาโบลย, แตห อัน วี ลึบ แคง รึร ซังโพว. 10วาย อัน ตี อัน วี หน็อะ ปอ บู ซีแง. แฮะ ฮอต, อัน วี แตห มาโบลย เลห ปอ อู จึบ. 11ซีแง ตี บา ดี อับ มาโบลย วี ตัห. อัน มืร กาบ ตัห หลา เฮ นามัน อี ลัต กามาย. ปัน ตี อาโนว แฮะ นับ, อึม แฮะ ฮีด แดง กาดาย, อาว ฮู มึห. 12ปัน ตี อัน วี หน็อะ ปอ บู ซีแง. แฮะ ฮอต, อัน วี แตห มาโบลย เลห. คา นี มาโบลย ยี ตู วี ตัห.

13ดอ แฮะ โนะ อาซาก อาโนว เดา มาย็อห ดี อู ซีนัม, แฮะ ฌัม มาเฆียน เหลห ซีแง เหลห, อึม แฮะ ฮีด โตต แดง กาดาย. ดอ อัน ตี อาโนว ตึอน บอ วึห กาตูะ รึร ซังโพว อัน. แตห อัน ปึอน ดี ยอด แดง กาดาย. 14ซีนัม ตี อึณ บอ ฌัม มาเฆียน ฮาอา ซีแง อา ฆึร ดี อึณบู, กาดาย บอ กาฮ็อห โตต.

15-16ปัน ตี เฌาพรา วี กาลาง ดี อาโนว ต็อห, “แตห แม เลห แคง รึร ซังโพว ตี. บอ แม, บอ อีบึณ แม, บอ เฆ ฆอน อีมาย แม, บอ เฆ เอา แม, แตห เบ เลห ดอน อี. 17บอ โดว ซัด อี กอย รึม โดบ แม บอ มาซีม, เฆ โดว ซัด อี กอย แคง นา, บอ โดว ซัด อี มึอน แดง กาดาย, แตห แม แตห เฆ เลห โดบ แม. แตห เฆ วี มึห ฆอน, แตห เฆ วี แกร ดี กืน แดง กาดาย.”

18เฌาพรา แฮะ ฮอต กาลาง ปาย ตี เฆ ดอน อี วี เลห แคง รึร ซังโพว. บอ อาโนว บอ ฆอน อัน บอ อีบึณ อัน เฆ เอา อัน, เฆ เลห โตต. 19บอ มาโดว แปร บอ มาซีม บอ โดว ซัด อี มึอน แดง กาดาย, อาโมยว เฆ ตี ดอน โมยว บอ เลห แคง รึร ซังโพว.

20วาย อัน ตี อาโนว ตึอน วี โบง กาโช็ง หลู ดี เฌาพรา. แคะ มึห มาโดว ซัด อี หมึอม ดอน โมยว, อัน ดึห มัง โดว. บอ มาซีม อี หมึอม ดอน โมยว, อัน ดึห มัง โดว, เบลห แดง กาโช็ง หลู ดี เฌาพรา, วี แตห อึณ แบน ปี หลู อี โดะ ดี เงา. 21เฌาพรา ยี ยึร อูห, อึณ แบน อูห หงูน ดี อัน. อัน ปี วี ต็อห, “โกบ กาเว โอว เฆ ดูอี อี กอย แดง กาดาย ดอน โมยว, โอว อาว ฮู ดืง กาดาย ดอ เหมา. โอว แฮะ นับ, ปี เฌณฌา เฆ ดูอี, ปี อึง เฆ, อึณ ตู อัห. อู ซีณ ดี แด เฆ, น็อห เฆ อาว หมึอม. มาแล, โอว ดี ตู วี ปยาต แวน โมยว อี มึห พึอม อี กอย แดง กาดาย. โอว ตู วี โบง ปี แปะ แฮะ โบง โอว ฌึร ตี ปอ อู เฌณ.

22เซ อึณ ซี มึห กาดาย นี, อึณ ดี มึห อาคราว ซัม, อาคราว โซะ. อึณ ดี มึห คราว ดีเรา บอ อาคราว ฆัด เฆียด, อาคราว ซอดาด บอ อาคราว ฆัด. อึณ ดี มึห กาแต ซีแง บอ แคง หมึร, ฮาว ปาย ตี อาว โตต ดอ เหมา.”

Currently Selected:

ดอ โฆว 8: pce

Highlight

Copy