ดอ โฆว 44

ลอง อาโยว วี เทว น็อห อีกัด อัน

1วาย อัน ตี อาโยว ตึอน วี จัร แดเจณ อัน ต็อห, “แตห แม ฮับ โหงว แคง จาน เฆ ดูอี ตี. แตห อึณ กืน แคะ ปึอน เฆ ดึห. แฮะ ฮอต, แม วี เบลห รึอน ดอน อี นา แดง โหงว แคง จาน ดอน อี. 2แม บอ โลว ดึห ซีลัยะ ปี เดียง โอว อี มูห รึอน, เบลห แคง จาน วา เตียะ, แตห อึณ กอย รึม โดบ รึอน แปะ แฮะ ดึห ตัห อัน อาดา โหงว.” อาโยว แฮะ ฮอต กาลาง ปาย ตี แดเจณ อัน วี โบง โตต ปี จัร อัน.

3ปา แคหณา ซีณวัห เจว เฆ อูกัด อูวา วี เลห, ดึห บอ โกรวกราม เฆ ปี เบลห เฆ แดง กาตูะ มาลา เฆ. 4เฆ แฮะ ฮอต เลห แคง มืง, ฮาว โดบ อึณเตณ อี แจก, อาโยว ตึอน วี ต็อห ดี แดเจณ อัน, “แม ยีต ฮาว ดอ ตี นี, โดบ เฆ. เซ แม กาตูณ เฆ, แม วี ต็อห ดี เฆ, ‘เหมา อึณปาย ปี โบง เบ นา ตู หมึอม ดี ดูอี อี โบง นา หมึอม ดี เบ? 5ซีลัยะ ปี ดึห เบ, อึณ มูห ซีลัยะ ปี เดียง ดา กาณา โอว. เซ อัน แมน เบดาง, อัน บอ โลว ตา ซีลัยะ ตี. เบ แฮะ โบง นา จีจีว ดี อัน.’”

6ปัน ตี แดเจณ ตึอน ฮาว กาตูณ เฆ, ต็อห ปี จัร ดา กาณา อัน ดี เฆ. 7เฆ อีกัด อาโยว ตึอน, เฆ ยี ต็อห, “เหมา อึณปาย ปี นับ ดา กาณา เย ดี ต็อห ปาย ตี? เย ตู ดึอม โบง มาเซ อี มูห นา จีจีว ฌึร ตี. 8แดง ตี, เย มืร แฮะ ดึห วีว รึอน ปี เบลห อัน แคง จาน เย ดอ ฮาว เย คา อาต. เหมา อึณปาย ปี ทาง แม, เย ดี ปรา รึอน เฆ ครีว แคง กาง ดา กาณา แม? 9อาเซ มึห ซีลัยะ ตี, อัน โลว ยัม. บอ เย ดอน อี ดี แบน หมาย ดา กาณา แม.”

10แดเจณ ตึอน วี ต็อห, “ปี ต็อห เบ แฮะ หมาน. มาแล, อาเซ มึห ซีลัยะ ตี, วี ตี ดี แบน หมาย ดา กาณา โอว. เบ อี เฮา ตู วี โลว คัม มาเซ.”

11ปัน ตี ดอน อี เบลห อูน จาน อัน, แตห อัน วึห ยอด. 12แดเจณ อาโยว ตึอน วี จูห ดี เหรต ซีลัยะ ตึอน ดี อีกัด วี ตาง, โลง แตห กอ ฌัม ดี วา วี เตียะ. อัน วี กาดูห ซีลัยะ ตึอน. อึณ กอย แคง จาน อาเบนยาม. 13เฆ บอ นับ ลอง อัน ตี, เฆ วี กลึร, วี กายาต ครึง เฆ. ดอน อี วี เบลห โกรว อัน แดง กาตูะ มาลา อัน. แฮะ ฮอต เฆ วี เวณ แคง มืง โดง กอย อาโยว ตึอน.

14ดอ ตัห ฌัม เฆ แคง กาง อาโยว ตึอน, อัน กอย หน็อะ เฆ. เฆ วี ครึบเครา ดี อาต อัน. 15อาโยว ตึอน วี ต็อห, “เหมา อึณ ปาย ปี โบง เบ นา ตู หมึอม ปาย ตี. เบ บอ นับ, เซ อึณ มูห ดา ตาง ปี โอว, อัน โลว แมน เบดาง.”

16อายูดา วี เวียะ โฆรห ตี ต็อห, “เย ตู นับ ดี ต็อห มาเซ ดี แม เฌา. เย ตู นับ มาเซ ปี ดี หมาณ เย ดี แม. เย ตู แป ดี กาลาง แตห แม หณึม ลอง ตู โบง เย หมาบ. อึณ มูห เฌาพรา, อัน แฮะ แตห ดอน อี นับ หมาบ ปี โบง เย. เย แฮะ ตัห โตต ดอน วี. บอ เย, บอ อี มึห ซีลัยะ แม แคง จาน อัน, เย ดอน อี แฮะ วี แบน หมาย แม.”

17อัน วี ต็อห, “อาว มูห ปาย ตี. วี อี มึห ซีลัยะ แคง จาน อัน, อัน ดี แบน หมาย โอว. เบ อี เฮา, เบ ปึอน ดี เวณ โดง กอย ฆูณ เบ.”

18ปัน ตี อายูดา ตึอน วี จูห ดี กาลาง โฆรห ต็อห, “อึย แม ดา กาณา โอว, แตห แม ควาง โอว กาลาง โฆรห ดี แม. แตห แม โทม โฆรห โอว. แกวะ แตห แม รู ดี โอว. โอว แฮะ นับ, ปวน แม ปี ปวน คูนดีคัม. 19แม แฮะ ดึอม ดีหมอด หมาย แม, ‘เบ ซี มึห ฆูณ บอ วา เบ?’ 20เย วี ต็อห ดี แม เฌา, ‘เย แฮะ มึห ฆูณ เย. อัน แฮะ กัด กาเซา. อัน บอ มึห ฆอน เตียะ. อีกัด ฆอน ตี แฮะ ฮอต ยัม. ปัน ตี อัน วี มึห ฆอน ปอ อู วี, ปี ฆึอด ดัว มา อัน ดี ฆูณ เย. โคว, ฆูณ ร็อก กาเซา ฆอน วี ตี.’

21ปัน ตี แม แฮะ ต็อห ‘แตห เบ ตึย วา เบ ตัห โดง กอย โอว, แตห โอว ยึร อัน.’ 22เย ยี กาลาง ดี แม, ‘เย ตู ปึอน ดี แตห วา เย ตึอน เลห โดง กอย ฆูณ อัน. ฆูณ อัน ดี ยัม, เซ อัน ดี เลห โดง กอย อัน.’ 23แม ยี ต็อห ดี เย, ‘เบ ตู ปึอน วี ตัห ดี นี, เซ วา เบ ตู ตัห โดบ เบ.’ 24ดอ ตัห ฌัม เย ดี โดง กอย ฆูณ เย, เย บอ กาลาง ดี อัน ลอง โฆรห แปะ แฮะ ต็อห แม เฌา. 25วาย อัน ตี ฆูณ เย แฮะ วี จัร เย ต็อห, ‘แตห เบ วี โลง มืง แอฆึบ ตึอน, จึห ปี ดี โฮม.’ 26เย วี ต็อห ดี อัน, ‘เซ เย ตู แดะ วา เย โดบ เย, เย ตู ปึอน ฮาว. เย ตู ปึอน ลาย ยึร ดี ดา กาณา ตึอน.’

27ฆูณ เย วี ต็อห, ‘เบ แฮะ นับ, อีบึณ โอว ตึอน มึห มี ฆอน อีมาย อา วี. 28อู วี แฮะ หราย. อึณ ปี เฆ โดว แปร แฮะ ก็อะ อัน. โอว ตู วี ยึร อัน กอ ฌัม อาตึร. 29ดอ ตี นี, เซ เบ ดี บอ ดึห ฆอน ตี, เซ อัน ดี บอ ฌัม ดูก, โอว ดี บอ ยัม โกบ กลึร โอว.’

30ดอ ตี นี, เซ โอว วี ฌัม ดี อาต ฆูณ โอว, 31เซ อัน นับ วา เย ตึอน ตู ตัห, ฆูณ เย ดี ยัม. อึณ ยี มูห หมาบ เย อี แตห ฆูณ เย ยัม โกบ กลึร น็อห อัน. 32โอว ยี แฮะ ดัว กาดีก ซัดฌา ดี ฆูณ โอว. โอว แฮะ ต็อห, ‘เซ โอว ตู แตห วา เย ตี วี ตัห ฌัม โดง กอย ฆูณ เย, อึณ ดี มูห หมาบ โอว. ฆูณ โอว โลว ดัม หมาบ ดี โอว บอ โจว โอว.’

33โคว, โอว หมาณ ดี แม เฌา, แตห โอว กอย ดี นี กาดาง อัน. แตห แม วี ควาง วา เย ฮาว เวณ รึม โดบ อีกัด อัน. 34เหมา โอว ดี บอ ปาย ดี เวณ ฌัม ดี อาต ฆูณ โอว, เซ วา โอว ตู โดบ โอว? โคว, โอว หมาณ, แกวะ แตห แม แตห โอว ยึร ดูก ตาง อี ดี ฌัม ดี ฆูณ โอว.”

Currently Selected:

ดอ โฆว 44: pce

Highlight

Copy