ดอ โฆว 20

ลอง อาบราฮัม กอย แคง มืง ฆีราด

1อาบราฮัม ตึอน ยี เลห โดง กอย อัน, ฮาว ฌัม แคง มืง นา เตต. อัน วี กอย ดี กาแต มืง ซาเดด ฆาย มืง ซูรา. อัน แบน แคต แคง กาดาย มืง อี จืร มืง ฆีราด. 2ดอ กอย อัน แคง มืง ตี, อัน กาลาง ลอง อีบึณ อัน ต็อห, “อัน มูห วา โอว.” ปัน ตี อึณ มึห คูนดีคัม แคง มืง ฆีราด ตึอน, อัน จืร อาบีเมน. อัน วี แดะ นาง ซารา ตัห โดง กอย อัน.

3แคง หมึร ดอ อึณบาว อัน เฌาพรา วี ตัห กาลาง โฆรห ดี คูนดีคัม ต็อห, “แม ดี ยัม, แม แฮะ ดึห อีบึณ อี.”

4คูนดีคัม อาบีเมน ยี หณัม ลาย อัน. อัน ต็อห, “แม เฌา, แม ดี บอ ง็อห แวน ดูอี เซ อัน ตู โบง หมาบ มาเซ? 5แม ตู นับ, อัน แฮะ ต็อห ดี โอว, ‘อีบึณ ตี มูห วา โอว?’ บอ อีบึณ แฮะ กาลาง ดี โอว ต็อห, ‘อัน มูห อีกัด โอว.’ โอว แฮะ มึห น็อห หมาน ดอ แดะ โอว อีบึณ ตี ตัห ดี โอว. โอว มืร ตู มึห ดี โบง หมาบ มาเซ.”

6อัน เฌา วี ต็อห ดอ อึณบาว อัน, “โอว แฮะ นับ, แม มึห น็อห หมาน ดอ แดะ แม นาง ตี. โคว, โอว แฮะ แร แม โบง หมาบ ดี อาต โอว. โอว ตู แตห แม ลาย อัน. 7ดอ ตี นี, แตห แม ยี วี ดัว อีบึณ เวณ โดง กอย อีมาย อัน. อัน มูห ดูอี อี บยาน โฆรห โอว. อัน โลว ซาคึร ดาง แม, แตห แม มึห อาซาก, แกวะ แตห แม ยัม. เซ แม ตู ดัว วีว อัน ดี อีมาย อัน, แม โลว นับ, บอ แม บอ เฆ อี กอย รึม โดบ แม, เบ ดี ยัม โตต.”

8ปา แคหณา ซีณวัห เจว, คูนดีคัม อาบีเมน ตึอน วี แดะ แดเจณ อัน ดอน อี ตัห โดง กอย อัน. อัน วี กาลาง โตต ลอง อัน ตี, แตห เฆ บอ นับ. เฆ ยี โยว กาเซา. 9ปัน ตี อัน บอ แดะ อาบราฮัม ต็อห, “มาเซ ปี โบง แม ดี เย? หมาบ มาเซ ปี โบง โอว ดี แม, แตห ปี โบง แม แบน หมาบ ดี โอว บอ ดี มาน มืง โอว? ปี ตู ปึอน โบง, แม แฮะ โบง ดี โอว.” 10คูนดีคัม อาบีเมน วี ต็อห, “มาเซ ปี คราม แม แคง น็อห แม ดอ โบง แม ปาย ตี?”

11อาบราฮัม วี ต็อห, “โอว แฮะ ทาง, แคง มืง นี, อึณ ตู มึห อาเซ อี โยว อี โรวเซ เฌาพรา. โอว บอ ทาง, โกบ มึห โอว อีบึณ ตี, เฆ ดี ง็อห แวน โอว. 12แดง นี, อึณ แฮะ หมาน, อัน มูห วา โอว. อัน มูห ฆอน ฆูณ โอว. อัน ยี ตู มูห ฆอน มา โอว. โคว อัน ตี, อัน แฮะ ปึอน แบน บอ อีบึณ โอว. 13ดอ แฮะ จัร เฌาพรา โอว เลห แคง โดง กอย บรีม โอว, แตห โอว ฮาว ฌัม แคง มืง อี เฮา, โอว แฮะ หมาณ ดี อีบึณ โอว ต็อห, ‘เซ แม ร็อก โอว, อาย บอ ฮาว นา เหมา, แตห แม ต็อห, โอว มูห อีกัด แม.’”

14ปัน ตี คูนดีคัม อาบีเมน วี ดึห มาบู เฆ มามัก แบน โดว แบน โดว, ดัว ดี อัน. บอ หมาย, อี มูห บอ อีมาย บอ อีบึณ, อัน ดึห ดัว ดี อาบราฮัม. บอ นาง ซารา อี มูห อีบึณ อาบราฮัม, อัน วี ดัว. 15คูนดีคัม วี กาลาง ดี อัน ต็อห, “แม ยึร มาน มืง โอว เฆ ตี. แตห แม กอย โดง อึง แม ดี กอย.”

16อัน วี ต็อห ดี นาง ซารา, “โอว บอ ดัว รึอน อู แหรณ โบ็ง ดี อีกัด แม, แตห รึอน ตี แบน รึอน ดัม ดาง ปี โบง โอว. เซ แม แฮะ ชึม ซาเร, อาตี วี แตห ดอน อี นับ, แม ตู โบง มาเซ อี ตู หมึอม.”

17ปัน ตี อาบราฮัม ซาคึร ดี เฌาพรา. เฌาพรา มืร โบง แตห บอ อาบีเมน บอ อีบึณ อัน บอ แดเจณ อัน วี แกน, แตห เฆ วี มึห ฆอน. 18คา อาต อัน เฌา แฮะ แตห อีบึณ ดอน วี อี กอย แคง กาง คูนดีคัม ตึอน แบน หมัน โกบ แฮะ ดึอม กอย นาง ซารา อี มูห อีบึณ อาบราฮัม แคง กาง คูนดีคัม อาบีเมน ตึอน.

Currently Selected:

ดอ โฆว 20: pce

Highlight

Copy