ดอ โฆว 13

ลอง อาบราม ฆาย อาโลด ลาย กาย็อห

1วาย อัน ตี อาบราม วี เลห แคง มืง แอฆึบ, โฮะ กอย นา กัว. บอ อัน บอ อีบึณ อัน บอ โกรวกราม อัน, แคะ ปี มึห อัน โตต ดอน โมยว, บอ อาโลด ตึอน, เฆ บอกาเฆลียด ฮาว รึม โดบ อัน. 2อาบราม ตึอน ยี ครัม กาเซา. บอ โดว ซัดดาวา บอ รึอน เฆ ครีว, อัน แฮะ มึห กืน กาเซา.

3อัน วี แกร ดี กาโทะ วีว, แตห อัน กอ วี ฌัม ดอน โปละ อี มูห โดง ดึอม กอย อัน อาต ฮาว อัน มืง แอฆึบ. แฮะ ฮอต, อัน วี ฌัม โดง คยัะ อัน คา อาต อี จืร เบดาเอน, อี กอย ดี กาแต มืง เบดาเอน ฆาย มืง อายี. 4อาตี มูห โดง แปะ แฮะ โบง อัน กาโช็ง หลู ดี เฌาพรา. อัน แฮะ ฮอต วี ฌัม โดง กอย อัน ตี, อัน วี กรึบ เฌาพรา.

5ยี มูห อาโลด ตึอน อี แฮะ โดบ อาบราม. บอ อัน แฮะ มึห มาบู เฆ มามัก. บอ ทึบ บีก แบน กาตูะ แบน กาตูะ อัน แฮะ มึห. 6มาน มืง โดง กอย ฆาย, อึณ ยี ตู กาว็อห, อึณ ตู ฆลึม อาดา แคะ ปี โลว ฆาย บอ อา วี. โกรวกราม ฆาย, ปี มึห ฆาย, อึณ แฮะ กืน, โคว, ฆาย ตู ปึอน กอย ลาย กาเครียะ. 7เฆ หมาย อี เฮียง โดว ซัด อาบราม บอ เฆ อี เฮียง โดว ซัด อาโลด, เฆ ลาย กาลูต แบน เฌณ แบน เฌณ. ดอ อัน ตี บอ เฆ ดูอี อาโมยว กานัณ บอ เฆ ดูอี อาโมยว เพเรซีด, เฆ ซี กอย แคง มืง ตึอน.

8ปัน ตี อาบราม ตึอน วี กาลาง โฆรห ดี อาโลด. อัน ต็อห, “อาย อา วี แฮะ มูห อู วอแว, แกวะ แตห อาย ลาย กาลูต. บอ เฆ ดา อี เฮียง โดว ซัด แม บอ เฆ ดา อี เฮียง โดว ซัด โอว, แกวะ แตห เฆ ลาย กาลูต. 9มาน มืง แฮะ ตาง โต็ง กาเซา. แตห แม กาย็อห ดี โอว. เซ แม ต็อห ดี ฮาว บลาก อาฆัะ, โอว ดี ฮาว บลาก อาอัห. เซ แม ซี ฮาว บลาก อาอัห, โอว ดี ฮาว บลาก อาฆัะ.”

10อาบราม แฮะ ฮอต กาลาง, อาโลด ตึอน วี ยอด มืง บอ มืง. อัน มืร ยึร ฆลัง อี กอย โคบ แบลง ยอดาน กอ ฌัม มืง โฌวอาน. กาดาย ตี แฮะ บอด. อึณ มึห อึม กืน ดี ตี. โดง ตี อึณ ปาย นี. อาต แวน เฌาพรา มืง โซวโดม ฆาย มืง โฆวโมว, กาดาย แคง มืง ตี แฮะ ปี กาปึม ปี โบง เฌาพรา. อึณ บอ ปี มืง แอฆึบ. 11โคว, อาโลด บอ ร็อห มืง บอ มืง อี กอย โคบ แบลง ยอดาน. อัน มืร ยีต อู เฌณ, ฮาว นา เลห ซีแง. ปาย ตี อาบราม ฆาย อาโลด ลาย กาย็อห. 12อาบราม กอย แคง มืง กานัณ ตึอน. อาโลด ยี ฮาว กอย ดี ฆลัง อี กอย โคบ แบลง ยอดาน ตึอน. อัน วี ซัม ทึบ บีก อัน กอ ฌัม โคบ มืง โซวโดม. 13เฆ ดูอี กอย แคง มืง โซวโดม ตึอน, เฆ ยี มืก กาเซา. เฌาพรา บอ ยึร, หมาบ เฆ แฮะ กืน.

14วาย แฮะ ฮอต อาโลด กาย็อห ดี อาบราม ตึอน, เฌาพรา วี ตัห กาลาง โฆรห ดี อัน ต็อห, “แตห แม ยอด ซีคยา, ยอด โดง กอย แม, แตห แม บอ ยอด นา กัว นา เตต, ยอด บอ นา เลห ซีแง, นา เฆต ซีแง. 15กาดาย ปี ยึร แม ดอน นา ดอน โปละ, โอว ดี ดัว โตต ดี แม, แตห อึณ แบน มาน มืง แม. บอ เฆ หลูกหลาน แม, เฆ ดี ปึอน กาดาย ตี, แตห กอ ฌัม ดอน โจว ดอน บาน. 16หลูกหลาน แม, เฆ ดี แบร กืน, แตห อึณ กืน ปี กาปูห แดง กาดาย. อาเซ แป ดี ตีห กาปูห อี กอย แดง กาดาย, อัน ดี บอ แป ดี ตีห แคะ กืน หลูกหลาน แม ตี. 17แตห แม ยีต ดอ ตี นี, ฮาว วีน ดี แล บอ มืง, แตห แม ฮาว แคะ โต็ง แคะ กาว็อห มืง, โอว ดี ดัว โตต ดี แม.”

18เฌาพรา แฮะ ฮอต กาลาง ปาย ตี อาบราม วี ยีต, ดึห บอ ทึบ บีก อัน, ฮาว คยัะ แบน โปละ แบน โปละ. แฮะ ฮอต, อัน วี ฮาว กอย ครึม เฮ เทเรบ อี กอย ดี ฆลัง อี จืร มัมเร.

Currently Selected:

ดอ โฆว 13: pce

Highlight

Copy