เลห 6

1วาย อัน ตี เฌาพรา วี ต็อห ดี อาโมวแซ, “ดอ ตี นี แม ดี ยึร ปี ดี โบง โอว ดี คูนดีคัม พาโรว. โอว ดี บยัะ ปวน โอว ดี อัน, แตห อัน ควาง เฆ ดูอี อีซาเรลัะ เลห แคง มืง อัน. อัน ฮี ยึร ปวน โอว, อัน ดี ซูต เฆ เลห แฮ แฮ แคง มืง อัน.”

2เฌาพรา วี ต็อห ดี อาโมวแซ, “โอว มูห อัน เฌา. 3โอว แฮะ ดึอม กาปลูห ดี อาบราฮัม, ดี อาแซก บอ ดี อาโกบ, แตห เฆ นับ, อึณ มูห โอว เฌาพรา, อี อึบ โตต ดอน โมยว. โอว ยี ตู ดึอม กาลาง ดี เฆ ลอง จืร โอว อี มูห อัน เฌา. 4แดง ตี, โอว แฮะ ดัว กาดีก ซัดฌา ดี เฆ. โอว แฮะ ต็อห ดี ดัว มืง กานัณ ดี เฆ, แตห อึณ แบน มืง เฆ. คา อาต มืง ตี แฮะ มูห มืง อี เฮา. เฆ แฮะ ฮาว วีน ดี แล แคง มืง ตี แบน แคต แคง มืง ตี. 5ดอ ตี นี โอว มืร แฮะ นับ ลอง ปี โลว คัม กาเซา เฆ ดูอี อีซาเรลัะ ดอ แบน เฆ หมาย แคง มืง แอฆึบ ตึอน. โอว มืร ตู ปีว กาดีก ซัดฌา ปี ดัว โอว ดี เฆ คา อาต.

6โคว อัน ตี, แม โลว กาลาง โฆรห โอว ดี เฆ ดูอี อีซาเรลัะ. แม โลว ต็อห, ‘เฌาพรา ต็อห ดี เบ, “โอว มูห อัน เฌา. โอว ดี แตห เบ เลห แคง ดูก ปี ดัว เฆ ดูอี แอฆึบ ดี เบ. โอว อาว ฮู แตห เบ แบน หมาย เฆ. โอว ดี บยัะ ดี เฆ แคะ ตาง ปวน โอว, แตห โอว ทูด เลห เบ ดี เฆ. โอว ดี ซูงพยาด ดารา ดี เฆ ดูอี แอฆึบ ตึอน, แตห เฆ คัม หมาบ เฆ.

7โอว ดี แตห เบ แบน ดูอี อาโมยว ปี อึบ โอว. โอว มืร แบน เฌาพรา ปี กรึบ เบ. ปัน ดี แตห โอว เบ เลห แคง มืง แอฆึบ ตี, เบ ดี บอ นับ ซีคยา, อึณ มูห โอว อัน เฌา อี มูห เฌาพรา ปี กรึบ เบ, โอว แฮะ แตห เบ เลห. 8ปัน ตี โอว ดี บอ ตึย เบ ฮาว ฌัม แคง มืง ปอ มืง. ลอง มืง ตี โอว แฮะ ดึอม ดัว กาดีก ซัดฌา ดี อาบราฮัม, บอ อาแซก เฆ อาโกบ. โอว แฮะ ต็อห, มืง ตี ดี แบน มืง เบ. อึณ มูห โอว อัน เฌา อี ดี โบง ปาย ตี.”’”

9เฌาพรา แฮะ ฮอต กาลาง โฆรห ตี, อาโมวแซ วี กาลาง โตต โฆรห ตี, แตห เฆ ดูอี อีซาเรลัะ วี โทม. เฆ ยี แฮะ แบน หมาย ดูอี เฮา, คัม ดูก ตาง, แตห อึณ บอ แบน น็อห เตียะ ดี เฆ. โคว, เฆ ตู ปึอน หณึม ปี ต็อห อัน.

10ดอ อัน ตี เฌาพรา วี กาลาง ดี อาโมวแซ ต็อห, 11“แตห แม ฮาว โดง กอย คูนดีคัม พาโรว อี อึบ มืง แอฆึบ, แตห แม จัร อัน ควาง เฆ ดูอี อีซาเรลัะ เลห แคง มืง อัน.”

12อาโมวแซ วี ต็อห ดี เฌาพรา, “โอว แฮะ ฮอต ต็อห ดี แม, โอว ตู มูห ดูอี อี กยัะ ดี กาลาง โฆรห ดี อี. ดอ ตี นี, เฆ ดูอี อีซาเรลัะ ตู วี โทม โฆรห โอว. ปาย ตี บอ คูนดีคัม พาโรว ดี บอ แวน โฆรห โอว.”

ลอง ฌาราง ดูอี แคง อึณกรึห อาโมวแซ ฆาย อาโรน

13เฌาพรา ยี ต็อห ดี อาโมวแซ ฆาย อาโรน, แตห ฆาย ฮาว กาลาง ดี เฆ ดูอี อีซาเรลัะ บอ ดี คูนดีคัม พาโรว, แตห เฆ นับ ลอง เฌาพรา ดี ตึย เฆ ดูอี อีซาเรลัะ เลห แคง มืง แอฆึบ.

14อานี มูห ฌาราง เฆ ฆีณ อึณกรึห อาโมวแซ ฆาย อาโรน ตึอน, เฆ อี แฮะ กอย อาต กอย ฆาย. เฆ ฆอน อีมาย อารูเบน อี มูห ฆอน ฆีณ อาโกบ ตึอน, เฆ จืร อาฮาน, อาพาลู, อาเฮฌาโรน บอ อาคามี. เฆ ดูอี ตี วี แบน ฆีณ แคง อึณโฮม เฆ อี มูห ฆอน อารูเบน ตึอน.

15เฆ ฆอน อีมาย อาซีเมโอน จืร อาเยมูเอน, อายามีน, อาโฌวฮาน, อายาคีน, อาโฌวอาน บอ อาซาอูน. ดูอี เฆ ตี วี แบน ฆีณ อึณกรึห เฆ อี มูห ฆอน อาซีเมโอน. มา อาซาโอน ตึอน มูห อาโมยว ดูอี กานัณ.

16เฆ ฆอน อีมาย อาเลวี จืร อาเฆนราโซน, อาโควฮาด บอ อาเมนรารี. ดอ อาซาก อาเลวี แฮะ โนะ อู มาย็อห ดี โอย ฆึร ดี บู ซีนัม อัน บอ ยัม.

17ฆอน อีมาย อาเฆนราโซน จืร อาลีบานี บอ อาซีมี. ฆาย บอ แบน ฆีณ อึณกรึห ฆาย.

18ฆอน อีมาย อาโควฮาด ตึอน มูห อามารัม, อาอีฌาฮา, อาเฮโบรว บอ อาอูซีเอน. อาโควฮาด ตึอน, ดอ โนะ อาซาก อัน อู มาย็อห ดี โอย ฆึร ดี โอย ซีนัม, อัน บอ ยัม.

19ฆอน อีมาย อาเมนรารี ตึอน มูห อามาลี บอ อามูซี.

อานี มูห อึณกรึห เฆ ฆอน อาเลวี อี แฮะ แดม อูน แคง ฌาราง.

20อามารัม ตึอน วี ลาย นาง โยวเคเบด, อี มูห วา ฆูณ อัน, แตห อัน แบน อีบึณ อัน. นาง โยวเคเบด ตึอน บอ มึห ฆอน อีมาย อี จืร อาโรน ฆาย อาโมวแซ. อามารัม ตึอน, อาซาก อัน บอ โนะ อู มาย็อห ดี โอย ฆึร ดี บู ซีนัม, อัน บอ ยัม.

21ฆอน อีมาย อาอีฌาฮา ตึอน มูห อาโควรา, อาเนเพก บอ อาฌีคารี.

22ฆอน อีมาย อาอูซีเอน ตึอน มูห อามีซาเอน, อาเอนซาพาน บอ อาซีทารี.

23อาโรน ตึอน ลาย นาง เอลีเซบา, แตห อัน แบน อีบึณ อัน. อีบึณ อัน ตี มูห ฆอน อามีนาดาบ บอ วา อานาโชน. นาง เอลีเซบา ตึอน มึห ฆอน อีมาย พวน วี. เฆ จืร อานาดาบ, อาบีฮู, อาเลอาซา บอ อาอีทามา.

24ฆอน อีมาย อาโควรา มูห อาซีรา, อาเอนคานา บอ อาบียาซาบ. ดูอี เฆ ตี, แฮะ วี แบน ฆีณ อึณโฮม เฆ ดูอี อาโควราด ตึอน.

25อาเลอาซา อี มูห ฆอน อีมาย อาโรน ตึอน, อัน ลาย ฆอน อีบึณ อาปูทีเอน, แตห อัน แบน อีบึณ อัน. อีบึณ อัน ตี, อัน มึห ฆอน อีมาย อู วี อี จืร อาพีเนฮาด. อาตี มูห ฌาราง เฆ ดอน อี อี มูห หลูกหลาน อาเลวี ตึอน. อึณ โดบ แบน อึณกรึห แบน อึณกรึห.

26อึณ ยี มูห อาโรน ฆาย อาโมวแซ, ฆาย แฮะ ดึอม โทม โฆรห เฌาพรา. เฌาพรา แฮะ ดึอม ต็อห ดี ฆาย, “บาย โลว แยต เฆ ดูอี อีซาเรลัะ แตห เฆ เลห แคง มืง แอฆึบ, แตห เฆ ฮาว แบน พึง แบน พึง.”

27อึณ บอ มูห อาโมวแซ ฆาย อาโรน, ฆาย แฮะ ฮาว โดง กอย คูนดีคัม แคง มืง แอฆึบ บอ หมาณ, แตห อัน แตห เฆ ดูอี อีซาเรลัะ เลห ฮาว แคง มืง อัน. อึณ บอ มูห อาโมวแซ ฆาย อาโรน อี แฮะ โบง ฌึร ตี ดอน โมยว.

28คา อาต ดอ กาลาง เฌาพรา ดี อาโมวแซ, ดอ กอย อัน แคง มืง แอฆึบ, เฌาพรา แฮะ ฮอต ต็อห, 29“โอว มูห อัน เฌา. แม โลว กาลาง โฆรห โอว ดี คูนดีคัม พาโรว อี อึบ มืง แอฆึบ, แตห อัน นับ โฆรห ปี ต็อห โอว ดอน แด.”

30อาโมวแซ ยี วี ต็อห ดี เฌาพรา, “โอว ตู มูห ดูอี อี กยัะ ดี กาลาง โฆรห ดี อี. โกบ อึณ ปาย ตี เหมา คูนดีคัม พาโรว ดี ปาย ดี โทม โฆรห ปี ดี กาลาง โอว ดี อัน?”

Currently Selected:

เลห 6: pce

Highlight

Copy