Luke 13

Lekaala etuma e be

1Ma ntini yoankulu yia baari ake ayi baga Zezi bo ŋa nde ndi: «Pilate okunji a bungu ma atuma kabuma baari ba kangundu ka Ngalile, baakiigi sa ambwoŋi kanca Njo Njyami. Ŋaa togi le bo levuniŋi bila le anyama ba ambwoŋi.» 2Ŋaa Zezi alyele ŋa bo ndi: «Ŋaa be le cimiŋa ni, baari a Ngalile ba amani ma kabuma baa, avuli amaami maabi ma baari baamon ba Ngalile ba siili? 3Kali, mi eyieze be ni be lebiza kaala eku e be, bwa be le kpaa mva ka kpi bo. 4Be lekini lebaraga baari ba kwumu ŋa mpuomon, ba bumi njo yeela ye Silowe yeevi yila bo. Be le cimiŋa ni bo ŋaa kiigi bo avuli baari bwozi a Zerizaleme ma amaami maabi? 5Kali, mi eyieze be ni, be lebiza kaala etuma e be, bwa be aso le kpaa mva ka kpi bo.»

Oti kabiza mpa mburu acagi

6Ŋaa amana Zezi vuri ti bo se ngana yi ndi: «Balaga lemon lekuni ofingye kanca ngwunu a nde ye vinye. Cugu leto nde yi ma katolo mburu ofingye, ŋaa nde ki baga ŋi. 7Ŋaa nde alyele ŋa ojanji angwunu a nde ndi: Ma mono! Yiga esibi etari beeya kese mi mburu kayila ofingye wu, ŋaa mi eka baga ŋi, nde ma kala biri yi kalakali caga nde! 8Ŋaa ojanji ŋa nde ndi: Kolokolo we mfumu a mi, sa nyina nde kasibi ki, mi kini esata nde obagi ka mbere, ŋaa mi lege mbori. 9Maasa asimi kalakala nde akula, ŋa nde kabiza kula yiga we abuna caga.»

Zezi mi cura kapundu keebi

10Cugu le baawuuma, Zezi kayiziga kanca okuga omon. 11Ŋaa nca ŋaa, kiigi ŋa okaazi eli kapundu keebi kamon kama ampa nde kaleme, yiga esibi kwumu ŋa mpuomon. Nde kiigi yiga ŋa onkoro, ŋaa nde kiigi yiga kibuna kaka tele ŋi. 12Ŋaa Zezi kamono okaazi wua, nde cwoli nde, ŋaa nde ŋa okaazi wua ndi: «Kaleme ka we ka mi cyege.» 13Zezi legi jiala kayila nde, ŋaa kancinci ŋaa okaazi wua vuri vurigi tele, ŋaa nde yiga ampa Njyami leve. 14Ŋaa ma ntini yia, mfumu okuga wua biri nkeri kabila Zezi mi salaga obieri ma cugu le ba awuuma. Ŋaa nde yiga alyele ŋa okuga ndi: «Ecugu baasa ma kajanja esyami, leya asalaga be ma ecugu bia, ŋaa kama cugu le ba awuuma ŋi.» 15Ŋaa Mfumu akaala ŋa nde ndi: «Kura le be lia, ma cugu le ba awuuma be ni le pisa angoombi sikali anyama akima, ma kaje mpa bo anja? 16Ŋaa okaazi wu se mwana Abarayame, eli Satan ma kura nde yiga esibi kwumu ŋa mpwomon, abiza nde ngayi yia kacyeze ma lo leeli cugu le ba awuuma?» 17Ŋaa Zezi akaala bwa, angaa mbele nde amoni okuru boonini, ŋaa okuga oso yiga aswere ma maami maasa Zezi maave.

Ngana ye lemburu lekyege bila ye anganga

18Zezi avura lyele ndi: «Omfumu o Njyami ema owuana, Ŋaa mi bo meema eyezege? 19Bo oma awuana lemburu lekyege, le mbuuru a balaga omon le kayaga, le kakuna nca letobo. Lo lemene, yiga le kirigi oti. Ŋaa anyoyi a yulu ayi cua kayila antaga.»

20Nde avura lyele ndi: «Mi omfumu o Njyami ma ema eyezege. 21Bo oma wuana anganga eli okaazi omon ma ayaga, maalege nca bege le farini, ŋaa farini selegi kumi.»

Lesa mpari ma kanyunuŋa ma kadubugu ke kiege

22Zezi kiigi je nca engundu ŋa ampugu, ma kayiziga mbari a Njyami ŋaa ma kaje kacu ka Zerizaleme. 23Ŋaa mbuuru omon apiza ŋa nde ndi: «Mfumu, Njyami baari ba kavuzuga nceti a otu?» 24Ŋaa Zezi akaala ŋa nde ndi: «Lesa mpari ma kanyunuŋa ma kadubugu ke kiege, ma kanyunuŋa nca omfumu o Njyami. Ee mi elyele be ni kuna le baari baasaga kanyunuŋa, ŋaa bo ba akabuna ŋi.»

25«Ŋaa ntini ye saraga nga njo, ma kabiinda aka be lekini ka njii, be leya, be leberege njo ma kalyele ni, Mfumu naana bizi njo. Nde akaala ŋa be ndi mi kiyaa be ŋi. 26Ŋaa be leje kalyele nde ni: Bizi leji, lenyui bila we, we yizigi nca a mpugu a bizi.» 27Ŋaa mfumu a njo aje ka kaala ndi: Mi kiyaa be ŋi. Lecyege mpaana mi, be ba lesa maami maabi. 28Yia biri ye alila be, ye aja be myi, ŋaa be le mono Abarayame bila Izake, ŋa Zakobe, ŋa antuma Njyami a ncie aso, kanca omfumu o Njyami ŋa ka ba acuna be kajii. 29Baari ba waa e biri eso e yila ncie, bo baasa cinda leenini nca mpugu a Njyami. 30Ŋaa yiga baari baa abaaka kabiza yiga levuzu, ŋaa baa abaaka levuzu yiga mbiza.

Zezi alila ma baari a Zerizaleme

31Ntini yia afarizi ake ayi mono Zezi, bo ŋa nde ndi: «Ciege ŋa, je kacu ka kima, kabila Erode wo mfumu kasi asaga buma we.» 32Zezi akaala ŋa bo ndi: «Leje lyele ŋa nga perepere wo Erode wua ni: Ŋaa lubu ŋa mbari mi ecura epundu beebi, mi esalaga abyeri, ŋaa cugu le otari mi mana. 33Bwa yemiŋi, mi eva ma njila lubu, mbari bila cugu le otari, kabila ntuma Njyami ave kakpaa ka kasi ka Zerizaleme, ka kangula kasi ka kima ŋi.»

34Amana Zezi ndi: «Ee! asi Zerizaleme, asi Zerizaleme! Be ba lebuma antuma Njyami, ŋa be ba lebuma antuma Njyami, ba buma be ma akele, nja kpe ye sagi vusa mi baana a we kampana mi, mva ka awuga ncuzu baana a nde kancina ayiaba! Ŋaa be le ki jya ŋi. 35Yia biri eli Njyami anyina be bila njo be. Ee! Mi elyele be, be leka ma mono mi ŋi, tii ntini eli be lelyele ni: Njyami mpa mbuuru wo aya ma nkuumu a we puga.»

Currently Selected:

Luke 13: teg

Highlight

Copy