Esima 20

Opinga o Poole ka Masedoyine ŋa ka Grese

1Ŋaa ngimiŋa ewaa, Poole kuzigi alwoni ŋa mpi bo kawasi. Amana, nde mpi bo olasi ndi yiga kalakala, ŋa yeni Masedoyine. 2Nde kayira nca bungu lia, kaŋaa, nde kawasa ayaligi ma kalyele kuna bila bo. Amana nde toyi Grese 3osi angondo atari. Ma ntini ye ba ayaga vaari ma kaje Syri, nde yugi ndi aZife ba akura ncwumu ma kasa nde jaa leebi. Ŋaa nde kuru ma ya kavuruga Masedoyine. 4Sopatere, mwana Pyribuse wo balaga, ka kangundu ka Bere, baakiigi yila nde, bila Arisetareke ŋa Sekunduse ba Tesalonike, Ngayiyuse wo Derebe, Timote, Ticike ŋa Terofime ba bungu le Azi. 5Bo ayeni levuzu le bizi, ma kaje njila bizi ka Teroyase. 6Ŋaa ma bizi, bizi lekumi nca vaari ka Filipe amana cugu le ampeebe mama abiza lwula, ŋa ecugu etaani eyira, bizi le toyi ŋa levuniŋi bila abuga a bizi ba opinga ka Teroyase. Bizi le ki ŋa oluna omon.

Poole ka Teroyase

7Ma cugu le ncomi le oluna, bizi lekugi ma ka kaba lempeembe. Poole yagi mbari ka levuzu le adumu ba akiricye, ŋa nde kiigi aje enyuzuga, nde seligi wobi mbari a nde tii cugu oyili. 8Kiigi ŋa bege le amunda nca katini kayulu kanca njo ka kiigi kuga bizi. 9Ŋaa onkere balaga omon nkuumu Etyce kiigi manci kapaana kaliniŋi. Nde ci tolo leenini ma ntini ye kiigi lyele Poole kuna kuna, tolo lebiri nde vi ma ncie kaka kafi yila etasi ba etari e njo. Ŋaa ka le manyusa nde, nde kiigi ma kpa. 10Ŋaa Poole surugi, kumuŋi yila nde, yagi nde nca njyala e nde, ŋa dugi ndi: «Lebiza kabaraga, nde kini mwon!» 11Amana Poole kumi, nde kabi lempeembe ŋa aji. Ŋa nde vuri wobi kuna tii eciri, ŋa nde yeni. 12Amana bwa, ayivuruga bila onkere balaga mwon yemiŋi, ŋa aso abagi kawasi.

Opinga o Teroyase ka Milete

13Bizi leyeni levuzu ma ka kuma yila vaari ma kaje Asose ŋa kaŋaa, bizi leyagi Poole bila bizi. Okorogo, nde kiigi ma kura ncwumu ma kaje ma njila. 14Poole yi bazaga bizi ka Asose, bizi leyagi nde yila vaari ŋa bizi leyeni Mitilene. 15Kaŋaa, bizi levurugi ma vaari ŋa enyuzuga letoyi ka levuzu le kajeneŋe le okeri ka Ciyo. Cugu le elwoni, bizi letoyi Samose ŋa cugu amana ka Milete. 16Okorogo, Poole kiigi ma akura ma ka yira ka levuzu le Efeze eli nde aka buna kasuga ma kavura ka eli tari leyira nca bungu le Azi ŋi. Nde seligi yiri waawaa ma kaka ka Zerizaleme ma cugu le Patekote, aka abuna.

Poole alyele ŋa ankwuru ba Efeze

17Poole tumi osizigi omon ka Milete ŋa Efeze ma kasa kaya ankwuru ba Okuga. 18Ŋaa bo aya katuga nde, nde ŋa bo ndi: «Be leyayi lemigi le kiigi mi bila be, ma antini aso kaasa baana mi cugu le ncomi le toyi mi nca bungu le Azi. 19Mi janji ma Mfumu bila onyimi oso, nca ancia, ŋa nca mpasi, okorogo, aZife ake asagi mpa mi mpasi. 20Be leyayi ni mi kiigi empa be mbari a Njyami eli ki swogo be jaa se lemon ŋi, ma kayiziga be amaami aso mama yamba be, se ka levuzu le baari aso, se nca anjo a be. 21Mi cwoli aZife ŋa anGereke ma kakala etuma ma Njyami ŋa ma kayalaga Mfumu a bizi a be Zezi. 22Ŋa yiga mi eje Zerizaleme, mva Oduduma Santi dugi ni ave mi sa, ŋa mi ki ya ma ebaga mi kakwa ŋi. 23Mi yayi ni, nca kangundu ŋa kangundu, Oduduma Santi ma ayieze mi ndi esia ba ankozo bila ampasi ma ajila mi. 24Ŋaa omuon wo mi ki kalogo ka miizi a mi ŋi, ka eji mi, ma kaduma nciini tii kato mi ncuo, bila ma kamana janja le Mfumu Zezi le kalegi nca njiala e mi: kampa ncia yeemve ye puga le Njyami.

25«Mi yiri kanca paniŋi a be aso ma kampa omfumu o Njyami, ŋaa yiga mi yayi, se mbuuru omon aka ma mono mi ŋi. 26Ŋaa meema, mi elyele be lubu: mi cece ma togi le be aso. 27Okorogo mi dugi be aso a Njyami kiigi ma ka kuru, Mi ki swogo be kalogo ŋi. 28Lesa oyeri yemiŋi ma be-ankulu ŋa ma endombo eso eli Oduduma Santi ma ampa be ma kakyele. Mva okyele endombo, leselege Okuga a Njyami wo kabagi ma togi le mwana nde-ankulu. 29Mi yayi ni ka emana je mi, abalaga baali mva anyama ankeri ba anyunuŋa kanca paniŋi a be, ŋa bo ba ka baga nya ma endombo ŋi. 30Ŋa kanca paniŋi be-ankulu, baari ba asaraga ŋa ba alyele amaami ma alaa ma kajiima alwoni ngula bo. 31Lesa oyeri ŋa be lebarigi ni ntini ye esibi etari, cugu bila lempiibi, mi kiigi mpa be adwo antini aso mbuuru omon ŋa omon nca be, se bila ancia.

32«Ŋa yiga mi enyina be ŋa Njyami ŋa ma mbari e puga le nde. Nde ŋa mpari ma kasa be kayele nca lila ŋa ma kampa be kabaga eli nde ma akyele ma aso baali ba nde. 33Mi eka njya si ampara, si nore, si amfa a mbuuru ŋi. 34Be leyayi ma be ankulu ni mi janji ma njyala e mi ankulu ma kabaga omwon o mi ŋa omwon ba akiigi yira bila mi. 35Mi e mvyere be ma eso ave le janji bwa ma kaya yamba afuga, ŋa ma kabaraga ambari eli Mfumu Zezi nde-ankulu alyele: “Ŋaa kase kavuli kampa ka kayaga ŋi.”»

36Ma ntini ye Poole kamani ka lyele, nde vi maabwu ŋa nde bwoni bila bo aso. 37Ŋaa aso akiigi lila, ŋa ayi va kayila kii ye Poole ŋa apori nde. 38Bo kiigi avuli moni obi meema Poole kiigi lyele ndi bo baaka ma vura mono nde ŋi. Amana bo ayi yila nde tii vaari.

Currently Selected:

Esima 20: teg

Highlight

Copy