Bemba 4

Pyɛli na Za o boho bwa yumbu ya menɛni mwa ba-Zufi

1Usya Pyɛli na Za bajasa o bosɔhɔkɔ na lupu, bawe ba bebuwa, na menɛni mya bakɔle belongwɛ ya Zambe na basadusɛyɛni te baya, 2bango te banganya buce usya bango bayɛnɛsɛ Pyɛli na Za ihɛlɛcɛ lupu maheya na itandaka te Zɛzi eyomwa na malonga. 3Ya ba banda bango na ihujɛcɛ bango o joko, ibokaka kwaji bosina te yajasa na ikɔ. 4Opanga bato bayokasa iyɔkɔ ja Zambe buce bakala babukwɛ, bajasa emba nda batɔsini jonwu (5 000).

5O nyate ya buya bwɛ na kwaji, bakapita, bakombo, na menɛni mya ango, na melɔnji mya Nceko, basɔnɔ bya Zɛluzalɛmi 6bango na nɛni mwa bawe bebuwa Hani, kayifi, Za, Alikisandi na baji o buka bwa bawe ba bebuwa bahajɛ. 7Ya bango batɛjɛ Pyɛli na Za o lebelebe ya bango na ihimwaka bango te: «bya amuhaka moto otɛ na tuma ya jinɔ ja za?»

8Usɛ Pyɛli, ajasa humɔn na Ekokoyi ya Pu, asɔhɔ na bango te: «Bakapita ba lupu na Bakombo, 9bahimwa bɛhɛ mwɛnhɛ emba ya mbɛ ya bamubeka na moto aji ekata, te bɛhɛ batandace nda ango amuyonga, 10Ye bakayi o bweji, bihi bahajɛ na lupu ja hajɛ ja Izahɛli: na jinɔ ja Zɛzi-Kilisitɛ wa Nazalɛti wa bihi bya mundɔmɛ o kuluwa wa Zambe amuyomwɛ o malonga, na tuma eji ya Moto otɛ aji tɛtɛ o boho bwa bihi. 11Ango imanya ja bihi balonge bafasa, ja hunwana imanya ja pizo buce ja yata Elongwɛ. 12Hamama ijate jinɔ ja enyɛni ipokwa, bosina te o mɔngɔ mutɛ teka ijate jinɔ ja Zambe awɛ na bato, ja mini beyongaka na jango.»

13Usya bango bayɛnɛsɛ ibukwɛ ja Pyɛli na Za, bango te bayenɛ ngambala, na bosina bwa bango bayebasa te yɛ lupu ja bato ba teka yeba makana bayembya te yɛ bato ba jongakasa na Zɛzi. 14Nde usya bango bayɛnɛsɛ moto wa bahakasa tɛtɛ okuna ango, bango teka minɛ ekana. 15Ya bango baloma bango ipwaka o yumbu ya inɛni ya ba-Zufi bango te bahisa tatuba opanga ango, 16Na isɔhɔkɔ te mini ebekaka na bato batɛ na, bosina te bekaka iyambala ya jɛ mombo na bato bahajɛ ba Zɛluzalɛmi, usɛ mini bakusi cɛcɛ. 17Nde mini abekace te itandu mwɛ teka landanga opanga Lupu, mini himbace bango na inganyaka te bango teka mici isɔhɔ na moto nde moto na jinɔ ja Zɛzi.

18Ya bango babanga Pyɛli na Za, na iyimbaka bango mombo te bango teka tɔbɔ na ihɛlɛcɛ maheya na lupu na jinɔ ja Zɛzi. 19Ya Pyɛli na Za bahungwɛ na bango te: yajɛ obwɛji hongololo oboho bwa Zambe ijaka na mabiya na bihi kate na Zambe? Bihi mɛnɛ bipaba. 20Bosina te bɛhɛ bakusi ja teka tanda emba ya bɛhɛ bamuyoka na iyɛnɛcɛ. 21Bakombo bayumbu ya menɛni ya ba-Zufi bahunwana bonganyaka, onyate mɛnɛ bayɛjɛ te bango, bosina te bikumɛsɛ na emba ya bango benyɛni hujɛ bango o nyahu, na bosina te lupu jahajɛ, ja somɛkɛsɛ Zambe na emba ya hulangasa. 22Bosina te moto ahakubwɛsɛ na iyambala ajasa na menkola memboto menanyi na iko (40).

Membɔndu mya Babukwe

23Usya bayɛjɛsɛ bango, Pyɛli na Za, balwa bya bananyangwɛ bango baji na ilazɛcɛ bemba bya menɛni mya bawe ba bebuwa na bakombo basɔhɔsɔ na bango. 24Usya bango bahajɛ bayokasa nɛ, ya babukwe na lema mɔkɔ babɔndɔ Zambe te: «Lɔnji, ɔbɛ o huna iko na hehe na zowa ya macemba, na byaji okate byahajɛ. 25Ɔbɛ o tandasa na Tata aho Davidi wa njazi mwɔbɛ na pizo ya Ekokoyi ya Pu:

“Sina ya baji teka ja bazufi baji kabakaba nde?

Sina ya lupu jaji na matemanga nɛnɛ nde?

26Menkani mya hehe mye kota ngumba wa ibaji

na bakapita nyesɔnɔ iyanaka ibaji na Ku na iyanaka ibaji na Kilisitɛ eji.”

27Ya je mombo, Elodi na Pɔnsi Pilati bahangwana na bateka ja ba-zufi o etafɛlɛ etɛ, na imate malɔngɔ, na lupu ja izahɛli iyanaka ibaji, na Zɛzi wa njazi mɔbɛ mwa Pu, mwa ɔbɔnɔsɔ 28na janga mwɛ, bango babeke bemba bya osijɛsɛ, bya ohakasa boho bya hajɛ na pizo ɔbɛ. 29Nde osatɛ, Ku, yɛnɛcɛ nda bango banganya na bɛhɛ, wɛcɛ menjazi myombɛ pizo ja itandaka iyɔkɔ jɔmbɛ na ibukwɛ ja buce. 30Wɛcɛ bɛhɛ pizo ya hakaka membɛlu, na ibekaka mandembo na mayambala na bemba bya ngambala na jinɔ ja njazi mɔmbɛ mwa Pu Zɛzi.» 31Usya, bango bahijɛsɛ bobɔndɔngɔkɔ, isi ya bango bajasa ya ningana ahajɛ bajasa bahajɛ humɔ na Ekokoyi ya Pu, batandakasa iyɔkɔ ja Zambe na ibukwɛ ja buce.

Babukwe bakaba bemba bya ango

32Babukwɛ buce bajasa isi ɛkɔ, na lema mɔkɔ na Ekokoi ɛkɔ bosina te opanga ango teka na moto nde moto asɔhɔkɔsɔ te bemba bitɛ ibyamɛ amɛnɛ nde bemba bya ango bya ajakasa isi yɛkɔ. 33Na tuma ya buce, batɔtu bakɔbɛ batandakasa iyomwe ja Ku Zɛzi, na ngamo ya inɛnɛ ya ajasa na bango bahajɛ. 34Opanga ango, ndeka moto ajasa nɛnɛ bosina te, bajasa na makumba ice belongwɛ bahombakasa byango, bayakasa na balɔlɔ babemba byɛ 35na iyaka iwɛcɛ na batɔtu, ya bango bakaba balɔlɔ, moto akwa ngambo ya koka neji.

36Usɛ Zozɛfi wa ntɔtu, moto wa buka bwa Levi, ajasa wa ndobe ya chipili, batɔtu bawɛsɛ ango kombo te Banabasi (isɔhɔkɔ te: asomɛ) 37ahombakasa bokumani na makuba na iyaka, iwɛcɛ balɔlɔ na batɔtu.

Currently Selected:

Bemba 4: KOQ

Highlight

Copy