Luuka 21:25-27

ɄYeesu ahajendeelela ayanje ahaga, “Vyahayiloleha ɨvimanyishizyo hwi‑isanya, hu mwezi na hu nzota. Nantele mu nsi ʉmu, ɨnsʉmbi zyahayibha na mabhilingwa amagoosi amamwamu tee. Ɨlyo lyahayihubhabhomba abhantu abhɨ nsi zyonti huje, bhagundushe na‑abhe nʉ wooga tee. Ɨgo gonti lwa gafumila mu nsi, abhantu bhahayiziliha amooyo hu nongwa yɨ wooga ʉgoosi. Bhahayisɨɨbhaga huje, ʉlʉgʉ ʉgoosi wuhwɨnza hu nongwa ya‑aje, ɨvintu vyonti ɨvya hu mwanya vyahayiyinga. Ɨpo abhantu bhonti bhahayihundola anɨ nɨMwana wa Muntu ɨhwɨnza mu mabhɨngo hwi‑ikhone ɨlinji nʉ mwamu ʉgoosi.