Yoohani 5

ɄYeesu ahumʼponia ʉmuntu wa‑alemɨɨye amanama

1Lwa gaashila ɨgo, ʉYeesu ahaweela hwi‑ibooma ɨlyɨ Yelusaleemu ahwanje ɨshikulukulu shimo ɨsha Bhayahuudi. 2Ʉhwo hu Yelusaleemu hwahali ni‑ilyango igoosi ɨlyo itaawa lyakwe bhahagaga lyɨ Ngoole.#5:2 lyɨ Ngoole Abhazenji bhahalizyʉngʉzɨɨzye ibooma ɨlyɨ Yelusaleemu nʉ lubhʉmba lwɨ mawe ʉlwo lwahali na malyango amagoosi gaminji. Shila lyango lyahali ni‑itaawa lyakwe. Ilyango limo bhahalikwizyaga lyɨ Ngoole pɨpo lyahali mu pɨɨpɨ nɨ lembuka, hwa bhahakazyaga ɨngoole nɨ vyʉma ɨvyɨnjɨ. Bhaazya Nehemiya 3:1; 12:39. Mu pɨɨpɨ mwi‑ilyango ɨlyo hwahali ni‑idiimi lyɨ mɨnzɨ ɨlyo itaawa lyakwe mu njango yaabho ɨyɨ Shiebulaniya bhahagaga Betizaata.#5:2 ƗBetizaata mu njango ɨyɨ Shiebulaniya hwa huje, ɨNyumba yɨ Nkʉmbʉ. Nantele pahali nɨ mpanda zisaanu zya zyahali na manyooha. Ɨmpanda ɨzyo zyahalizyʉngʉlɨɨye idiimi ɨlyo. 3Mu nzunda yɨ mpanda ɨzyo, bhahali bhagona abhabhinu abhinji. Mu bhabhinu ɨbho bhahalɨɨho abhantonko, abhalemazu na bha bhafwiye hundwɨmo. Ɨbho bhahagʉlɨlaga amɨnzɨ huje gande avwalangane, 4pɨpo ʉnʼtumi wa Ngʉlʉbhɨ ahɨnzaga na hugavwalanganye amɨnzɨ mwi‑idiimi liila. Ɨshi ʉmʼminu wa‑ahabhanga wa hwande atʉʉshe mwi‑idiimi, ahaponaga ʉbhinu waakwe ʉwo ahali nawo.#5:3-4 Ɨbho bhahagʉlɨlaga amɨnzɨ huje gande avwalangane, pɨpo ʉnʼtumi wa Ngʉlʉbhɨ ahɨnzaga na hugavwalanganye amɨnzɨ mwi‑idiimi liila. Ɨshi ʉmʼminu wa‑ahabhanga wa hwande atʉʉshe mwi‑idiimi, ahaponaga ʉbhinu waakwe ʉwo ahali nawo Amazwi ɨgo saga galɨɨho mu nsimbo zimo ɨzyɨ mandɨ ɨzyɨ Shiyunaani. 5Pi‑idiimi liila, ahalɨɨho ʉmuntu ʉmo wa‑ahali mʼminu hu maaha amashʉmi gataatu na naana. 6ɄYeesu ahanʼnola ʉmʼminu ʉyo agonile paala. Ahamɨɨnye huje ʉmuntu ʉla mʼminu hu habhaazyo ahatali, ahamʼmʉzɨɨlɨzya ahaga, “Wɨlɨ, aawe ʉhwanza aje ʉpone?” 7Ʉmʼminu ʉla ahamʼmwamula ahaga, “Wee Mwɨnɨ, saga ɨndi nʉ muntu ʉwa huntʉʉsye mwi‑idiimi lyɨ mɨnzɨ lwa gavwalanganywa. Anɨ lwɨ‑ɨhwanda atʉʉshe, ʉmuntu ʉwɨnjɨ atagaalila hwitagaalila lyanɨ.” 8Ɨpo ʉYeesu ahamʼmʉʉzya ʉmʼminu ʉla ahaga, “Ɨmɨɨlɨla, ega ɨshɨlɨlɨ shaaho, bhalaga.” 9Lwʉlwo, ʉmuntu ʉla ahapona, ahabhʉʉsya ɨshɨlɨlɨ shaakwe na hwande ajende.

ɄYeesu ahamʼponiizye ʉmuntu ʉyo pi‑isiku ɨlyɨ Sabaato.#5:9 ƗSabaato hwa Bhayahuudi lisiku lya‑apuute na‑atʉʉye lwene. Bhaazya izwi Sabaato hu Ngalulanyo ɨyɨ Mazwi aMajenu hu malishilo wɨ shitaabu ɨshi. 10Ɨpo abhalongozi bha Bhayahuudi bhahamʼmʉʉzya ʉmuntu ʉla ʉyo ʉYeesu ahamʼponiizye bhahaga, “Ɨleelo lisiku lyɨ Sabaato, ɨshi alɨngaane nɨ ndajizyo zya Moose saga ɨhwɨtɨshɨlwa aawe abhʉʉsye ɨshɨlɨlɨ shaaho.”#Bhaazya Afume 20:10-11; Yelemiya 17:21-22. 11Leelo ʉmuntu ʉla ahabhaamula ahaga, “Ʉmuntu ʉyo amponiizye ya yʉʉyo ambʉzɨɨzye huje ɨneeje ɨshɨlɨlɨ, ɨmbale.” 12Ɨpo abhalongozi bhaala bhahamʼmʉzɨɨlɨzya bhahaga, “Wɨlɨ, weenu ʉyo aʼbhʉzɨɨzye huje ʉnyeemule ɨshɨlɨlɨ, ʉbhalaje?” 13Leelo ʉmuntu ʉla saga ahamɨɨnye huje yʉ naanu wa‑ahamʼponiizye, pɨpo ʉYeesu ahali asogʉʉye pa mpʉga ya bhantu bha bhahali paala. 14Isiku liliila hu habhaazyo lwa haashila hashe, ʉYeesu ahabhala na humʼmwaje ʉmuntu ʉla mu lubhaga lwɨ nyumba ɨmfinjile ɨya Ngʉlʉbhɨ, ahanʼsunda ahaga, “Tejeelezya, ɨshi ʉponile. Ʉgandi ajendeelele abhombe ɨmbiibhi nantele, pɨpo nkashele ʉjendeelela abhombe ɨmbiibhi, ʉnza‑ayɨmbe tee ashile ɨsho wahayɨmbɨle hu wandilo.” 15Ʉmuntu ʉla ahanʼneha ʉYeesu na‑aweele hubhabhʉʉzye abhalongozi bha Bhayahuudi huje yʉ Yeesu wa‑amʼponiizye.

16Ɨpo abhalongozi bha Bhayahuudi bhahanda hunʼnyanzye ʉYeesu hu nongwa ya huje ahali ahubhaponia abhantu pi‑isiku ɨlyɨ Sabaato. 17Leelo ʉYeesu ahabhabhʉʉzya ahaga, “ɄDaada waanɨ abhomba ɨmbombo ɨnsiku zyonti sinta aleshe. Ɨshi nanɨ ɨbhomba ɨmbombo sinta aleshe.” 18Amazwi ɨga gahabhaviisya abhalongozi bha Bhayahuudi. Bhahanza shila lidala huje bhanʼgoje ʉYeesu. Bhahali bhahwanza hunʼgoje saga hu nongwa ya hulisyonshele isiku ɨlyɨ Sabaato lwene, lyoli hu nongwa ya‑aje ahali ayanga huje, ʉNgʉlʉbhɨ yʉ Yise waakwe. Ɨshi hwi‑idala ɨlyo, ʉYeesu ahwibhɨɨshɨle huje ʉmwene yʉ Ngʉlʉbhɨ.

Abhantu bhahuwaaga ʉwʉʉmi ashilile hwa Mwana wa Ngʉlʉbhɨ

19ɄYeesu ahabhabhʉʉzya abhalongozi bhaala ahaga, “Lyoli ɨhubhabhʉʉzya, anɨ nɨMwana waakwe saga ɨmbajiiye abhombe hohonti hwi‑ikhone lyanɨ. Lyoli ɨbhomba gaala ɨgo ɨhunʼnola ʉDaada waanɨ abhomba. Ɨnjanjile ɨsho, pɨpo ga‑abhomba ʉDaada waanɨ ga gɨɨgo nanɨ nɨMwana waakwe ɨbhomba. 20ɄDaada waanɨ angɨɨne anɨ, yɨ nongwa ɨyo ahundolesya ɨmbombo zyonti ɨzyo abhomba, nantele ahayihundolesya ɨsho nahayibhomba amayele amagoosi ashile hubhaponie abhantu, namwɨ mwahayiswiga tee. 21Nanshi ɨsho ʉDaada waanɨ ahubhazyʉsya abhafwe na hubhapeele ʉwʉʉmi ʉwa wiila na wiila, shɨɨsho nanɨ ɨnza hubhapeele ʉwʉʉmi abhantu ɨbho ɨhwanza hubhapeele. 22Nantele ʉDaada saga ahunʼnonga ʉmuntu wowonti, leelo ampiiye anɨ ikhone ɨlya hubhalonje abhantu bhonti. 23Hwi‑idala ɨlyo, abhantu bhonti bhahayihuntiniha nanshi ɨsho bhahunʼtiniha ʉDaada waanɨ. Ʉmuntu wowonti ʉyo saga ahuntiniha anɨ nɨMwana waakwe, saga ahunʼtiniha ʉDaada ʉyo ahansonteleziizye.

24Lyoli ɨhubhabhʉʉzya, abhantu bhonti ɨbho bhahugʉmvwa amazwi gaanɨ na humʼmwɨtɨshe ʉNgʉlʉbhɨ ʉyo ahansonteleziizye, bhali nʉ wʉʉmi ʉwa wiila. Saga bhahayilongwa hu mbiibhi zyabho, leelo bhashilile afume hu fwe na‑atʉʉshe hu wʉʉmi ʉwa wiila. 25Lyoli ɨhubhabhʉʉzya, ahabhaazyo hahwɨnza, nantele hafishile, ɨho abhafwe#5:25 abhafwe Ɨpa ʉYeesu ahubhayanga abhantu ɨbho bhafwiye mu lwɨtɨho lwabho, saga ʉfwe ʉwɨ mʼbɨlɨ. bhahayʉmvwa ɨgo anɨ nɨMwana wa Ngʉlʉbhɨ ɨyanga. Ɨpo bhonti ɨbho bhahayibha bhahwʉmvwa na hwɨtɨshe, bhahayibha nʉ wʉʉmi ʉwa wiila na wiila. 26Nanshi ɨsho ʉDaada waanɨ ali ni‑ikhone ɨlya humʼpeele ʉmuntu ʉwʉʉmi ʉwa wiila na wiila, shɨɨsho nanɨ nɨMwana waakwe ampiiye ikhone ɨlya hubhapeele abhantu ʉwʉʉmi ʉwa wiila na wiila. 27Nantele, ampiiye ikhone ɨlya hubhalonje abhantu pɨpo anɨ ɨndi Mwana wa Muntu. 28Mugandi aswije! Hahayɨnza ahabhaazyo ɨho abhafwe bhonti ɨbho bhali mu nkʉngwa bhahayihunʉmvwa lwɨ‑ɨhubhakwizya, 29bhope bhahayizyʉha na‑afume mu nkʉngwa zyabho. Bhonti ɨbho bha bhahabhombile ɨnyinza, bhahayihuwaaga ʉwʉʉmi ʉwa wiila na wiila. Leelo bhonti ɨbho bha bhahabhombile ɨmbiibhi, bhahayilongwa.”

Abhasimishizi bha Yeesu

30ɄYeesu ahajendeelela ayanje ahaga, “Anɨ saga ɨmbajiiye abhombe hohonti hwi‑ikhone lyanɨ. Ɨhubhalonga abhantu alɨngaane nɨ‑ɨsho ʉDaada waanɨ ahumbʉʉzya. Hu nongwa ɨyo, ʉlongwe lwanɨ lwɨ lyoli, pɨpo saga ɨbhomba ɨgo ɨsʉngwa, leelo ɨbhomba ɨgo asʉngwa ʉDaada waanɨ ʉyo ahansonteleziizye. 31Nkashele ɨhwisimishizya ɨnongwa zyanɨ nɨɨnɨ, amwɨ saga mubhajiiye ahwɨtɨshe huje ɨgo ɨyanga gɨ lyoli. 32Leelo ʉDaada waanɨ wope asimishizya ɨnongwa zyanɨ huliimwɨ, nanɨ ɨmɨɨnye huje ʉsimishizi waakwe wɨ lyoli. 33Amwɨ mwahabhasonteleziizye abhafuusya hwa Yoohani ʉMwozi huje bhamʼmʉzɨɨlɨzye, wope ahasimishizya gɨ lyoli huliimwɨ. 34Anɨ saga ɨsʉʉbhɨla ʉsimishizi wa bhantu, leelo ɨhubhabhʉʉzya gonti ɨgo huje mufyʉlwe. 35ɄYoohani ʉMwozi ahalolesiizye ɨlyoli huliimwɨ nanshi ɨsho ʉlukhozyo lukhozya hu hiisi. Amwɨ mwahasʉngwɨlwe ʉlukhozyo ʉlwo hu habhaazyo hashe. 36Leelo anɨ ɨndi nɨ nongwa ɨzyo zihunsimishizya tee ashile ɨzyo asimishizya ʉYoohani. Ɨnjanjile ɨsho, pɨpo ɨmbombo ɨzyo ʉDaada waanɨ ahampiiye huje ɨnzibhombe zya zyɨzyo zisimishizya huje ʉDaada waanɨ ya yʉʉyo ahansonteleziizye. 37Wope ʉDaada ʉyo ahansonteleziizye anɨ, ansimishiziizye anɨ huliimwɨ. Namwɨ saga mwʉmvwɨzye dumu izwi lyakwe, nantele saga munʼnolile dumu sha‑alɨɨho. 38Mukhaana hugɨɨtɨshe amazwi ga Ngʉlʉbhɨ mu mooyo geenyu, pɨpo saga muhunɨɨtɨha anɨ ʉyo ʉNgʉlʉbhɨ ahansonteleziizye huliimwɨ. 39Muhwidandamiha tee abhaazye ɨNsimbo ɨMfinjile, pɨpo musɨɨbha huje hwi‑idala ɨlyo mubhajiiye huwaaje ʉwʉʉmi ʉwa wiila. Lyoli ɨnsimbo ɨzyo zihunsimishizya anɨ, 40leelo mukhaana ahwɨnze hwaliinɨ huje muwaaje ʉwʉʉmi ʉwa wiila na wiila.”

41ɄYeesu ahajendeelela ayanje ahaga, “Saga ɨhwanza abhantu huje bhamwamishe anɨ. 42Leelo ɨmbamɨɨnye amwɨ ɨsho muli, saga muli nʉ kʉndwa ʉwa Ngʉlʉbhɨ mu mooyo geenyu. 43Anɨ ɨnɨnzɨle hu nongwa ya huje ʉDaada waanɨ ahansonteleziizye, leelo mukhaana hunambɨɨlɨle. Nkashele ʉmuntu ʉwɨnjɨ ahwɨnza sinta Daada waanɨ hunʼsonteelezye, ya yʉʉyo munza humʼmwɨtɨshe na humʼmwambɨɨlɨle. 44Musʉngwa asʉmbwe na bhamwenyu, leelo saga mudandamala ahwanze ɨnshɨnshɨ ɨyo ɨfuma hwa Ngʉlʉbhɨ yʉʉyo. Ɨshi mubhajiiye wɨlɨ hunɨɨtɨshe anɨ? 45Mugandi asɨɨbhe huje ɨnza hubhataake hwa Daada waanɨ huje mulongwe, ndaadi! ɄMoose ya yʉʉyo ahayihubhataaka, pɨpo ya yʉʉyo muhunʼsʉʉbhɨla. 46Nkashele lyoli mwahɨtɨɨshe amazwi aga Moose, ɨshi handɨ mwabhanga muhunɨɨtɨha anɨ, pɨpo ʉMoose ya yʉʉyo ahasimbile ɨnongwa zyanɨ. 47Nkashele saga muhwɨtɨha amazwi ɨgo ʉMoose ahasimbile, ɨshi mubhajiiye wɨlɨ ahwɨtɨshe ɨgo ɨyanga?”

Currently Selected:

Yoohani 5: SBK

Highlight

Copy