Yoohani 3

ɄYeesu ayanga nʉ Nikodeemu

1Ahalɨɨho ʉmuntu ʉmo ʉnʼgoosi ʉwa Bhayahuudi, afume mu mpʉga ɨya Bhafalisaayo, ʉyo itaawa lyakwe ahali yʉ Nikodeemu. 2Isiku limo ahabhala hwa Yeesu nʉsiku, ahamʼmʉʉzya ahaga, “Wee Mʼmanyizyi, timɨɨnye huje aawe ʉli Mʼmanyizyi wʉ‑ʉsonteleziiwe nʉ Ngʉlʉbhɨ, pɨpo nʉʉmo ʉmuntu wowonti wa‑abhajiiye abhombe amayele ɨgo ʉbhomba, nkashele ʉNgʉlʉbhɨ saga ali peeka nawo.” 3ɄYeesu ahamʼmwamula ahaga, “Lyoli ɨhubhʉʉzya huje nʉʉmo ʉmuntu wa‑abhajiiye atʉʉshe mu wumwɨnɨ ʉwa Ngʉlʉbhɨ,#3:3 wumwɨnɨ ʉwa Ngʉlʉbhɨ Bhaazya izwi Wumwɨnɨ ʉwa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. nkashele saga apapwilwe ʉlwa bhɨɨlɨ.” 4ɄNikodeemu ahamʼmʉzɨɨlɨzya ʉYeesu ahaga, “Wɨlɨ, ʉmuntu ʉnʼgogolo abhajiiye wɨlɨ apaapwe ʉlwa bhɨɨlɨ? Wɨlɨ, abhajiiye atʉʉshe nantele mu vyanda vya nyina waakwe huje apaapwe?” 5ɄYeesu ahamʼmwamula ahaga, “Lyoli ɨhubhʉʉzya huje nʉʉmo ʉmuntu wa‑abhajiiye atʉʉshe mu wumwɨnɨ ʉwa Ngʉlʉbhɨ, nkashele saga apapwilwe hu mɨnzɨ na hu Mʼpepo wa Ngʉlʉbhɨ. 6Ʉmuntu apaapwa nʉ mʼbɨlɨ afume hwa bhapaafi bhaakwe, leelo ahwambɨɨlɨla ʉwʉʉmi ʉpya afume hwa Mʼpepo wa Ngʉlʉbhɨ. 7Ʉgandi aswije, pɨpo ɨʼbhʉzɨɨzye huje, ‘Ʉhwanziwa apaapwe ʉlwa bhɨɨlɨ.’ 8Enya, ɨnkʉngʉ ɨvugula abhale hwohwonti hwɨ‑ɨsʉngwɨlwe. Nawe ʉbhajiiye ahwʉmvwe avugule hwakwe, leelo saga ʉmɨɨnye hwɨ‑ɨfumila hwope hwɨ‑ɨbhala. Ɨshi sha shɨɨsho sha hubha hwa shila muntu wa‑apapwilwe hu Mʼpepo wa Ngʉlʉbhɨ.”

9ɄNikodeemu ahamʼmʉzɨɨlɨzya ʉYeesu ahaga, “Wɨlɨ, ʉmuntu abhajiiye wɨlɨ apaapwe hu Mʼpepo wa Ngʉlʉbhɨ?” 10ɄYeesu ahamʼmwamula ahaga, “Aawe ʉli mʼmanyizyi wʉ‑ʉmanyiishe tee hu nsi ɨyɨ Izilaeeli. Wɨlɨ, saga ʉgamɨɨnye ɨga? 11Lyoli ɨhubhʉʉzya huje, atɨ tiyanga ɨgo tigamɨɨnye, nantele tihubhasimishizya ɨgo tigalolile. Leelo amwɨ saga muhwɨtɨha ʉsimishizi weetu. 12Ɨshi nkashele saga muhwɨtɨha lwɨ‑ɨhubhabhʉʉzya ga gabhombeha mu nsi ɨnɨ, mubhajiiye wɨlɨ ahwɨtɨshe lwɨ‑ɨhubhabhʉʉzya ga gabhombeha hu mwanya? 13Nʉʉmo ʉmuntu wowonti wa‑alɨnjɨle abhale hu mwanya. Leelo anɨ nɨMwana wa Muntu nɨɨnɨ ɨnɨnzɨle afume hu mwanya. 14Enya, aBhaizilaeeli lwa bhahali mu lʉʉgwa, ʉMoose ahalɨngɨɨnye ɨholanyo yɨ nzoha ɨyɨ shaaba#3:14 ʉMoose ahalɨngɨɨnye ɨholanyo yɨ nzoha ɨyɨ shaaba ɄMoose ahabhombile ɨsho huje ʉNgʉlʉbhɨ abhafyʉle aBhaizilaeeli afume mu mbiibhi zyabho na hubhaponie. Bhaazya ɨMbaazyo 21:4-9. na huyizʉvye pi‑ikwi huje bhafyʉlwe. Nanɨ nɨMwana wa Muntu ɨhwanziwa huje bhanzʉvye pa shikhobheehanyo, 15huje shila muntu wa‑ahunɨɨtɨha, ayambɨɨlɨle ʉwʉʉmi ʉwa wiila.”

16ɄNgʉlʉbhɨ abhagɨɨne tee abhantu bhonti. Hu nongwa ɨyo ahanʼsonteleziizye ʉMwana waakwe wa‑ali mwene, ahwɨnze mu nsi ʉmu, huje ʉmuntu wowonti wa‑ahumʼmwɨtɨha, agandi ateeje, leelo awaaje ʉwʉʉmi ʉwa wiila. 17ɄNgʉlʉbhɨ saga ahanʼsonteleziizye ʉMwana waakwe mu nsi ʉmu huje abhalonje abhantu, lyoli ahanʼsonteleziizye huje abhafyʉle ashilile hwa mwene.

18ɄNgʉlʉbhɨ saga ahunʼnonga ʉmuntu wa‑ahumʼmwɨtɨha ʉMwana waakwe, lyoli ʉmuntu wa saga ahumʼmwɨtɨha, alongwilwe nzɨɨla pɨpo saga ahamʼmwɨtɨɨshe ʉMwana waakwe wa‑ali mwene. 19Ʉlongwe lwa lwʉlwu, ʉmwene ahɨnzɨle mu nsi ɨnɨ nanshi ʉlukhozyo, leelo abhantu bhayigɨɨne ɨhiisi ashile ʉlukhozyo, pɨpo ɨnjendo zyabho mbiibhi. 20Abhantu bhonti bha bhabhomba ɨmbiibhi bhahuluviitilwa ʉlukhozyo ʉlwo. Nantele bhakhaana ahwɨnze hu lukhozyo, huje ɨnjendo zyabho ɨzyɨ mbiibhi zigandi aloleshe pa pazelu. 21Leelo abhantu bhonti bha bhabhomba agɨ lyoli bhabhala hu lukhozyo ʉlwo, huje ɨnjendo zyabho zibhe pa pazelu, ɨmanyishe huje ʉNgʉlʉbhɨ ahubhapeela amaha aga huzibhombe.

ɄYoohani ʉMwozi asimishizya ɨnongwa ɨzya Yeesu

22Lwa gaashila ɨgo, ʉYeesu na bhasundwe bhaakwe bhahabhala hu mukowa ʉgwɨ Yudeeya. Ahakhala ʉhwo peeka nabho hu habhaazyo hashe na hubhoozye abhantu. 23Hu habhaazyo hahaala, ʉYoohani ʉMwozi wope ahabhozyaga abhantu hu shipanga ɨshɨ Ayinooni, mu pɨɨpɨ ni‑ibooma ɨlyɨ Saliimu, pɨpo ʉhwo hwahali na mɨnzɨ aminji. Abhantu bhahabhala hwa mwene huje abhoozye. 24ɄYoohani ʉMwozi ahali abhomba ɨmbombo ɨya hubhoozye sha‑asɨɨle ʉmwɨnɨ ʉHeloode ʉAntipa#3:24 ʉHeloode ʉAntipa Bhaazya izwi Heloode hu Ngalulanyo ɨyɨ Mazwi aMajenu hu malishilo wɨ shitaabu ɨshi. hunʼkhate na hunʼkʉnje mu hoobhe.

25Isiku limo abhasundwe bhamo abha Yoohani ʉMwozi bhahanda adalisanye nʉ Nʼnyahuudi ʉmo hu nongwa yɨ miiho aga hwisangalusye. 26Ɨpo bhahabhala hwa Yoohani ʉMwozi, bhahamʼmʉʉzya bhahaga, “Wee Mʼmanyizyi, ʉhumʼmwizuha ʉmuntu ʉyo wahali nawo hwi‑isyɨla ɨli‑isooho ɨlyɨ Yolodaani, ʉyo wahatisimishiziizye ɨnongwa zyakwe? Ɨshi enya, wope ahubhoozya abhantu, nantele abhantu bhonti bhabhala hwa mwene!” 27ɄYoohani ahabhaamula ahaga, “Ʉmuntu saga abhajiiye ahwambɨɨlɨle ahantu nkashele saga apewiilwe nʉ Ngʉlʉbhɨ. 28Amwɨ muli bhasimishizi bhaanɨ lwa nahayanjile huje, ‘Anɨ saga nɨ Mʼfyʉli, leelo ʉNgʉlʉbhɨ ahansonteleziizye huje ɨnʼtagaalile hwitagaalila lyakwe.’ 29Ʉmwalɨ wa‑ahwegwa ahwanziwa abhale hwa nʼnume ʉyo ahumʼmwega. Anɨ ɨndi nanshi ʉmʼmanyani wa mweji, wɨ‑ɨhwɨmɨɨlɨla panshɨnjɨ yaakwe, ɨseshela hu habhaazyo hɨ‑ɨhwʉmvwa izwi lyakwe. Lyoli yɨ mbombo ɨyo ɨseshelela tee. 30Ɨhwanziwa ʉYeesu abhe nʼgoosi tee, leelo anɨ ɨmbe nʼdoodo tee.”

31ɄYeesu ʉyo ahwɨnza afume hu mwanya ali ni‑ikhone ashile abhantu bhonti. Wowonti ʉyo afuma mu nsi, ayanga ɨnongwa ɨzya mu nsi ɨnɨ. Leelo ʉyo afumile hu mwanya ali ni‑ikhone ashile abhantu bhonti. 32Ʉmwene asimishizya ɨgo agalolile na hugʉmvwe, leelo bhantu bhashe bha bhahwɨtɨha ʉsimishizi waakwe. 33Ʉmuntu wowonti wa‑ahwɨtɨha ʉsimishizi wa Yeesu, asimishizya huje ʉNgʉlʉbhɨ wɨ lyoli, 34pɨpo Ngʉlʉbhɨ ahanʼsonteleziizye ʉYeesu ayanje amazwi aga Ngʉlʉbhɨ. ɄNgʉlʉbhɨ amʼpiiye ʉMʼpepo ʉMʼfinjile sinta shipimilo. 35ɄNgʉlʉbhɨ ʉDaada ahunʼgana ʉMwana waakwe, nantele amʼpiiye ikhone ɨlya‑alongozye ɨvintu vyonti. 36Ʉmuntu wowonti wa‑ahumʼmwɨtɨha ʉMwana wa Ngʉlʉbhɨ, ali nʉ wʉʉmi ʉwa wiila. Leelo ʉmuntu wowonti wa‑akhaana humʼmwɨtɨshe ʉMwana, ʉyo saga ali nʉ wʉʉmi ʉwa wiila, pɨpo ilyoyo lya Ngʉlʉbhɨ lɨnza‑ajendeelele abhe hwa mwene.

Currently Selected:

Yoohani 3: SBK

Highlight

Copy