Lukas 2

Jesus padidu

(Mat 1.18-25)

1Na ki tempu Rei Agustu da ordi pa marka kabesa di tudu pobu di si renu. 2E purmeru resensiamentu#At 5.37 fasidu oca Siréniu seduba gubernadur di Siria. 3Kada un bai marka si kabesa na si tabanka propi. 4José tambi i sai di tabanka di Nazaré, na tera di Galileia; i bai pa tera di Judeia, pa tabanka comadu Belen, nunde ku Davi#Kap 1.27; 1 Sam 16.1,13; Mik 5.2; Mat 1.1,16; Jon 7.42 padidu nel, manera ku José seduba di jorson di Davi. 5I bai pa marka si kabesa, ku si minjer Maria ku staba ku bariga.

6Oca e staba la, i ciga tempu di i padi. 7I padi si purmeru fiju, i mbuljal na panus, i ditandal na kaŝa nunde ku limarias ta kume nel, pabia i ka tenba lugar pa elis na kasa di ospris.

Bakiaduris di Belen

8Na ki mesmu reẑion, i tenba utru bakiaduris na matu; e na bisiaba se karnel di noti. 9Anju di Siñor parsi se dianti; gloria di Deus numia elis ku garandi lus. E panta. 10Anju fala elis: “Ka bo panta, pabia N tisi bos noba di garandi alegria ku tudu jinti#Kap 24.47; Kum 12.3 na kontenti ku el. 11Aos na tabanka di Davi i padidu un Salbadur pa bos, ku sedu Kristu,#Is 9.6; Jon 20.31; At 2.36; Fil 2.11 Siñor. 12Es ku na sedu sinal pa bos: bo na oja mininu mbuljadu na panus, ditandadu na kaŝa nunde ku limarias ta kume nel.”

13Na ki ora i parsi ku ki un anju un garandi multidon di tropas#Kum 32.1-2; 2 Re 6.17; Dan 7.10; Mat 26.53; Apok 5.11 di seu; e na ngaba Deus, e kanta:

14“Gloria pa Deus na lugar mas altu#Kap 19.38; Ef 2.14 na seu!

Pas na tera pa jinti ki kontenti ku elis.”

15Anjus disa elis, e riba pa seu. Bakiaduris papia entri elis, e fala: “No bai te Belen, pa no jubi e kusa ku kontisi, ku Siñor kontanu.” 16E bai tudu dipresa, e oja Maria, ku José, ku mininu ku staba ditandadu na ki kaŝa nunde ku limarias ta kume nel. 17Dipus de ojal, e kumsa na konta tudu jinti kusa ke kontaduba di ki mininu. 18Tudu jinti ku obi e ta dimira di kil ku bakiaduris na kontaba elis. 19Maria guarda tudu e kusas#Kap 2.51 na si korson; i na kudaba sempri nel. 20Bakiaduris riba, e na ngaba Deus, e na dal gloria pa tudu ke obi, ke oja, pabia tudu sedu suma ke kontadu.

Jesus pudu nomi, i lebadu dianti di Deus

21Oca ki kompleta oitu dia#Kum 17.12 ki padidu, tempu ciga pa mininu sirkunsidadu. I pudu nomi di Jesus, nomi ku anju dal oca si mame ka paña bariga inda.

22Dipus di i ciga tempu di#Sir 12.2-8 purifikason, konformi lei di Moisés, e lebal pa Jerusalen pa pursental dianti di Siñor, 23suma ki sta skritu na lei di Siñor kuma: “Tudu purmeru fiju macu i na ntregadu#Sai 13.2; Num 3.12 pa Siñor.” 24E bai tambi pa da oferta konformi lei di Siñor: dus pumba di kasa o dus pumba di matu.

Simeon ku Ana

25I tenba un omi na Jerusalen ku comadu Simeon. Ki omi i ta yandaba diritu, i tenba garandi rispitu pa Deus; i na peraba#Kap 2.38; Mar 15.43 konsolason di Israel. Spiritu Santu staba riba del, 26i mostralba ja kuma i ka na muri tementi i ka oja Mesias di Siñor. 27Spiritu gial, i lebal#Mat 4.1; Rom 8.14 pa kasa di Deus. Oca papes di mininu Jesus lebal pa kasa di Deus pa fasil konformi kustumu di lei, 28Simeon tomal na si mon, i ngaba Deus, i fala:

29“Siñor, suma ku bu kumpri bu palabra,

bu pudi dispidi#Kum 46.30 ja bu servu ku pas,

30pabia ña uju oja#Kap 3.6; Is 52.10 ja bu salbason

31ku bu purpara dianti di tudu pobu.

32I lus pa numia#Kap 1.79; At 13.47; 28.28 jintius,

tambi i pa sedu gloria pa bu pobu Israel.”

33Mame di mininu ku José e dimira kusas ku na faladu del. 34Simeon bensua elis, i fala Maria, mame di Jesus: “E mininu i distinadu pa i pui manga di jinti na Israel#Is 8.14; Os 14.9; Mat 21.44; Rom 9.32-33; 1 Kor 1.23-24; 1 Ped 2.8 pa e kai, tambi pa lantanda manga delis. I na sedu sinal ku jinti na fala kontra#At 13.45; 28.22 el, 35pa pensamentu sukundidu di manga di jinti sai na lus. Un dur na fidi bu korson#Jon 19.25-27 tambi suma spada ku fidiu.”

36I tenba tambi un minjer anunsiadur ku comadu Ana, fiju di Fanuel, di jorson di#Kum 30.13 Aser. I teneba ja idadi avansadu. I kasa ocal bajuda, i ten son seti anu ku si omi; kila bin muri. 37I fika viuva tok i tene kuas oitenta i kuatru anu.#2.37 I fika viuva tok i tene kuas oitenta i kuatru anu, o: I fika viuva pa kuas oitenta i kuatru anu. I ka ta lunjusi di kasa di Deus, i ta adoraba Deus di noti#At 26.7 ku di dia, ku junjun ku orason. 38Oca ki ciga na ki ora, i gardisi Deus, i fala di mininu pa tudu kilis ku na pera#Kap 2.25; 24.21 pa Jerusalen libertadu.

E riba pa Nazaré

39Oca ke kaba fasi tudu ku lei di Siñor manda, e riba pa Galileia, pa se tabanka di Nazaré. 40Mininu kirsi, i bida forti, i jiru ba dimas; fabur#Kap 2.52; 1.80; 1 Sam 2.26 di Deus staba riba del.

Jesus na kasa di Deus ocal rapas

41Kada anu si papes ta baiba Jerusalen pa festival#Sai 23.15 di Paskua. 42Oca ku Jesus kompleta ja dozi anu, e bai Jerusalen pa festival suma di kustumu. 43Oca ku dias di festival pasa, e na riba; mininu Jesus fika na Jerusalen; nin si papes ka sibi. 44E kuda kuma i sta juntu ku si kumpañeris di bias. Oca ke yanda un dia ntidu, e kumsa na buskal na metadi di parentis ku kunsidus. 45E ka ojal, e riba pa Jerusalen pa bai buskal. 46Dipus di tris dia e ojal na kasa di Deus, sintadu na metadi di pursoris; i na obi ke ke na fala, i na fasi elis purguntas. 47Tudu jinti ku na obil e dimira#Kap 4.22,32; Mat 7.28; Mar 1.22; Jon 7.15-46 si jiresa, ku raspostas ki na da elis. 48Oca ku Maria ku José ojal, e dimira. Si mame puntal: “Ña fiju, ke ku manda bu fasinu asin? Ami ku bu pape no fika fadigadu, no na buskau.”

49I punta elis: “Ke ku manda bo buska-buskan? Bo ka sibi kuma N ten ku sta na kasa di ña#Jon 2.16 Pape?” 50Ma e ka ntindi#Kap 9.45; 18.34; Jon 10.6; 12.16 palabra ki fala elis.

51Jesus riba ku elis pa Nazaré, i kontinua na obdisi elis. Si mame fika i na guarda#Kap 2.19; Dan 7.28 tudu ki kusas na si korson. 52Jesus na kirsiba#Kap 2.40 na jiresa, ku altura; i ngaña fabur di Deus ku di omis.

Currently Selected:

Lukas 2: povB

Highlight

Copy