Jon 6

Kumida pikininu ku ciga pa manga di jinti

(Mat 14.13-21; Mar 6.30-44; Luk 9.10-17)

1Dipus de kusas Jesus bai pa utru banda di Mar di Galileia, ku ta comadu Tiberíadis. 2Manga di jinti na kumpañalba, pabia e oja milagris di kura ki na fasi pa duentis. 3I bai subi na monti, i sinta la ku si disipulus. 4Paskua, ku seduba festival#Kap 2.13 di judeus, staba pertu. 5Jesus oja manga di jinti na bin pa kau ki staba nel. I punta Filip: “Nunde ku no na kumpra pon pa e jinti kume?” 6I puntaba son pa spurmenta Filip, pabia Jesus sibiba ke ki ten ku fasi. 7Filip ruspundil: “Nin si no gasta duzentus mueda di prata na pon, i ka na ciga#Num 11.21-22 pa kada kin oja un padas.” 8Un di si disipulus, André, ermon di Simon Pedru, falal: 9“I sta li un rapas ku tene sinku pon di sevada ku dus pis pikininu, ma ke ku es ciga pa e multidon#2 Re 4.43 di jinti?”

10I tenba manga di paja verdi na ki kau. Jesus fala elis pa e manda jinti pa e sinta. E sinta. E seduba kuas sinku mil omi. 11Jesus toma pon, i fala Deus#1 Tim 4.3-5 obrigadu, i rapati pa disipulus. Disipulus rapati pa ki jinti ku staba sintadu; i fasi tambi mesmu kusa ku pis. Jinti kume konformi e misti. 12Oca e farta, Jesus fala si disipulus: “Bo junta padas ku sobra pa nada ka pirdi.” 13E junta, e inci dozi kufu di padas ku sobra di ki sinku pon di sevada ku jinti kumeba.

14Ki jinti oja milagri ku Jesus fasi, e fala: “Es li na bardadi i ki anunsiadur#Kap 1.21 ku dibi di bin mundu.” 15Jesus sibi kuma ki jinti misti bin pegal pa fasil se rei. I kuri delis, i bai pa monti, el son.

Jesus yanda riba di mar

(Mat 14.22-33; Mar 6.45-52)

16Oca sol na noti, disipulus di Jesus ria pa mar, 17e mbarka pa bai pa Kafarnaun. Kau staba ja sukuru. Jesus ka baiba inda nunde elis. 18Bentu lanta ku forsa; mar bida brabu. 19Oca e yanda serka di sinku o seis kilometru, e oja Jesus na yanda riba di mar, i na pertu barku. E panta. 20Jesus fala elis: “I ami; ka bo panta.” 21E risibil kontenti na barku. Na ki ora barku ciga kau ke na baiba nel.

Jesus i pon di vida pa kin ku setal

22Sol mansi. Jinti ku staba na utru banda di mar e sibi kuma, son un barkusiñu ku staba la. Jesus ka mbarkaba ku si disipulus nel, ma si disipulus baiba elis son. 23Utru barkus bin ciga di Tiberíadis, e fundia pertu di ki kau nunde ke kume pon dipus ku Siñor falaba Deus obrigadu. 24Oca jinti rapara kuma Jesus ka staba la, nin si disipulus ka staba tambi, ki jinti kamba na ki barkus, e bai pa Kafarnaun pa buska Jesus.

25E ojal na utru banda di mar, e puntal: “Rabi, kal ora ku bu ciga li?” 26Jesus ruspundi elis: “N na konta bos bardadi kuma, bo na buskan, i ka pabia di sinalis ku bo oja, ma pabia bo kume pon tok bo farta. 27Ka bo tarbaja pa kumida ku ta dana, ma bo tarbaja pa kumida ku ka ta dana, ku ta fika pa vida#Kap 6.54; 4.14 ku ka ta kaba, ku Fiju di omi na bin da bos, pabia Deus si Pape#Kap 1.33; 8.18; Mat 3.17; 17.5; 2 Ped 1.17 pui si karimbu riba del.” 28E punta Jesus: “Kal tarbaju ku Deus misti pa no fasi?” 29Jesus ruspundi elis: “Kusa ku Deus misti i pa bo fia#1 Jon 3.23 na kil ki manda.” 30E punta mas: “Kal sinal#Mat 12.38 ku bu na fasi pa no pudi oja, no fia na bo? Ke ku bu ta fasi? 31No papes di antigu kume maná#Kap 6.49; Sai 16.14-15; Sal 78.24-25 na lala, suma ki sta skritu na libru di Deus kuma, i da elis pon ku bin di seu pa e kume.” 32Jesus fala elis: “N na konta bos bardadi, i ka Moisés ku da bos pon ku bin di seu, ma i ña Pape ku na da bos pon di bardadi ku bin di seu, 33pabia pon di Deus i ki algin ku ria na seu, i da vida pa jinti ne mundu.” 34E falal: “Siñor, danu#Kap 4.15 e pon sempri.”

35Jesus fala elis: “Ami i pon#Kap 6.48,58; Kap 4.14; 17.2 ku ta da vida; kin ku bin pa mi, nunka mas i ka na bin tene fomi; kin ku setan, nunka mas sedi ka na bin tenel. 36Ma N fala bos kuma bo ojan, ma bo ka ten fiansa na mi. 37Tudu algin ku ña Pape dan i na bin pa mi. Kil ku bin pa mi, di nin un manera N ka ta negal. 38Ami N ria na seu, i ka pa N fasi ña#Kap 4.34 vontadi, ma pa N fasi vontadi di kil ku mandan. 39Vontadi di ña Pape ku mandan i es: pa nin un son di tudu kilis ki dan ka#Kap 10.28; 17.12; 18.9; Kol 3.3; Jud 1 pirdi, ma pa N lantanda elis di mortu#Kap 5.21,24-29 na ultimu dia. 40Tambi vontadi di kil ku mandan i es: tudu kil ku ojan, i setan, ami Fiju di Deus, pa i tene vida ku ka ta kaba; na ultimu dia N ta lantandal di mortu.”

41Judeus fika e na ŋuniŋuni entri elis aserka del, suma ki fala kuma el i pon ku ria na seu. 42E na puntaba: “Nta es i ka Jesus, fiju di#Luk 4.22 José, ku no kunsi si pape ku si mame? Kuma ki na fala kuma i ria na seu?”

43Jesus ruspundi elis: “Bo para ruin entri bos. 44Ningin ka pudi bin pa mi#Kap 6.65 sin ña Pape ku mandan ka tisil. Na ultimu dia N ta lantanda ki algin di mortu. 45I sta skritu na libru di anunsiaduris kuma Deus na nsina#Is 54.13; Mik 4.2 tudu jinti. E ku manda, tudu kin ku obi di ña Pape, i ntindi, i ta bin pa mi. 46I ka suma ku un algin ciga di oja ña Pape,#Kap 1.18; 7.29; Mat 11.27; 2 Kor 4.6 ma kil ku bin di Deus, el son ku ojal. 47N na konta bos bardadi, kin ku setan i ta tene vida#Kap 3.16 ku ka ta kaba. 48Ami i pon ku ta da vida. 49Bo papes di antigu kume maná#Kap 6.31 na lala, ma, oca se dia ciga, e muri. 50E pon ku bin di seu, si algin kumel, i ka na muri. 51Ami i ki pon bibu ku ria na seu; si algin kume de pon li, i ta vivi pa sempri. Pon ku N na da bos i ña karni#Eb 10.5,10 ku N na da pa jinti di mundu pudi tene vida.”

52Ŝefis di judeu na diskutiba#Kap 7.12,43; 9.16; 10.19 entri elis, e na punta: “Kuma ku el i pudi danu si karni pa no kume?”

53Jesus fala elis: “N na konta bos bardadi, si bo ka kume karni#Mat 26.26-28 di Fiju di omi, bo ka bibi si sangi, bo ka ta tene vida na bos propi. 54Kin ku kume#Kap 6.40,58 ña karni, i bibi ña sangi, i ta tene vida ku ka ta kaba. Na ultimu dia N ta lantandal di mortu. 55Ña karni i kumida di bardadi; ña sangi i bibida di bardadi. 56Kin ku kume ña karni, i bibi ña sangi, i ta sta na mi; ami N ta sta#1 Jon 4.15 nel. 57Suma ku ña Pape ku na vivi mandan, ami N vivi pabia del, asin tambi kil ku alimenta na mi i ta vivi pabia di mi. 58Es i pon ku ria na seu. I ka suma bo papes di antigu ku kume#Kap 6.31,49-51 maná, ma e muri. Kin ku kume e pon i ta vivi pa sempri.”

59Jesus fala tudu e kusas oca i na nsina na kasa di juntamentu na Kafarnaun.

Manga di disipulu bandona Jesus

60Manga di si disipulus obi ki kusas, e fala: “E kombersa kansadu! Kin ku pudi sukutal?” 61Jesus sibiba dentru del kuma si disipulus na ŋuniŋuniba. I punta elis: “E palabra ta pui bos riba tras? 62Ke ku ta sedu si bo oja Fiju di omi na subi#Kap 3.13; Mar 16.19 pa nunde ki staba nel purmeru? 63I Spiritu di Deus#Rom 8.2; 1 Kor 15.45; 2 Kor 3.6 ku ta da vida; omi na si forsa ka ta bali nada. E palabra#Sal 119.50 ku N fala bos i Spiritu, i vida, 64ma i ten utru di bos ku ka#Kap 6.36; 2.24-25; 13.11 fia.” Na bardadi, Jesus sibi disna di kumsada kilis ku na bin fia nel, ku kil ku na bin falsial. 65I fala mas: “E ku manda N fala bos kuma ningin ka pudi bin pa mi si ña Pape ka judal pa i bin.”

66Disna di ki ora, manga di si disipulus riba tras, e bida e ka na yandaba ja ku el. 67Jesus punta ki dozi: “Bo misti disan tambi?” 68Simon Pedru ruspundil: “Siñor, pa kin ku no na bai? I abo ku tene palabra ku ta da vida ku ka ta kaba. 69Anos no fia, no sibi kuma abo#Kap 1.49; 11.27; Mat 16.16 i ki Santu di Deus.” 70Jesus punta: “I ka abos dozi ku N kuji? Ma un di bos i#Kap 13.27 diabu.” 71I na falaba di Judas Iskariotis, fiju di Simon, pabia i el ku na bin falsial, kontudu el i un di ki dozi.

Currently Selected:

Jon 6: povB

Highlight

Copy