Kumsada 38

Judá ku Tamar

1Na ki tempu Judá disa si ermons, i bai fika ku un omi comadu Ira di prasa di Adulan. 2Judá oja la un fiju femia di un omi kananeu comadu Suá. I tomal, i kasa ku el. 3I bin preña, i padi un fiju, i coma si nomi Er.#Kap 46.12; Num 26.19; 1 Kron 2.3 4I torna preña, i padi utru fiju, i comal Onan. 5I kontinua i padi utru fiju, i coma si nomi Selá. I staba na Kezib kontra i padil.

6Judá toma minjer pa si purmeru fiju, Er; si nomi i Tamar.#Mat 1.3 7Er, purmeru fiju di Judá, i seduba mau na uju di SIÑOR. Pabia di kila, SIÑOR matal.

8Judá fala Onan: “Toma minjer di bu ermon, bu yardal, pa bu padi fiju ku el#Lei 25.5-10; Mat 22.24 na konta di bu ermon.” 9Ma Onan sibi kuma, si i padi fiju, i ka na sedu pa el. Asin, si i na ditaba ku si minjer, i ta darma si simenti na con, pa i ka padi na konta di si ermon. 10Ki kusa ki fasi i mau na uju di SIÑOR; asin tambi SIÑOR matal.

11Judá fala Tamar, minjer di si fijus: “Fika viuva na kasa di bu pape te ora ku ña fiju Selá sedu garandi.” I fala asin pabia i pensa: “Talves Selá na muri suma si ermons.” Asin Tamar bai i fika na kasa di si pape.

12Tempu pasa ciu; minjer di Judá, fiju di Suá, muri. Dipus di konsola, Judá bai pa Timnat, pa omis ku na tiskiaba si karnel. Ira, si amigu adulamita, i bai ku el. 13Algin konta Tamar: “Ala pape di bu omi bai Timnat pa tiskia si karnel.” 14Tamar tira si bistidu di viuva, i kubri ku veu pa kamufla, i sinta na porton di Enain, ku sta na kamiñu di Timnat, pabia i oja kuma Selá seduba ja garandi, ma i ka dadu el pa minjer.

15Judá ojal, i kuda kuma i minjer di mau fama, suma ki kubriba si rostu. 16I bai pa el na kamiñu, pabia i ka sibiba kuma i minjer di si fiju. I falal: “Bin pa N dita ku bo.” Tamar puntal: “Ke ku bu na dan pa N dita ku bo?” 17I falal: “N na mandau kabritu.” I puntal: “Bu na fikan ku un kusa te ora ku bu bin mandal?” 18I puntal: “Kal kusa ku N na fikau ku el?” Tamar falal: “Bu karimbu ku si korda, ku ki manduku ku bu tene na mon.” I dal ki kusas, i dita ku el; i preña. 19Tamar lanta i bai, i tira si veu, i torna bisti ropa di viuva.

20Judá manda kabritu na mon di si amigu adulamita, pa toma ki kusas ki fikaba na mon di minjer, ma i ka ojal. 21I punta omis di ki kau: “Nunde ki minjer di mau fama ku staba na kamiñu lungu di porton di Enain?” E falal: “Nin un minjer di mau fama ka staba li.” 22I riba pa Judá, i falal: “N ka ojal. Omis di ki kau e falan kuma nin un minjer di mau fama ka staba la.”

23Judá fala: “I pudi fika ku ki kusas. No ka misti pa jinti rinu. N mandal ki kabritu ma bu ka bai ojal.”

24Dipus di kuas tris mis, algin bin konta Judá: “Ala Tamar, minjer di bu fiju, i fasi suma minjer di mau vida. Gosi i preña.” Judá fala: “Bo tiral fora pa i#Sir 20.10; 21.9 kemadu.”

25Oca ke na tiral fora, i manda konta pape di si omi: “N preña ku omi ku tene e kusas. Jubi si bu pudi rapara kin ku tene e karimbu ku korda, ku e manduku.”

26Judá rapara elis, i fala: “El i mas justu di ki mi, pabia N ka dal ña fiju Selá.” Asin nunka mas i ka durmi ku el.

27Na tempu ki na padiba, i teneba jemias na si bariga. 28Oca ki na padi, un di mininus tira si mon fora. Partera toma liña burmeju, i maral na ki mon, i fala: “Es ku sai purmeru.” 29Ma i rukuji si mon; si ermon sai. Partera falal: “Asin ku bu romba, bu bin sai!” Pa kila i comadu#Kap 46.12; Num 26.20; 1 Kron 2.4-5; Mat 1.3; Luk 3.33 Perez.#38.29 Perez signifika romba pa sai. 30Dipus, si ermon ku teneba korda burmeju na si mon i bin sai; i comadu Zerá.#38.30 Zerá signifika burmeju wak.

Currently Selected:

Kumsada 38: povB

Highlight

Copy