Lucas 14

Nxi̱núvi Jesús ɨɨn te̱e ya̱ nóꞌo kue̱ꞌi̱ꞌ kuiñɨ

1Nkuvi suꞌva ɨɨn ki̱vɨ̱ꞌ nájiáví, sáá kua̱ꞌa̱nꞌ Jesús kua̱kajiꞌ re̱ꞌ neyu veꞌi ɨɨn te̱e fariseo ya̱ kúñáꞌnú, jee rá te̱e yukuán kúmí yuꞌuꞌ ráa Jesús. 2Jee ichinúúnꞌ re̱ꞌ íñɨ́ ɨɨn te̱e nóꞌo kue̱ꞌi̱ꞌ kuiñɨ. 3Jee ni̱ka̱tu̱ꞌún re̱ꞌ rá te̱e súkuáꞌa jie̱ꞌe̱ꞌ tu̱ꞌun nta̱túníꞌ Ndiosíꞌ jín rá te̱e ñujiínꞌ fariseo, jee nkachiꞌ re̱ꞌ:

―¿Á yɨ́netuꞌ ya̱ xinúvi‑ó ɨɨn ñɨvɨ kúꞌvíꞌ ɨɨn ki̱vɨ̱ꞌ nájiáví rúja, áxí ntu̱ví? ―nkachiꞌ Jesús.

4Soo ni ntu̱né nkáꞌánꞌ ráa. Saájee ntɨɨn re̱ꞌ te̱e kúꞌvíꞌ vá jee nxi̱núvi re̱ꞌ maa jee nna̱chuichí re̱ꞌ maa. 5Jee suni nkachiꞌ re̱ꞌ nu̱u̱nꞌ ráa:

―¿Né ɨɨn ránoꞌó, jee retú nkininkava se̱ꞌya‑a #14:5 Yakuꞌ tutuꞌ káchíꞌ burrúꞌ. áxí xi̱ni̱kɨ̱ꞌ‑ɨ iniꞌ ɨɨn sókó, jee á ntu natavaꞌ‑a vá ntañúꞌún kuitɨꞌ, asúnika̱ꞌ ki̱vɨ̱ꞌ nájiáví kúvi vá rúja? ―nkachiꞌ Jesús.

6Jee ni ntu̱náꞌ nkúvi naxiníkó ráa nu̱u̱nꞌ re̱ꞌ jie̱ꞌe̱ꞌ ya̱ nkachiꞌ re̱ꞌ.

Tu̱ꞌun kúnkunuún jie̱ꞌe̱ꞌ rá ñɨvɨ ya̱ jiáꞌánꞌ ɨɨn viko tánáꞌá

7Jee nne̱ꞌyá Jesús rá ñɨvɨ ya̱ nkana kuáꞌánꞌ kajiꞌ ráa neyu, jee sáá niniꞌ re̱ꞌ na̱ja káji ráa nu̱u̱nꞌ yɨ́ñúꞌún ka̱ꞌ kikuneeꞌ ráa kajiꞌ ráa neyu yuꞌú mesa, jee nkachiꞌ re̱ꞌ nu̱u̱nꞌ ráa ɨɨn tu̱ꞌun kúnkunuún káꞌánꞌ suꞌva:

8―Sáá kána ɨɨn ñɨvɨ noꞌó kɨ̱ꞌɨ̱nꞌ nú ɨɨn viko tánáꞌá, jee koto jiákuneeꞌ rán nu̱u̱nꞌ yɨ́ñúꞌún ka̱ꞌ, koto sa̱naanꞌ jee nkana‑a inka ka̱ꞌ ñɨvɨ kúñáꞌnú ka̱ꞌ kenta kikuneeꞌ maa nsú káꞌ noꞌó. 9Jee kenta ñɨvɨ nkana noꞌó jín ñɨvɨ kúñáꞌnú vá nu̱u̱nꞌ nú, jee kachiꞌ‑i nu̱u̱nꞌ nú: “Ku̱ꞌva nu̱u̱nꞌ nééꞌ nú kuneeꞌ ñɨvɨ yaꞌá.” Saájee kukanuun nú jee kɨ̱ꞌɨ̱nꞌ nú kuneeꞌ nú ne̱ nu̱u̱nꞌ nɨ́ꞌɨ ka̱ꞌ. 10Saáva sáá kána ɨɨn ñɨvɨ noꞌó kɨ̱kajiꞌ nú, jee kikuneeꞌ nú ne̱ nu̱u̱nꞌ nɨ́ꞌɨ ka̱ꞌ, sáva sáá kenta ñɨvɨ ya̱ kana‑a noꞌó, jee kachiꞌ‑i nu̱u̱nꞌ nú: “Tenó, neꞌenꞌ kuneeꞌ nú nu̱u̱nꞌ váꞌa ñáꞌnú ka̱ꞌ yaꞌá”, kachiꞌ‑i. Saájee sáꞌá ñáꞌnú‑u noꞌó ichinúúnꞌ ntáká rá ñɨvɨ nééꞌ nkáá jín nú yuꞌú mesa. 11Chi ntáká ñɨvɨ ya̱ kutéyɨ́ɨ́‑ɨ sáꞌá ñáꞌnú‑u maáa, jee saꞌ kino̱o kanuun ñɨvɨ vá, ntu ka̱ꞌ kúñáꞌnú‑u, jee ɨɨn ñɨvɨ ya̱ sáꞌá núun‑u maáa ñúláꞌví iniꞌ‑i maáa, jee ni̱ꞌi̱nꞌ‑i ya̱ nuñáꞌnú‑u ―nkachiꞌ Jesús.

12Jee suni nkachiꞌ re̱ꞌ nu̱u̱nꞌ te̱e ya̱ kana‑a re̱ꞌ kajiꞌ re̱ꞌ i̱xta̱ꞌ veꞌi‑i:

―Sáá sáꞌá nú neyu áxí xíní ya̱ ku̱ꞌva nú kajiꞌ rá ñɨvɨ jee koto kána nú rá ñɨvɨ ma̱ni̱ꞌ jín nú, jín rá ñaniꞌ nú, jín rá táꞌán nú, jín rá ñɨvɨ kúká ya̱ nééꞌ yatin jín nú, nsuñájee nakana tuku ráa noꞌó, jee natají tuku ráa nu̱u̱nꞌ nú. 13Chisaꞌ sáá sáꞌá nú viko, jee kana nú rá ñɨvɨ láꞌví, jín ñɨvɨ kúꞌlúꞌ, jín ñɨvɨ lénkó jín ñɨvɨ kuáá. 14Saájee na̱ ka̱ꞌ netuꞌ ka̱ꞌ kuvi nú, chi ntu̱náꞌ íyó nu̱u̱nꞌ ráa ya̱ nataji ráa nu̱u̱nꞌ nú. Soo nachunáán Ndiosíꞌ nu̱u̱nꞌ noꞌó ya̱ kútaꞌviꞌ nú ki̱vɨ̱ꞌ natekuꞌ i̱i̱ꞌ rá ñɨvɨ na̱a̱ꞌ ya̱ níꞌiꞌ ―nkachiꞌ Jesús.

Tu̱ꞌun kúnkunuún káꞌánꞌ jie̱ꞌe̱ꞌ viko káꞌnú kuxíní

15Jee sáá nteso̱ꞌo ɨɨn rá ñɨvɨ ya̱ nééꞌ jín re̱ꞌ yuꞌú mesa rá tu̱ꞌun yaꞌá, jee nkachiꞌ‑i nu̱u̱nꞌ re̱ꞌ:

―Na̱ ka̱ꞌ netuꞌ ka̱ꞌ kúvi ñɨvɨ ya̱ kajiꞌ‑i neyu nu̱u̱nꞌ ñuunꞌ nu̱u̱nꞌ tátúníꞌ Ndiosíꞌ ne̱ antivɨ́ ―nkachiꞌ‑i.

16Saájee nkachiꞌ Jesús nu̱u̱nꞌ‑u tu̱ꞌun kúnkunuún káꞌánꞌ suꞌva:

―Ɨɨn te̱e nsa̱ꞌá re̱ꞌ ɨɨn viko xíní máá káꞌnú, jee kána re̱ꞌ kue̱ꞌe̱ꞌ víꞌí ñɨvɨ. 17Jee sáá nkenta máá hora kuxíní jee nchu̱ichí re̱ꞌ musúꞌ re̱ꞌ kɨ̱kachiꞌ‑i nu̱u̱nꞌ rá ñɨvɨ ya̱ nkana re̱ꞌ, jee nkachiꞌ‑i: “Neꞌenꞌ rán, chi ya̱ íyó túꞌva xíní.” 18Jee ntáká ráa ni ɨɨn ni ɨɨn ráa nka̱jiéꞌé ráa ntee ráa si̱kɨ̱ꞌ ya̱ kunekáꞌnú iniꞌ re̱ꞌ kune̱ꞌyá re̱ꞌ ráa chi nkúvi kɨ̱ꞌɨ̱nꞌ ráa. Jee ɨɨn ráa ya̱ xíꞌnañúꞌún nkachiꞌ‑i: “Nkeꞌen ni̱ꞌ ɨɨn pedasúꞌ ñuꞌun, jee íyó kɨ̱ne̱ꞌyá ni̱ꞌ maa, jee jíkánꞌ táꞌvíꞌ ni̱ꞌ ya̱ kunekáꞌnú iniꞌ nú kune̱ꞌyá nú nuꞌuꞌ ya̱ nkɨ̱ꞌɨ́nꞌ ni̱ꞌ”, nkachiꞌ‑i. 19Jee inka ka̱ꞌ nkachiꞌ‑i: “Nkeꞌen ni̱ꞌ u̱ꞌu̱nꞌ yuntá xi̱ni̱kɨ̱ꞌ jee íyó kɨ̱ꞌɨ̱nꞌ ni̱ꞌ kototúníꞌ ni̱ꞌ rátíꞌ, jee jíkánꞌ táꞌvíꞌ ni̱ꞌ ya̱ kunekáꞌnú iniꞌ nú kune̱ꞌyá nú nuꞌuꞌ ya̱ nkɨ̱ꞌɨ́nꞌ ni̱ꞌ”, nkachiꞌ‑i. 20Jee inka ka̱ꞌ nkachiꞌ‑i: “Nta̱na̱ꞌá ni̱ꞌ jín ɨɨn ñaꞌan, jee saáva nkúvi kɨ̱ꞌɨ̱nꞌ ni̱ꞌ”, nkachiꞌ‑i. 21Jee sáá nni̱kó musúꞌ vá jee nna̱kani‑i nɨꞌɨ rá tu̱ꞌun yaꞌá ya̱ nkachiꞌ rá ñɨvɨ vá nu̱u̱nꞌ i̱toꞌoꞌ‑o, saájee nki̱tɨ̱ꞌ víꞌí iniꞌ i̱toꞌoꞌ veꞌi vá, jee nkachiꞌ‑i nu̱u̱nꞌ musúꞌ‑u vá: “Kuáꞌán ntañúꞌún rá nu̱yáꞌvi jín rá iniꞌ ichi káá nteñu ñuunꞌ, jee kana nú rá ñɨvɨ láꞌví, jín rá ñɨvɨ kúꞌlúꞌ, jín rá ñɨvɨ kuáá jín rá ñɨvɨ lénkó, kiji ráa”, nkachiꞌ re̱ꞌ. 22Jee sáá nni̱kó musúꞌ vá, jee nkachiꞌ‑i: “I̱toꞌoꞌ ni̱ꞌ nsa̱ꞌá ni̱ꞌ ya̱ nta̱túníꞌ nú, soo núne i̱i̱ꞌ ka̱ꞌ nu̱u̱nꞌ kuneeꞌ ka̱ꞌ ñɨvɨ iniꞌ veꞌi nú jee chitú‑u”, nkachiꞌ‑i.

23’Saájee nkachiꞌ i̱toꞌoꞌ xí veꞌi vá nu̱u̱nꞌ musúꞌ‑u: “Kuáꞌán iniꞌ rá ichi káꞌnú jín rá ichi kuíñɨ́, jee tetuvi nú rá ñɨvɨ ki̱vɨ ráa, sáva chitú veꞌi ni̱ꞌ. 24Chi máá naáꞌ vá káchíꞌ ni̱ꞌ nu̱u̱nꞌ rán, ya̱ ni ɨɨn rá ñɨvɨ ya̱ nkana ni̱ꞌ ya̱ xíꞌnañúꞌún, ni nsáꞌ kuxíní ráa neyu ni̱ꞌ”, nkachiꞌ re̱ꞌ ―nkachiꞌ Jesús.

Yɨ́ɨ́ íyó sáá ɨɨn ni kuꞌun iniꞌ‑ó kunikɨnꞌ‑ó Cristo

(Mateo 10:37-38)

25Jee kue̱ꞌe̱ꞌ ntántúníꞌ ñɨvɨ níkɨ́nꞌ ráa Jesús kua̱ꞌa̱nꞌ ráa jín re̱ꞌ, jee nna̱jikó re̱ꞌ nna̱kune̱ꞌyá re̱ꞌ nu̱u̱nꞌ ráa jee nkachiꞌ re̱ꞌ nu̱u̱nꞌ ráa:

26―Retú néni ɨɨn ñɨvɨ natuꞌva‑a nuꞌuꞌ jee sú ñúnúunꞌ‑u tátáꞌ‑a, jín nánáꞌ‑a, jín ñasɨ́ꞌɨ́‑ɨ áxí yɨɨ́‑ɨ, jín rá kuáchí‑i, jín rá ñaniꞌ‑i, jín rá ku̱ꞌva‑a, jín rá ku̱ꞌvi̱ꞌ‑i, jín ne̱ maáa, soo íyó kunu̱u̱nꞌ‑u nuꞌuꞌ ka̱ꞌ nsú káꞌ kua̱ꞌ ñúnúunꞌ‑u ráa ya̱ kúvi kuéntáꞌ táꞌvi iniꞌ‑i kune̱ꞌyá‑a ráa jee retú ntu ñúnúunꞌ ñɨvɨ vá nuꞌuꞌ ka̱ꞌ sukuán nsáꞌ kuvi kunikɨnꞌ‑ɨ nuꞌuꞌ sukuáꞌa ni̱ꞌ maa. 27Néni ɨɨn ñɨvɨ ya̱ ntu jiéꞌnéꞌ iniꞌ‑i kunikɨnꞌ nuꞌuꞌ chi ntu jiéꞌnéꞌ iniꞌ‑i kunoꞌo‑o súka̱ꞌ ne̱ kuviꞌ‑i jie̱ꞌe̱ꞌ kunikɨnꞌ‑ɨ nuꞌuꞌ, kuéntáꞌ ɨɨn ya̱ níso‑o kurúsiꞌ sáva kuviꞌ‑i nu̱u̱nꞌ vá, jee ntu kúvi kunikɨnꞌ‑ɨ nuꞌuꞌ sukuáꞌa ni̱ꞌ maa.

28’Chi néni ɨɨn ránoꞌó kuíni‑i kani‑i ɨɨn veꞌi súkún, jee, ¿á ntu xíꞌna ka̱ꞌ nakuneeꞌ‑e natavaꞌ‑a kuéntáꞌ sáva kuniꞌ‑i retú kenta xu̱ꞌún sijínu‑u veꞌi vá rúja? 29Nsuñájee sáá kajiéꞌé‑e sama‑a jie̱ꞌe̱ꞌ ve̱ꞌí vá, jee ni nkúvi sijínu‑u vá, saájee ntáká rá ñɨvɨ kuniꞌ ráa jee kajiéꞌé ráa kaꞌanꞌ u̱ꞌvi̱ꞌ ráa kune̱ꞌyá ráa ñɨvɨ vá, 30jee kachiꞌ ráa: “Te̱e yaꞌá nka̱jiéꞌé‑e ñani‑i veꞌi, jee ni ntu nku̱neí‑i sijínu‑u vá”, kachiꞌ ráa.

31’Áxí, ¿né ɨɨn te̱e nísotíñú tátúníꞌ sáá kene re̱ꞌ kɨ̱kantáꞌán re̱ꞌ jín inka ka̱ꞌ te̱e nísotíñú nu̱u̱nꞌ inka ñuunꞌ váji si̱kɨ̱ꞌ re̱ꞌ jee, á ntu xíꞌna ka̱ꞌ nakuneeꞌ re̱ꞌ jee kani va̱ꞌa iniꞌ re̱ꞌ retú kuvi kuneí re̱ꞌ kantáꞌán re̱ꞌ jín u̱ji̱ꞌ mil (10,000) soldado kútáꞌán jín re̱ꞌ si̱kɨ̱ꞌ o̱ko̱ꞌ mil (20,000) rá soldado ya̱ váji jín inka ka̱ꞌ te̱e tátúníꞌ vá rúja? 32Jee retú nkúvi kuneí re̱ꞌ, jee ni íká ka̱ꞌ va̱ji inka te̱e tátúníꞌ vá ya̱ váji si̱kɨ̱ꞌ re̱ꞌ jee tají re̱ꞌ najiáꞌáꞌ re̱ꞌ kɨ̱kaꞌanꞌ‑a jín te̱e vá sáva nakama̱ni̱ꞌ ráa ntu kantáꞌán ráa ka̱ꞌ. 33Jee saáva, nta̱ká ránoꞌó, retú ntu íyó iniꞌ‑i xinóo nɨꞌɨ ya̱ kúmí‑i, saájee ntu kúvi kunikɨnꞌ nuꞌuꞌ ya̱ sukuáꞌa ni̱ꞌ maa ―nkachiꞌ Jesús.

Sáá núkatɨ́ ya̱ uꞌváꞌ ñɨ̱ɨ̱nꞌ

(Mateo 5:13; Marcos 9:50)

34Nkachiꞌ re̱ꞌ:

―Ya̱ váꞌa kúvi ñɨ̱ɨ̱nꞌ, soo retú nukatɨ́ ya̱ uꞌváꞌ‑a jee, ¿na̱ja kuvi jee nuꞌu̱ꞌva̱ꞌ tuku‑u rúja? 35Chi ni ntu̱náꞌ íyótiñu‑u ka̱ꞌ súka̱ꞌ sa̱ka̱nuun‑ó maa jín ñuꞌun, ni ya̱ kuvi‑i ñe̱ꞌen kava‑a jie̱ꞌe̱ꞌ tataꞌ sáꞌá, chisaꞌ kua̱chi ku̱te̱ꞌ ñɨvɨ maa. Ñɨvɨ ya̱ íyó rá so̱ꞌo sáva teso̱ꞌo, jee teso̱ꞌo va̱ꞌa ―nkachiꞌ Jesús ya̱ kúvi ñɨvɨ kuéntáꞌ kua̱ꞌ ñɨ̱ɨ̱nꞌ.

Currently Selected:

Lucas 14: meh

Highlight

Copy