Génesis 9

Ñakɨnꞌ Ndiosíꞌ tratúꞌ

1Nkachiꞌ Ndiosíꞌ ya̱ netuꞌ kuvi Noé jín rá se̱ꞌya‑a jee nkachiꞌ re̱ꞌ:

“Nakuneꞌ víꞌí rán jee nukueꞌeꞌ rán jee chuchítú rán maárán nu̱u̱nꞌ ñu̱ꞌún. 2Nɨꞌɨ rá kitɨ jíka nu̱u̱nꞌ ñu̱ꞌún, jín nɨꞌɨ rá kitɨ íyó chi̱yo̱ꞌ jíkó súkún, jín nɨꞌɨ rá kitɨ síúꞌun maátíꞌ nu̱u̱nꞌ ñu̱ꞌún, jín nɨꞌɨ rá tia̱ká ñúꞌún nu̱u̱nꞌ nteñúꞌún kuyu̱ꞌví rátíꞌ kune̱ꞌyá rátíꞌ ránoꞌó. Táji ni̱ꞌ rátíꞌ nu̱u̱nꞌ ránoꞌó kɨꞌɨ rátíꞌ xi̱ntíín rán. 3Kuvi kajiꞌ rán nɨꞌɨ rá kitɨ tékúꞌ jíka sánikua̱ꞌ ntaji ni̱ꞌ nu̱u̱nꞌ rán rá tataꞌ kéne nu̱u̱nꞌ ñu̱ꞌún kajiꞌ rán maa. 4Soo koto yájíꞌ rán ku̱ñu retú ntiáꞌan katɨ nɨꞌɨ ni̱ñɨ̱ꞌ chi ni̱ñɨ̱ꞌ ví ya̱ sáꞌá ya̱ tékúꞌ.

5’Maá nááꞌ nijia na̱ka̱nꞌ ni̱ꞌ kuéntáꞌ nu̱u̱nꞌ nta̱ká ya̱ kaꞌniꞌ ñɨvɨ. Na̱ka̱nꞌ ni̱ꞌ kuéntáꞌ nu̱u̱nꞌ nta̱ká kitɨ ya̱ kaꞌniꞌ ñɨvɨ, jee na̱ka̱nꞌ ni̱ꞌ kuéntáꞌ nu̱u̱nꞌ ñɨvɨ ya̱ kaꞌniꞌ ñɨvɨ. Na̱ka̱nꞌ ni̱ꞌ kuéntáꞌ nu̱u̱nꞌ ta ñanitáꞌán ya̱ kaꞌniꞌ ñɨvɨ.

6’Ɨɨn ya̱ kaꞌniꞌ ɨɨn ñɨvɨ

jee inka ñɨvɨ íyó kaꞌniꞌ maa,

chi nsa̱ꞌá Ndiosíꞌ ñɨvɨ kuéntáꞌ íyó maáréꞌ.”

7’Jee suvirán nakuneꞌ víꞌí rán jee kutenuun rán nu̱u̱nꞌ ñu̱ꞌún, jee nukueꞌeꞌ rán nu̱u̱nꞌ‑u.”

8Jee nkachiꞌ Ndiosíꞌ nu̱u̱nꞌ Noé jín nu̱u̱nꞌ rá se̱ꞌya re̱ꞌ:

9“Jee vitan re kakɨnꞌ ni̱ꞌ tratúꞌ ni̱ꞌ jín rán jín rá ichiyúkúnꞌ rán kiji ichinúúnꞌ ka̱ꞌ, 10jín ntáká rá kitɨ tékúꞌ ya̱ íyó jín rán: rá kitɨ íyó chi̱yo̱ꞌ, rá sa̱na̱ꞌ, jín rá kitɨ yúkú nu̱u̱nꞌ ñu̱ꞌún, nɨꞌɨ kuitɨꞌ rá kitɨ nkene arca, ntáká rá kitɨ íyó nu̱u̱nꞌ ñu̱ꞌún. 11Jee kakɨnꞌ ni̱ꞌ tratúꞌ ni̱ꞌ jín rán, jee ni nsáꞌ xináánꞌ tuku ni̱ꞌ ka̱ꞌ nɨꞌɨ rá íyó ñunéꞌyúꞌ jín nute ya̱ chitú nu̱u̱nꞌ ñu̱ꞌún. Jee ni ɨɨn íchí ka̱ꞌ nsáꞌ chitú nute xináánꞌ‑a nu̱u̱nꞌ ñu̱ꞌún.”

12Jee nkachiꞌ Ndiosíꞌ:

“Yaꞌá ví seña tratúꞌ ni̱ꞌ ya̱ naxinákúꞌun‑u iniꞌ rán ya̱ sáꞌá ni̱ꞌ maa nɨ́ɨ́nkání jín ránoꞌó jín ntáká rá kitɨ tékúꞌ íyó jín rán. 13Ñani ni̱ꞌ ko̱ye̱ꞌlé ni̱ꞌ nu̱u̱nꞌ vi̱ko̱ꞌ sáva kuvi seña tratúꞌ ni̱ꞌ ya̱ nsa̱ꞌá ni̱ꞌ jín ñɨvɨ jín kitɨ íyó iniꞌ ñɨ̱vɨ́. 14Sáá sikíji ni̱ꞌ vi̱ko̱ꞌ súkún, jee tu̱vi nijinꞌ ko̱ye̱ꞌlé nu̱u̱nꞌ vi̱ko̱ꞌ, 15saájee naku̱ꞌun iniꞌ ni̱ꞌ tratúꞌ ni̱ꞌ ya̱ nsa̱ꞌá ni̱ꞌ jín ránoꞌó jín ntáká rá tékúꞌ ntáká rá íyó ñunéꞌyúꞌ, ya̱ ni nsáꞌ kiji ka̱ꞌ nute chitú‑u nu̱u̱nꞌ ñu̱ꞌún sáva xináánꞌ nɨꞌɨ rá íyó ñunéꞌyúꞌ. 16Sáá íñɨ́ ko̱ye̱ꞌlé nu̱u̱nꞌ vi̱ko̱ꞌ jee kune̱ꞌyá ni̱ꞌ maa jee naku̱ꞌun iniꞌ ni̱ꞌ tratúꞌ ñakɨnꞌ nuꞌuꞌ Ndiosíꞌ nɨ́ɨ́nkání jín ntáká rá tékúꞌ ntáká rá íyó ñunéꞌyúꞌ nu̱u̱nꞌ ñu̱ꞌún.”

17Jee nkachiꞌ tuku Ndiosíꞌ nu̱u̱nꞌ Noé:

“Yaꞌá kuvi seña tratúꞌ ya̱ ñakɨnꞌ ni̱ꞌ jín nɨꞌɨ rá íyó ñunéꞌyúꞌ rá íyó nu̱u̱nꞌ ñu̱ꞌún.”

Noé jín rá se̱ꞌya yɨ́ɨ́ re̱ꞌ

18Rá se̱ꞌya Noé nkene ráa iniꞌ arca suviráa kúvi Sem, Cam jín Jafet. Jee Cam nkuvi tátáꞌ Canaán. 19Núníꞌ rá te̱e yaꞌá nkuvi se̱ꞌya Noé, jee nu̱u̱nꞌ rá yaꞌá nkene rá ñɨvɨ ñe̱te̱nuun ráa ña̱ko̱o ráa nu̱u̱nꞌ nɨꞌɨ nu̱u̱nꞌ ñu̱ꞌún.

20Noé kúvi te̱e sátíñú nu̱u̱nꞌ ñu̱ꞌún jee nki̱jéꞌé re̱ꞌ ntee re̱ꞌ rá yokúꞌúꞌ uva sáva saꞌá re̱ꞌ tataꞌ uva. 21Jee niꞌi re̱ꞌ nixiꞌ nu̱xi uva nsa̱ꞌá re̱ꞌ jee ni̱ni naanꞌ re̱ꞌ jee ña̱kava ñɨɨn lɨ́ɨ́ꞌ re̱ꞌ iniꞌ veꞌi sayo saꞌma re̱ꞌ. 22Jee Cam, tátáꞌ Canaán, niniꞌ re̱ꞌ ya̱ íyó ñɨɨn lɨ́ɨ́ꞌ tátáꞌ re̱ꞌ jee ña̱kachiꞌ re̱ꞌ maa nu̱u̱nꞌ ni núvíꞌ rá ñaniꞌ re̱ꞌ. 23I̱ña̱jée Sem jín Jafet nkeꞌen ráa saꞌma jee nchi̱só ráa maa chi̱yo̱ꞌ ráa jee nika ya̱ta̱ꞌ ráa ñasɨꞌ ráa ya̱ta̱ꞌ tátáꞌ ráa. Jee nna̱teeyátá ráa nu̱u̱nꞌ ráa jee ntu nne̱ꞌyá ráa ya̱ íyó ñɨɨn lɨ́ɨ́ꞌ tátáꞌ ráa.

24Jee nna̱taꞌviꞌ iniꞌ Noé ya̱ níni re̱ꞌ jee sáá nku̱káꞌnú iniꞌ re̱ꞌ ya̱ nsa̱ꞌá se̱ꞌya yɨ́ɨ́ re̱ꞌ ya̱ su̱chí ka̱ꞌ jín re̱ꞌ 25jee nkachiꞌ re̱ꞌ:

“Kosoni̱nu Canaán,

kuvi ichiyúkúnꞌ kene ráa nu̱u̱nꞌ re̱ꞌ musúꞌ keꞌen ñɨvɨ kɨꞌɨ ráa xi̱ntíín [ichiyúkúnꞌ] kene rává nu̱u̱nꞌ rá ñaniꞌ re̱ꞌ.”

26Jee nkachiꞌ re̱ꞌ:

“Netuꞌ kúvi I̱toꞌoꞌ‑ó ya̱ kúvi Ndiosíꞌ nu̱u̱nꞌ yɨ́tíñú Sem,

jee rá ichiyúkúnꞌ Canaán ya̱ váji ichinúúnꞌ kuvi ráa musúꞌ keꞌen ñɨvɨ kɨꞌɨ ráa xi̱ntíín rá ichiyúkúnꞌ kene nu̱u̱nꞌ Sem.

27Na̱ ka̱ꞌ saꞌá kue̱ꞌe̱ꞌ Ndiosíꞌ ñuꞌun nu̱u̱nꞌ kuneeꞌ Jafet ya̱ kuvi kutenuun rá se̱ꞌya ichiyúkúnꞌ re̱ꞌ nu̱u̱nꞌ kuneeꞌ ráa,

jee na̱ ka̱ꞌ kuneeꞌ nkáꞌnú va̱ꞌa rá se̱ꞌya ichiyúkúnꞌ re̱ꞌ nu̱u̱nꞌ kuneeꞌ rá ichiyúkúnꞌ ya̱ kene ráa nu̱u̱nꞌ Sem,

jee rá ichiyúkúnꞌ kene nu̱u̱nꞌ Canaán kuvi ráa musúꞌ keꞌen ñɨvɨ kɨꞌɨ ráa xi̱ntíín ichiyúkúnꞌ kene rává nu̱u̱nꞌ Jafet.”

28Sáá njia̱ꞌa ya̱ nchu̱chítú nute nu̱u̱nꞌ ñu̱ꞌún jee ntekuꞌ Noé u̱ni̱ꞌ sientúꞌ vi̱xiko u̱ji̱ꞌ kui̱ya̱ꞌ (350) ka̱ꞌ. 29Jee nɨꞌɨ rá kui̱ya̱ꞌ ntekuꞌ Noé ni̱ñɨ re̱ꞌ ɨ̱ɨ̱nꞌ sientúꞌ vi̱xiko u̱ji̱ꞌ kui̱ya̱ꞌ (950) jee ni̱ꞌi̱ꞌ re̱ꞌ.

Currently Selected:

Génesis 9: meh

Highlight

Copy