Génesis 13

Abram jín Lot kúsɨ́ɨ́n ráa

1Jee nkene Abram ñuunꞌ Egipto jín ñasɨ́ꞌɨ́ re̱ꞌ jín nɨꞌɨ kuitɨꞌ ya̱ kúmí re̱ꞌ, jín Lot jee kua̱ꞌa̱nꞌ ráa Négueb. 2Jee kúká nasɨ́kuitɨꞌ Abram, chi íyó víꞌí rá sa̱na̱ꞌ re̱ꞌ jín ka̱a kuáán oro re̱ꞌ ya̱ yɨ́yáꞌvi jín ka̱a kuíjín plata re̱ꞌ ya̱ yɨ́yáꞌvi.

3Jee nkene re̱ꞌ Négueb ni̱kónúun re̱ꞌ kua̱ꞌa̱nꞌ re̱ꞌ nekuaꞌ nkenta tuku re̱ꞌ ñuunꞌ Betel, i̱ña̱jée nna̱kuneeꞌ tuku re̱ꞌ nu̱u̱nꞌ ya̱ nneeꞌ re̱ꞌ nu̱u̱nꞌ ya̱ níñɨ veꞌi sayo saꞌma re̱ꞌ xíꞌna ma̱ꞌñú ñuunꞌ Betel jín ñuunꞌ Ai, 4nu̱u̱nꞌ íyó nu̱u̱nꞌ nsamaꞌ re̱ꞌ yu̱u̱ꞌ tióꞌ ya̱ta̱ꞌ nu̱u̱nꞌ #13:4 Altar sókóꞌ re̱ꞌ nu̱u̱nꞌ I̱toꞌoꞌ‑ó jee nkakua̱chi re̱ꞌ nu̱u̱nꞌ I̱toꞌoꞌ‑ó.

5Jee Lot, ya̱ kútáꞌán re̱ꞌ jín Abram, sunisaá íyó víꞌí sa̱na̱ꞌ líꞌíꞌ re̱ꞌ, jín xi̱ni̱kɨ̱ꞌ re̱ꞌ, jín rá veꞌi sayo saꞌma re̱ꞌ. 6Soo ntu kúneí nu̱u̱nꞌ ñu̱ꞌún kutekuꞌ nkáá ráa chi íyó kue̱ꞌe̱ꞌ víꞌí rá kúmí ráa jee ntu nkúvi kuneeꞌ nkáꞌnú ráa. 7Jee kántátúꞌun rá ñɨvɨ kúmí sa̱na̱ꞌ Abram jín rá kúmí sa̱na̱ꞌ Lot. (Jee tiempúꞌ yukuán, rá ñɨvɨ ya̱ kúvi tataꞌ ichiyúkúnꞌ Canaán jín rá ñɨvɨ ferezeo suni nééꞌ ráa nu̱u̱nꞌ ñu̱ꞌún yukuán.) 8Saáva nkachiꞌ Abram nu̱u̱nꞌ Lot:

“Koo va̱ꞌa iniꞌ nú, nkóo‑ó tu̱ntíxín nteñu noꞌó jín nuꞌuꞌ, jín nteñu rá kúmí sa̱na̱ꞌ ni̱ꞌ jín rá kúmí sa̱na̱ꞌ nú, chi ñɨvɨ táꞌán veꞌi kúvi‑ó. 9¿Á nsáꞌ káá nɨꞌɨ ñuꞌun ichinúúnꞌ nú rúja? Jee kákua̱chi ni̱ꞌ ya̱ kusɨ́ɨ́n nú nu̱u̱nꞌ nuꞌuꞌ. Retú kɨ̱ꞌɨ̱nꞌ nú ichi sátín jee kɨ̱ꞌɨ̱nꞌ ni̱ꞌ ichi kuáꞌá. Jee retú kɨ̱ꞌɨ̱nꞌ nú ichi kuáꞌá jee kɨ̱ꞌɨ̱nꞌ ni̱ꞌ ichi sátín”, nkachiꞌ Abram.

10Jee nna̱nenu̱u̱nꞌ Lot jee niniꞌ re̱ꞌ nɨꞌɨ nuꞌveꞌ ichi káá nute káꞌnú Jordán, jee niniꞌ re̱ꞌ ya̱ nɨꞌɨ rá ñuꞌun yukuán íyó víꞌí nute maa kénta ne̱ ñuunꞌ Zoar kuéntáꞌ kua̱ꞌ ni̱yo ñuꞌun I̱toꞌoꞌ‑ó naní Edén nu̱u̱nꞌ viiꞌ víꞌí ni̱yo jín kuéntáꞌ kua̱ꞌ nu̱u̱nꞌ ñu̱ꞌún Egipto. Sukuán ni̱yo viiꞌ‑i ne̱ sáá ntiáꞌan xináa I̱toꞌoꞌ‑ó rá ñuunꞌ Sodoma jín Gomorra. 11I̱ña̱jée nka̱ji Lot nɨꞌɨ nuꞌveꞌ ichi káá nute káꞌnú Jordán ntɨɨn re̱ꞌ maa jee nke̱chí re̱ꞌ kua̱ꞌa̱nꞌ re̱ꞌ ichi kénta nka̱niiꞌ, jee nku̱sɨ́ɨ́n ráa nu̱u̱nꞌ ɨɨn inka táꞌán ráa. 12Jee Abram nkino̱o re̱ꞌ nneeꞌ re̱ꞌ ichi káá ñuꞌun Canaán, jee Lot kua̱ꞌa̱nꞌ re̱ꞌ ña̱kuneeꞌ re̱ꞌ rá ñuunꞌ káá nuꞌveꞌ jee ñaniꞌ re̱ꞌ veꞌi sayo saꞌma re̱ꞌ ñuunꞌ Sodoma. 13Jee rá ñɨvɨ Sodoma nkuvi ráa ñɨvɨ kánéꞌén, jee sáꞌá nasɨ́kuitɨꞌ ráa kua̱chi nu̱u̱nꞌ I̱toꞌoꞌ‑ó.

14Sáá ya̱ kua̱ꞌa̱nꞌ Lot nku̱sɨ́ɨ́n re̱ꞌ nu̱u̱nꞌ Abram, jee I̱toꞌoꞌ‑ó nkachiꞌ re̱ꞌ nu̱u̱nꞌ Abram: “Nanenu̱u̱nꞌ jee kune̱ꞌyá ne̱ nu̱u̱nꞌ nééꞌ nú ne̱ ichi xíníꞌ ñɨ̱vɨ́, ne̱ ichi jiéꞌéꞌ ñɨ̱vɨ́, ne̱ ichi kénta nka̱niiꞌ jín ne̱ ichi táꞌánꞌ nka̱niiꞌ, 15chi nɨꞌɨ noo ñuꞌun néꞌyá nú nu̱u̱nꞌ noꞌó taji ni̱ꞌ maa jín nu̱u̱nꞌ rá se̱ꞌya ichiyúkúnꞌ nú ya̱ kuvi‑i ñuꞌun nú jín ráa nɨ́ɨ́nkání. 16Jee saꞌá ni̱ꞌ ya̱ nukueꞌeꞌ víꞌí rá se̱ꞌya ichiyúkúnꞌ nú kuéntáꞌ ti̱ka̱cha̱a̱ꞌ íyó nu̱u̱nꞌ ñu̱ꞌún, ya̱ retú kúneí kaꞌvi ɨɨn ñɨvɨ ti̱ka̱cha̱a̱ꞌ íyó nu̱u̱nꞌ ñu̱ꞌún, jee sunisaá kúvi kaꞌvi‑i rá se̱ꞌya ichiyúkúnꞌ nú. 17Nakuiñɨꞌ jee kuáꞌán kaka nɨꞌɨ kua̱ꞌ kání nu̱u̱nꞌ ñu̱ꞌún jín nɨꞌɨ kua̱ꞌ níkáꞌ, chi taji ni̱ꞌ maa nu̱u̱nꞌ noꞌó.”

18Jee kua̱ꞌa̱nꞌ Abram jín veꞌi sayo saꞌma re̱ꞌ ña̱kuneeꞌ re̱ꞌ nteñu rá tu̱ya̱á nku̱mí Mamré ya̱ íñɨ́ ráa ñuunꞌ Hebrón, jee yukuán nsamaꞌ Abram yu̱u̱ꞌ ɨɨn nu̱u̱nꞌ #13:18 Altar so̱ko̱ꞌ re̱ꞌ nu̱u̱nꞌ I̱toꞌoꞌ‑ó.

Currently Selected:

Génesis 13: meh

Highlight

Copy