Génesis 11

Veꞌi súkún nasɨ́kuitɨꞌ ya̱ nkáa ñuunꞌ Babel

1Jee tióꞌ yukuán nɨꞌɨ noo ñɨvɨ nééꞌ ñɨ̱vɨ́ ɨɨn ni tu̱ꞌun nkaꞌanꞌ ráa jín ɨɨn nuún ni rá tu̱ꞌun káꞌánꞌ ráa nékui. 2Jee sáá ni̱kónúun ráa ichi kéne nka̱niiꞌ jee nna̱niꞌinꞌ ráa nu̱u̱nꞌ íyó nuꞌveꞌ káꞌnú naní Sinar, jee yukuán ña̱kuneeꞌ ráa. 3Jee nkachiꞌ ɨɨn inka ráa nu̱u̱nꞌ táꞌán ráa: “Nkóꞌónꞌ‑ó kɨ̱saꞌá‑ó no̱ꞌo jee nateñuꞌun‑ó maa nu̱u̱nꞌ ñuꞌúnꞌ.”

Jee sukuán ña̱tíñú ráa rá no̱ꞌo kuéntáꞌ kua̱ꞌ rá yu̱u̱ꞌ. Jee ña̱tíñú ráa su̱jie petroliúꞌ kuéntáꞌ kua̱ꞌ cementúꞌ. 4Jee nkachiꞌ ráa: “Nkóꞌónꞌ‑ó kɨ̱saꞌá‑ó ɨɨn ñuunꞌ‑ó jín ɨɨn veꞌi súkún nasɨ́kuitɨꞌ ya̱ sikuéꞌnu súkún‑ó maa nekuaꞌ kenta xi̱ni̱ꞌ ve̱ꞌí súkún nasɨ́kuitɨꞌ vá ne̱ súkún, sáva te̱ku̱tu̱ꞌún jie̱ꞌe̱ꞌ‑ó sáva ntu kusɨ́ɨ́n‑ó kutenuun‑ó nu̱u̱nꞌ nɨꞌɨ ñɨ̱vɨ́.”

5Soo nki̱nkuun I̱toꞌoꞌ‑ó sáva kune̱ꞌyá re̱ꞌ ñuunꞌ yaꞌá jín veꞌi súkún nasɨ́kuitɨꞌ nsa̱ꞌá rá ñɨvɨ. 6I̱ña̱jée nkachiꞌ I̱toꞌoꞌ‑ó: “Kune̱ꞌyá, ɨɨn ni nu̱u̱nꞌ ñɨvɨ kúvi ráa jee ɨɨn ni nu̱u̱nꞌ tu̱ꞌun káꞌánꞌ nɨꞌɨ ráa. Jie̱ꞌe̱ꞌ saáva tiñu yaꞌá ví tiñu xíꞌnañúꞌún ya̱ saꞌá ráa, vitan jee kuvi saꞌá ráa néni ɨɨn tiñu ya̱ kuꞌun iniꞌ ráa saꞌá ráa. 7Nkóꞌónꞌ‑ó kinkuun‑ó sama‑ó tu̱ꞌun ráa sáva sɨ́ɨ́n sɨ́ɨ́n kaꞌanꞌ ráa sáva nkíku̱ꞌun ka̱ꞌ iniꞌ ɨɨn inka ráa tu̱ꞌun kaꞌanꞌ táꞌán ráa.”

8Jee sukuán nsi̱kúténuun I̱toꞌoꞌ‑ó ráa nkene ráa yukuán kua̱ꞌa̱nꞌ ráa kua̱íyó nu̱u̱nꞌ ñu̱ꞌún, jee ña̱kui̱ñɨ̱ꞌ ráa ya̱ síkuéꞌnu ráa ñuunꞌ vá. 9Saáva naní ñuunꞌ yukuán Babel #11:9 Babel kuíni kachiꞌ: sisákáꞌ xi̱ni̱ꞌ. chi yukuán nsama I̱toꞌoꞌ‑ó tu̱ꞌun ráa sáva sɨ́ɨ́n sɨ́ɨ́n kaꞌanꞌ nɨꞌɨ rá ñɨvɨ íyó nu̱u̱nꞌ ñu̱ꞌún, jee nsi̱kúténuun re̱ꞌ ráa nkene ráa yukuán kua̱ꞌa̱nꞌ ráa kua̱íyó nu̱u̱nꞌ ñu̱ꞌún.

Rá se̱ꞌya ichiyúkúnꞌ Sem

10Yaꞌá ví tu̱ꞌun jie̱ꞌe̱ꞌ rá ichiyúkúnꞌ nkene ráa nu̱u̱nꞌ Sem. Sáá nkenta íñɨ́ Sem ɨɨn sientúꞌ kui̱ya̱ꞌ (100) jee nsa̱ꞌá re̱ꞌ se̱ꞌya yɨ́ɨ́ re̱ꞌ Arfaxad, sáá njia̱ꞌa u̱vi̱ꞌ kui̱ya̱ꞌ ya̱ nchi̱tú nute nu̱u̱nꞌ ñu̱ꞌún. 11Sáá njia̱ꞌa ya̱ nsa̱ꞌá Sem se̱ꞌya re̱ꞌ Arfaxad jee ntekuꞌ re̱ꞌ u̱ꞌu̱nꞌ sientúꞌ kui̱ya̱ꞌ ka̱ꞌ (500), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

12Sáá íñɨ́ Arfaxad o̱ko̱ꞌ xa̱ꞌu̱nꞌ kui̱ya̱ꞌ (35) jee nsa̱ꞌá re̱ꞌ se̱ꞌya yɨ́ɨ́ re̱ꞌ Sala. 13Sáá njia̱ꞌa ya̱ nsa̱ꞌá Arfaxad se̱ꞌya re̱ꞌ Sélah jee ntekuꞌ re̱ꞌ ku̱mi̱ꞌ sientúꞌ u̱ni̱ꞌ (403) kui̱ya̱ꞌ ka̱ꞌ, jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

14Sáá íñɨ́ Sélah o̱ko̱ꞌ u̱ji̱ꞌ kui̱ya̱ꞌ (30) jee nsa̱ꞌá re̱ꞌ se̱ꞌya yɨ́ɨ́ re̱ꞌ Heber. 15Sáá njia̱ꞌa ya̱ nsa̱ꞌá Sala se̱ꞌya re̱ꞌ Éber jee ntekuꞌ re̱ꞌ ku̱mi̱ꞌ sientúꞌ u̱ni̱ꞌ kui̱ya̱ꞌ ka̱ꞌ (403), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

16Sáá íñɨ́ Heber o̱ko̱ꞌ u̱xu̱ꞌ ku̱mi̱ꞌ kui̱ya̱ꞌ (34) jee nsa̱ꞌá re̱ꞌ se̱ꞌya yɨ́ɨ́ re̱ꞌ Peleg. 17Sáá njia̱ꞌa ya̱ nsa̱ꞌá Heber se̱ꞌya re̱ꞌ Peleg jee ntekuꞌ re̱ꞌ ku̱mi̱ꞌ sientúꞌ o̱ko̱ꞌ u̱ji̱ꞌ kui̱ya̱ꞌ ka̱ꞌ (430), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

18Sáá íñɨ́ Peleg o̱ko̱ꞌ u̱ji̱ꞌ kui̱ya̱ꞌ (30) jee nsa̱ꞌá re̱ꞌ se̱ꞌya yɨ́ɨ́ re̱ꞌ Reu. 19Sáá njia̱ꞌa ya̱ nsa̱ꞌá Peleg se̱ꞌya re̱ꞌ Reu jee ntekuꞌ re̱ꞌ u̱vi̱ꞌ sientúꞌ ɨ̱ɨ̱nꞌ kui̱ya̱ꞌ ka̱ꞌ (209), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

20Sáá íñɨ́ Reu o̱ko̱ꞌ u̱xu̱ꞌ u̱vi̱ꞌ kui̱ya̱ꞌ (32) jee nsa̱ꞌá re̱ꞌ se̱ꞌya yɨ́ɨ́ re̱ꞌ Serug. 21Sáá njia̱ꞌa ya̱ nsa̱ꞌá Reu se̱ꞌya re̱ꞌ Serug jee ntekuꞌ re̱ꞌ u̱vi̱ꞌ sientúꞌ u̱xa̱ꞌ kui̱ya̱ꞌ ka̱ꞌ (207), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

22Sáá íñɨ́ Serug o̱ko̱ꞌ u̱ji̱ꞌ kui̱ya̱ꞌ (30) jee nsa̱ꞌá re̱ꞌ se̱ꞌya yɨ́ɨ́ re̱ꞌ Nacor. 23Sáá njia̱ꞌa ya̱ nsa̱ꞌá Serug se̱ꞌya re̱ꞌ Nacor jee ntekuꞌ re̱ꞌ u̱vi̱ꞌ sientúꞌ kui̱ya̱ꞌ ka̱ꞌ (200), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

24Sáá íñɨ́ Nacor o̱ko̱ꞌ ɨ̱ɨ̱nꞌ kui̱ya̱ꞌ (29) jee nsa̱ꞌá re̱ꞌ se̱ꞌya yɨ́ɨ́ re̱ꞌ Taré. 25Sáá njia̱ꞌa ya̱ nsa̱ꞌá Nacor se̱ꞌya re̱ꞌ Taré jee ntekuꞌ re̱ꞌ ɨɨn sientúꞌ xa̱ꞌu̱nꞌ ku̱mi̱ꞌ kui̱ya̱ꞌ ka̱ꞌ (119), jee nsa̱ꞌá re̱ꞌ ka̱ꞌ rá se̱ꞌya yɨ́ɨ́ re̱ꞌ jín rá se̱ꞌya sɨ́ꞌɨ́ re̱ꞌ.

26Sáá íñɨ́ Taré u̱ni̱xiko u̱ji̱ꞌ kui̱ya̱ꞌ (70) jee nsa̱ꞌá re̱ꞌ rá se̱ꞌya yɨ́ɨ́ re̱ꞌ Abram, Nacor jín Harán.

Rá se̱ꞌya ichiyúkúnꞌ Taré

27Yaꞌá ví tu̱ꞌun jie̱ꞌe̱ꞌ rá ichiyúkúnꞌ nkene ráa nu̱u̱nꞌ Taré. Nsa̱ꞌá Taré rá se̱ꞌya yɨ́ɨ́ re̱ꞌ Abram, Nacor jín Harán. Jee Harán nsa̱ꞌá re̱ꞌ se̱ꞌya yɨ́ɨ́ re̱ꞌ Lot. 28Jee xíꞌna ka̱ꞌ Harán ni̱ꞌi̱ꞌ ne̱ ntiáꞌan kuviꞌ tááꞌ re̱ꞌ Taré. Ni̱ꞌi̱ꞌ Harán ñuunꞌ Ur nu̱u̱nꞌ nkaku re̱ꞌ, nu̱u̱nꞌ nééꞌ rá ñɨvɨ caldeo. 29Jee nta̱na̱ꞌá Abram jín ñasɨ́ꞌɨ́ re̱ꞌ jee nta̱na̱ꞌá Nacor jín ñasɨ́ꞌɨ́ re̱ꞌ. Ñasɨ́ꞌɨ́ Abram naní Sarai, jee ñasɨ́ꞌɨ́ Nacor naní Milca, ya̱ kúvi se̱ꞌya sɨ́ꞌɨ́ Harán, jee Harán kúvi tááꞌ Milca jín Isca. 30Soo Sarai kúvi ñaꞌan númáꞌ jee ntu íyó se̱ꞌya ña.

31Jee nkene Taré nu̱u̱nꞌ ñuunꞌ Ur nu̱u̱nꞌ nééꞌ rá ñɨvɨ caldeo sáva kɨ̱ꞌɨ̱nꞌ re̱ꞌ nu̱u̱nꞌ ñu̱ꞌún Canaán, jee kua̱ꞌa̱nꞌ re̱ꞌ jín se̱ꞌya re̱ꞌ Abram jín tiání re̱ꞌ Lot ya̱ kúvi‑i se̱ꞌya Harán. Jee suni kua̱ꞌa̱nꞌ Taré jín sia̱nú re̱ꞌ Sarai ya̱ kúvi ñasɨ́ꞌɨ́ Abram. Jee kua̱ꞌa̱nꞌ ráa nu̱u̱nꞌ ñuunꞌ Harán jee nkino̱o ráa nééꞌ ráa yukuán. 32Jee íñɨ́ Taré u̱vi̱ꞌ sientúꞌ u̱ꞌu̱nꞌ kui̱ya̱ꞌ (205) jee ni̱ꞌi̱ꞌ re̱ꞌ nu̱u̱nꞌ ñuunꞌ Harán.

Currently Selected:

Génesis 11: meh

Highlight

Copy