रोमि 15

एटाःकू राः बनो चलोः घियाआ बू पसींदू

1अबू जे जे बिसवास रेबू मजबूत गिआ हेंकू, अनाबू खुस लगड अलोबू जियोऊ, लेकिन जे बिसवास रेकू ढिलंग गिआ, हेंकू राः संखा अवुर डर बू सहोवे। 2अबू सींड़कू एटाःकू राः बनो चलोः घियाआ बू पसींदू, अवुर हेंय बिसवास रेय मजबूतुः लगड बू कोसिसे। 3कहेकि मसीहा अनानेज खुस लगड मेनेय जियो गना; न राः बारे ते धरमग्रंथ रे न घयते लिखल इदाना, “अम कू बेजती तेडा, हेंकू इंञ कू बेजती केडा।” 4जेतना ना धरमग्रंथ रे पहील तेकू लिखो केडा, हेना अबू चेडूः लगड कू लिखो केडा, ताकि अबू धीरज बू साबू अवुर बचन ते हिमत ञँमकेते आसा बू रखो।

5धीरज, अवुर सान्ति ए-माय भगवान अपे ईसु मसीह तिःवड पेआ, हेना राः अनुसार ते आपस रे एक गूट तेपे दोहोन लगड सहेताय ओवापे। 6ताकि अपे एक सुर ते अवुर एक आवाज ते अबू रेनिय परभु ईसु मसीह अपत भगवान पे बडेयवा।

बढ़ियाँः खभेर सींड़कू लगड हवे

7हेनाते, जेयसे मसीहा भगवान राः आदर होयाः लगड अपेय अपनो केडा, हेन घयते अपे हो एटाःकू पे अपनो। 8इंञ नआँ टेबोः नेन लगाडिंञ कहनी यडा कि मसीहा दो मुँवर बू हवे, हेंडे रेहो एहूदिकू#15:8 खतना केनकू रेनिय सेवेखियाय बनो एना सेवा लगाडिय मेजेना, अवुर हेंकू रेनकू दादी पुरखाकू थरेय जबान तेडा, हेना पूरा लगड भगवान तयोम हनते कबोह मेनेय चीगिआ#15:8 ग्रीक भासा ते भगवान सत गिअय मेनाआँ तिब लगड मेनाआँ लाय लगाडिय मेजेना। 9अवुर मसीहा मेजुः राः कारन नआँ हो हवे कि अनजातकू थरे हो भगवान दया केना, हेना लगड भगवान कू बडेयवा; धरमग्रंथ रे न घयते लिखल इदाना, मतलोब हेनारे दाऊद राजा भगवान थरे न याःतेय कहनिया,

“हेनाते इंञ अनजातकू राः बीच रे अम धन्यावादिंञ ओवा मिआँ,

अवुर अम ञुमू राः भजानिंञ सीरिंगा।”#सिरिंग 18:49

10अवुर मियाँ थरे न घयते हो इदाना,

“ए, अपे अनजातकू,

हेंय रेनकू होड़कू सुदा खुसी पे मनो।”

11अनावुर मियाँ थरे इदाना,

“ए, अनजातकू, परभु पे बडेयवा;

अवुर ए, राज राज रेनकू सींड़ होड़कू, हेंय पे हठावा।”

12फेर एसायाह भविस्यवक्‍ता हो न याःतेय कहनिया,

“ईसेय राः खुटी खनदान रे मियाँहोड़ जनामुआँ; हेंय अनजातकू थरे राजे लगाडिय रिमुःआ,

अवुर अनजातकू हेंय थरे आसा कू रखोआ।”

13आसा ए-माय भगवान, अपे बिसवास केडा तेपे, हेंय अपे हँसी खुसी ते अवुर सान्ति तेय भरपूर पे; ताकि अपे राः आसा पवितर आत्मा राः सक्‍ति ते बड़हो चलोऊ।

पवलुस अनजातकू थरेय सेसेवा एना

14एगा ईञाःकू भाईकू, इंञ खुदे अपे राः बारे तेंञ पपाड़ी तना कि अपे भगवान राः गुँड़ ते अवुर जे-निरीता गियान ते भरपूर गिआपे, अवुर एटाःकू होपे चेड सकोआ। 15हेंडे रेहो इंञ कुछ बिसेय राः बारे ते अपे एर सुरता पे लगड हिमत केतेंञ लिखो केडा; भगवान इंञ थरेय किरपा केना ते, 16इंञ अनजातकू लगड ईसु मसीह रेनिय सेवेखियांञ बनो केना; भगवान राः बढ़ियाँः खभेर लाय लगड आजककू घयतेंञ सेसेवा तना; हेनाते अपे चिली करा भगवान लगड भेंट घयतेंञ रकब पे, ताकि पवितर आत्मा पवितर केपे ते भगवान अपनो पे घयतेपे बनोऊ। 17हेनाते भगवान ईञाः सेवा रे, मसीह ईसु ईञाः दोवारा तेय काम केडा हेना सगोर टेबोः रे इंञ सयँड़ सकोअँञू। 18भगवान राः टेबोः कू मनो लगड अनजातकू भगवान थरे अगकू लगड मसीहा ईञाः दोवारा ते जो कुछिय करो केडा, हे-ना राः बारे तेंञ कहनिया, अवुरिंञ हिमातेआ; अनजातकू थरे बचन लाय केते, अवुर ईञाः जीवन राः दोवारा ते भगवान थरे अगकू लगड ईसु मसीह काम केडा। 19अवुर चिन्ह तिबके ते अवुर अहचरज काम केते, अवुर पवितर आत्मा राः सक्‍ति ते, इंञ हेंकू भगवान राः बचन लाय वकू लगड हेंय थरे अगकू लगड ईसु मसीह ईञाः दोवारा तेय काम केडा, नेन घयते इंञ एरुसलेम सहर वरी इल्लुरिकुस राः जघीन जघा ते, मसीहा राः बढ़ियाँः खभेर पूरा पूरांञ परचार केडा।

20लेकिन इंञ, जहाँ जहाँ ते मसीहा राः ञुमू बेगर कू अँजोमा, हेना हेनाते परचारे लगाडिंञ चहोः तना। इंञ एटाःकू नेंव केड हेना रे, ओड़ाः बनो लगड मेनेंञ चहोः तना। 21लेकिन धरमग्रंथ रे न घयते लिखल इदाना, हेन घयते होयाऊ,

“जे जे थरे हेंय राः बढ़ियाँः खभेर बेगर तयाआ, हे-नकू ञेंलेया,

अवुर जे जे हेंय राः बारे ते बेगर कू अँजोमा, हेनकू जे-रेआ।”

पवलुस रोम सेनुः लगाडिय सँबाहुआ

22 # रोमि 1:13 जहाँ जहाँ ते बढ़ियाँः खभेर बेगर तयाआ, हेना हेनाते ललाय रेंञ अडताना, हेनाते अपे थरे मेनेंञ मेज सको गना। 23लेकिन इंञ नआँ देस रे ईञाः कामिंञ पूरा केडा। केय बरिस वरी अपे थरे सेन गिसन यडिञाँ। 24हेनाते इंञ स्पेन देसिंञ चलोः तोलोग अपेंञ उसका गोःया पेआ, कहेकि ईञाः आसा हवे कि चलोः तोलोग अपे सुदांञ जुमोआ, अवुर अपे सुदा जुमो कोःते जीविंञ बहालुआ, अवुर अपे अधा अँगम पे पड़गाही अटुञूँ।

25लेकिन निहों दो पवितर होड़कू सहेतावा कू लगड एरुसलेम सहर हनतेंञ चलोः तना।#1 कुरि 16:1-4 26कहेकि मकिदुनिया अवुर अखया रेनकू, एरुसलेम रेनकू पवितर होड़कू मेंडे रे गरीब गिः हेंकू लगड थोड़ा बहुत खुसी तेकू उगह केडा। 27हेंकू खुसी तेदो कू उगह केडा, लेकिन हेंकू एरुसलेम रेनकू राः करजा होकू जोम केडा। कहेकि अनजातकू, एहूदिकू वरी आत्मिक आसीस कू ञँमकेडा, दो हेंकू हो हेंकू राः घटी टुटी रेकू सहेतावा कू।#1 कुरि 9:11 28हेनाते नआँ कू उगह केड हेना एम अटु केकुते, अवुर नआँ बढ़ियाँः काम पूरा केतेंञ उसका गोया पेआ, तहाँ स्पेन देस हनतेंञ चलोआ। 29अवुर इंञ पपाड़ी तना, इंञ अपे थरेंञ मेजुः रे अपे लगड मसीहा राः भरपूर आसीसिंञ अगदरताआ।

30एगा भाईकू, अबू रेनिय परभु ईसु मसीह राः ञुमू ते, अवुर पवितर आत्मा एमकेडा परेम राः चलते ते, अपे थरे ईञाः अरजी हवे कि अपे इंञ सुदा मियाँ ते हरग दिल ते इंञ लगड भगवान थरे पे बिनतीऊ। 31ताकि अहूदिया रेनकू भगवान थरे मेने कू बिसवासेःकू वरिय बंचोविञूँ, अवुर एरुसलेम रेनकू पवितर होड़कू लगड भेंटिंञ गोःयड हेना, हेंकू हँसी खुसी तेकू तिलायू। 32अवुर भगवान राः इक्छा ते, अपे थरे हँसी खुसी तेंञ मेजुऊ, अवुर अबू जुमो कोःतेबू टेबोः बहल ओड़ेंगू।

33सान्ति ए-माय भगवान अपे सींड़कू सुदाय दोहोनू। आमेन।

Currently Selected:

रोमि 15: ksz

Highlight

Copy