मरकुस 1

बतिस्मा ए-मय एहुन्‍ना राः परचार

(मत्ती 3:1-12; लूका 3:1-18; 7:27; एहुन्‍ना 1:19-28)

1भगवान होपोन, ईसु मसीह राः बढ़ियाँः खभेर राः बोंहड़ित न घयते होयाआ। 2एसायाह भविस्यवक्‍ता लिखो केड हेना पोथी रे इदाना, “अँजोम मी, ईञाअय दूत अम वरी मड़ंग तेंञ कुलियाडिया, हेंय अम लगड होरिय तयारा। 3सुनहर ओत रे मियाँहोड़ होड़ गोहार यडा, परभु लगड होर पे तयारू, हेंय राः होर पे सोझ साझू।” 4नेय खभेरिया बतिस्मा ए-मय एहुन्‍ना दोहो एना। नेय सुनहर ओत रे दोहो कोःतेय लाय वकू दोहो एनु कि सींड़कू पाप वरी मन पे मिड़ाऊ, हेंडे भगवान माफिय ओवा पेआ। अवुर पाप वरी मानिय मिड़ाः केडा मेनाआँ, सींड़कू पपाड़ी लगड बतिस्मा पे तिला, मेनतेय परचार तेडा। 5गोटा एहूदी देस रेनकू अवुर एरुसलेम रे दोहोनकू सींड़कू हेंय थरे कू मेजेना। अवुर हेंय राः टेबोः अँजोम केते अपन अपन पाप कू मनो दोहो एनु, अवुर हेंकू जरदन जोड़ रे हेंय वरी बतिस्मा कू तिला तेडा। 6हेंय राः कपड़ा ऊँट रोंवा राः दोहो एना। अवुर मयंग तुरे खाल राः बेलाटिय तोल दोहो एनु, अवुर हेंय फंफा फीरियाकू अवुर मधरासिय जोम दोहो एनु। 7हेंय न याःतेय परचारे दोहो एनु, “इंञ तयोम तेय मेजुः तन हेनी, इंञ वरी अखीर सक्‍तिसाली गिआयू; इंञ दो हेंय राः जुता रसी लड़ा लायिक हो कोवाञाँ। 8इंञ दो दाः ते बतिस्मांञ ओवापे तना, लेकिन हेंय पवितर आत्मा ते बतिस्माय ओवा पेआ।”

ईसु राः बतिस्मा अवुर परिक्छा

(मत्ती 3:13; 4:11; लूका 3:21,22; 4:1-13)

9हेना वरी एक दिन राः दिन रे ईसु गलील जिला राः नसरेत सहर वरी मेजकेन ते जरदन जोड़ रे एहुन्‍ना वरी बतिस्माय तिला तेडा। 10अवुर दाः वरिय उडूंग एना, तहाँ तुरेत्ते अगस जीजुः तोलोग अवुर पवितर आत्मा परेवाँ घयते अनेज थरे अगड़ुः तोलोगिय ञेंलवाडा। 11#मत्ती 3:17; 12:18; मरकुस 9:7; लूका 3:22 अवुर अगस वरी न याःते आवाज मेजेना, “अम ईञाअय दुलारय कोड़ा होपोनींञ हवे, इंञ अम थरे अखीर खुस इदानिञाँ।” 12हेना वरी तुरेत्ते ईसु पवितर आत्मा सुनहर ओत हनते कुलतेडिया। 13अवुर हेंय सुनहर ओत रे चालीस दिन अँगम सयतान परिक्छा तेडिया; अवुर जंगली जानवरकू सुदाय दोहोन दोहो एनु, अवुर सरगदूतकू मेजकेन तेकू सेवा तेडिया।

ईसु सेसेवाय बोंहड़ी तेडा

(मत्ती 4:12-17; लूका 4:14,15)

14अवुर हेरोदेस अंतीपास राजा, एहुन्‍नाय पकड़ो तेडा, तहाँ ईसु भगवान राः बढ़ियाँः खभेर लाय लगड गलील जिलाय सेनेना। 15#मत्ती 3:2अवुर हेंय परचार तेडा, “समय पुरो यना, अवुर भगवान राः राज बँदे रे मेजियाना। मन पे मिड़ाऊ अवुर नआँ बढ़ियाँः खभेर रेपे बिसवासे।”

ईसु हकु ञेंड कुय राःतेडा

(मत्ती 4:18-22; लूका 5:1-11)

16एक दिन राः दिन रे ईसु गलील राः समुन्धर अड़ी तेय चलोः दोहो एनु, तहाँ सिमोन#1:16 सिमोन पतरस मेनते हो ञुमूत इदाना बोहोत अन्दिरयास, नेकींञ बना होड़ मगिया समुन्धर रे जाल कींञ एनेज तोलोगिय ञेंल ञँम किञाँ; कहेकि हेंकींञ हकु ञेंड कींञ दोहो एना। 17अवुर ईसु हेंकींञ थरेय कहनी तेडा, “इंञ तयोम तेबा मेजुऊ; इंञ अबा भगवान थरे होड़कू अग लगाडिंञ चेडबाआ।” 18तहाँ हेंकींञ तुरेत्ते जाल चिली बगी वते हेंय तयोम तेकींञ सेनतेडा। 19हेना वरी ईसु दमभर मड़ंग हनते तोरा केनते जबदी कोड़ा होपोन कींञ एकूब अवुर एहुन्‍ना, डोंगा रे जाल तँग तुँगो तोलोगिय ञेंल ञँमतेड किञाँ। 20तहाँ तुरेत्ते हेंकींञ होय राःतेड किञाँ। अवुर हेंकींञ बना होड़ अपत कींञ जबदी बबानिकू थरे डोंगा रेकींञ अटु तेडिया। अवुर अकींञ ईसु तयोम तेकींञ चलो एना।

ईसु मियाँहोड़ वरी भूतिय उडूंग तेडा

(लूका 4:31-37)

21तहाँ ईसु चेलाकू सुदा कफरनहूम सहर कू सेनेना, अवुर तुरेत्ते हेंय सब्द राः दिन रे ईसु आराधना ओड़ाः रे भगवान राः टेबोईय चेडकू दोहो एनु। 22#मत्ती 7:28,29अवुर होड़कू ईसु राः टेबोः अँजोम केतेकू अहचरज यनु। कहेकि हेंय एहूदी नियम चेचेडकू घयते मेने, लेकिन अधिकार राः साथ तेय चेडकू दोहो एनु। 23हेन तोलोग हेंकू राः आराधना ओड़ाः रे मियाँहोड़ होड़ दोहो एना, हेंय थरे भूत लगो तना, हेंय अहीज केनतेय कहनी तेडा, 24“ए नसरेत रेनिय ईसु, अम अले ची लगड मी सताप यडलेआ (अले राः अम थरे ची काम इदाना), अम अले नास ले लगड मी मेजकेना किदो? इंञ पपाड़ी तना अम ईया हवे, अम भगवान रेनिय पवितर होड़ हवे!” 25तहाँ ईसु दबेट केडिय तेय कहनी तेडा, “जपनो कोःमी; अवुर नेय वरिम उडूंग चलोऊ।” 26तहाँ भूत हेंय हिलो केडिय ते हेंय वरी अच्छा ते अहीज केनतेय उडूंग यनु। 27होड़कू ञेंलकेय तेकू अहचरज यनु। अवुर अनाकू अनाकू कहनी यडू, “न का घियाः टेबोः हवे? न दो नवाँः सिक्छा हवे! अधिकार राः साथ तेय कहनियाँ अवुर भूतकू हो नेय राः टेबो कू मनोवेआ।” 28अवुर तुरेत्ते ईसु राः चरचा सींड़ गलील जिला राः धरी कगर रे मिरीज यनु।

ईसु अखीर बेमारिया कुय चिकन तेडा

(मत्ती 8:14-17; लूका 4:38-41)

29हेना वरी ईसु तुरेत्ते आराधना ओड़ाः वरी उडूंग केनते एकूब अवुर एहुन्‍ना सुदा सिमोन अवुर अन्दिरयास ओड़ाः रेकू सेनेना। 30सिमोन हनहार जार लेनता डिया, अवुर होड़कू हेंय राः बारे ते तुरेत्ते ईसु थरे कू कहनी तेडा। 31तहाँ ईसु हेंय बँदे रे सेनकेनते तीत रे सब केडिय तेय रिमतेडिया; अवुर हेंय राः जार अगड़ू यनु, अवुर हेंय रिमकेनते आदर भोजन कू लगाडिय भिड़ो यनु। 32बेर डुबोः तोलोग#1:32 बेर डुबोः सी सब्द राः दिन हनी जोमा, हेनाते सींगड़ जुवर कू अगतेड कुआ। होड़कू केय प्रकार ते हसु तनकू अवुर जे थरे भूतकू लगो तनकू, हेंय थरे कू अगतेड कुआ। 33अवुर सहर रेनकू सींड़कू राच रेकू जवार यनु। 34हेंय अखीर होड़कू जे-निरीत्ते हसु तनकुय चिकन तेडा। अवुर भूतकू लगोतन हेंकुय उडूंग तेडा, अवुर भूतकू मेनेय इकम टेबोः गडकुआ, कहेकि हेंय कू चिन्होंविय दोहो एनु।

मियाँहोड़ ते ईसु बिनती एना

(लूका 4:42-44)

35ईसु भिंसार तेय रिमेना, अवुर हेंय सुनहर ओत रे सेनकेन तेय बिनती एना। 36तहाँ सिमोन अवुर हेंय गतिकू हेंय छपा लगड कू उडूंग एना। 37हेंय कू ञँमतेडिया, तहाँ हेंय थरे कू कहनी तेडा, “सींड़कू अम कू छपा यडा।” 38तहाँ हेंय हेंकू थरेय कहनी तेडा, “दाऊ; अबू आस पास तआ बस्ती तेबू सेनुऊ, इंञ हेना तेहोंञ परचारेआ, कहेकि इंञ नेन लगाडिंञ मेजकेना।” 39#मत्ती 4:23; 9:35हेना वरी हेंय सींड़ गलील जिला रे हेंकू राः आराधना ओड़ाः ते सेनकेन तेय परचारे अवुर भूतकुय उडूंग दोहो एनु।

ईसु कुड़गा रोगियाय चिकन तेडा

(मत्ती 8:1-4; लूका 5:12-16)

40मियाँहोड़ कुड़गा तनय ईसु थरेय मेजेना, अवुर हेंय थरे गोड़िय गिरो केनतेय अरजी एना, “अगर अम चहोः रेदो, इंञ मी सुद्ध सकोआ।” 41हेना वरी हेंय थरे दया केनते तीतिय सुहरू तेडा, अवुर हेंय छुयों केडिय तेय कहनी तेडा, “इंञ चहोः तना, अम सूधुः मी।” 42हेना वरी हेंय राः कुड़गा रोग तुरेत्ते छुटो यनु, अवुरिय चिकन तेडिया। 43तहाँ हेंय चेतवन केडिय ते, तुरेत्तेय कुलतेडिया। 44अवुर हेंय थरेय कहनी तेडा, “अँजोम मी, कनय थरे कनर मेनते अलोम लाय बेड़ायू, सींड़कू मड़ंग रे सखिया गोवाह होयाः लगड सेनकोःते आजक मी तिःवा। कुड़गा वरी चिकानुअय लगड भगवान मूसा थरे नियामिय एमतेडा, हेना राः अनुसार ते पुजम ए-मू।” 45लेकिन हेंय बहेर हँडे सेनकेनते नआँ टेबोः अखीरिय परचार तेडा, अवुर एतना मिरीज एना कि फेर ईसु सहर रेनकू होड़कू राः देखता देखती ते मेनेय सेन सको गना, हेनाते हेंय बहेर हनताः भदेड़ी तेय दोहो एना; अवुर चारियो खुट वरी होड़कू हेंय थरे कू मेजेना।

Currently Selected:

मरकुस 1: ksz

Highlight

Copy