मत्ती 9
9
ईसु लवका ञेंडता डियायिय चिकन तेडा
(मरकुस 2:1-12; लूका 5:17-26)
1ईसु डोंगा रे रकब केनते बडे समुन्धर खँडा केते अकू सहर रेय मेजेना। 2अवुर कुछ होड़कू लवका ञेंडताडिय हेनी होड़, परकोम ते ईसु थरे कू अगतेडिया। तहाँ ईसु हेंकू राः बिसवास ञेंलके ते लवका ञेंडताडियाय थरेय कहनी तेडा, “ए बेटा, हिमातेमू, अमाः पाप माफ यना।” 3नआँ अँजोम केते एहूदी नियम चेचेडकू मेंडे कुछ होड़कू मने मन रे “नेय दो भगवानिय निन्दा यडा” मेनते कू कहनी तेडा। 4ईसु हेंकू मने मन रेकू पसींद तेडा, हेना पपाड़ी केनतेय कहनी तेडा, “अपे ची लगड खराब टेबोःपे पसींद यडा? 5करा टेबोः सहज गिआ? अम पाप केड हेनांञ माफ गोत्तेडा मेनाआँ किदो, रिमकोः तेम सेन बेड़ाऊ मेनाआँ? 6ताकि इंञ होड़ होपोन धरती रे पाप माफ राः हँक इदाना मेनाअपे पपाड़ी, हेना अपेंञ तिःवा पेआ।” तहाँ हेंय लवका ञेंडताडियाय थरेय कहनी तेडा, “रिमुःमी, परकोम तम रिमकेते ओड़ाः मी हनतेम चलोऊ।” 7तहाँ हेंय चिकन यनियू, अवुर रिमकेन ते ओड़ाः तुकू हनतेय चलो यनु। 8तहाँ भीड़ रेनकू होड़कू नआँ ञेंलके तेकू बोरो यनु, अवुर हेंकू भगवान, होड़कू हो न घियाआ हाँकिय ओवड कुआ मेनते कू बडेय वडियू।
ईसु मत्तिय राःतेडा
(मरकुस 2:13-17; लूका 5:27-32)
9हेना जघा वरी ईसु मड़ंग हनतेय तोरा एना। तहाँ मत्ती मेनते कू ञुमू तडिय हेनी मलगुजारी तिलाआ ओड़ाः रे दुड़ूब तन तोलोगिय ञेंल ञँमतेडिया, अवुर हेंय थरेय कहनी तेडा, “दाव इंञ तयोम तेम मेजुऊ।” हेना वरी हेंय रिमकेनते हें-नी तयोम तेय सेनतेडा। 10#लूका 15:1,2 मत्ती ओड़ाः रे ईसु जोमुः लगाडिय दुड़ूब एना, तहाँ दो मलगुजारी तिलाकू अवुर पापी होड़कू मेनते फरीसिकू कहनी वकुआ, हेंकू मेजकेन ते ईसु अवुर चेला कुतय सुदा जोमुः लगड कू दुड़ूब एना। 11नआँ ञेंलकेते फरीसिकू हेंय रेनकू चेला कुकू होंबोर तेडा, “अपे रेनिय गुरू मलगुजारी तिलाकू अवुर पापी होड़कू सुदा ची लगाडिय जोमुआँ?” 12हेना वरी ईसु नआँ टेबोः अँजोम केते हेंकू थरेय कहनी तेडा, “डाक्टर चिकन होड़कू लगड मेने, लेकिन हसु कोःकू लगड जरूरत पड़ोआ। 13#मत्ती 12:7 जू सेनकोःते ‘इंञ बलिदान मेने, लेकिन इंञ दयांञ चहोः तना’ मेनाआँ, भगवान राः टेबोः राः मतलोब चेडूः पे, नआँ टेबोः राः मतलोब पे जेर तेड रेदो, इंञ पापी होड़कू सुदा ची लगाडिंञ जोमुः तना, हेना पे जेर तेड मेनू, कहेकि ‘इंञ धरमिकू मेने,’ लेकिन पापिकू राः लगाडिंञ मेजकेना।”
उपासुः राः बारे ते सवाल
(मरकुस 2:18-22; लूका 5:33-39)
14तहाँ बतिस्मा ए-मय एहुन्ना रेनकू चेलाकू ईसु थरे मेजकेन तेकू कहनी तेडा, “अले अवुर फरीसिकू ची लगड अखीर ले उपासुआ, लेकिन अमाःकू चेलाकू मेने कू उपासुः तना?” 15हेना वरी ईसु हेंकू थरेय कहनी तेडा, “बरातियाकू सुदा दुल्हा दोहोन मेन दिन, हेंकू पसतोअकू किदो? लेकिन हेना दिन मेजुआ, दुल्हा हेंकू वरिय हिगरो गोगेया, हेन तोलोग हेंकू उपासुआ#9:15 ईसु मसीह अनानेज दुल्हा मेनतेय कहनी केना, ईसु मसीह चेलाकू सुदाया, हेनाते खुस गिआकू, लेकिन ईसु मसीह कू ञेंड गोजेया, अवुर चेलाकू दुख रेकू पड़ोआ, हेंडेकू उपासुआ।” 16“नवाआँ कपड़ा वरी ओड़ेज केते मरिआ कपड़ा रे कनय मेने कू टेपीया। कहेकि हेना टेपी मरिआ कपड़ा ओर गोत्तेआ, अवुर हेना बगरा ते ओड़ेज जो-मा। 17अवुर नवाआँ अंगूर#9:17 ना रे मरिआ अंगूर रस राः मतलोब एहूदी होड़कू राः मरिआ रीति बिधी, अवुर नवाः अंगूर रस ईसु मसीह राः नवाः रीति बिधी। रस मरिआ खाल राः झोला रे कनय मेने भरोवेआ, नहीं तदो झोला ओड़ेजुआ, अवुर अंगूर रस एंडाआ, अवुर झोला हो बरबादुआ, लेकिन नवाआँ अंगूर रस ननावआँ झोला रे भरो केतेकू दोहोया, अवुर हेना बनाटंग बढ़ियाँ ते दोहोना।”
गोजतानाय कोड़ी चोंडिज अवुर महेनवरी रोगिया कोड़ीहोन
(मरकुस 5:21-43; लूका 8:40-56)
18ईसु नआँ घयतेय कहनी वकू दोहो एनु, तहाँ एहूदिकू राः आराधना ओड़ाः रेनिय मुखिया मेजेना, अवुर हेंय ईसु थरे गो-ड़िय गिरो केनतेय कहनी तेडा, “इंञाअय कोड़ी होपोन निनीहोय गोजियाना। दू सेनकोःते तीम तेम छुवोंविय रेदोय जियो अयू।” 19तहाँ ईसु रिमकेनते चेला कुतय सुदा हेंय तयोम तेय सेनेना।
20हेनेन तोलोग मियाँहोड़ बारह बरिस अँगम महेनवरी रोग रेय दोहो एना, हेंय कोड़ीहोन तयोम हनवरी सेनकेन ते ईसु राः कपड़ा छोरिय छुवों तेडा। 21कहेकि हेंय मन मन रेय कहनिय दोहो एनु, “मेंय राः कनापड़ांञ छुयों तेंञ चिकानुआ” मेनते। 22हेना वरी ईसु मुँहियों केनतेय तेरेज तेडिया अवुरिय कहनी वडियू, “बेटी, जीविम मी केटेजू, अम बिसवास केडा तेम चिकन यना।” हेना वरी हेंय कोड़ीहोन हेनेन तोलोगिय चिकन यनु।
23तहाँ ईसु हेंय मुखिया ओड़ाईय तयाःतेड दो, हेना रे बसरी बजाकू अवुर होड़कू काँव राँवुः कुय सेन ञँमतेडा। 24तहाँय कहनी तेडा, “अड़ीः पे, नेय कोड़ीचोंडीज बेगारिय गो-जा, नेय गितीज तनायू।” नआँ टेबोः अँजोम केते हेंकू लँदा वडियाकू। 25हेना वरी हेना ओड़ाः रे जवर तनकू बहेर हनतेकू उडूंग तेडकुआ, तहाँ ईसु भीतारिय बोलो केनते, कोड़ी चोंडिज तीय सबतेडा, अवुर हेंय जियो रिमिया नियू। 26अवुर नआँ टेबोः राः चरचा हेना गोटा देस रे मिरीज यनु।
ईसु बा होड़ अंद्हा कीञिंय चिकन तेडा
27ईसु हेना जघा वरिय तोरा एना, दो बा होड़ अंद्हा कींञ हेंय तयोम ते, “ओ दाऊद खनदान रेनियू, अलिंञ थरेम दयाऊ!” मेनते कींञ हाक दोहो एनु। 28ईसु ओड़ाईय सेनेना, तहाँ हेंकींञ अंद्हा कींञ हो हेंय थरे कींञ मेजेना। हेना वरी ईसु हेंकीञिंय होंबोर तेडा, “इंञ नआँ कामिंञ करो सकोआ मेनाआँ अबा बिसवास यडा किदो?” तहाँ हेंकींञ कहनी तेडा, “हूँ, परभु!” 29तहाँ हेंकींञ मेड छुयों केतेय कहनी तेडा, “अबा जेयसे बा बिसवास केडा, हेन घयते होयाऊ!” 30अवुर हेंकींञ मेड जीजयानू। हेना वरी ईसु हेंकींञ चेतवन केडकींञ तेय कहनी तेडा, “अँजोम बा, नआँ टेबोः कनय थरे अलोबा लाय बेड़ायू।” 31लेकिन हेंकींञ उडूंग केनते गोटा देस रे हेंय राः खभेर कींञ मिरीज गोत्तेडू।
ईसु मियाँहोड़ कोंदय चिकन तेडा
32हेंकू बहेर हनतेकू उडूंगुः दोहो एनु, तहाँ कुछ होड़कू मियाँहोड़ गूँगा ईसु थरे कू इदी तेडिया, अवुर हेंय थरे भूत लगो तना। 33अवुर ईसु भूतिय उडूंग तेडा, तहाँ गूँगा टेबोईयू। होड़कू अहचरज यन तेकू कहनियू, “अबू इसरायिल रे नआँ घियाआ कबोह मेने बू ञेंलगाडा।” 34#मत्ती 10:25; 12:24; मरकुस 3:22; लूका 11:15लेकिन फरीसीकू कहनियू, “नेय भूतकू रेनकू मुखिया राः सहेता ते भूतकुय उडूंग यडा।”
बनियाँरकू ठुवा गिआकू
35 #
मत्ती 4:23; मरकुस 1:39; लूका 4:44 ईसु सींड़ सहर अवुर गाँव गाँव तेय सेनेना, अवुर हेंय एहूदिकू राः आराधना ओड़ाः तेय चेडकू, अवुर भगवान राः राज राः बढ़ियाँ खभेरिय परचारे, अवुर जे-निरीत रेनकू बेमारियाकू अवुर लटो तनकुय चिकन दोहो एनु। 36#मरकुस 6:34 हेंय भीड़ रेनकू होड़कुय ञेंलतेडा, तहाँ सोग लगो एना, कहेकि हेंकू बेगर चरवाहकू भेंड़िकू घयतेकू अलमलोः तना, अवुर कू अडतना#9:36 बेसहारा कू अवुर पिटो गोजकेड कुते घिरकेड कुः घयतेय ञेंलवड कुआ।। 37#लूका 10:2तहाँ अनेज रेनकू चेलाकू थरेय कहनी तेडा, “बिली केना खेत दो अखीर इदाना, लेकिन बनियाँरकू ठुवा गिआ। 38हेनाते खेत मुँवर थरे पे बिनतीऊ, कि हेंय अनेज राः खेती ईर लगड बनियाँर कुय कूलु।”
Currently Selected:
मत्ती 9: ksz
Highlight
Share
Copy
Want to have your highlights saved across all your devices? Sign up or sign in
© 2022, Wycliffe India. All rights reserved.
