मत्ती 15

रीति रिवाज मनोआँ राः सवाल

(मरकुस 7:1-23)

1तहाँ एरुसलेम वरी गोटाचार फरीसिकू अवुर एहूदी नियम चेचेडकू ईसु थरे मेजकेन तेकू होंबोर तेडिया। 2“अमाःकू चेलाकू दादी पुरखाकू राः रीति रिवाज ची लगड मेने कू मनो यडा, हेंकू बेगर अंचा ते रोटी कू जोम यडा?” 3हेना वरी हेंकुय जबाब वडा, “अपे हो अपे राः रीति रिवाज राः चलते ते भगवान राः हुकूम ची लगड पे कटो गोत्ते तना? 4कहेकि भगवान, ‘अपन इंग आप राः सिमाम रखो,’ अवुर ‘जे इंगत चहे अपत राः इजेतिय उडुगूँ, #निर्ग 21:17 हेंय ञेंड गोज गोत्तेय पे’ मेनतेय कहनी केडा। 5लेकिन अपे कहनियाँ, ‘इंञ अबा सहेता ओवा बा मेनते दोहोएन हेना, भगवान लगाडिंञ रकब गोत्तेडा’ मेनते, अगर कनय इंगत अपत थरेय कहनियू, 6दो हेंय इंगत अपत राः आदर इजेत करेक जरूरत कोवाआ मेनते पे चेडकुआ। नेन घयते अपे रीति रिवाज राः चलते ते भगवान राः हुकूम पे कटो गोत्ते तना। 7ए कपटिकू, एसायाह अपे राः बारे ते ठिकेय भविस्यवाड़ी केडा, 8‘नेकू अहत कू तेदो इंञ कू आदर इजेतिञाँ, लेकिन नेकू राः मन इंञ वरी एटाः रे दोहोना। 9अवुर नेकू इंञ बे-मतलोब तेकू आराधनाञाँ, कहेकि मनवाँकू बनो केडा नियम भगवान राः नियम ने-ना हवे मेनते कू चेडकुआ।’”

असुद्ध कुआ हेना टेबोः

10तहाँ ईसु, होड़कू अनेज बँदेर रे राःकेड कुते हेंकू थरेय कहनी तेडा, “अँजोमे पे अवुर समझोः पे। 11जो-मेः हेनाते होड़कू मेने असुद्ध कुआ, लेकिन अहा वरी उडूगुआ, हेनाते असुद्ध कुआ।” 12तहाँ चेलाकू मेजकेन ते हेंय थरे कू कहनी तेडा, “अमाः टेबोः अँजोम केते फरीसिकू जीवित कुरे ठाँय मरेना, हेनम पपाड़ी तना किदो मेने?” 13हेना वरी ईसु जबाब तेडा, “सरग रेनिय अपुंञ बेगर रोहेः हेना गँछी, सींड़िय रचा गेआ। 14#लूका 6:39मेकू इकम गोडवा कुपे; मेकू अंद्हाकू रेनकू अंद्हा अघुवाकू हवे, अगर अंद्हा होड़ अनंदहा होरिय तिःवा रेदो, बना होड़ डोड्हा रेकींञ लोजो रूआ।”

15नआँ अँजोम केते पतरस ईसु थरेय कहनी तेडा, “नआँ उदाहरड़ राः मतलोब मी समझो गोत्तेले।” 16हेना वरी ईसु कहनी तेडा, “अपे निहों मेनते मेने पे पपाड़ी तना किदो? 17अपे मेने पे समझोः तना किदो? जे-ना अहा रे सेनुआ, हे-ना लाज रे सेनुआ, अवुर कू बिर उडूंग गोत्तेआ? 18#मत्ती 12:34लेकिन जे-ना अहा वरी उडूगुआ, हे-ना मन वरी उडूगुआ, अवुर होड़ हे-ना असुद्ध गोत्तेया। 19कहेकि गंदा सोच, जनमरवा, परसतिरीगमन#15:19 कोड़िकू संग कोड़िकू गितिजा, हेना कू कहनी वआ, लंद फँद, चोचोरा, झूठ मुठा गोवाही, अवुर निन्दा टेबोः मनन वरी उडूंगुआ। 20नेन होयाना होड़कू असुद्ध हेना दो, ती बेगर अंचा ते जोमुः हेना होड़कू मेने असुद्ध कुआ।”

कनानी जात रेनिय कोड़ीहोन राः बिसवास

(मरकुस 7:24-30)

21ईसु हेना वरी उडूंग केनते, सूर अवुर सयदा राः छेतर हनतेय चलो एना। 22हेना राज वरी मियाँहोड़ कनानी जात#15:22 कनानी जात रेनकू सहीअय भगवान मेने पपाड़िकू रेनिय कोड़ीहोन उडूंग एना, अवुर किर्री केनतेय कहनियूँ, “ओ परभु, दाऊद खनदान रेनियू, इंञ थरेम दयाऊ! कोड़ी होपोनिंञ भूत अखीरिय सताप यडिया।” 23लेकिन ईसु हेंय कनर जबाब मेनेय एमगाडिया। तहाँ चेला कुतय हेंय थरे मेजकेन तेकू अरजी एना, “मेय राः टेबोः अँजोम केते बिदा गोत्तेय मी, कहेकि नेय अबू तयोम तेय किर्री मेजुः तना।” 24हेना वरी हेंय कहनी तेडा, “भगवान इंञ अडकेनकू भेंड़िकू इसराएलिकू थरे भरिय कुलकेडिञाँ, लेकिन अनजातकू थरे बेगारिय कुलेञाँ।” 25हेंडे रेहो हेंय मेजेनयू, अवुर ईसु थरे गो-ड़िय गिरो केनतेय कहनी तेडा, “ओ परभु, सहेतावंञ मी।” 26हेना वरी हेंय कहनी तेडा, “कोड़ा चोंडिजकू राः रोटी सबकेते कुतूकू ओवा बढ़ियाँ कोवाआ।” 27हेना वरी हेंय कहनी तेडा, “सही हवे परभु, लेकिन कुतूकू हो मुँवर तुकू राः टिबुल पेंदी रे लोजोर कोआ हेना सीथ कू जो-मा।” 28हेना वरी ईसु जबाब वडिया, “ए कोड़ीहोन, अमाः बिसवास बडे गिआ। जेयसे अम चहोः तना, हेनेन घयते अम लगड होयाऊ।” तहाँ हेंय कोड़ी होपोन हेनेन तोलोगिय चिकन यनु।

ईसु केय्यो झन रोगिया कुय चिकन तेडा

(मरकुस 8:1-10)

29ईसु हेना जघा वरी गलील जिला राः समुन्धर अड़ी अड़ी तेय सेनेना, हेना वरी बुरू रेय रकब केनतेय दुड़ूब यनु। 30तहाँ भीड़ उपर भीड़ हेंय थरे कू मेजेना। अवुर हेंकू अकू सुदा लंगड़ाकू, अंद्हाकू, गूँगाकू, ठुठाकू, अवुर जे-निरीत रेनकू हेंय थरे कू अगतेड कुआ, अवुर हेंकू हेंय कटत बँदे रेकू इदी तेडकू दोहो एनु, अवुर ईसु हेंकुय चिकन तेडकुआ। 31गूँगाकू टेबोआ, लंगड़ा ठुठाकू चिकन जोमा, अवुर अंद्हाकू ञेंञेंल तना, हेना ञेंलते होड़कू अहचरज यनते इसरायिल रेनिय भगवान कू बडेय वडा।

ईसु चार हजार होड़कुय खियो तेडा

(मरकुस 8:1-10)

32ईसु चेला कुतय राःकेड तेय कहनी तेडा, “नेकू होड़कू इंञ सोग वकू तनाञूँ, कहेकि नेकू तीन दिन वरी इंञ सुदा कुआ, अवुर जो-मे लगड नेकू थरे कनर कोवाआ। बेगर खियो केकुते मेने कुल गिसन यडिञाँ, होर घियाः रे लँगा कोःते अलोकू तुरसूडुऊ।” 33हेना वरी चेलाकू हेंय थरे कू कहनी तेडा, “निमीन होड़कू खियो लगड नआँ सुनहर ओत रे कराआ रोटी बू ञाँमा?” 34हेना वरी ईसु हेंकुय होंबोर तेडा, “अपे थरे तीमिन रोटी इदाना?” हेना वरी हेंकू कहनी तेडा, “सात गोटंग, अवुर दमभर होडींञ हकुकू इदाना।” 35तहाँ होड़कू ओतेत रे दुड़ूब लगाडिय कहनी वडकू। 36अवुर हेना सात गोटंग रोटी अवुर हकु कुय सबतेडा, अवुर भगवान धन्यवाद वतेय टोविज तेडा, अवुर चेला कुतायिय ओवाडू, अवुर चेलाकू होड़कू कू परोस वडू। 37सींड़कू जोम केनतेकू बियानू, हेना वरी चेलाकू पेरेज पेरेज ते सात छनवाँ बंचो तना टुटकत कू रिमतेडा। 38जोजोमकू कोड़िकू अवुर चोंडिजकू छोड़ ते चार हजार कोड़ाकू दोहो एना। 39तहाँ हेंय होड़कू बिदा केते डोंगा रेय रकब एना, अवुर मगदन छेतर हनतेय चलो एना।

Currently Selected:

मत्ती 15: ksz

Highlight

Copy