लूका 6

सब्द रेनिय परभु

(मत्ती 12:1-8; मरकुस 2:23-28)

1सब्द राः दिन रे ईसु अवुर चेलाकू गोहोम खेत तेकू चलोः दोहो एनु। अवुर चेला कुतय गोहोंम बली होड होड ते तीत कुते दरमेस केतेकू जोम गो-गे दोहो एनु। 2तहाँ फरीसिकू मेंडे कुछ होड़कू कहनी तेडा, “सब्द राः दिन रे जे नियम इदाना, हेना ची लगड पे उजड़ यडा?”

3हेना वरी ईसु हेंकुय जबाब वडा, “अपे धरमग्रंथ कबोह मेने पे पड़हो गडा किदो? दाऊद अवुर गतितकू रँगेज तडकू तोलोग चीय बनो तेडा? 4दाऊद भगवान ओड़ाः#6:4 भगवान राः स्तुति हेना बडेआ तम्बू रे सेनकेनते भेंट कू रकब तडा, हेना रोटिय जोम तेडा, अवुर नआँ आजककू छोड़ कनय एटाःकू जोजोम जयेज कोवाआ, अवुर गतितकू होय ओवडकू।” 5हेना वरी ईसु हेंकू थरेय कहनी तेडा, “इंञ होड़ होपोन सब्द राः दिन रेनिय हो परभु हवे।”

ईसु तीत लोहोड़ तनयहोड़ीय चिकन तेडा

(मत्ती 12:9-14; मरकुस 3:1-6)

6अवुर एटाः सब्द राः दिन रे ईसु आराधना ओड़ाः रे सेनकेनते होड़कू सिक्छाय चेडकू दोहो एनु। हेना रे मियाँहोड़ होड़ जोम गतर तीत लोहोड़ तनय दोहो एना। 7अवुर सब्द राः दिन रेय चिकानिय किदो एरोआ मेनाआँ ञेंल लगड फरीसिकू अवुर एहूदी नियम चेचेडकू ईसु कू बदी लगड मोका कू ञँम बेड़ा दोहो एनु। 8हेंय हेंकू पसींद तेड हेनाय पपाड़ी दोहो एनु, हेनाते हेंय लोहोड़ तना ती थरेय कहनी तेडा, “रिमुःमी, सींड़कू मड़ंग रेम चड़ाँऊ।” तहाँ हेंय रिम चड़ाँ यनु।

9ईसु हेंकू थरेय कहनी तेडा, “इंञ अपेंञ होंबोर यडपेआ, सब्द राः दिन रे नियम राः अनुसार ते करा बढ़ियाँ इदाना, भला काम करो हेना किदो बुरा काम करो हेना; जीव बंचो हेना किदो नासेः हेना?” 10तहाँ हेंय चारो गतर हन सींड़कू ञेंलके ते हेंय होड़ थरेय कहनी तेडा, “तीम मी सुहरू।” हेना वरी हेंय सुहरू तेडा, तहाँ हेंय ती चिकन यनु। 11हेना वरी हेंकू अखीर धको केनते बहेर हँडे उडूंग केनते अनाकू अनाकू कहनी ओड़ेंगू, “अबू ईसु काःतेबू चीया?”

ईसु बारह झन परेरित कुय चुनो तेडा

(मत्ती 10:1-4; मरकुस 3:13-19)

12हेना तोलोग ईसु बुरू रे बिनतीः लगाडिय सेनेना, अवुर भगवान थरे रात भरिय बिनती एना। 13अंगा एना तहाँ हेंय अनेज रेनकू चेलाकू राःकेड कुते, हेंकू मेंडे रे बारह झनिय चुनो तेडा, अवुर हेंकू परेरित#6:13 भगवान राः खभेर इदी लगड लिंबड़ केडकुः हेंकू मेनतेय कहनी वडकुआ। 14अवुर नेकू ञुमू नआँ याःतेआ, सिमोन ञुमू ईसु पतरस मेनतेय ञुमू तेडिया, अवुर हेंय बोहोत अन्दिरयास अवुर एकूब अवुर एहुन्‍ना अवुर फिलिपुस अवुर बरतुलमय, 15अवुर मत्ती अवुर थोमा अवुर हलफई होपोन एकूब अवुर सिमोन, नेय जेलोतेस#6:15 रोमि सरकार राः नियम राः बिरूध रे होड़कू उरायलिः हेनी। मेनते होकू कहनी वया, 16अवुर एकूब होपोन एहूदा, अवुर एहूदा इस्करयोती ने-नी ईसुय एर पकड़ो तेडा।

ईसु सिक्छाय ओवड कुआ अवुरिय चिकन तेडकुआ

(मत्ती 4:23-25; 5:1-12)

17हेना वरी ईसु हेंकू सुदा अगड़ू केनते, समथर जघा रेय चड़ाँ एना, अवुर चेलाकू राः अखीर भीड़ दोहो एना। एहूदी, एरुसलेम अवुर समुन्धर अड़ी राः सूर अवुर सयदा वरी हो अखीर होड़कू मेजेना। 18नेकू ईसु राः टेबोः अँजोम लगड अवुर रोग वरी चिकानुः लगड हेंय थरे होड़कू मेजेना। अवुर भूतकू लगो तनकू होड़कू होय चिकन कू दोहो एनु। 19हेंय वरी सक्‍ति उडूंग कोःते सींड़कुय चिकन कू दोहो एनु, हेनाते होड़कू हेंय छुवोंविय मेनते कू सँबह तना।

आसीस अवुर दुख राः टेबोः

20तहाँ हेंय अनेज रेनकू चेलाकू हनते तको केतेय कहनी तेडा, “अपे दीन गिआपे हेनाते अपे भगवान आसीसिय ओवा पेआ, कहेकि भगवान राः राज अपे राः हवे,

21अपे रँगेज केनकू पुरो केपे ते भगवान आसीसिय ओवा पेआ, अपे ईयामकू भगवान आसीसिय ओवा पेआ, कहेकि अपे लाँदा पे।

22 # 1 पतरस 4:14 होड़ होपोन राः चलते ते अपे सुदा खुरेस कू साबा अवुर कू निंदा पेआ, अवुर अपे होड़कू गलती गिआकू मेनते, पसींद केते सामाज वरी कू बेघर पेआ, हेनाते भगवान अपे आसीसिय ओवा पेआ।

23 # परेरित 7:52 हेना चेका खुसी तेपे ऊजू, कहेकि अँजोम पे अपे लगड सरग रे बडेआ ईनाम इदाना। नेकू रेनकू पुरबुजकू हो, भविस्यवक्‍ताकू सुदा नेन घयतेकू करोवे दोहो एनु।

24अपे धनी गिआपे अखीर दुख रेपे पड़ोआ, कहेकि अपे धरती रे मवोज मस्ति पे ञँम चुको केडा।

25अपे निहों सींड़ चीज पे ञँम चुको केडा, अखीर दुख रेपे पड़ोआ, कहेकि रँगेजुआ पे। अपे निहों लाँद तनकू अखीर दुख रेपे पड़ोआ, कहेकि पसतो अपे अवुर ईया मपे।

26सींड़ होड़कू अपे बढ़ियाँ गिआ मेनते कू कहनी वपे रेदो, ओहो, अपे अखीर दुख रेपे पड़ोआ, कहेकि नेकू रेनकू पुरबुजकू हो झूठा भविस्यवक्‍ताकू सुदा नेन घयते बढ़ियाँ गिआ मेनते कू कहनी वकू दोहो एनु।”

मुदेयकू सुदा परेम

(मत्ती 5:38-48; 7:12)

27“लेकिन इंञ अपे अअँजोमकू थरेंञ कहनी यडा, अपे रेनकू मुदेयकू सुदा मया मिलन तेपे दोहोनू; अपे थरे खुरेस कू सबताआ हेंकू राः भलाई पे करो। 28कनय हो अपेकू सराप रेदो आसीर्वाद पे ओवाकू, जे अपेकू मेरंग वपेआ, हेंकू लगड पे बिनतिऊ। 29कनय हो मियाँ गतर जोहापे रेय चाड़ोवे रेदो, एटाः गतर होपे एनेम चाड़ो वयू, अवुर कनय हो उयूआ तपे कू लुसी रेदो, हेंय अँगा होपे ओवायू। 30कनय हो अपे थअय असी रेदो, हेंय ओवाय पे, अवुर अपे थआ कनारा चीज होय लुसीय रेदो हेंय वरी अलोपे असियू। 31#मत्ती 7:12जे घयते अपे सुदा बेवहार पे चहोः तना, हेन घयते एटाःकू सुदा होपे बेवहारुऊ।”

32अपे सुदा मया मिलन ते दोहोनकू सुदा मया मिलन तेपे दोहोन रेदो, बड़ा भारी काम पे काम केडा किदो? नआँ याःतेदो पापी होड़कू हो अकू सुदा मया मिलन ते दोहोनकू सुदा दो मया मिलन तेकू दोहोना। 33अपे अनापे राः भलाई कू करोआ, हेंकू सुदा भलाई पे करो रेदो बड़ा भारी काम पे काम केडा किदो? नआँ याःतेदो पापी होड़कू होकू करो वेआ। 34अगर अपे मिड़ाः सकोः घियाःकू उधार पे ओवा रेदो, बड़ा भारी काम पे काम केडा किदो, नआँ याःतेदो पापिकू हो पापिकू थरे फेर हेन मेनमोट ञाँमे लगड उधार कू ओवा कुआ। 35अपे रेनकू मुदेयकू सुदा हो मया मिलन तेपे दोहोनू, भला काम पे करो, फे-रिय मिड़ागेआ मेनते असरा कोःते उधार अलोपे एमे, नआँ घयतेपे करोवे रेदो बडेः ईनाम ञँमुआ। अवुर अपे सींड़ वरी बडेअय भगवान रेनकू होपोन कुपे होयाआ, कहेकि मेने धन्यावाद वय हेंकू थरे हो अवुर पापी होड़कू थरे हो भगवान राः दया इदाना। 36जे घयते अपे रेनिय अपा दयादार गिआ हेन घयते अपे हो दयादार पे बनोऊ।

एटाःकू अलोपे दोस कू

(मत्ती 7:1-5)

37अलोपे दोस कू, तबे अपे भगवान एरोय दोस तेडपेआ। दोसी अलोपे ठहरोकू, हेंडे अपे हो भगवान दोसी एरोय ठहरो तेडपेआ। एटाःकू पे माफ रेदो, अपे हो भगवान माफ वपेअयू। 38एमेय रेदो अपे होकू ओवा पेआ, अवुर होड़कू नपो नपो ते सोकोजवते एन्डाः घयतेकू ओवा पेआ। जे नाप तेपे नपोवेआ, हे-ना नाप ते अपे लगड होय नपोवेआ।

39 # मत्ती 15:14 तहाँ मियाँटंग उदाहरड़िय कहनी तेडा, “काःते अंद्हा होड़ अंद्हा होरिय लाय वया? बना होड़ डोड्हा रे एरो कींञ लोजोर एना किदो? 40#मत्ती 10:24,25; एहुन्‍ना 13:16; 15:20चेला अनेज रेनिय गुरू वरी बडे कोवाया, लेकिन जे पक्‍काय होयाआ, हेंय अपन गुरू राः बरोबर तेय होयाआ। 41एटाःकू मेड राः तील भराः कचरा ची लगड मी ञेंलियाडा, अपन मेड राः बडेआ गेडा दो मेन सुझोः तना किदो? 42अम अनम मेड राः गेडा मेनेम ञेंलियाडा, दो एटाःकू काःतेम कहनी सकोआ, ‘रहा चड़ाँः पे अपे मेड वरी कचरांञ उडुंगा’? ए टेबोः बेंहड़ो अय होड़, पहिल ते अनम मेड वरी बडेआ गेडाम उडूंग के हेंडे एटाःकू मेड राः कचरा, ञेंलके ते बढ़ियाँ तेम उडूंग सकोआ।”

जेयसे दुबीत तेयसे जोओत

(मत्ती 7:17-20; 12:34-35)

43“कनारा बढ़ियाँः दुबी रे खराब मेने जो-आ। अवुर खराब दुबी रे बढ़ियाँः मेने जो-आ। 44#मत्ती 12:33सींड़ दुबी जोओत ते चिन्हों जोमा। होड़कू जनोम भेंजुड़ वरी अंजीर जोःओ मेने कू गो-डेआ, अवुर ओत बोयीर दुबी वरी हो अंगूर जोःओ मेने कू गो-डेआ। 45#मत्ती 12:34बढ़ियाँ होड़ अपन कोठी कया वरी बढ़ियाँः टेबोईय उडूंगा, अवुर खराब होड़ अपन कोठी कया वरी खराब टेबोईय उडूंगा, कहेकि कोठी कया रे भरो कोआ, हेनेना टेबोः हेंय अहा वरी उडूंगुआ।

बा होड़ ओड़ाः बनो कींञ

(मत्ती 7:24-27)

46अपे ईञाः टेबोः मेने पे चेडयड रेदो, ची लगड ओ परभु, ओ परभु, मेनते पे कहनी वंञ तना? 47कनय हो इंञ थरेय मेजुः हेनी, ईञाः टेबोईय अँजोमेआँ अवुर अँजोम केतेय चेडेः हेनी करा घयगी अयू, इंञ अपेंञ लाय वताना। 48हेंय होड़ नआँ घयगी अयू, अपन ओड़ाः बनो तोलोग गहीर अँगम ला ला ते चटाँड़ी तयाः केते, हेन वरी नेंविय बोंहड़िआँ। जब ओड़ाः रे बाढ हलका मेजेना, हेंडे रेहो मेने टक्सो गना, कहेकि हेना ओड़ाः अमर जमर तेय बनो तडा। 49लेकिन जे ईञाः टेबोः अँजोम केते मेने मनोवेः हेंय होड़, नआँ घयगी अयू, ओतेत रे बेगर नेंव ला ते ओड़ाईय बनो तेडा। जब हेना ओड़ाः रे बाढ हलका मेजेना, तहाँ हेना ओड़ाः तुरेत्ते धसगों यनु, अवुर हेंय राः सींड़ बरबाद यनु।”

Currently Selected:

लूका 6: ksz

Highlight

Copy