लूका 13

मन पे मिड़ाऊ नहीं तदो नासुः पे

1हेन तोलोग कुछ होड़कू ईसु थरे मेजकेन ते गलील जिला रेनकू होड़कू, भगवान लगड बलिदान कू रकब तोलोग, पिलातुस एर ञेंड गोजतेड कुआ, हेना राः बारे ते ईसु कू लाय वडा। 2नआँ अँजोम केते हेंय हेंकू थरेय कहनी तेडा, “गलील जिला रेनकू होड़कू वरी नेकू अखीर कू पाप तडा ते, नेकू थरे नआँ बिपेत मेजेना मेनते पे अड़ींग तना किदो? 3मेने, इंञ अपे थरेंञ कहनी यडा, सही मेते पाप वरी मन मेने पे मिड़ाः रेदो, सींड़कू नेन घयतेपे बिलोआ। 4एरुसलेम रे दोहोनकू मेंडे रे अठारह झन बगरा कू कसूर तडा ते, सिलोह राः बडाः ओड़ाः तेकू तेपेड गोजेना मेनते पे अड़ींग तना किदो? 5मेने, इंञ अपे थरेंञ कहनी यडा, सही मेते मन मेने पे मिड़ाः रेदो, सींड़कू नेन घयतेपे बिलोआ।”

मेने जोः हेना अंजीर दुबी राः उदाहरड़

6हेना वरी ईसु नआँ उदाहरड़िय कहनी तेडा, “मियाँहोड़ होड़ राः अंगूर बरी रे मियाँटंग अंजीर दुबीय रोहे तडा, हेना रे हेंय जोः तन कि मेने मेनाआँ ञेंञेंलिय सेनेना, लेकिन मेनेय ञँमगाडा। 7तहाँ हेंय बगान रेनिय पहरदार थरेय कहनी तेडा, ‘अँजोम मी, तीन बरिस वरी इंञ नआँ अंजीर दुबी राः जोओ छपांञ मेजुः तना, लेकिन मेनेंञ ञँम यडा, नआँ गेर केतेम घिर गोत्ते जघा भर एसेड केडा।’ 8पहरदार हेंय थरेय कहनी तेडा, ‘मालिक नेस दिनाः मी एनेवाँ, नआँ दुबीत राः चरियो गतर हन कोड़ी केते खादिंञ लगो वआ। 9मड़ंग हँडे जोः रे दोम इकावा, नहीं तदोंम गेर गोत्ते’।”

ईसु सब्द राः दिन रे कुबड़ी कोड़ीहोनिय चिकन तेडा

10सब्द राः दिन रे आराधना ओड़ाः रे ईसु होड़कुय चेड दोहो एनु। 11हेना रे मियाँहोड़ कोड़ीहोन दोहो एना, हेंय अठारह बरिस अँगम लटोविय हेनी भूत हेंय थरेय लगो तना, अवुर हेंय कुबड़ी तनायू, कनर याःते मेनेय सोझ सकोः दोहो एनु। 12ईसु हेंय ञेंलकेडिय तेय राःतेडिया, अवुरिय कहनी वडियू, “अम लटो केन वरिम चिकन यना।” 13तहाँ हेंय तीत तेय छुवों तेडिया, हेना वरी तुरेत्तेय सोझ यनु, अवुर भगवानिय बडेय वडा।

14ईसु हेंय सब्द राः दिन रेय चिकन तेडिया, हेनाते आराधना ओड़ाः रेनिय मुखिया धको केनते होड़कू थरेय कहनी तेडा, “बुता लगड छो दिन इदाना हेन देवह मेजकोः तेपे चिकानुऊ, सब्द राः दिन रे अलो।”

15नआँ अँजोम केते ईसु कहनी तेडा, “ए कपटिकू, सब्द राः दिन रे अपे मेंडे सींड़कू अपन बयेलकू चहे गदहाकू खुटा वरी लड़ा केकुते दाः पियो मेने पे गोःकुआ किदो? 16नेय कोड़ीहोन अबराहम खुटी खनदान रेनिय हवे, सयतान अठारह बरिस अँगामिय लगो तना, सब्द राः दिन रेंञ चिकन केडिया बढ़ियाँ कोवाः किदो?”

17तहाँ हेंय नआँ टेबोईय कहनी तेड सी, सींड़ बिरोधी कू लजियो यनु, अवुर ईसु अदभुत कामिय करो तेडा, हेना ञेंलके ते सींड़ कुकू खुसी यनु।

सरसों दना रआ उदाहरड़

(मत्ती 13:31-33; मरकुस 4:30-32)

18हेना वरी हेंय कहनी तेडा, “भगवान राः राज ची घयतेआ? अवुर हेना ची सुदा बरोबर केतेंञ लाय वपेआ? 19हेना मियाँ दना सरसों राः बरोबर गिआ, हेना मियाँहोड़ होड़ बरी तय रेय मेरतेडा, अवुर दुबीत बडे केनते डाँड़ एना, अवुर अगस तेनकू तितीजकू हेना रेकू डेरा एना।”

खमीर राः उदाहरड़

20हेंय फेरेचिय कहनी तेडा, “इंञ भगवान रआ राज ची सुदा बरोबर केतेंञ लाय वपेआ? 21हेना दमभराआ खमीर घयतेआ, कनय कोड़ीहोन हेना, तीन पसेरी आटा रेय सुवेड मेड़वा तेडा, तहाँ हेना सींड़ आटा खमीर बनो यनु।”

सकताहा दुवर

(मत्ती 7:13-14; 21:23)

22ईसु एरुसलेम हनतेय चलोः तोलोग सहर सहर ते गाँव गाँव ते सिक्छाय ओवाकू दोहो एनु। 23हेना वरी कनय मियाँहोड़ ईसुय होंबोर तेडा, “ए परभु, भगवान ठुवा होड़कुय उबारा किदो?” 24हेना वरी ईसु कहनी तेडा, “भगवान राः राज रे सेनुः लगड सकेता दुवर ते बोल लगड पे कोसिसे। इंञ अपेंञ कहनी वताना, अखीर होड़कू बोल मेनते कू सँबाहुआ, लेकिन एरो कू बोलो सको एना। 25ओड़ाः रेनिय मुँवर रिमकोःते दुवारिय सींञ गोत्ते, अवुर अपे बहेर हँडे चड़ाँ कोःते केंवड़ ठोको ठोको तेपे कहनियाँ, ‘ए परभु, दुवर मी जिजवा ले।’ हेना वरी हेंय अपे नआँ याःतेय जबाब वपे, ‘इंञ अपे मेनेंञ पपाड़ी तना, अपे करेन कू हवे?’ 26हेना वरी अपे कहनियाँ, ‘अले अम सुदा ले जोमेन चरो एना, अवुर अले गाँव ते सिक्छाम लाय वडलेआ।’ 27तहाँ परभु कहनियाँ, ‘इंञ मेनेंञ पपाड़िआ अपे करेन कू हवे, ए गलत काम हेंकू होड़कू, अपे सींड़कू इंञ वरी ञींर पे।’ 28#मत्ती 22:13; 25:30#मत्ती 8:11,12भगवान राः राज रे अपे अबराहम, इसहाक, एकूब, अवुर भविस्यवक्‍ताकू, दुडूब कोः तोलोग पे ञेंल कू रेदो, अवुर अपे बहेर हनतेकू उडूंग पेआ हेना ञेंलके ते ईयामा पे, अवुर तिरींग पेपे लुकड़ूमा। 29हेना वरी पुरूब अवुर पछु; उतर अवुर देखीन हनवरी चारो खुट रेनकू मेजकोःते भगवान राः राज राः भोज रेकू सामिलुआ। 30#मत्ती 19:30; 20:16; मरकुस 10:31अवुर अँजोम पे, जे तयोम केन हेंकू मड़ाँगुआकू, अवुर जे मड़ंग केन हेंकू तयोमुआँकू।”

एरुसलेम लगाडिय ईयाम एना

(मत्ती 23:37-39)

31हेन तोलोग गोटाचार फरीसिकू मेजकेन ते ईसु कू लाय वडा, “अम हेरोदेस एर ञेंडमी मेनते, नआँ वरी उडूंग चलोःमी।” 32हेना वरी ईसु हेंकू थरेय कहनी तेडा, “सेनकोःते बिगवा घयते चलहाँकय पे लायवा, ‘अँजोम पे, इंञ तेसींञ अवुर गपा भूत कुंञ उडूंग यडा, अवुर रोगिया कुंञ चिकन यडा, तीन दिन रे ईञाः कामिंञ पुनूराया।’ 33कनर घयू इंञ तेसींञ अवुर गपा अवुर मियाँग सेनुः जरूरी इदाना, कहेकि कनय भविस्यवक्‍ताकू एनेरूसलेम रेकू ञेंड गोज कुआ एटाः हँडे एरोआ।”

34“ए एरुसलेम रेनकू! अपे भविस्यवक्‍ताकू पे ञेंड गोज गोत्ते कुआ। अवुर अपे थरे कुल कुआ, हेंकू तिकी गोज गोत्ते कुआ पे। तीमिन एस इंञ चहो सोताडा, कि जेयसे सीम होपोन कुतय फंकीत तेय उकू तकुआ। हेन घयते इंञ एरुसलेम रेनकू जवर लगाडिंञ पसींद तेडा, लेकिन अपे नआँ घयते मेने पे इकाम गडिञाँ। 35अँजोम पे, अपे दोहोन तना हेना ओड़ाः उजड़ यना, नेन याःतेंञ अटु तना। अपेंञ कहनी वताना, ‘परभु राः ञुमू ते मेजुः तन हेनी आसीसित गिआयू’ मेनते पे कहनिय रे हेंडेपे ञेंलेञाँ।”

Currently Selected:

लूका 13: ksz

Highlight

Copy