लूका 1

ईसु राः बारे ते परिचय

1एगा आदरनिय थियोफिलुस, ईसु मसीह अबू होड़कू राः मँझर रेय दोहो एना। हेना तोलोग कुछ होड़कू सुरू वरी हेंय राः काम कू ञेंलतेडा, नेकू भगवान रेनकू सेवेखियाकू दोहो एना, अवुर अबू ईसु राः बारे तेकू लाय वडबुआ। 2जे जे नआँ टेबोः कू अँजोम तेडा, हेंकू मेंडे कुछ होड़कू जेयसे कू लाय वडकुआ, हेन घयतेकू लिखो केडा। 3हेनाते इंञ नआँ सींड़ टेबोः दुबीत जेड़ित वरी धियान सेतेंञ जाँच तेड दो बढ़ियाँ वडिञाँ। 4अम नआँ टेबोः पड़हो केते जो कुछ मी अँजोम केडा, हेना राः सत मी पपाड़ीः लगड ओरे ओर ते अम लगाडिंञ लिखो यडा।

एहुन्‍ना राः जनम राः घोसड़ाँ

5हेरोदेस एहूदी देस रेनिय राजाय दोहोएन तोलोग अबियाह राः दल रे जकरयाह मेनते कू ञुमू तडिय हेनी आजक#1:5 मरिआ नियम रे भगवान थरे होड़कू लगड बिनतीअय होड़। दोहो एना, हेंय इंगत कू इलीसिबा हारून खुटी खनदान रेनिय दोहो एना। 6बना होड़ कुलगिया भगवान राः नँजेर रे धरमी कींञ दोहो एना, अवुर परभु राः सींड़ टेबोः अवुर नियम कींञ मनो दोहो एनु। 7लेकिन हेंकींञ रेनकू चोंडिजकू मेने कू दोहो गना, कहेकि इलीसिबा बँजीय दोहो एना। हेंकींञ बना होड़कींञ सयाँहोड़ यन दोहो एनु।

8एक दिन राः दिन रे अनेज दल राः पारी रे हेना तोलोग जकरयाह भगवान राः मँडिल रे आजक राः कामिय काम दोहो एनु। 9भगवान राः मँडिल रे सकला जरो लगड आजककू राः रीति बिधी घयते जकरयाह ञुमू ते चिट्ठी उडूंग एना। 10सकला जरो तोलोगू, सींड़ होड़कू बहेर हँडे कू बिनतीः दोहो एनु। 11सकला जरो तेड तोलोग, धाम वरी जोम गतर रे सरगदूत अचाकतेय मेज चड़ाँ एना, अवुर जकरयाह हेंयिय ञेंलवाडिया। 12जकरयाह ञेंलकेडिय तेय अकबको यनु, अवुर अखीरिय बोरो तेडा। 13लेकिन सरगदूत कहनी तेडा, “ए जकरयाह, अलोम बो-रू, कहेकि अमाः बिनती भगवान अँजोम केडा, अम इंगापे इलीसिबा वरी अम लगड मियाँटंग कोड़ा चोंडीजिय हँबुडा, अवुर हेंय अम एहुन्‍ना मेनतेम ञुमूयू। 14अम अखीर तेम खुसीआ, अवुर हेंय जनामुः हेना चलते ते अखीर होड़कू बहालुआ कू। 15कहेकि हेंय भगवान राः नँजेर रेय बडेआ, अवुर अंगूर रस अवुर नसा चीज कभी एरोय ञूँ तेडा, हेंय इंनीगत लाज वरी पवितर आत्मा तेय भरोआ। 16अवुर इसराएल देस रेनकू अखीर होड़कू, एहुन्‍ना हेंकू रेनिय परभु भगवान हनतेय मिड़ाः कुआ। 17हेंय एलियाह थरे दोहो एना, हेना आत्मा अवुर सक्ति तेय भरोकोःते, एहुन्‍ना परभु वरी होड़कू तयार लगाडिय मड़ाँगा, अवुर बाप ददाकू अवुर चोंडिजकू राः मानिय हेल मेला, अवुर टेबोः मेने चेडकू परभु राः टेबोः मनोकू घयते होड़कुय तयारा।”

18हेना वरी जकरयाह सरगदूतिय होंबोर तेडा, “नआँ काःतेंञ पपाड़िआ? कहेकि इंञ दोंञ हड़म यना, अवुर इंगाले होय बुडही यना।” 19तहाँ सरगदूत जबाब तेडा, “इंञ भगवान मड़ंग रे दोहोनय जिबराईल हवे, अवुर अम सुदा टेबोः लगड अवुर बढ़ियाँः खभेर लाय लगाडिय कुलकेडिञाँ। 20अँजोम मी, अम ईञाः टेबोः अपन समय रे पूरा होयाः हेना रे मेनेम बिसवास गडा, हेनाते अम गूँगा अमू अवुर नआँ टेबोः अनायिन पुरोः मेन दिन एरोम टेबोः सको एना।”

21होड़कू जकरयाह कू तँगी दोहो एनु, अवुर मँडिल रे न मेन ची लगाडिय देरी केडा मेनते कू अहचरज यनु। 22जकरयाह बहेर हनतेय उडूंग एना, तहाँ हेंय हेंकू सुदा मेनेय टेबोः सकोऊ, तहाँ कू पपाड़ियन किदो नेय मँडिल रे कनायिय ञेंलवाडा। अवुर हेंकू थरेय तिब एपेल बेड़ायू अवुरिय गूँगा यनु। 23हेंय राः सेसेवा राः दिन पुरो एना, तहाँ अनेज ओड़ाः हनतेय चलो एना।

24कुछ दिन बितो केन राः बाद रे, जकरयाह इंगत कू इलीसिबा असापति एनायू। 25अवुर पाँच महिना अँगम न याःते कहनी केतेय उकू तडा, “होड़कू अलोकू कहनी गेवेंञ लगड भगवान नआँ समय रे इंञ थरेय दया केनते, चोंडिजकू ञँमुः तना।”

ईसु राः जनम राः घोसड़ाँ

26इलीसिबा राः छो महिना तना, हेन तोलोग भगवान हनवरी जिबराईल सरगदूत गलील जिला राः नसरेत गाँव रे 27#मत्ती 1:18मियाँहोड़ कुँवारी हपामोन थरेय कुलतेडिया, हेंय ञुमू मरियोम मेनते दोहो एना, हेंय राः मला मठी उसुफ सुदा होया तना, उसुफ दाऊद खुटी खनदान रेनिय होड़ दोहो एना। 28सरगदूत भीतर रे मेजकेन ते हेंय थरेय कहनी तेडा, “खुसीम मनो, भगवान अम थरेय किरपा केना! परभु अम सुदाया!”

29तहाँ हेना टेबोः अँजोम केते अखीरिय अकबको यनु, अवुर न करा घियाः जोहार हवे? मेनतेय पसींदे दोहो एनु। 30हेना वरी सरगदूत हेंय थरेय कहनी तेडा, “ए मरियोम, अलोम बो-रू, कहेकि अम थरे भगवान राः किरपा होया केना। 31#मत्ती 1:21अँजोमेमू, अम असापति अमू, अवुर अम मियाँटंग कोड़ा चोंडिज मी हँबुडा, हेंय ईसु मेनतेम ञुमूयू। 32हेंय बडेहोड़ीय बनोआँ, सींड़ वरी बडेअय भगवान होपोन कहोआ, परभु भगवान हेंय अपत#1:32 खुटियारा अपत। दाऊद राः राज गदिय ओवाया। 33अवुर हेंय एकूब#1:33 एकूब, भगवान इसराएल मेनतेय ञुँमू तेडिया, मरिआ नियम रे इसहाक कोड़ा होपोन दोहो एना। राः पिढ़ी पिढ़ी रे सरलो सँदानिय राजेआ; अवुर हेंय राः राज राः अन्त एरो होया एना।”

34हेना वरी मरियोम सरगदूत थरेय कहनी तेडा, “न काःते होयाआ इंञ दो कनय कोड़ाहोन सुदा बेनेगारिंञ गितिजा।”

35हेना वरी सरगदूत जबाब वडिया, “पवितर आत्मा अम थरे अगड़ुआ, अवुर सींड़ वरी बडेअय भगवान राः सक्‍ति डबड़ीं मिआँ, हेनाते पवितर बले जनमुआ हेंय, भगवान होपोन मेनते कू कहनी वया। 36अवुर अँजोमेमू, अम खनदान रेनिय इलीसिबा होड़कू बँजी मेनते कू कहनी वया, हेंय सयाँहोड़ यन रेहो कोड़ा चोंडीजिय हँबुड बंचो केडा, हेंय राः छटवाँ महिना चलोः तना। 37कहेकि भगवान हनवरी दोहोन हेना टेबोः एके ओत रे मेने लोजोरुआ।”

38हेना वरी मरियोम कहनी तेडा, “अँजोम मी, इंञ दो भगवान रेनिय सेवेखहीन हवे, जेयसे अम कहनी केडा हेन घयते इंञ थरे होयाऊ।” तहाँ सरगदूत मरियोम वरिय चलो यनु।

मरियोम इलीसिबा सुदा जुमोईय सेनेना

39हेन तोलोग मरियोम तुरेत्ते सँबह केनते, एहूदी देस राः मियाँटंग पहाड़ी गाँव रे जकरयाह ओड़ाः इलीसिबा सुदा जुमोईय सेनेना। 40जकरयाह ओड़ाः रे सेनकेन ते इलीसिबय जोहार वडा। 41इलीसिबा मरियोम राः जोहारिय अँजोम तेड सी, चोंडिज लाजतू रेय उजेना, अवुर इलीसिबा पवितर आत्मा तेय भरो यनु। 42अवुर हेंय बडे बडे तेय कहनी तेडा, “अम सींड़ कोड़िकू मेंडे, भगवान अम अवुर लजमी रे इदानिय हेंय बले हो आसीसिय ओवाडिया! 43ईञाअय परभु इंगत इंञ थरे मेजुः लगड, इंञ लायिक कोवाञाँ, सीरिफ नआँ भगवान राः किरपा हवे। 44अँजोम मी, अमाः जोहारिंञ अँजोम तेड सी चोंडिज इंञ लाज रे खुसी तेय उजेना। 45परभु कहनी केड हेना टेबोः रे अम बिसवास केडा, हेनाते भगवान अम आसीसिय ओवड मिआँ!”

मरियोम सीरिंग एना

46हेना वरी मरियोम कहनी तेडा, “ईञाः जीव परभु राः बड़हाई यडा,

47अवुर इंञ उबारय हेंय भगवान थरे ईञाः कोठी कया बहल केना।

48कहेकि भगवान इंञ घियाअय होडीञाँय सेवेखहीन थरे अखीरिय दया केना, हेनाते अँजोम पे, अब वरी पिढ़ी पिढ़ी रेनकू होड़कू, इंञ तीमिन आसीसिय ञँमकेडा मेनते कू कहनी वञाँ।

49सक्‍तिदारय भगवान हेंय इंञ लगड बडे बडेआ कामिय काम केडा, हेंय ञुमू पवितर गिआ।

50अवुर कनय हो हेंय राः डर-भय तेय दोहोना, हेंकू थरे भगवान राः दया पिढ़ी पिढ़ी अँगम दोहोना।

51हेंय अनेज राः बालिय तिबकेडा, अवुर अपन आप बडे गिअंञ मेनते कू अड़ींग दोहो एनु, हेंकू सींड़कुय छितीर बितीर गोत्तेड कुआ।

52राजाकू राज गद्दी रेकू दुडूब तन हेंकू हेंय सींड़कुय उडूंग गोत्तेड कुआ, अवुर गरीब होड़कुय रिमतेड कुआ।

53हेंय रँगेज होड़कू बढ़ियाँ बढ़ियाँः चीज तेय पुरो तेडकुआ, अवुर धनी होड़कू एके तीतेय उडूंग गोत्तेड कुआ।

54हेंय अनेज रेनकू सेवेखियाकू इसराएलिकुय सम्भरो तेडकुआ, ताकि भगवान अबू रेनकू दादी पुरखाकू थरेय जबान तेडा, हेना दयाय उहयारू,

55जोकि अबराहम अवुर हेंय रेनकू खुटी खनदानकू थरे हमेसा दोहोना।”

56लगभग तीन महिना मरियोम इलीसिबा सुदाय दोहो एना, हेना वरी अनेज ओड़ाः हनतेय मिड़ाः एना।

इलीसिबा एहुन्‍नाय हँबुड तेडा

57इलीसिबा राः दिन पुरती एना, हेना वरी मियाँटंग कोड़ा चोंडीजिय हँबुड तेडा। 58हेंय रेनकू परोसिकू अवुर हित नातकू परभु हेंय थरे अखीरिय दया केना मेनाआँ अँजोम केते, हेंकू इलीसिबा सुदा बहाली कू मनो तेडा।

59अवुर आठ दिन रे बले खतनाय#1:59 एहूदिकू राः रीति बिधी रे कोड़ा चोंडिजकू जनामुः रे आठवाँ दिन जीव होर राः चोटीत हन खलतू कू गे-डा। लगड हित नातकू मेजेना, हेना वरी बले ञुमू अपत ञुमू घयते जकरयाह मेनते कू ञुमू सोताडिया। 60लेकिन इलीसिबा कहनी तेडा, “न घयते अलोपे ञुमूयू, नेय ञुमू एहुन्‍ना मेनते दोहोना।” 61तहाँ हेंकू इलीसिबा थरे कू कहनी तेडा, “अपे खुटी खनदान रे न याःते कनय ञुमू कोवाआ!” 62नेय ची मेनतेम ञुमूया मेनते, अपत तिब एपेल केडिय तेकू होंबोर तेडिया। 63हेंय लिखोवे लगड सिलोटिय एर अक्‍तेडा, अवुरिय लिखो तेडा, “नेय ञुमू एहुन्‍ना हवे,” तहाँ सींड़ कुकू अहचरज यनु। 64हेनेन तोलोग जकरयाह तुरेत्तेय टेबोः बेड़ाऊ, अवुर भगवान धन्यावादिय ओवा दोहो एनु।

65हेना वरी धरी कगर ते दोहोएन हेंकू थरे बोर समसो यनु, अवुर नआँ टेबोः सींड़ एहूदी देस राः पहाड़ी गाँव ते मिरीज यनु। 66अवुर परभु हेंय सुदाय दोहो एना, हेनाते अअँजोमकू सींड़कू मन मन रे पसींद केतेकू कहनी तेडा, “नेय चोंडिज चीय बनोआँ?”

जकरयाह सीरिंग एना

67एहुन्‍ना अपत जकरयाह पवितर आत्मा ते भरो केनते भगवान राः टेबोईय लाय तेडा। 68“इसराएल रेनिय परभु भगवान राः जय होयाऊ, कहेकि हेंय अपन होड़कू थरेय ञेंल मया केनते अबुय छडो केडबुआ। 69अवुर अपन सेवेखिया दाऊद राः खुटी खनदान रे अबू लगड मियाँटंग उऊबरायिय कुलकेडा। 70(नआँ हेंय पहील वरी अनेज रेनकू पवितर भविस्यवक्‍ताकू राः दोवारा तेय लाय अक्‍तेडा)। 71भगवान अबू रेनकू दुस्मनकू वरी अवुर बयरिकू वरिय उबर केडबुआ। 72ताकि अबू रेनकू दादी पुरखाकू थरे दया कोःते अपन पवितर जबानिय उहयर केते अबू रेनकू खुटियारा कू थरेय दया केना। 73अवुर भगवान अबू रेनिय अपाबू अबराहम थरे नआँ याःतेय कीरिया एना, 74कि अबू दुस्मनकू राः हाथ वरी छडो कोःते, 75हेंय मड़ंग रे पवितर अवुर धार्मिक्‍ता ते जिनगी भर निडर ते हेंय सेवाय महल रेपे दोहोनू।

76ए बाबू, अम सींड़ वरी बडेअय भगवान रेनिय भविस्यवक्ता मेनते कू कहनी वमिआँ, कहेकि परभु राः होर तयार लगड हेंय वरी मड़ंग मड़ंग तेम से-नेआँ, 77ताकि हेंय रेनकू होड़कू पाप राः माफी ञँमुआँ, हेना मुक्‍ति राः जानकारी ञँमुऊ। 78अबू रेनिय भगवान राः महान दया ते सरग वरी अबू थरे इंजोर चमकोआ। 79ताकि अंधकार अवुर मिरतु राः छहरा रे दोहोन कुय इंजोरवा, अवुर अबू राः पाँव सान्ति ञमुः हेना होर ते सोझ तेय चलोवे।”

80अवुर हेंय चोंडिज बडेऊ अवुर आत्मा रेय मजबूत चलो एना, अवुर इसराएलिकू थरे अनायीनिय परचारे मेन दिन, सुनसान जघा रेय दोहो एना।

Currently Selected:

लूका 1: ksz

Highlight

Copy