एहुन्‍ना 4

ईसु अवुर सामरी जिला रेनिय कोड़ीहोन

1ईसु एहुन्‍ना वरी बगरा चेला कुय बनो यडा, अवुर बतिस्माय ओवाकू तना मेनते फरीसिकू अँजोम तेडा। 2(लेकिन ईसु अनेज बतिस्मा मेनेय ओवाकू दोहो एनु, चेला कुतय ओवाकू दोहो एनु)। 3तहाँ हेंय एहूदी जिला बगी वते गलील जिला हनतेय मिड़ाः चलो एना।

4अवुर हेंय सामरी जिला ते सेनुः जरूरी दोहो एना। 5हेनाते ईसु सामरी जिला राः सूखार सहर बँदे रेय सेनेना, हेन सहर बँदे रे एकूब अनेज कोड़ा होपोन तू उसूफिय ओवड दोहो एनु, हेना जमीन दोहो एना; 6अवुर हेना जमीन रे एकूब राः मियाँटंग इंदारा दोहो एना, अवुर ईसु सेन सेन तेय लँगा यनते, हेनेन इंदारा बँदे रेय दुड़ूब यनु। हेना तोलोग भरेभर #4:6 लगभग छो घंटातीकिन तना।

7हेनेन तोलोग सामरी रेनिय मियाँहोड़ कोड़ीहोन दाः लुय मेजेना, हेना वरी ईसु हेंय कोड़ीहोन थरेय कहनी तेडा, “दाः मी पियो विञूँ।”

8(अवुर चेला कुतय सहर हनते जो-मेआँ कहिन जहिन तिलाकू चलोयन दोहो एनु।)

9हेना वरी कोड़ीहोन हेंय थरेय कहनी तेडा, “अम एहूदी रह ते इंञ सामरी कोड़ीहोन थरे दाः ची लगड मी असी यडा?” (कहेकि एहूदिकू सामरी कुकू मेरंग वकू दोहो एनु।)

10तहाँ ईसु कहनी तेडा, “अगर अम भगवान ची बरदानिय ओवा मिआँ मेना अम पपाड़ी एनु, अवुर दाः मी पियोविंञ मेनतेय कहनी यडा, हेनी होम पपाड़िएन रे दोम असी तेडिय मेनू, अवुर हेंय अम जीवन एम हेना दाईय ओवड मी मेनू।”

11हेना वरी कोड़ीहोन कहनी तेडा, “ए सहेबू, अम थरे दाः लू लगड कनर कोवाआ, अवुर इंदारा हो गहीर गिआ; फेर अम थरे जीवन ए-मा दाः का वरी मेजकेना? 12अम अबू रेनिय पुरखा एकूब वरी होम बडे गिआ किदो? हेंय नआँ इंदाराय बनो केडा, अवुर नआँ वरी होन होपोन कुतय, चीज बतुस कुतय अवुर अनेज होय ञुँतेडा।”

13हेना वरी ईसु हेंय थरेय कहनी तेडा, “कनय हो नआँ दाईय ञूँआ, हेंय फेर तताँगिया, 14लेकिन कनय हो इंञ ओवय हेना दाईय ञुँः हेनी, फेर हेंय कबोह एरो ततँग तेडिया; जे इंञ ओवय हेना दाईय ञूँआ, हेना हेंय वरी उपका बनोआँ, अवुर नआँ अनन्त जीवन लगड छलकेजुः महल रे दोहोना।” 15तहाँ कोड़ीहोन हेंय थरेय कहनी तेडा, “ए परभु, अलो तताँगिंञ लगड अवुर नामेन सँगिंञ दाः लू अलोंञ मेजुः लगड हेना दाः मी ओवाञूँ।”

16हेना वरी ईसु हेंय थरेय कहनी तेडा, “जू, अपापे नआँ रेम राः अगेयू।”

17तहाँ कोड़ीहोन हेंय थरेय कहनी तेडा, “इंञ बेगर अपत कुतेञाँ।” हेना वरी ईसु कहनी तेडा, “अम ठिकेम कहनी यडा, कि ‘बेगर अपत कुतेञाँ’ मेनते।

18कहेकि अम पाँच थरेम जवाँय एना, अवुर निहों जे थरे इदान मिआँ, हेंय हो जवाँय मी न लगे। नआँ अम सही मेतेम कहनी तेडा।” 19तहाँ कोड़ीहोन हेंय थरेय कहनी तेडा, “ए परभु, इंञ भविस्यवक्‍ता घयतेंञ अटकर यडमिआँ। 20अले रेनकू पुरबुजकू मेना बुरू #4:20 गेरीजीम रे भगवान कू सेवा तेडा, अवुर अपे कहनी यडा, आराधनाः हेना डेरा दो एरुसलेम रेआ मेनते।”

21तहाँ ईसु हेंय थरेय कहनी तेडा, “ए कोड़ीहोन, ईञाः टेबोः रेम बिसवासे, हेना समय मेजुः तना, अपे भगवान अपा न दो बुरू रे न दो एरुसलेम रेपे आराधनाया। 22अपे सामरी रेनकू होड़कू मेने पे पपाड़िआ, हेंय राः पे आराधनाआ; अवुर अले एहूदिकू जे-ले पपाड़िआ हेनी राः ले आराधनाआ; कहेकि पाप वरी उऊबारय एहूदी जातकू वरिय मे-जा। 23हेना समय मेजुः तना अवुर हेना निहों मेजियाना, लेकिन सही मन ते सेसेवाकू आत्मा अवुर सच्‍चाई ते भगवान अपा कू आराधनाआ, कहेकि अपा अनेज लगड नेन घयते आराधनाः कुय छपाआ। 24भगवान आत्मा हवे, अवुर जरूरी हवे कि हेंय कू आराधनाः हेंकू आत्मा अवुर सच्‍चाई तेकू आराधनायू।”

25हेना वरी हेंय कोड़ीहोन कहनी तेडा, “इंञ मसीहा#4:25 इसराएलिकू रेनिय चुनो केडियाय राजा हवे (मतलोब ख्रिस्त) मेजुआ मेनाअंञ, पपाड़िअञूँ। हेंय मेजुः रेदो, अले सींड़ टेबोईय लाय वलेआ।” 26तहाँ ईसु हेंय थरेय कहनी तेडा, “इंञ अम सुदाय टेबोः तना, हें-नी हवे मसीहा।”

चेलाकू मिड़ाः एना

27हेनेन तोलोग चेला कुतय मेजियानू, अवुर ईसु कोड़ीहोन सुदाय टेबोः ञेंलतेकू अहचरज यनु। लेकिन हेंडे रेहो अम चीम ञँम बेड़ा यडा? चहे ची लगड मेय सुदाम टेबोः तना, मेनमोट हो कनय मेने कू होंबोर गडिया। 28तहाँ हेंय कोड़ीहोन अनेज राः गगेर बगी अटु केते, सहर हनतेय चलो यनु; अवुर होड़कू थरेय कहनी तेडा, 29“मेजुः पे मखा, मियाँहोड़ होड़ पे ञेंल आगू, हेंय जे-ना इंञ करो तेडा, हेना सींड़िय लाय गोत्तेडा, ने-नी घियाअय मसीहा दो न लगे जहानू?” 30तहाँ हेंकू सहर वरी उडूंग केनते ईसु ञेंल कू मेजेना। 31हेन तोलोग चेलाकू ईसु थरे कू कहनी तेडा, “ए गुरू, दमभर जोम कोःमी।” 32हेना वरी हेंय हेंकू थरेय कहनी तेडा, “इंञ थरे जो-मेआँ एयसा चीज इदाना, हेना राः बारे ते अपे कनर मेने पे पपाड़िआ।” 33तहाँ चेला कुतय अकू अकू कहनी ओड़ेंगू, “कनय जो-मे लगड कनारा कू अगवाडिया किदो?” 34हेना वरी ईसु हेंकू थरेय कहनी तेडा, “जे ईंञिय कुलकेडा, हें-नी राः मरजी ते जिओऊ अवुर हेंय राः काम पूरा, हे-ना ईञाः जो-मेआँ चीज हवे। 35अपे चार महिना राः बाद रे ईरूआ मेनते मेने पे कहनियाँ किदो? अँजोम पे, इंञ अपे थरेंञ कहनी यडा, खेत हन पे ञें-लू, हेना ईरे लगड बिली यना। 36इईराय बनिय ञाँमेआँ अवुर अनन्त जीवन कू ञँम लगड फल घयतेय सकेल यडकुआ, ताकि मेमेराय अवुर इईरकू सींड़कू जवर कोःते बहाली कू मनो। 37कहेकि नआँ रे न टेबोः ठिके उतरोआ, ‘मेमेराय एनेटागी अवुर इईरकू एनेटाःकू।’ 38इंञ अपे बेगर पे बुताआ हेना खेती इईर लगाडिंञ कुलतेड पेआ ः एटाःकू बुता एना, अवुर अपे हेंकू बुता तेड हेना राः फल पे ञँमकेडा।”

सामरी रेनकू बिसवास तेडा

39हेंय सामरी कोड़ीहोन ना याःतेय कहनी तेडा, “जे-ना इंञ करो तेडा, हेना सींड़िय लाय वडिञाँ,” अवुर ना गोवाही अँजोम केते, हेना सहर रेनकू अखीर होड़कू ईसु थरे कू बिसवास तेडा। 40हेना वरी सामरी रेनकू मेजकेन ते अले थरेम दोहो वन मेनते, ईसु थरे कू गोड़ेन मुड़ेन एना। तहाँ हेंय हेना रे दूय दिन अवुरिय दोहो यनु। 41अवुर हेना रेनकू अखीर होड़कू हेंय राः टेबोः अँजोम केतेकू बिसवास तेडा। 42हेना वरी हेंकू होड़कू हेंय कोड़ीहोन थरे कू कहनी तेडा, “अब अले अम कहनी यडा हेना भर मेने ले बिसवास यडा; कहेकि खुद ले अँजोम केडा, अवुर ले पपाड़िआ कि सही मे धरती रेनकू होड़कू उबारय ने-नी हवे।”

43ईसु सामरी रेनकू सुदा दूय दिन दोहो केनते अनेज रेनकू चेलाकू सुदा गलील जिला हनतेकू चलो एना। 44#मत्ती 13:57; मरकुस 6:4; लूका 4:24कहेकि ईसु खूदिय कहनी तेडा कि भविस्यवक्‍ता अनेज गाँव रे मान मरजाद मेनेय ञाँमेआ।#4:44 ईसु गलील जिला रेनिय हवे। अवुर हेंय गलील रे मान मरजाद मेने ञँमुआँ मेनाअय पपाड़ी दोहो एनु। अवुर हेना रे उतना मान मरजाद मेने ञँमुअते एहूदी नेताकू बगरा मेने कू एठेठ वय दोहो एनु। 45#एहुन्‍ना 2:23ईसु गलील रेय मेजेना, तहाँ हेना रेनकू होड़कू हेंय सुदा खुसी तेकू जुमो एना; कहेकि हेंकू हो हेना पस्का परब रेकू सेनताना; अवुर जेतना काम हेंय एरुसलेम राः पस्का परब रेय करो तेडा, हेना सगोरकू ञेंलतडा।

ईसु, राजा रेनिय करमचारी होपोनिय चिकन तेडा

46 # एहुन्‍ना 2:1-11 तहाँ ईसु फेर गलील जिला राः काना गाँव रेय मेजेना। हेन गाँव रे हेंय दाः अंगूर रासिय बनो तेडा। अवुर हेनेन बँदे रे कफरनहूम सहर रे राजा रेनिय मियाँहोड़ करमचारी दोहो एना, अवुर हेंय कोड़ा होपोन तू हसु यन दोहो एनु। 47अवुर हेंय करमचारी ईसु एहूदी जिला वरी गलील रेय मेजियाना मेनाअय अँजोम तेडा, तहाँ हेंय ईसु थरेय सेनकेन ते, दू कोड़ा होपोनिंञ मी चिकन गोत्ते मेनतेय गोड़ेन मुड़ेन एना, कहेकि चोंडिज तय गोज बंचो तनायू।

48हेना वरी ईसु हेंय थरेय कहनी तेडा, “अपे चिन्ह चमत्कार राः काम ञेंल बिगर, एनेरो पे बिसवास तेडा।”

49तहाँ राजा रेनिय करमचारी कहनी तेडा, “ओ परभु, होपोनिंञ अनायिन गोजुः रे दू सी।”

50हेना वरी ईसु हेंय थरेय कहनी तेडा, “जू, कोड़ा होपोन मी जीवत गिआयू।”

हेना मेनकी हेंय होड़ ईसु कहनी तेडा हेना टेबोईय बिसवास केते ओड़ाः तू हनतेय चलो यनु। 51हेंय मिनिड़ाः दोहो एनु, तहाँ हेंय रेनकू हरवाहकू, ओड़ाः हनवरी हेंय सुदा अद्हा होर रेकू जुमो यनु, अवुर कू लाय वयू, “कोड़ा होपोन मी जीवत गिआयू।” 52तहाँ हेंय होंबोर तेडकुआ, “तीमिन जुवारिय चिकन एना?” हेना वरी हेंकू कहनी तेडा, “होला ढड़कोः तोलोगू, हेंय राः जर अगड़ू एना।”

53हेना वरी नआँ, चोंडिज तम जीवत गिअय मेनते, ईसु ईंञिय कहनी वड तोलोग होया एना मेनाअय पपाड़ियानू, अवुर हेंय ओड़ाः रे दोहो एनकू सींड़कू ईसु थरे कू बिसवास तेडा।

54ईसु एहूदी जिला वरी मेजकेन ते गलील जिला रे, नआँ दूसरा चमत्कार कामिय करो तेडा।

Currently Selected:

एहुन्‍ना 4: ksz

Highlight

Copy