YouVersion Logo
Search Icon

परेरित 22

22
भीड़ रे पवलुस भाँसड़ तेडा
1“एगा भाईकू, अवुर सपायँड़कू ईञाः टेबोःपे अँजोमू, हेना इंञ अपे मड़ंग रेंञ कहनी यडा।”
2हेंय हेंकू थरे इबरानी भासा तेय टेबोः एना, तहाँ कू जपनो बगी यनु, हेना वरी पवलुस कहनी तेडा,
3 # परेरित 5:34-39 “इंञ किलिकिया राः तरसुस सहर रे जनम एनाय एहूदी होड़ हवे, अवुर इंञ एरुसलेम सहर रेंञ बडे एना। अवुर गमलीएल कटा बँदे रे दुड़ूब केनते अबू रेनकू पुरबुजकू राः नियम कानून बढ़ियाँ तेंञ चेडकेना। अवुर भगवान लगड एयसा धुन रेंञ दोहो एना, कि जेयसे अपे सींड़कू तेसींञ इदान पेआ।
4 # परेरित 8:3; 26:9-11 इंञ कोड़ाकू अवुर कोड़िकू तोलकेड कुते जेहेल रेंञ डलो तेडकुआ, अवुर नआँ होर ते सेनियाड कू अखीरिंञ ससीत तेडकुआ, अवुर केय्यो झन दोंञ ञेंड गोजतेड कुआ। 5अवुर नआँ टेबोः लगड सींड़ वरी बड बडे आजककू अवुर सपायँड़कू गोवाही इदान कुआ, हेंकू वरी इंञ भाईकू राः ञुमू ते चिट्ठी सबके ते दमिस्क हनतेंञ चलोः दोहो एनु, ताकि हेना रेनकू सजा ओवाकू लगड तोलके कुते एरुसलेम रेंञ अगकू।
पवलुस राः मन बदलो एन हेना राः गोवाही
6इंञ दमिसीकिंञ तयाः बंचो तोलोग, लगभग तीकिन केन रे अचाकते इंञ थरे अगस वरी चरियो गतर हनवरी इंजोर चमको एना। 7अवुर इंञ ओतेत रेंञ लोजोर यनु, अवुर नआँ घयते अवाजिंञ अँजोम तेडा, ‘ए साऊल, ए साऊल, अम इंञ ची लगड मी ससीत यडिञाँ?’ हेना वरी इंञ जबाब तेडा, ‘ओ परभु, अम ईया हवे?’ 8तहाँ हेंय इंञ थरेय कहनी तेडा, ‘अम ससीत यडिञाँ, हें-नी नसरेत रेनिय ईसु हवे।’ 9अवुर इंञ गतिकू इंजोर तुदो कू ञेंलवाडा, लेकिन जे इंञ सुदाय टेबोः दोहो एनु, हेंय राः टेबोः मेने कू अँजोम गडा। 10हेना वरी इंञ कहनी तेडा, ‘ए परभु, इंञ चिंञ बनोआ?’ तहाँ परभु इंञ थरेय कहनी तेडा, ‘रिमकोःते दमिस्क हनतेम चलोऊ, अवुर जो कुछ अम करोवे लगाडिंञ ठहरो केडा, हें-डे अम सींड़ टेबोईंञ लाय वमिआँ।’ 11हेना इंजोर राः मार तेदो मेनेंञ ञेंल सको गना, तहाँ गतिंञ कू तींञ रे सबकेते दमिस्क कू इदी तेडिञाँ।
12हेना रे #परेरित 5:1 हनन्याह#22:12 हनन्याह परेरित 5:1 23:2 मेनते ञुमूत दोहो एनाय होड़ इंञ थरेय मेजेना। हेंय धरम नियम राः अनुसार ते से-नेअय बढ़ियाँ होड़ दोहो एना, अवुर हेना रे दोहोनकू एहूदिकू हेंय अखीर कू आदर इजेतिय दोहो एनु। 13अवुर हेंय चड़ाँ केनते इंञ थरेय कहनी तेडा, ‘ए साऊल भाई, फेर सेतेम ञेंञेंलू;’ हेनेन तोलोग मेडिंञ जीजयानू, अवुर हेंयिंञ ञेंलतेडिया। 14हेना वरी हेंय कहनी तेडा; ‘अबू रेनकू दादी पुरखाकू रेनिय भगवान अम नेन लगाडिय चुनो केडमिआँ कि अम हेंय राः इक्छाम पपाड़ी, अवुर धरमी गिः हेंय मी ञें-लू, अवुर हेंय वरी टेबोः मी अँजोमू। 15कहेकि अम हेंय हनवरी सींड़ होड़कू मड़ंग रे जेम ञेंलकेड अँजोम केडा, हेना ललाय राः गोवाहिम होयाआ। 16अब ची लगड मी देरी यडा? रिमुःमी, बतिस्माम तिला, अवुर हेंय राः ञुमू ते अमाः पाप मी साफ गोत्ते।’
भगवान पवलुस अनजातकू थरे परचारे लगाडिय कुलतेडिया
17हेना वरी इंञ एरुसलेम रे मिड़ाः मेजकेन ते मँडिल रेंञ बिनतीः दोहो एनु, तहाँ मियाँटंग दर्सानिंञ ञेंलतेडा। 18अवुर इंञ परभुंञ ञेंलवाडा, अवुर हेंय इंञ थरेय कहनी तेडा, ‘हलिते एरुसलेम वरी तुरेत्तेम उडूंगुऊ, कहेकि हेंकू ईञाः बिसेय ते अमाआँ गोवाही एरो कू मनो तेडा।’ 19हेना वरी इंञ कहनी तेडा, ‘ए परभु, अम थरे कू बिसवासेःकू जेहेल रेंञ डलो तेडकुआ, अवुर आराधना ओड़ाः ते सेनकोः तेंञ ञेंडतेड कुआ, हेना खुद कू पपाड़िआ। 20#परेरित 7:58अवुर अमाआँ गोवाही ए-माय ईसतेफनुस कू ञेंड गोज दोहो एनु, हेना रेहो इंञ चड़ाँ तना, अवुर हेंकू राः टेबोः रे सहमातिंञ दोहो एना, अवुर हेंय ञेंड गोगोजकू राः कपड़ा तकुंञ पहरा दोहो एनु।’ 21तहाँ परभु इंञ थरेय कहनी तेडा, ‘जू! इंञ अम अनजातकू थरे अखीर सगिंञ सगिंञिंञ कुलमिआ’।”
22होड़कू हेना मेन दिन पवलुस राः टेबोः कू अँजोम तेडा। तहाँ हेंकू हल्ला केनतेकू कहनी तेडा, “धरती वरी नेय राः नामो निसान पे मिटो गोत्ते, नेय जीये लयीक कोवाया।” 23जब हेंकू हल्लाऊ अवुर अपन अपन राः कपड़ा कू ओड़ेज केतेकू अटड़ तेडा, अवुर अगस हनते धूड़ी कू अरेज तेडा; 24तहाँ पलटनकू रेनिय मुखिया, होड़कू नेय राः बिरोध रे, नआँ घयते ची लगड कू हल्लाः तना मेनाआँ पताय लगड, पवलुस गड़ही रे इदिय लगड अवुर कोड़ा ते एर ञेंडय लगाडिय हुकूम तेडा। 25हेंय कोड़ा तेकू ञेंडेय लगड कू तोलेय दोहो एनु, हेन तोलोग बँदेत रेय चड़ाँ तनाय बडेअय अधिकारी थरे पवलुस कहनी तेडा, “अम रोम रेनिय अवुर हेंय थरे कनर दोस कोवाअय कोड़ा तेम ञेंडेय लगड बढ़ियाँ गिआ किदो?” 26हेना वरी बडेअय अधिकारी हेना अँजोम केते पलटनकू रेनिय मुखिया थरे सेनकेन तेय कहनी तेडा; “अम चीम बनो यडा? मेय दो रोम देस रेनिय होड़ हवे।” 27हेना वरी पलटनकू रेनिय मुखिया हेंय थरे सेनकेन तेय कहनी तेडा, “इंञ मी लायवा, अम रोम देस रेनिय हवे किदो?” तहाँ हेंय कहनी तेडा, “हूँ।” 28हेना अँजोम केते पलटनकू रेनिय मुखिया कहनी तेडा, “इंञ रोम देस रेनिय होयाः राः पद अखीर पेयसा एमकेड तेंञ ञँमकेडा।” हेना वरी पवलुस कहनी तेडा, “इंञ दो जनानम वरी रोम देस रेनिय होड़ हवे।” 29जे होड़कू हेंय होंबोरिय मेनते कू सँबह तना हेंकू तुरेत्ते हेंय वरी कू अड़ी यनु; अवुर पलटनकू रेनिय मुखिया हो मेय रोम#22:29 रोम रेनकू होयाः लगड तीन तरिका तेकू बनोआँ, पेयसा देय ते, एक दो हें-डे जनामुअय, एक दो राजा ईनामिय ओवाय रे। देस रेनिय हवे, अवुर इंञ एर तोलकेडिया मेनाअय बोरो वडा।
एहूदी अधिकारिकू राः मड़ंग रे पवलुस राः भाँसड़
30हेना ञींदावत एहूदिकू मेय थरे ची लगड दोस कू लगो यडा मेनाआँ, बढ़ियाँ ते पपाड़ी लगड तोलताडिय वरिय लड़ा वडियू; अवुर बड बडे आजककू अवुर गोटा महासभा रेनकू कू जवारूः लगाडिय हुकूम तेडा, अवुर पवलुस पेंदी हँडे इदी केडिय ते हेंकू मड़ंग रेय चड़ाँ तेडिया।

Currently Selected:

परेरित 22: ksz

Highlight

Share

Copy

None

Want to have your highlights saved across all your devices? Sign up or sign in