परेरित 11

एरुसलेम रे पतरस अनेज राः काम राः बारे तेय समझो कुआ

1परेरितकू अवुर अहूदिया रेनकू बिसवासी भाईकू अँजोम तेडा कि अनजातकू हो भगवान राः बचन कू मनो केडा मेनते। 2पतरस एरुसलेम रेय मेजेना, तहाँ खतना रीति बिधी मनोकू#11:2 ग्रीक भासा ते खतना केनकू हेंय सुदा कू होड़बादुः दोहो एनु। 3“अम ची लगड बेगर खतनाः हेंकू होड़कू थरे सेनकेन ते हेंकू सुदाम जोमेना?” 4हेना वरी पतरस दुबीत जेड़ित वरिय समझो तेडकुआ; 5“इंञ आफा सहर रेंञ बिनतीः तोलोग मियाँटंग कनारा चीज, बडेआ चादर घयते चरियो छोर रे सबकेते, अगस वरी अगड़ू केनते इंञ थरे मेजेन घयते परभांञ रेंञ ञेंलवाडा। 6हेनांञ तियाग तेड दो नआँ धरती रेनकू चार गोड़ियाकू अवुर बुरू तेनकू जानवरकू अवुर से-नेःकू जीव जन्तुकू अवुर अगस रेनकू तितीज कुंञ ञेंलवाडा। 7अवुर न याःते आवाज होंञ अँजोवाडा, ‘ए पतरस रिमुःमी, ञेंड जोमकुमू।’ 8हेना वरी इंञ कहनी तेडा, ‘एरोआ परभु, एरोआ; कहेकि कनारा पवितर कोवाआ, हेना चहे असुद्ध चीज कबोह बेगारिंञ जो-मा।’ 9अगस वरी फेर आवाज मेजेना, ‘जे चीज भगवान सुद्ध गिआ मेनतेय कहनी केडा, हेना असुद्ध गिआ मेनते अलोम कहनिवा।’ 10पेय एस नेन घयते होया एना; हेना वरी फेर सगोर अगस हनतेय रिम गोःयाडू। 11हेनेन तोलोग अले दोहो एना, हेना ओड़ाः रे पेय होड़ होड़कू मेज चड़ाँ एना। हेंकू कयसेरिया वरी कू कुलतड कू दोहो एनु। 12तहाँ बेगर धुक पुच ते हेंकू सुदा सेनुः लगड आत्मा इंञ थरे कहनी तेडा, अवुर आफा रेनकू छो झन भाईकू इंञ सुदा कुरनेलियुस ओड़ाः ले सेनेना। 13हेंय अलेय लाय वडा कि अनेज ओड़ाः रे मियाँटंग सरगदूत चड़ाँ तनायिय ञेंलवाडा, अवुर ‘आफा वरी सिमोन मेनते कू कहनी वय हेंय पतरस, होड़कू कुलके तेम एर राः अगेयू मेनते। 14हेंय अम अवुर अम ओड़ाः भर रेनकू उबारुआ, हेना घियाआ टेबोईय लाय वमिआँ,’ मेनते हेंय थरेय कहनी तेडा। 15हेंकू थरे टेबोईंञ बोंहड़ी तेडा, तहाँ अबू थरे सुरू रे पवितर आत्मा अगड़ू एना, हेन घयते हेंकू थरे हो अगड़ू एना। 16तहाँ परभु राः नआँ टेबोईंञ उहयर तेडा, हेंय कहनी तेडा, ‘एहुन्‍ना दो दाः ते बतिस्माय एमतेडा, लेकिन अपे पवितर आत्मा ते बतिस्मा पे ञाँमा।’#परेरित 1:5 17अबू परभु ईसु मसीह थरे बू बिसवास तेड रे ञँमेना, हें-ना दान भगवान हेंकू होय ओवड कुआ। दो इंञ ईया हवे, भगवान काःतेंञ रोको सकोआ?” 18नआँ अँजोम केते हेंकू जपनो चुवेर यनकू, अवुर भगवान बडेय वते कू कहनी तेडा, “हेंडे दो भगवान अनजातकू हो जीवन ञँम लगड मन तकू मिड़ाः राः दानिय ओवड कुआ।”

अन्ताकिया राः कलीसिया

19ईसतेफनुस कू ञेंड गोजतेडा, हेना चलते ते सताव मेजुः दोहो एनु, हेनाते होड़कू जतकतो यनकू,#परेरित 8:1-4 अवुर होयोर होयोर ते फीनीके अवुर साइपरास अवुर अन्ताकिया कू सेनेना; लेकिन एहूदिकू छोड़ कनय एटाःकू बढ़ियाँः खभेर मेने कू लाय वकू दोहो एनु। 20अन्ताकिया रे मेजकेन ते उनानिकू हो परभु ईसु राः बढ़ियाँः खभेर लाय हेंकू मेंडे रे कोई कोई साइपरास रे दोहोनकू अवुर कुरेन रेनकू दोहो एना। 21परभु राः सक्‍ति हेंकू सुदा दोहो एना, अवुर अखीर होड़कू बिसवास केते परभु हनतेकू मिड़ाः एना। 22हेंकू राः खभेर एरुसलेम कलीसिया रेनकू अँजोम तेडा, तहाँ हेंकू बरनबास अन्ताकिया रेकू कुलतेडिया। 23हेंय हेना रेय सेनकेन ते भगवान किरपा एना, हेना काम ञेंलके तेय खुसी एना। अवुर हेंकू सींड़कुय टेबोः बहल तेडकुआ कि पूरा मन लगय ते परभु राः परती ईमानदार कू दोहोनू। 24बरनबास बढ़ियाँ होड़ दोहो एना। हेंय पवितर आत्मा ते अवुर बिसवास रे भरपुरिय दोहो एना। अवुर अखीर होड़कू परभु रेनकू चेलाकू सुदा कू मेड़वा एना। 25तहाँ बरनबास साऊल छपा लगड तरसुस सहारिय सेनेना। 26तहाँ हेंय सुदा जुमो एन दो हेंय अन्ताकियाय अगतेडिया। बरनबास अवुर साऊल एक बरिस अँगम कलीसिया रेनकू सुदा दोहो केनते, हेना रेनकू सिक्छा कींञ ओवाकू दोहो एनु। अवुर चेलाकू मतलोब ईसु थरे बिसवास तेडकू सींड़ वरी मड़ंग ते अन्ताकिया रे मसीही मेनते कू कहनी वडकुआ।

27नेन तोलोग कुछ भविस्यवक्‍ताकू एरुसलेम वरी अन्ताकिया कू मेजेना। 28हेंकू मेंडे रे अगबुस मेनते कू कहनी वडिया, हेनी चड़ाँ केनते पवितर आत्मा राः अगुवाय तेय लाय तेडा कि गोटा दुनिया रे अखीर ते अकालेआ, नआँ अकाल कलोदियुस राः समय रे होया एना।#परेरित 21:10 29तहाँ चेलाकू भर सींड़कू अपन अपन सक्‍ति राः अनुसार ते, अहूदिया रे दोहोनकू भाईकू सहेता ओवाकू लगड कू सलाह एना। 30हेंकू जेयसे कू सलाह एना, हेन घयते बरनबास अवुर साऊल राः हाथ रे बरार तकू सपायँड़ अघुवाकू थरे कू भेजो तेडा।

Currently Selected:

परेरित 11: ksz

Highlight

Copy