LUKA 4

1Yesu wa tò ni Spiritu Musandu, yakatuka ku Yordau yahiluka, yamutwala muli Spiritu ku puya; 2ha shimbu lia makumi awana a matangwa, kanamweseka kuli Ndiapu, kalile nichimwe ha matangwa aze: ni muze amanunukine wevwile zala. 3Mba Ndiapu wambile kuli iye ngwenyi, Kachi yena uli mwe Mwana Zambi, amba liwe lino, lialumuke mbolo. 4Yesu wamukumbulwile ngwenyi, Chinasonewa ngwo, Hi ku mbolo wika ko mutu matwama ni mwono, alioze ku maliji eswe a Zambi. 5Ndiapu wamutwalile helu lia mulundu usuku, wamulwezele mawanangana eswe a yifuchi ya hashi ha kashimbu kakepekepe. 6Ndiapu wambile kuli iye ngwenyi, Mungukwaha chiyulo chino cheswe ni uhenya wacho, mumu hanangukunjikawo; kuli mweswawo mungumupala, mungumwahawo. 7Kashika kachi munguwayila, kachi weswe kumuukapwa niwe. 8Yesu wamukumbulwile, ngwenyi, Sosoloka kunyima yami, Satana, mumu chinasonewa ngwo,

Ukawayile Mwehe Zambi ye,

Iye wika ukamulingile.

9Iye wamutwalile ku Yerusaleme, wamusele ha kasonga ka tembele, ngwenyi, Kachi uli mwe Mwana Zambi, limbile hashi; 10mumu chinasonewa ngwo,

Kumakahana shimbi kuli angelo jenyi ha kutwala kuli yena kukufunga kawape:

11ha moko jo kumakakumbata,

kuchina muhukana chiliato che ku liwe.

12Yesu wamukumbulwile, ngwenyi, Kanachambe ngwo, Kanda ukeseka Mwene Zambi ye. 13Muze te Ndiapu hamanununa yeseko yeswe, wakatukile kuli iye ndo ku mwaka ukwo.

14Yesu wahilukilile ni tachi ja Spiritu ku Ngalileya; ni lufuma wenyi wafumanyine ndusu mu chifuchi cheswe cha kujingilika. 15Iye walongesele mu masunangonga jo, ni eswe amuchichimiekene.

16Iye wejile ku Nazare, kuze amulelele, wanjilile nikulita ni ndako yenyi, mu sunangonga ha tangwa lia sambata, wakatukile mukutanga. 17Mba amukunjikile mukanda wa profeta Izaia, iye wapakwile mukanda, wawanyine kuze asonekene ngwo,

18Spiritu ya Mwene hwali hali yami,

Mumu hananguwayisa ni maji kwambujola sango lipema kuli yiswale;

Kuhindwisa waze akumakuka ku mbunge;

Hanangutumu kwambujola utuswilo kuli funge,

Kulawisa cha meso kuli tupuputa;

Kutusula waze ali mu upinjilo.

19Mukwambujola mwaka wa kupemena kuli Mwene. 20Iye wapakikile mukanda waukunjikile cheka nawa kuli kalala, Watwamine, ni meso ja eswe mu sunangonga ahulikilile kuli iye. 21Iye waputukile kwamba kuli ayo ngwenyi, Musono uno chisoneko chino chinamanunuka mu matwi jenu. 22Eswe amushindakenyene, nikukomoka ha maliji a vumbi aze atuhukile mu kanwa lienyi; no ambile ngwo, Yono hi mwana José ko, nyi? 23Iye wambile kuli ayo ngwenyi, Munwamba kuli yami chishima chino ngwo, Mbuki, liwuke yena mwene; chize cheswacho twevwile alingile ku Kafwanaume, linga kuno nawa mu chijima cha yena mwene. 24Iye ngwenyi, Pundu ngunambe kuli yenu ngwami, Profeta niumwe mapemena akwa chijima chenyi mwene. 25Alioze chamwenemwene ngwami, Mwapwile twamishi anji mu Izalele ha matangwa ja Eliya, muze ájilile lilu ha miaka yitatu ni tukweji asambano, chocho kapunga munene wejile mu chifuchi cheswe; 26alioze katumine Eliya kuli niumwe shina kuli Sarepeta, chihunda cha mu Sendone, kuli twamishi wa pwo. 27Mwapwile akwa mbumba anji mu Izalele ha matangwa ja Eliseu; alioze niumwe wa kuli ayo wapemene shina Naamane, Ka-Seria. 28Waze eswe mu sunangonga azalile tò ni ufwatulo ha kwivwa yino yuma; 29o akatukile, amumbilile haze lia limbo, amutwalile ku mungilingili wa mulundu haze hatungile limbo lio, hanga amunyasemo. 30Alioze iye, nikupalika ndusu mukachi ko, wayile kwenyi.

31Iye wapalumukine ku Kafwanaume, limbo lia mu Ngalileya, waalongesele ha masambata. 32O alishimwokene ha longeso lienyi; mumu liji lienyi liapwile ni chiyulo. 33Mba mu sunangonga mwapwile mutu ni Spiritu ya ndemoniu ya luchisa, iye wakololokele ni liji linene, 34ngwenyi, Kuchi yetu ni yena, Yesu, Ka-Nazare? Hiuneza mukutwonwona, nyi? Ngunakunyingika mwe Musandu wa Zambi. 35Yesu yamwambila ngwenyi, Hola, tuhuka muli iye, ni muze te ndemoniu hamulimbwila hashi mukachi ko, watuhukile muli iye, kamulemekene nichimwe. 36Mba eswe akomokene, o ahanjikile umwe kuli mukwo ngwo, Liji lino lika, mumu ni chiyulo ni tachi mamba maspiritu a luchisa, o matuhuka? 37Ndundumwino yino yayile kweswe ku chifuchi cha kujingilika.

38Iye wakatukile ku sunangonga, wanjilile mu zuwo lia Semone; alioze naye-weno ya Semone wayijile ni kachiki munji; o aliumbile kuli iye, amuhindwise. 39Iye wamuzulaminyine, wakanjishile kachiki, iye wamukatukile, ni haze hene wahindukile, waavumbikile.

40Muze tangwa mulichinjila, waze eswe apwile ni mieji a kuyiza ni misongo yeka ni yeka, aanehene kuli iye; neye wasayikile moko jenyi hali eswe, waawukile. 41Ni andemoniu nawa atuhukile muli anji, nikukololoka, ngwo, mwe Kristu yena, mwe Mwana Zambi. Iye nikwakanjisa, kaatayijile kuhanjika, mumu anyingikine ngwo, Iye Kristu.

42Muze hapwile mwalwa, wakatukile, wayile ku puya: ni mbunga amufupile, ejile kuli iye, afupile kumukwata, hanga kechi kakatuka kuli ayo. 43Alioze wambile kuli ayo ngwenyi, Changutamba kwambujola sango lipema lia wanangana wa Zambi ku membo akwo nawa: mumu ha chino angutumine. 44Iye wapwile nikwambujola mu masunangonga a mu Ngalileya.

Currently Selected:

LUKA 4: Csa

Highlight

Copy