LUKA 18

1Iye wahanjikile nawa chishima kuli ayo, ngwe chaatamba kulemba matangwa eswe, kanda akalezumuka; 2ngwenyi, Kwapwile umwe sopi mu limwe limbo, yoze kevwile woma wa Zambi, kalemesene atu. 3Kwapwile nawa twamishi wa pwo mu limbo lize; wejile kanji kuli iye, ngwenyi, Ngukale ha mukwa kole yami. 4Alioze ha shimbu linene katayijileko; alioze kulutwe lia chize wambile mu mbunge yenyi ngwenyi, Chipwe chishi kwivwa woma wa Zambi, ni atu chishi kwalemesa; 5hindu mumu yono twamishi kakunguketeka, mungumukala, kuchina makanguchikilika ni kwiza chenyi matangwa eswe. 6Mwene wambile ngwenyi, Ivwenu chize anambe sopi wa uhenge. 7Ni Zambi kechi kukala waze hanaatongola, waze akukololoka kuli iye mwalwa ni ufuku, chipwe kakupwa ni uhomboloji hali ayo shimbu linene, nyi? 8Ngunambe kuli yenu ngwami, Kumakaakala nikawashi. Alioze muze mwe Mwana Mutu meza, makawana Ufulielo hano hashi, nyi?

9Iye watele nawa chishima chino kuli amwe waze afulielele ayo ene ngwo, Tuli akwa ululi, apwishile amokomoko akwo eswe, ngwenyi, 10Atu aali akandukile ku tembele mukulemba, umwe Ka-Fwariseu, ni mukwo mukwa kufwetesa lijimu. 11Ka-Fwariseu wamanyine nikulemba kuli iye mwene ngwenyi, Zambi, ngunakusakwila yami chapwile ngwe atu akwo, akwa mbenga, yihenge, yitanji, hanji chipwe ngwe yono mukwa kufwetesa lijimu. 12Nakulitwamina kulia kaali ha semana, nakuhana chihanda cha kumi cha yuma yeswe nguli nayo. 13Alioze mukwa kufwetesa lijimu kanamana kusuku, katayile chipwe kuhetula meso jenyi kwilu, alioze walambile ha pambo lienyi, nikupihilila, ngwenyi, Zambi, nguvwile kama keke, yami mwe chivulumunyi. 14Ngunambe kuli yenu ngwami, Yono wapalumukine ku zuwo lienyi mukwa kusamba, hi mukwo ko. Ni mweswe malinangamisa makanuhetesa; alioze yoze malilelesa kumakamunangamisa.

15O anehene kuli iye nawa ana-akemba jo, hanga ase moko jenyi hali ayo; alioze muze tumbaji achimwene, aakanjishile. 16Alioze Yesu waatambikile kuli iye, wambile ngwenyi, Tayizenu ana akepe eze kuli yami, kanda nwakanjisa: mumu wanangana wa Zambi wa wano ene. 17Pundu ngunambe kuli yenu ngwami, Mweswawo kechi katambula wanangana wa Zambi ngwe mwana mukepe, kechi kanjilamo nichimwe.

18Mba umwe mukwa kuyula wamuhulile ngwenyi, Longeshi mupema, kuchi mungulinga, hanga ngukahinge mwono wa mutolo? 19Yesu wambile kuli iye ngwenyi, Kuchi te unanguvuluka ngwe, Mupema? Mupema wakuhi niumwe, shina umuwika iye Zambi. 20Unanyingika shimbi ngwo, Kanda ulinga utanji, kanda ushiha, kanda wiya, kanda ushindakenya mahuza, lemesa tatenu ni noko. 21Iye ngwenyi, Yino yuma yeswe hingunayifungu chize ku wanuke wami. 22Muze Yesu evwile chino, wambile kuli iye ngwenyi, Hindu chuma chimuwika unahono; lanjisa yize yeswe uli nayo, ukapangile kuli yiswale, ukapwe ni upite mwilu; wize, ungukaule. 23Alioze muze evwile yino yuma, wevwile chinyengo chinji; mumu wapwile pichi munene. 24Muze Yesu amwene ngwe wevwile chinyengo chinji, wambile ngwenyi, Chikalu chikolo hali waze akwete upite kunjila mu wanangana wa Zambi. 25Mumu chashi hali kamelu kunjila mu liso lia ndongo, chikalu hali pichi kunjila mu wanangana wa Zambi. 26Waze achivwile, ambile ngwo, Iya kevwe mahasa kulilamwina? 27Alioze iye ngwenyi, Yuma yize atu mayisa kenu Zambi mayihasa. 28Petulu wambile ngwenyi, Hitunahichika yeswe, hitunakukaula. 29Iye wambile kuli ayo ngwenyi, Pundu, ngunambe kuli yenu ngwami, Mutu wakuhi yoze hanahichika zuwo, hanji yisemi, hanji usoko, hanji mukwo-pwo, hanji ana, mumu ha wanangana wa Zambi, 30yoze kechi katambula yisuho yinji yikwo, ha mwaka uno, ni ha mwaka uze muwizaho, mwono wa mutolo, ngwami, Niumwe.

31Iye watwalile kumi ni aali ku tenga kuli iye mwene; wambile kuli ayo ngwenyi, Talenu, mutukanduka ku Yerusaleme, ni yuma yize yeswe yinasonewa ku moko ja aprofeta kumuyikamanunuka kuli mwe Mwana Mutu. 32Mumu kumakamukunjika kuli akwa mavungu, makamukekuna, makamulinga chipi, makamufwila mate; 33o makamulamba ni shikote, makamushiha; ni ha tangwa liamuchitatu kumakahinduka. 34Alioze maliji ano kaalumbunukine: ni liji lino liaswamine kuli ayo, kanyingikine chize ambile.

35Shimbu machikundama ku Yeriku, umwe kapuputa watwamine ku sesa lia jila nikuunjila: 36iye, nikwivwa mbunga anapalika, wahulile chize muchipwa. 37O amwambulwilile ngwo, Yesu Ka-Nazare kanapalika. 38Iye wakololokele ngwenyi, Yesu, yena mwana David, nguvwile kama keke. 39Waze atetekelele amukanjishile, hanga ahole kulungunga kwenyi; alioze watetele kuhiana chikolo ngwenyi, Mwana David, nguvwile kama keke. 40Yesu wamanyine, wambile amunehe kuli iye. Muze te hakundama, wamuhulile ngwenyi, 41Kuchi unazange ngukulingile? Iye wambile ngwenyi, Mwene, ngulaule ku meso. 42Yesu wambile kuli iye ngwenyi, Laula ku meso: Ufulielo we hiwakupwisa mungunu. 43Haze hene walawile ku meso, wamukawile, nikuchichimieka Zambi; ni atu eswe, muze achimwene, ahanyine uhaliso kuli Zambi.

Currently Selected:

LUKA 18: Csa

Highlight

Copy