LUKA 16

1Iye wambile nawa kuli tumbaji twenyi ngwenyi, Kwapwile umwe pichi, wapwile ni kaselo; iye amusumine ngwo, Kanamwange yikumba ye. 2Iye wamutambikile, wambile kuli iye ngwenyi, Acho, chika ngunevu hali yena? Lumbununa uselo we, mumu kushi kuhasa kupwa kaselo nawa. 3Mba kaselo wambile mu mbunge yenyi ngwenyi, Kuchi mungulinga, mumu mwene wami kanachiza uselo kuli yami? Ngolo ja kulima chishi najo, ngunevu sonyi kuunjila. 4Ngunanyingika chize mungulinga, hanga muze mangukatwisa ku uselo, akangulambule mu mazuwo jo. 5Iye watambikile akwa mikuli ja mwene wenyi, wambile kuli mutangu ngwenyi, Kongo lika uli nalio kuli mwene wami? 6Iye wambile ngwenyi, Kulakaji lia njongo ja maji. Wambile kuli iye ngwenyi, Anda mukanda we, Utwame nikawashi, Usoneke ngwe, Makumi atano. 7Kulutwe wambile kuli mukwo ngwenyi, Ni yena, kongo lika uli nalio? Iye wambile ngwenyi, Kulakaji lia njongo ja tiliku. Yamba kuli iye ngwenyi, Anda mukanda we, Usoneke ngwe, Makumi nake. 8Mwene wenyi wahalishile kaselo ka uhenge, mumu walingile ni ukanyame, mumu akwa mwaka uno ha chisemuko cho ene kanakanyama kuhiana akwa pangu. 9Mba ngunambe kuli yenu ngwami, Litengelenu tusendo a ku upite wa uhenge, hanga muze januhwa, o akanutambule muma mwa kutwama mwa mutolo.

10Yoze mapwa wamwenemwene ni chikepekepe, mapwa wamwenemwene nawa ni chinji: ni yoze mahengesa ni chikepekepe, mahengesa ni chinji. 11Kashika kachi kunwapwile amwenemwene ni upite wa uhenge, iya makunjika kuli yenu upite wamwenemwene? 12Nyi kachi kunwapwile amwenemwene ni yuma yize ya mbala, iya manwaha yize ya yenwene? 13Ngamba niumwe mahasa kulingila miata aali, mumu chipwe mavwila kole umwe, akazange mukwo; hanji makakaminya kuli umwe, akalelese mukwo. Kunwahashile kulingila Zambi nikulingila upite nawa.

14A-Fwariseu nawa, waze apwile akwa kufwila mbongo, evwile yino yuma yeswe; amukekwine. 15Iye wambile kuli ayo ngwenyi, Yenu nuli waze akulisambisa kumeso ja atu; alioze Zambi kananyingika mbunge jenu; mumu chize machilemesa chikolo hakachi ka atu, chapwa chizelwokeso kumeso ja Zambi.

16Shimbi ni aprofeta apwile ndo kuli Yoano; chize ku mwaka uze, kanambulula sango lipema lia wanangana wa Zambi, ni mweswe kananjilamo ni tachi. 17Alioze kuhwa cha lilu ni hashi chashi, alioze kuhwa cha toshi limuwika lia shimbi, chikalu.

18Mweswawo malakula mukwo-pwo, mambata weka, malinga utanji; ni mweswawo mambata yoze hanamulakula kuli mukwo-lunga, malinga utanji.

19Achi, kwapwile umwe pichi, iye wazalile mahina ja ufungo ni linyu lipema, nikutwama ni usehejelo ni uhenya tangwa ha tangwa. 20Kwapwile nawa umwe chiswale, jina lienyi Lazaru, amutumbikile kushi lia senge lia ku chikolo chenyi wa tò ni yilonda. 21Iye wevwile usona wa kulikuchisa ni yifwenyufwenyu yize yaholokele ku mesa ya pichi; chipwe tuwa ejile nikulesa yilonda yenyi. 22Mba chiswale wafwile ni angelo amusele mu kondo ya Apalahama; ni pichi nawa yafwa, yamufunda. 23Iye mu Heteze yahetula meso jenyi mu upinjilo, yamona Apalahama kusuku ni Lazaru mu kondo yenyi. 24Iye watambikile ngwenyi, Kaka Apalahama, nguvwile kama keke, utume Lazaru, hanga achupike songo lia munwe wenyi mu meya, akekemese limi liami; mumu ngunapinji mu mulengi uno. 25Alioze Apalahama ngwenyi, Mwanami, iwuluka ngwe yena ha miaka ya mwono we, watambwile yuma ye yipema, chizechene Lazaru watambwile yuma yipi; haliapwila kanamulembejeka, ni yena uli mu upinjilo. 26Mba kuweza ku yino yuma yeswe, mukachi ka yetu ni yena mbongo yinene kuyakola; hanga waze mazanga kukatuka kuno akaye kuli yena kechi kuhasa, chipwe waze mazanga kukatuka koko akeze kuli yetu, kechi kuhasa. 27Iye wambile ngwenyi, Ngunakulembe, kaka, umutume kama ku zuwo lia tata. 28Mumu ana-akwetu atano nguli no; hanga akashindakenye chikolo kuli ayo, kuchina meza kuma kuno kwa kupinda. 29Alioze Apalahama yamba kuli iye ngwenyi, Mikanda ya Mose ni ya aprofeta kali nayo, akayivwe. 30Iye wambile ngwenyi, Ka, kaka Apalahama, alioze kachi umwe hakachi ka afu maya kuli ayo makalikonyeka. 31Yamba kuli iye ngwenyi, Nyi keshi kwivwa Mose ni aprofeta, chipwe kechi kakunuka, kachi umwe mahinduka hakachi ka afu.

Currently Selected:

LUKA 16: Csa

Highlight

Copy