YOANO 8

1alioze Yesu wayile ku mulundu wa Olevwe. 2Ha kupatwoka ngwangwangwa wahilukile cheka nawa ku tembele, ni atu eswe ejile kuli iye; iye Watwamine, waalongesele. 3Ni akwa kusonyeka ni A-Fwariseu yaneha pwo amukwachile mu utanji, ni muze te hamusa mukachi ko, 4yamba kuli iye ngwo, Longeshi, yono pwo hanamukwata mu utanji ha kuulinga. 5Achi, mu shimbi Mose watwambile tukaase mawe waze ngwe yono: kuchi kevwe yena unambe hali iye? 6Alioze chino ambile nikumuzeza, hanga akapwe ni chuma cha kumusuma nacho. Alioze Yesu wahetamine, iye ni munwe wenyi wasonekene hashi. 7Alioze muze anyongonwene nikumuhula, wahetukile, wambile kuli ayo ngwenyi, Yoze keshi shili hakachi kenu aliange kumwasa liwe. 8Iye cheka nawa wahetamine nikusoneka hashi. 9O muze achivwile atuhukile umwe ni umwe, nikuputuka kuli mukulwana ndo kuli yoze wa kusula; ahichikile Yesu ukawenyi, ni mwe pwo, muze apwile mukachi. 10Yesu wahetukile, wambile kuli iye ngwenyi, Pwo, alihi waze akukusuma? Kakuhishile niumwe, nyi? 11Iye wambile ngwenyi, Niumwe, Mwene. Yesu wambile kuli iye ngwenyi, Ni yami nawa chishi kukuhisa, yako kwe; chize ku haliapwila ndo ku miaka kanda ukavulumuna nawa.

12Kashika Yesu wahanjikile cheka nawa kuli ayo ngwenyi, Pangu lia hashi yami: yoze wakungukaula, kechi kenda mu milima, alioze kumakapwa ni pangu lia mwono. 13A-Fwariseu kashika ambile kuli iye ngwo, Yena wakushindakenya hali yena mwene; Shindakenyo ye hi yamwenemwene ko. 14Yesu wakumbulwile ngwenyi, Chipwe kachi ngunashindakenya hali yami mwene, kachi Shindakenyo yami yamwenemwene; mumu ngunanyingika kuze ngunakatuka, ni kuze munguya; alioze yenu kunwanyingikine kuze ngunakatuka ni kuze munguya. 15Yenu nwakupatula nikulita ni musunya; yami chishi kupatwila niumwe. 16Ewa, nyi kachi yami mungupatula, kachi upatwilo wami wamwenemwene; mumu yami chishi ukawami, alioze nguli ni Tata yoze wangutumine. 17Ewa, mu shimbi yenu nawa chinasonewa ngwo, Shindakenyo ya atu aali yapwa yamwenemwene. 18Yami nguli yoze wakushindakenya hali yami mwene, ni Tata yoze wangutumine, kakushindakenya hali yami. 19Ambile kuli iye kashika ngwo, Tatenu kulihi ali? Yesu wakumbulwile ngwenyi, Yenu kunwanyingikine chipwe yami, chipwe Tata: kachi nwangunyingika, kachi nwanyingika Tata nawa. 20Maliji ano wahanjikile mu zuwo lia milambu, shimbu alongesele mu tembele: mba niumwe wamukwachile; mumu ola yenyi kanda yichiza.

21Yesu kashika wambile kuli ayo cheka nawa ngwenyi, Munguya kwami, kumunukangufupa, munukafwa mu milonga yenu: ni kuze munguya, kunwahashile kuhetako. 22A-Yunda kashika ambile ngwo, Malishiha mwene, nyi? Te anambe ngwenyi, Kuze munguya, kunwahashile kuhetako? 23Iye wambile kuli ayo ngwenyi, Yenu nuli a mushi; yami nguli wa mwilu: yenu nuli akwa hashi; yami hi nguli mukwa hashi ko. 24Hinamba kuli yenu ngwami, Munukafwa mu milonga yenu: mumu kumunukafwa mu milonga yenu shina munufuliela yoze nguli. 25Ambile kuli iye kashika ngwo, Yena iya? Yesu wambile kuli ayo ngwenyi, Yoze nanwambulwilile chize ku uputukilo. 26Yuma yinji nguli nayo ya kwamba ni ya kupatula ha kutwala kuli yenu, alioze yoze wangutumine iye wamwenemwene; ni yuma yize nevwile kuli iye, yino nakuhanjika kuli akwa hashi. 27O kanyingikine ngwe wahanjikile kuli ayo ha kutwala kuli mwe Tata. 28Yesu kashika wambile kuli ayo ngwenyi, Muze hinwazundula mwe Mwana Mutu, hohene munukanyingika yoze nguli; chishi kulinga nichimwe cha kuli yami mwene; alioze chizechene ngwe Tata wangulongesele, nakuhanjika yino yuma. 29Yoze wangutumine hwali hamwe ni yami; Tata kanguhichikile ukawami; mumu nakulinga matangwa eswe yuma yize ya kupemena kuli iye. 30Shimbu ahanjikile yino yuma anji amufulielele.

31Yesu kashika wambile kuli A-Yunda waze amufulielele ngwenyi, Kachi munutwama mu maliji jami, kachi munupwa chamwenemwene tumbaji twami. 32Kumunukanyingika umwenemwene, ni umwenemwene kumuukanutusula. 33Amukumbulwile ngwo, Tuli munyachi wa Apalahama, kutwapwile ndungo kuli niumwe nilimwe tangwa: ngwe kuchi unambe ngwe, Kumunukatusuka?

34Yesu waakumbulwile ngwenyi, Pundu, pundu, ngunambe kuli yenu ngwami, Mweswawo kakuvulumiona, iye ndungo ya shili. 35Achi, ndungo keshi kutwama ndo ku miaka ya mutolo: mwe Mwana katwama ndo ku miaka ya mutolo. 36Kachi kashika mwe Mwana manutusula, kachi kumunukatusuka chamwenemwene. 37Ngunanyingika nuli munyachi wa Apalahama; alioze nwakufupa kungushiha, mumu liji liami kulishi unjililo muli yenu. 38Nakuhanjika yuma yize hingunamono hamwe ni Tata; ni yenu nawa nwakulinga yuma yize nwevwile kuli tatenu.

39Amukumbulwile ngwo, Kulwetu iye Apalahama. Yesu yamba kuli ayo ngwenyi, Kachi nwapwa ana a Apalahama, kachi nwalinga yitanga ya Apalahama. 40Alioze haliapwila nwakufupa kungushiha, mutu yoze hanahanjika umwenemwene, uze hingunevu kuli Zambi: Apalahama kalingile yoyo. 41Yenu nwakulinga yitanga ya tatenu. Ambile kuli iye ngwo, Yetu kutwasemukine ku utanji; Tata umuwika tukwete, iye Zambi. 42Yesu wambile kuli ayo ngwenyi, Kachi Zambi kapwa Tatenu, kachi nwanguzanga: mumu natuhukile kuli Zambi; ngunakatuka kuli iye; mumu chipwe chalijilile yami mwene, alioze iye wangutumine. 43Kuchi te kunwanyingikine kuhanjika chami? Mumu te kunwahashile kwivwa liji liami. 44Yenu nuli a kuli tatenu Ndiapu, nwakuzanga kulinga usolo wa tatenu. Iye wapwile chingalwe chize ku uputukilo, kamanyine mu umwenemwene, mumu umwenemwene wakuhi muli iye, niumwe. Muze mahanjika mahuza, kanahanjika nichenyi mwene; mumu iye mukwa mahuza ni mwe tato ya mahuza. 45Alioze mumu ngunahanjika umwenemwene kunushi kungufuliela. 46Iya wa kuli yenu unangukumika ngwe shili nguli nayo? Kachi ngunambe umwenemwene kuchi te kunushi kungufuliela? 47Yoze wa kuli Zambi kakwivwavwa maliji a Zambi: ha chikuma chino yenu kunushi kwevwa, mumu hi nuli akwa Zambi ko.

48A-Yunda amukumbulwile ngwo, Kutwambile kanawa ngwetu, Yena uli Ka-Samaria ni ndemoniu ukwete, nyi? 49Yesu wakumbulwile ngwenyi, Ndemoniu chishi nenyi; alioze nakulemesa mwe Tata, ni yenu nwakungusaula. 50Alioze chishi kufupa uhenva wa yami mwene: kwali yoze wakufupa, wakupatula. 51Pundu, pundu, ngunambe kuli yenu ngwami, Kachi umwe mafunga liji liami, iye kechi kamona kufwa nichimwe ndo ku miaka ya mutolo. 52A-Yunda kashika ambile kuli iye ngwo, Haliapwila tunanyingika ndemoniu ukwete. Apalahama wafwile, ni aprofeta nawa; ni yena unambe ngwe, Kachi umwe matunga liji liami, kachi kechi kumona kufwa nichimwe ndo ku miaka ya mutolo. 53Yena uli munene Wahiana kulwetu Apalahama, mwenawo wafwile? Ni aprofeta afwile: unalipwisa iya? 54Yesu wakumbulwile ngwenyi, Kachi ngunalichichimieka, kachi uhenya wami wamokomoko: yoze wakunguchichimieka mwe Tata; yoze nwakwamba ngwenu, Iye Zambi yetu. 55Kunwamunyingikine: alioze yami nakumunyingika; kachi mungwamba ngwami, Chamunyingikine, kachi mungupwa mukwa mahuza ngwe yenu; alioze nakumunyingika, nakufunga liji lienyi. 56Kulwenu Apalahama walikwijile kumona tangwa liami; iye walimwene, wawahililile. 57A-Yunda kashika ambile kuli iye ngwo, Yena kanda upwa ni makumi atano a miaka, mba wamwene Apalahama, nyi? 58Yesu wambile kuli ayo ngwenyi, Pundu, pundu, ngunambe kuli yenu ngwami, Muze te Apalahama kanda apwa, yami nguli. 59Anjile kashika mawe hanga amwase; alioze Yesu waswamine, watuhukile mu tembele nikupalika ndusu mukachi ko wayile kwenyi, chocho wahianyine.

Currently Selected:

YOANO 8: Csa

Highlight

Copy