HAGAIA 2

1Ha mwaka wamuchiali wa mwanangana Dariu, ha kakweji wamuchishimbiali ni tangwa makumi aali ni kashi lia kakweji liji lia Yehova yiliza kuli profeta Hagaia ngwenyi, 2Amba haliapwila kuli Zorobabele mwana Salatiele, nguvulu wa Yunda, ni kuli mwe sasendote mukwa lutwe Yoshua mwana Jehozadake ni ku masalila eswe ja atu ngwe, 3Hakachi kenu angahi asala waze amwene zuwo lino ni uhenya walio wa shakulu? Kuchi nwalimona haliapwila? Kuliapwile kumeso jenu ngwe chuma chamokomoko? 4Alioze Yehova kanambe ngwenyi, Ena Zorobabele, hamuka! Ni yena sasendote mukwa kutwe Yoshua mwana Jehozadake, hamuka! Ni yenu atu eswe a chifuchi, hamukenu! Chocho kanambe Yehova. Yehova-wa-Tujita kanambe ngwenyi, Hondanganenu! Mumu kunguli hamwe ni yenu, 5nikulita ni chilakenyo chize nanuhele ha kukatuka ku Engitu. Spiritu yami katwama hakachi kenu; kanda nwivwa woma. 6Mumu Yehova-wa-Tujita kanambe ngwenyi, Chisuho chikwo nawa, kulutwe lia shimbu likepe, mungunyika malilu ni hashi; ni kalunga-lwiji ni mavu omu. 7Mungunyika mavungu eswe, hanga upite wa mavungu eswe ukeze, mba munguzalisa zuwo lino ni uhenya. Chocho kanambe Yehova-wa-Tujita. 8Yehova-wa-Tujita kanambe ngwenyi, Prata niyami, ni oru niyami. 9Mba uhenya wa kusula wa zuwo lino muuhiana uze wa shakulu. Chocho kanambe Yehova-wa-Tujita. Ni muno mwene mungukahana kuwaha. Chocho kanambe Yehova-wa-Tujita.

10Ha tangwa makumi aali ni liamuchiwana lia kakweji wamuchilivwa, ha mwaka wamuchiali wa Dariu, liji lia Yehova yiliza kuli profeta Hagaia ngwenyi, 11Yehovawa-Tujita kanambe ngwenyi, Hulenu asasendote ha kutwala ku shimbi yino ngwenu, 12Nyi mutu mambata yifwo yisandu mu hina lienyi, ni hina lienyi mulisunga ku mbolo, hanji kulia cha kuteleka, hanji vinyu, hanji maji, hanji kulia chimwe chikwo, muchalumuka chisandu, nyi? Asasendote yakumbulula ngwo, Ka. 13Mba Hagaia yamba ngwenyi, Nyi umwe wapwa wa luchisa ha kusunga mujimba wa mufu mba makwata ku yimwe ya yino, muyipwa ya luchisa nyi? Asasendote yakumbulula ngwo, Muyipwa ya luchisa. 14Mba Hagaia yamba ngwenyi, Chocho chinapu ni atu ano ni vungu lino kumeso jami. Chocho kanambe Yehova. Ni chocho chapwa ni yitanga yeswe ya moko jo. Yize yeswe malambulako yapwa ya luchisa. 15Haliapwila nyongenu kanawa chize ku tangwa lino ni kulutwe; shimbu te kanda achisa limwe liwe ha liwe ni likwo mu tembele ya Yehova, 16ha kuheta umwe ku mulumba wa makumi aali a njongo ja mbuto, yawana kumi wika; muze umwe maya ku chikwachilo cha vinyu akachize makumi atano a misenge, mawana makumi aali wika. 17Nanulambile ni yenu ni milimo yenu ni mbongola, ni mbundu, ni chiwe, hindu kunwahilukile kuli yami. Chocho kanambe Yehova. 18Nyongenu kanawa chize ku tangwa lino ni kulutwe; chize ku tangwa makumi aali ni liamuchiwana lia kakweji wamuchilivwa. Chize ku tangwa lize asele fundamentu ya tembele ya Yehova nyongenu. 19Mbuto hindu yinatwama mu machila? Mitondo ya uva, ni ya makuyu, ni romana, ni olevwe hindu kuyemine? Chize ku tangwa lino mungunuwahisa.

20Liji lia Yehova yiliza chisuho chamuchiali kuli Hagaia ha tangwa makumi aali ni liamuchiwana lia kakweji ngwenyi, 21Hanjika kuli Zorobabele nguvulu wa Yunda ngwe, Mungunyika malilu ni hashi, 22mungununguna ngunja ja mawanangana; mungwonwona tachi ja mawanangana ja mavungu, nikununguna matemba-a-jita ni akwa kwaendesa. Tuvwalu ni akwa kwaendesa malimbuka mweswe ku katana wa mukwo. 23Yehova-wa-Tujita kanambe ngwenyi, Ha tangwa lize mungukutambula yena Zorobabele kavumbi kami mwana Salatiele; mungukupwisa kazeya kami ka jina, mumu hinakutongola. Chocho kanambe Yehova-wa-Tujita.

Currently Selected:

HAGAIA 2: Csa

Highlight

Copy