Luk 14

Jisɔs ɔgbana orumanɛ ŋɔ ofimɛfimɛ

1Reyi Sabad dinɛ Jisɔs orua bedidi kodi na ɛtɔ ɔkɨmkɨm oni Farisi; mɨnɛ bani bara bababɛrɛ Jisɔs na jɛnɛ na jɛnɛ. 2Oni ŋɔ ɔtɨna ibɔ na ikari owu kɨmanɛ Jisɔs, 3mɨnɛ Jisɔs ɔsɨna bakpɛbɛ Ibina na Bafarisi ya, “Ibina iyua ijɛ yu nsɨm ya rɛgbana reyi Sabad din ikijɛ?” 4Nsu bakisɛ remu tum dinɛ. Jisɔs ɔjɨba oni bofiɛ na kɔbɔ, ɔgbana mɔ, ɔsɛ mɔ ibɔ oruŋɛ.

5Ɔkanɛ bɛ yɛ ya, “Ara oni ɔfɔnɔ wɔ na ara ɔfɔnɔ ɛfɔm nji ɛtɔ na rebira reyi Sabad, aruŋɛ akajam ji asɛ kegbucinɛ, tum ndi ɛra reyi Sabad-ɛ?” 6Ndi Jisɔs ɔtanɛ kɔtanɛ nku, bakikɔtanɛ gba bojuju.

Rɛkpɛbɛ Jisɔs ndi rɛbaŋa kɔtɔ-botiga

7Jisɔs ɔfɛ kɛmanci bani bajuju mbɛ bajia bɛ na kɛtɔmɔ baraŋɛ brika botu, otuba yɛ rɛkana ndi ɔjɛ bɛ: 8“Ara oni oji nu na kɛtɔmɔ rɛba, katumɛ na brika keti. Kuetumɛ ya baji mɨnɛ oni ojuju ŋɔ ocia wu na kɛtɔmɔ kanci. 9Mɨnɛ oni ŋɔ ɔfɔnɔ kɛtɔmɔ, ŋɔ ojia nu iti ifa, kuowu kanɛ wu ya, ‘Yɔgɛ oni ŋɔka otumɛ na ketu kɛyɛ.’ Gbobi kubosi wu, mɨnɛ akoru akatumɛ na keti nji kɛbɔ kekijaga ɛyɔ. 10Ara baji wu na kɛtɔmɔ, taŋɛ katumɛ na keti nci kɛbɔ kekijaga ɛyɔ, nabɔ esikafa oni ŋɔ ojia wu ara owu, kuowu ji wu ya ŋuɛ ɔcɛmɛ omia, ɔkajɛ wu brika ketu.’ Mbu kubowu na rejubi na jɛnɛ oni naŋɔnɛ ŋɔ bajia owu kɛtɔmɔ kanci. 11Bani mbɛ batamanɛ bɔkpaju kubatuɛ bɛ ketu, mɨnɛ mbɛ batuɛnɛ ketu kubabirɛ bɛ ketu.”

12Jisɔs ɔkanɛ yɛ oni ŋɔ ojia mɔ ya, “Ara aji oni bedidi ekujaga tum mbi korirɛ, kajia bacɛmɛ bayɛ tum bama bayɛ tum bani kɛtɨbi tum bakɔ-ogbuga mbɛ batumɛ bakunɛ wu ndi kubajia wu mɨnɛ, na ɛyɔ nji, bafɛlɛ wu na mbu asi. 13Ara akɔyɔgɛ kɛtɔmɔ, jia baram, baba-ibɔ na ikari, mambɨni na bajaga jɛnɛ; 14mɨnɛ kuafɔnɔ reŋunɛ, ndi bayɛŋɛ kɔfɛlɛ mbu asi ajɛ bɛ. Ɛbrɔkpabi kuɛfɛlɛ wu reyi brika bani bafiɛ na rɔbɔ.”

Rɛkana Ɔkɨmkɨm kɛtɔmɔ

(Mt 22:1-10)

15Ndi oni ŋɔnɛ ŋɔ bajia otum kafa na bɛ ofugɛ ramu ndɛ, ɔkanɛ Jisɔs ya, “Kɔrɔmetima kɔyɔmɛ kɔjɛ bani mbɛ bakotumɛ na kɛtɔmɔ na Rɔrɛ-rɛkɨm Ɛbrɔkpabi!”

16Jisɔs ɔkanɛ mɔ ya, “Kegbu cinɛ oni ŋɔnɛ ɔyɔgɛ kɛtɔmɔ kɛrɛnɛ nci ojia bani ecii. 17Ndi kegbu kɛtɔmɔ kebigɛ, otigɛ ori ɔmɔ ya ɔkanɛ bani mbɛ owuji ya, ‘ŋuɛ nu, gba nambunɛ bobigɛ!’

18Nsu babɨnɛ, ŋɔnɛ na ŋɔnɛ, kɔtam nsɨm. Kɛbɛrɔsɔ oni ɔkanɛ ori ɔmɔ ya, ‘nyam kɛkana nkɔkoru nkafɛ ci; botutu yɔgɛ ntama nsɨm.’ 19Ɔnyakanɛ oni ya, ‘Nyam ifɔm jubi nji ikosi mi rɛsɛ na kɛkana nkoru nkayumɛ bu; botutu yɔgɛ mi ntama nsɨm.’

20Oni ojuju ya, ‘Nsa kanya ɔwanɛ kunku, na mbu bokosi ya nkawu.’ 21Ori ɔmɔ ɔŋbɨnɛnɛ ɔkakanɛ mintɛ-ɛtɔ ɔmɔ rasɛ ndɛ fɛb. Mintɛ-ɛtɔ ɔmɔ ɔma etima ɔkanɛ ori ɔmɔ ya, ‘Taŋɛ fɨrifɨri na bɔyɔ na raŋabanɛ rika rɔrɛ, ŋuɛ na baram, mambɨni, bajaga jɛnɛ, na mbɛ bakpɔgɔrɔ-kpɔgɔrɔ.’ 22Ndi ori ɔmɔ ɔŋbɨnɛnɛ, ɔkanɛ mintɛ-ɛtɔ ɔmɔ ya, “Nsi mbu atigɛ mi, nsu Ita, kɛfɔŋ kɛbɛnɛ ecii.”

23“Mintɛ-ɛtɔ ɔmɔ ɔŋbɨnɛnɛ otigɛ mɔ ya, ‘Taŋɛ yɛ na bɔyɔ bɔrɛnɛ na ifa, si bani bawu rika, nabɔ esikafa ɛtɔ emia ejuga. 24Nsu nkanɛ nu, bani mbɛ mbɛrɔsɔ njia, bafumanɛ bedidi bemia.’ ”

Mbu ɛbɛŋɛ kɔnyɛgɛ Jisɔs

(Mt 10:37-38)

25Bani ecii bara bacɛŋɛ na Jisɔs, ocimɛnɛ ɔkanɛ bɛ ya, 26“Oni naŋɔnɛ ŋɔ oduga kɔnyɛgɛ mi, ɔkɔkotumɛ nya: Ɔkɔ kɔfɔn rɔraganɛ na ami rocia ndu ɔfɔnɔ na mintɛ, minka, ɔwa, na bɔ, bama barumanɛ na bama babanɛ. Ɔkɔ kɔfɔn rɔraganɛ na ami ocia ɛkpaju ɛmɔ. Ara okisi kanya ɔyɛŋɛ kotumɛ ɔnyɛgɛ-mi. 27Mɨnɛ oni naŋɔnɛ ŋɔ ɔbɔ okisɔgɛ kɛkpati-rasinkanɛ kɛmɔ ɔnyɛgɛ mi ɔyɛŋɛ kotumɛ ɔnyɛgɛ-mi. 28Ara oni ŋɔnɛ na kɔrɔ konua otimanɛ kori ɛtɔ nji ɛgbɛ ɛbari, ɔbɛŋɛ kparɔsɔ ɔgbɨra mbu ɛkɔba mɔ, nabɔ esikafa ɔfɛ ara ɔfɔnɔfɔnɔ bagbuga kori ji ɛyɛ? 29Ara abɨnɛ ji kori nsu akikɔyɛ akurɛ, oni naŋɔnɛ ŋɔ ɔfɛ ji kuɔmamɛ wu rasa, 30ya oni ŋɔ ɔbɨnɛ kori nsu okiyɛ naku.’ 31Ara ɔkɨm otubɛrɛ ɛkpaju koru reku na igɔd bata-iku ɛram irɨma itan, ɔbɛŋɛ kpa rɔsɔ ɔfɛ ara bani bamɔ mbɛ kubayɛ baju na ɔkɨm ŋɔka ŋɔ ɔfɔnɔ igɔd bata-iku iram ifa irɨma jubi. 32Ara ɔfɛ ya amɔ ɔyɛŋɛ koju na ɔkɨm ŋɔka, kuotigɛ bani bakakɨmanɛ mɔ kɔkpɔlɛ ya bakɔnanɛ ndi ɔbɛnɛ kɛgbanta ɛyɔ. 33Jisɔs ɔkanɛ bɛ ya, “Na kɛmanci ɛra, oni tum ŋɔnɛ ɔyɛŋɛ kotumɛ ɔnyɛgɛ mi ara okisɛ ibɔ na gbanambunɛ mbu ɔfɔnɔ. 34“Minuga minyibayiba, nsu ara ɔrɔm minuga oninaŋ, akosi nyan asi mu miŋbɨnɛnɛ minfɔnɔ ɔrɔm minuga? 35Mimboyibi tum na rɔcɛ tum ara abɛ mu ya asi rɔcɛ royiba birɛ. Akɔnyan mu. Oni naŋɔnɛ ŋɔ ɔfɔnɔ ratu kofugɛ, yɔgɛ mɔ ofugɛ.”

Currently Selected:

Luk 14: Olulumo-Ikom

Highlight

Copy