Mateus 28

Jesu i edne le ngad aden.

1Sabbath bomud, bing si muren Sande mabing Maria Magdalena, ma hom Maria lie, sor le ngaibad ad Jesu, beg ilndri i. 2Sor gin me mabing, boan i rerr, i nunueie. Angelo ad Jehova i gin me lundielang, i gin bieni bad manden, i da marbohangai gineao, i lugdo im bad. 3Mandrn i hinganen manden, dege ndremla, salo aden beren, hengerang ge. 4Su polisboi su da gin bogulue ngaibad, su noh, su rerr, su dege su gin mad. 5Angelo i vong le ndro so bihin, i bai: Mbue mor go noh, io dono, mor gahi Jesu, su da gin dadhe i le gei. 6I do da bui, i gin ndne, dege i gin boharni mahanu. Ama, e lele logna, su gin daui i ri. 7Mor hilou ge, boharni le ndro su lao aden, i gin ndne lie le ngad aden, i iao hanu le gor Galilea. Mu gelndri i gorla, hanguruen nongen ordo hian ge. 8Su bieni ngaibad roud, su rerr, su mugmug, beg boharni le ndro su lao aden le longu ogo. 9E lele malabo Jesu i sohal le ndro su, i vong le ndro su i bai: Horuamu, su hilou le ndro i, su godurhu, su boro ndegen. 10Boen Jesu i vong le ndro su, i bai: Mbue mu go noh, al ndro su ndere, gobharni le ndro su, su gal gor Galilea, su gelndri io la. 11Su da sal, su polisboi holel, su da gin bogulue ngaibad, su gina le gor, su boharni longu ogo masigane le ndro su ndurhian. 12Su gin loh su labenen masi, su vong le goure, su beg hengen le ndro su polisboi moni mabosanged, 13su vong le ndro su: Bosoui longu ogo le ndro su ndramed masigane dagara: Su lao ad Jesu gin me lobing, su gin behena numbuen Jesu, iou ge gin medir. 14Su vong le ndro su, be ndorlaben ha hirong, su gin medir de gin bogulue ngaibad hian bui, su de noh hebsa bui, su beg vong le ndro Pilatus. 15Su hedi moni asu, su hinen i, dege su labenen gin bai. Le longu ogo ngarnongen i hilou le gor masigane, su gin behena i, mabenan range.

16Su lao ad Jesu masongul e homo, su la gor Galilea, ndre bahali, Jesu gin vong gleri. 17Be su gin ilndri i, su los le boan, su holel ge, de dansu hanguruen bui aga Jesu. 18Jesu i la molengasu, i vong le ndro su, i boi: Io ndoa le longu masigane, ber lang e ber boan. 19Hian gal gor masigane, e hinen su ndramed le lao ordo, gsurhi su le ndran le ngarn ad Damen, le ngarn ad Ndurn, le ngarn ad Meluan Helian. 20Ghenunuen su le longu masi, io da gin bosoui le ndro mu. Hanguruen longu hendre ogo: Io da baghege ndro mu, bing si, rang si, sidegesi.

Currently Selected:

Mateus 28: LLENT

Highlight

Copy