Luk 16

Ɛbɛɛ Ɛkpasagha Nwagha nnɛ a isi

1Jisɔs atɔ asɔgba ɛyɛ, “Ɛfɔ ɛfang a nnɛ munnu wiwi ya afɔ mmɔanju yɔ isi yi ɛkiɛ nsam sa abri mbe ɛbɛ, ka ɛfang a nnɛ ayog si mmɔanju ɛwɛ ya anɛghɛ akpugha ɛyɛ. 2Ka nsɛnju abengɛ aba ka abɔmmɛ, ‘Nyog jɛ nteba? Kɛm nfan a mbe wɔɔ bi omene, atebsi ɔkpɛmmɛ fɔ nsam ka mbe ɛbaa.’

3“Mmɔanju yɔ isi akana ka nete ɛnɛ, ‘Munu nne nang? Yi nsɔjaanju akpɔ kɔ noto ɛnaa. Ka ndiga koro yi mma nne nkora noto, ka nsɔn afemfe nɔbɔɔ mbɔɔ. 4Nnyinyi ji nne sɔng, ngara yi amim na taba noto ɛnaa fa, anɛ akperem ka betek mbɔ.’

5“Ka abeng kpere nnɛ ya akpe nsɛnju ḿbɔ ka wiawi. Abɔmmɔ mgbɔgha mba nnɛ, ‘Okpe nsɔjaa nju mbɔ́ akpugha abek?’

6“Munnu yɔ akpɛ, ‘Ɛbɔfɔng akuu olib ɛgɔr bɛnɛ na atanarɔn.’

“Mmɔanju atɔɛ, ‘Kɔ nfan ɛya, jɔ nji ɛbanɛban, ɔyɛnɛ ɛgɔr baba na atan aba na wobo.’

7“Ka abɔmmɔ ɛtɔɔngɔ nnɛ, ‘Ka wɔ okpe ḿbɔ a jɛ?’ Akpɛ.

“ ‘Nsang a wit#16:7 wit Amog a mbe ya are nasi arasi,’ ɛgɔr bɔrɔn.

“Ka atɔa, ‘Kɔ nfan ɛya, yɛnɛ ɛgɔr bɛnɛ.’

8“Nsɛnju atig ɛkpasagha mmɔanju yɔ isi atebsi ame ne nwagha nwagha. Ka anɛ ba eying jifa awagwag anyi sa ajɛn na anɛ a mbɔ aga abɔ Ɔsɔwɔ. 9Nɔngɔ ntɔ war, kɔ afang eying otuu anɛ ɔkɛ nana, sɔng ka ngara ebebe, akpera ka etek nkankan.

10“Kpere nnɛ ya ama afe nkokomo ejo nnɔbɔnnɔbɔ amama afe ntakpa ejo, ka kpere nnɛ ya arima afe nkokomo ejo nnɔbɔnnɔbɔ amam afe ntakpa. 11Ka orina ma ofe afang eying nnɔbɔnnɔbɔ, yɛnnɛ akia afang ɛdɛdɛghɛ? 12Ka orina ma ofe mbe nnɛ nnɔbɔnnɔbɔ, yɛnnɛ akia mbe ɛba wɔfɔnɔ?

13“Mmɔanju wawi amam arɔghɔ nsɛnju aba ka mkpɛ yiyi. Ateb wiwi akɔra yɔga asagga, sɛ ɔga fɔ ngara ɔkɛ wiwi ɔtɛn yɔga. Ɔmam ɔrɔghɔ Ɔsɔwɔ na akpugha ka mkpe yiyi.”

14Bafarisi ya akpugha afang mbɔ, ajɔ afana akana Jisɔs kana ka mbe bi wɔɔ ba ayogho. 15Jisɔs atɔ mbɔ, “War bi ene anɛ akana si ere afɔ anɛ, ka Ɔsɔwɔ ya anyi nte ɛyɛrɛ. Jɛ fang anɛ ka nete ɛsag Ɔsɔwɔ.

16“Sɔng Jɔn aba Bajus amɔ tɔghɔ kpene ejighi Mosis na awɛr ya Abono Ɔsɔwɔ ayɛnɛ. Jam ka ngara yi aragharagha ayɛbɛ aka Oton Ɔsɔwɔ, ka kpere nnɛ ya alɔg si anam ka nsam. 17Ere ndɛndɛ si bɔsɔ na nsisi yifa afɔ nkannisi ka ejighi Ɔsɔwɔ nani amam ayanga.

18“Ka kpere nnɛ ya atɛn nka wɛ amakɔ yɔntingi orogho ɛmɛbɔb, ka munnu ya akɔ manka yi nnu atɛnɛ orogho ɛmɛbɔb.”

Ɛfang a nnɛ munnu na Lasarus

19Ka Jisɔs atuu mbɔ ɛbɛɛ ji, “Ɛfɔ ɛfang a nnɛ munnu ya ajɔ alebe akorasɛ abɔ́ anɛghɛ nekpen kpere ofo. 20Ka ɛfɔ mbɔɔ a mbɔɔ ya abengɛ si Lasarus ajɔ aba nana ama anɔngɔ ka mbuegrigba ɛbɛ, afɔ bɛnɛn ka biji ɛbɛ wɔɔwɔɔwɔɔ 21ka ajɔ asɛb si anɛ ji eru ka okpokoro ɛfang a nnɛ ɛgbɔ. Kpɛnɛga ɔwɔ ɛbagha ɛmɛlɛbɛ bɛnɛn ɛbɛ.

22“Ngara asi yi mbɔɔ a mbɔɔ akpɔ ka baɛnjɛl asɔnɛ amabo ka mfo a Abraam. Ɛfang a nnɛ ɛtam ɛkpɔ asammɛ. 23Ɛfanga nnɛ ka udummu ngon, ajɔ ka ntakpa niyiri abri ka bɔsɔ ayɛ Abraam ka ndaba mba, na Lasarus ka mgbanga. 24Ka abengɛ, ‘Nsɔjaa Abraam, fɔ ɛkpɔgisi kɛm oto Lasarus asɔng isi nyighibɔ ɛyɛ ka alab ama nara ninibi ɛnaa, ateb nde ka niyiri ngon bifa.’

25“Ka Abraam akpɛ, ‘Mmɔ, gbɔnter ngara yi ɔjɔ ka nekpen ɔfɔ kpere ji ɔsɛbɛ, ka Lasarus ajɔ ka ebebe, ka munu are ka ɛyɛbɛ nete ka wɔ ore ka niyiri. 26Ka erikan fa, ntakpa nsɛbɛ nebe are ga yi nnɛ wawi arighima ayanga aba akɔrɔ war ga. Ka wɔfɔnɔ ɔmam ɔyanga ɔkɔrɔ warr.’

27“Ɛfang a nnɛ akpɛ, ‘Mma gɔrɔ, nsɔjaa, to Lasarus ama tɔ abɔannajaa, 28ka mkpe abɔannyɛ arɔn. Tɔɛ si abo mbɔ nɛnɛ ayanga nekpen, sɔng aki tam aba ka mfo a niyiri bifa.’

29“Abraam akpɛ, ‘Akpe ji Mosis na Abono Ɔsɔwɔ ayɛnɛ; ayongo atɔng akɛ mbɔ.’

30“ ‘Eˈe, nsɔjaa Abraam,’ arag, ‘ka nnɛ ya amɔkpɔkpɔ amo na ma tɔ mbɔ, ayanga yanga.’

31“Ka Abraam atɔɛ, ‘Arina yongo atɔng akɛ Mosis na Abono Ɔsɔwɔ, nnɛ wawi arem ya ama ane mbɔ ayanga arina yongo atɔng araggasi nnɛ ya akpɔkpɔ anyimi ama jɔ ka nekpen atɔ mbɔ ayangam.’ ”

Currently Selected:

Luk 16: NDD Nta

Highlight

Copy